ನೀರ್ ತೆಲ್ಲಾವುಡೇ ಬದುಕ್ ಕಟ್ಟೊಂದಿನ ಭವಾನಿ ಅಕ್ಕ.

ಉಡುಪಿ ಬಡಾನಿಡಿಯೂರು ಪೌಂಜಿಗುಡ್ಡೆ ನಿವಾಸಿ ಭವಾನಿ ಅಕ್ಕ. ಬದುಕುದ  ಹೋರಾಟ ಆರಂಭ ಮಲ್ತಿನ  ಭವಾನಿ ಅಕ್ಕ ಇನಿ ತನ್ನ ಪರಿಶ್ರಮಡಾದ್ ಅವ್ವೇತೊ ಜನಕ್ಲೆಗ್  ಮಾದರಿಯಾತೆರ್.ಜೀವನಡ್  ಮಲ್ಲ  ಬಂಡವಾಳ ಇಜ್ಜಿಡಲಾ, ಕೈಟ್  ಇತ್ತಿನ  ಒಂಜಿ  ಕಲೆ—ರುಚಿಯಾಯಿನ  ನೀರ್ ದೋಸೆ  ಮಲ್ಪುನ ಕಲೆ—ಅರೆನ  ಬದುಕುನೇ  ಬದಲ್ ಮಲ್ತುಂಡ್.. ಮೂಲತಃ ಬೆನ್ನಿದ ಕುಟುಂಬಡ್ ಪೆತ್ತ ತಾಂಕೊಂದಿತ್ತಿನ
ಭವಾನಿ  ಮೆರೆಗ್  ತನ್ನ ಕುಟುಂಬದ ನಿರ್ವಹಣೆಗಾದ್ ದಾದಾಂಡಲಾ   ಕಿನ್ನ ಉದ್ಯಮ ಮಲ್ಪೊಡ್ ಪಂಡುದು ಆಲೋಚನೆ ಬತ್ತಿನಪಗ ಅರೆಗ್ ತೆರಿದಿತ್ತಿನ ಕಲೆ ಒಂಜೇ ಅವ್ವೇ ನೀರುದೋಸೆ ಮಲ್ಪುನವ್..

ಕರಿನ 25  ವರ್ಷದ ಪಿರ ಕೂಡುಕುಟಂಬದ  ಒಟ್ಟುಡಿತ್ತಿನ ಭವಾನಿ ಅಕ್ಕ ಮೇರ್ ಸುರುಕ್ ಕಡೆಪಿನ ಕಲ್ಲುಡೇ  ಅರಿ ಕಡೆದ್  ದೋಸೆ ಮಲ್ತುದ್ ಹೋಟೇಲ್ ಗ್ ಕೊರೊಂದಿತ್ತೆರ್ ..ಕ್ರಮೇಣ ಮೆರೆನ ದೋಸೆ ಹೋಟೇಲ್ ದ ಗ್ರಾಹಕೆರೆಗ್ ರುಚಿ ಪಸುದ್ ಹೋಟೇಲ್ ದ ಕುಲು   ಮಲ್ಲ ಮಲ್ಲ ಆರ್ಡರ್ ಕೊರಿಯರೆಗ್ ಸುರು ಮಲ್ತೆರ್.  ಸುರುಕ್ 25 ದೋಸೆಡ್ ಸುರು ಮಲ್ತಿನ ಮೆರೆನ ನೀರ್ ತೆಲ್ಲಾವ್ ದ ಉದ್ಯಮ ಇನಿಕ್ ಅರೆನ ಬದುಕುನೇ ಬದಲ್ ಮಲ್ದುಂಡ್.ಸರಳ ಉಪಹಾರ ಜನಕ್ಲೆಗ್   ಇಷ್ಟ ಆದ್. ದಿನಡ್ದ್  ದಿನ ಗ್ರಾಹಕೆರು ಹೆಚ್ಚಾಯೆರ್. ಗ್ರಾಹಕೆರ್ ಹೆಚ್ಚಾಯಿಲೆಕ್ಕ  ಮೆರೆನ ಆದಾಯಲಾ ಜಾಸ್ತಿ ಆವೊಂದ್ ಪೋಂಡ್. ದಿನೊಕ್ ಕೇವಲ 25 ದೋಸೆ ಮಲ್ತೊಂದಿತ್ತಿನ ಆರ್ ಇತ್ತೆ ದಿನೊಕ್ 2000 ದೋಸೆದ ಆರ್ಡರ್ ಬತ್ತುಂಡಲಾ ಮಲ್ತ್ ಕೊರ್ಪೆರ್.
25 ವರ್ಷ ಪಿರಾವುಡ್ ಒಂಜಿ ದೋಸೆಗ್ 50 ಪೈಸೆ ಇತ್ತುಂಡ್. ಇತ್ತೆ ಒಂಜಿ ದೋಸೆಗ್ 5 ರೂ ತಿಕ್ಕುಂಡ್ ಪನ್ಪೆರ್. ರಾತ್ರೆದ 12 ಗಂಟೆದ ಪೊರ್ತುಡ್ ಮಾತೆರ್ ಜೇದಿಪ್ಪುವೆರ್ ಆಂಡ ಭವಾನಿ ಅಕ್ಕನ ಇಲ್ಲಡ್ ಮಾತ್ರ ನೀರ್ ತೆಲ್ಲಾವ್ ಕಾಯೊಂದುಪ್ಪುಂಡ್.
“ಕೆಲಸ  ಕಿನ್ನ ಆವಡ್ ಮಲ್ಲ ಆವಡ್ , ಮನಸ್ಸು ಇತ್ತುಂಡ ಅವ್ವೇ  ಬದುಕುನ್  ಕಟ್ಟುಂಡ್ ಪನ್ಪೆರ್ ಭವಾನಿ ಅಕ್ಕ.
ಭವಾನಿ ಅಕ್ಕ ದೋಸೆ ಮಲ್ಪುನ  ಉದ್ಯಮಡೇ  ತನ್ನ ಮಗಕ್ ಕಲ್ಪಾಯೆರ್ ಅರೆನ  ಮಗೆ ಡಿಪ್ಲೊಮಾ ಮಲ್ತುದ್ ಮಣಿಪಾಲ ಕಂಪೆನಿ ಡ್ ಬೇಲೆ ಮಲ್ತೊಂದುಲ್ಲೆ.ತನ್ನ ಬೇಲೆದೊಟ್ಟುಗ್ ಅಪ್ಪೆನ ದೋಸೆದ ಬೇಲೆಗುಲಾ ಕೈ ಜೋಡಿಸಾವೆ… ಆತೇ  ಅತ್ತಾವಂದೆ ಭವಾನಿ ಅಕ್ಕ ದೋಸೆ ಮಾರುದೇ  ಅಯಿತ್ತ ಸಂಪಾದನೆಡೇ ಜಾಗ ದೆತೊಂದ್ ಅಲ್ಪ ಪೊರ್ಲುದ ಇಲ್ಲ್ ಕಟ್ಟುದ್ ತನ್ನ ಕಂಡನಿ ಕಮಲಾಕ್ಷ ಮೆರೆನೊಟ್ಟುಗ್ ಬೊಕ್ಕ ಮಗೆ  ಮನಿಷ್ ನೊಟ್ಟುಗ್ ಖುಷಿಟುಲ್ಲೆರ್ . . ಭವಾನಿ ಅಕ್ಕನ ಪರಿಶ್ರಮಡಾದ್  ಕೆಲವ್ ಪೊಂಜೊವುನಕುಲ್  ಪ್ರೇರಿತೆರಾದ್  ಕಿನ್ನ  ಉದ್ಯಮಲೆನ್  ಸುರು ಮಲ್ದೆರ್. ಭವಾನಿ ಮೆರೆನ ಕಂಡನಿಲಾ ಅರೆನೊಟ್ಟುಡ್ ಅರೆನ ಬೇಲೆಗ್ ಸಹಕಾರ ಕೊರ್ಪೆರ್.ಇತ್ತೆ ಬಡಾನಿಡಿಯೂರುದ ಪೌಂಜಿಗುಡ್ಡೆಡ್ ಕರಿನ ಐನ್ ವರ್ಷಡಿಂಚಿ ನೀರ್ ತೆಲ್ಲಾವ್ ದ ಉದ್ಯಮನ್ ಇಲ್ಲಡೇ ಮಲ್ತೊಂದುಪ್ಪುನ  50 ವರ್ಷ ಪ್ರಾಯದ ಭವಾನಿ ಮೇರ್ ಮಾತೆರೆಗುಲಾ ಆದರ್ಶ ಆತೆರ್.

ಭವಾನಿ ಮೆರೆನ  ಬದುಕುದ ಕಥೆ ನಮಕ್ ದಾದಾ ಪನ್ಪುಂಡ್ —
ಸರಳವಾಯಿನ  ಕೆಲಸನ್  ಪ್ರಾಮಾಣಿಕವಾದ್  ಮಲ್ತುಂಡ ಅವ್ವ್  ಜೀವನೊನ್  ಬದಲ್ ಮಲ್ಪುಂಡ್. ಮೆರೆನ ಈ ಬದುಕುದ ಸಾರ್ಥಕತೆದ ಸಾಧನೆ ಮಾತೆರೆಗುಲಾ ಒಂಜಿ ಆದರ್ಶ ಆತುಂಡ್. ತುಳುನಾಡ ಧ್ವನಿ ಪತ್ರಿಕೆ ಮೆರೆನ ಸಾಧನೆಗ್ ಅಭಿನಂದನೆ ಪನೊಂದ್ ಮೆರೆನ ಈ ಉದ್ಯಮ ನನಲಾತ್ ಮಿತ್ತ ಮಟ್ಟುಗ್  ಪೋವಡ್ ಪಂಡುದ್ ಹಾರೈಕೆ ಮಲ್ಪುಂಡ್.