ತುಳುನಾಡ್ದ ಶುದ್ಧ ಕಲಿ ಬೋಡಾಂಡ ಬಲೆ ಹೆಮ್ಮಾಡಿದ ರಾಮಣ್ಣ ಡಾಬಾಗ್..

ತುಳುನಾಡುಡ್ ಪುಗಾರ್ತೆನ್ ಪಡೆಯಿನ ಕಲಿ(ಕಳ್ಳು) ಪರೊಡಾಂಡ ಒರ ಭೇಟಿ ಕೊರೊಡ್ ಹೆಮ್ಮಾಡಿದ ರಾಮಣ್ಣ ಢಾಬಾಗ್..ಪಂಡಿಲೆಕ್ಕ ಮುಲ್ಪದ ದಾದ ವಿಶೇಷ ಬಲೆ ತೆರಿಗಾ…

ಕೊಲ್ಲೂರುಗ್ ಪೋಪಿನ ಹೆಮ್ಮಾಡಿದ ರಸ್ತೆಡ್ ತಿಕ್ಕುನ ರಾಮಣ್ಣ ಡಾಬಾಡ್ ತಿಕ್ಕುನ ಕಲಿ (ನೀರಾ) ಮುಲ್ಪದ ವಿಶೇಷ.ಆರೋಗ್ಯದಾಯಕವಾಯಿನ ಕಲಿ ಪರೊಡಾಂಡ ಸಾರಗಟ್ಟಲೆ ಜನ ಬರ್ಪೆರ್ ಇಡೆಗ್…ಎಂಚ ಕೇನುವರಾ ಮುಲ್ಪ ತಿಕ್ಕುನಂಚಿನ ಕಲಿ ರಾಮಣ್ಣ ಡಾಬಾದ ಮಾಲೀಕೆರಾಯಿನ ರಾಮಕ್ರಷ್ಣ ಶೆಟ್ಟಿ ಮೆರೆನ ತೋಟೊಡ್ ದೆಪ್ಪುನ ಶುದ್ಧ ಕಲಿ.ಒವ್ವೇ ರೀತಿದ ಕಲಬೆರಕೆ ಮಲ್ಪಂದೆ ಶುದ್ಧವಾಯಿನ ಕಲಿನ್ ಮುಲ್ಪ ಉಂಡು..ಅವ್ವೇತೊ ಜನ ರಾಮಣ್ಣ ಡಾಬಾಗ್ ಬತ್ತಿನಕುಲು ಮುಲ್ಪದ ಕಲಿ ಪರ್ದ್ ,ಪೋವನಗ ಇಲ್ಲದಕ್ಲೆಗುಲಾ ಕೊನೊಪೆರ್..

ಪಂಡಿಲೆಕ್ಕ ಮುಲ್ಪ ಕಲಿತೊಟ್ಟುಗ್ ಬೇತೆ ದಾದ ಮಾತಾ ತಿಕ್ಕುಂಡ್ ಪಂಡುದ್ ತೆರಿಯೊಡಾ..ಮುಲ್ಪ ಕಲಿತೊಟ್ಟುಗ್ ಶುದ್ಧವಾಯಿನ ಮೀನುದ ವನಸ್ ಲಾ ಉಂಡು..ಈ ಡಾಬಾಡ್ ಶುದ್ಧವಾಯಿನ ತುಪ್ಪ ಬೊಕ್ಕ ತಾರಾಯಿದೆಣ್ಣೆನೇ ಅಟ್ಟಿಲುಗ್ ಬಳಕೆ ಮಲ್ಪುವೆರ್.ಮೀನುದ ಒಟ್ಟುಗ್ ಊರುದ ಕೋರಿ ಸುಕ್ಕ,ಮಟನ್ ಸುಕ್ಕ, ಬಿರಿಯಾನಿ ಇಂಚ ಬಗೆ ಬಗೆತ ಖಾದ್ಯಲಾ ಉಂಡು..ಅಂಚಾಂಡ ನಿಕುಲು ಒರ ಮುಲ್ಪ ಭೇಟಿ ಕೊರೊಡೇ…

ಸಾಮಾಜಿಕ ಕಳಕಳಿ ದೀಯೊಂದಿನ ರಾಮಕ್ರಷ್ಣ ಶೆಟ್ಟಿ ಮೇರ್ ಜನಕ್ಲೆನ ಆರೋಗ್ಯಗ್ ಹಾನಿಕರ ಆವರೆಗ್ ಬಲ್ಲಿ ಪಂಡುದ್ ತನ್ನ ಇಲ್ಲದ ತೋಟೊಡೇ ತಯರಾಯಿನ ಶುದ್ಧ ಕಲಿಕ್ ಒವ್ವೇ ರೀತಿದ ಕಲಬೆರಕೆ ಮಲ್ಪಂದೆ ಕೊರೊಂದುಲ್ಲೆರ್..ಅಂಚಾಂಡ ಈ ಕಲಿ ಪರುಂಡ ಆರೋಗ್ಯಗ್ ದಾದ ಉಪಯೋಗ ಪಂಡುದ್ ತೆರಿಯೊನುಗಾ..

ಕಲಿಟ್ ವಿಟಮಿನ್ ಸಿ,ಬಿ1, ಬಿ2, ಬಿ3 ,& ಬಿ6 ,ಸಕ್ಕರೆ ,ಪ್ರೋಟೀನ್ ಕಾರ್ಬೊಹೈಡ್ರೇಟ್ ಅಂಶ ಉಂಡು.ಆಯುರ್ವೇದಡ್ ಕಲಿನ್ ಔಷಧಿಯಾದ್ ಬಳಕೆ ಮಲ್ಪುವೆರ್.ಟಿಬಿ ಕಾಯಿಲೆ,ಪಡಿಕೆಡ್ ಉರಿ ಬರ್ಪಿನ ಸಮಸ್ಯೆ (ಉರಿಮೂತ್ರ),ಬೊಕ್ಕ ತೂಕ ಜಾಸ್ತಿ ಆವೊಡಾಂಡ ಕಲಿ ಎಡ್ಡೆ ಸಹಕಾರಿಯಾಪುಂಡ್.

ತುಳುನಾಡುಡ್ ತಾರೆ,ಈಂದ್ ಬೊಕ್ಕ ತಾರಿದ ಮರಟ್ ಆಪಿನ ಒಂಜಿ ಪಾನೀಯನೇ ಕಲಿ..ಕನ್ನಡೊಡ್ ಕಲಿಕ್ ನೀರಾ ಅಂಚೆನೇ ಇಂಗ್ಲೀಷ್ ಡ್ TODY ಪನ್ಪೆರ್.ತುಳುನಾಡುಡ್ ಮೂರ್ತೆದಕುಲು ಹೆಚ್ಚಾದ್ ಕಲಿ ಮೂರುವೆರ್..

ಭೂತಾರಾಧನೆಡುಲಾ ಕಲಿತ ಉಲ್ಲೇಖ ಉಪ್ಪುನ ನಮ ತೂಪ.ವಿಶೇಷವಾದ್ ಕೊರಗಜ್ಜ ದೈವಗ್ ಅಗೆಲ್ ಬಲಸುನಗ ಕಲಿ ದೀಪೆರ್.ತುಳುನಾಡ್ದ ಅಮರ್ ಬೊಳ್ಳಿಲು ಪಂಡುದೇ ಪುಗಾರ್ತೆನ್ ಪಡೆಯಿನ ಕೋಟಿ-ಚೆನ್ನಯೆರೆನ ಕತೆಟುಲಾ ಕಲಿತ್ತ ವಿಚಾರ ಉಲ್ಲೇಖ ಉಂಡು.ತುಳುನಾಡುಡ್ ಸೈತಿನಕ್ಲೆಗುಲಾ ಬಲಸುನಗ ಕಲಿ ದೀಪಿನ ಕ್ರಮ ಉಂಡು.

ಒಟ್ಟಾರೆಯಾದ್ ನಮ್ಮ ಜೀವಗ್ ಆರೋಗ್ಯಕರವಾಯಿನ ಕಲಿ ನಮ್ಮ ಆರೋಗ್ಯ ನ್ ರಕ್ಷಣೆ ಮಲ್ಪುಂಡ್..