ರಾಷ್ಟ್ರಮಟ್ಟದ ಕರಾಟೆ

ನ.16-17 : ಉಡುಪಿ ಶ್ರೀ ಕೃಷ್ಣ ಮಠದ ಮದ್ವಾಂಗಣಡ್ ಬುಡೋಕಾನ್ ಕರಾಟೆ ಎಂಡ್ ಸ್ಪೋರ್ಟ್ಸ್ ಅಸೋಸಿಯೇಷನ್ ನೇತೃತ್ವಡ್ 4ನೇ ರಾಷ್ಟ್ರಮಟ್ಟದ ಕರಾಟೆ ಪಂತೊಕೂಟ

ಪರ್ಯಾಯ ಶ್ರೀ ಪುತ್ತಿಗೆ ಮಠ, ಶ್ರೀ ಕೃಷ್ಣ ಮಠ ಉಡುಪಿ ನೆತ್ತ ಆಶ್ರಯಡ್  ಬುಡೋಕಾನ್ ಕರಾಟೆ ಎಂಡ್ ಸ್ಪೋರ್ಟ್ಸ್ ಅಸೋಸಿಯೇಶನ್ ಕರ್ನಾಟಕ (ಬುಡೋಕಾನ್ ಕರಾಟೆ ಇಂಟರ್ ನ್ಯಾಶನಲ್ ಆಸ್ಟ್ರೇಲಿಯ) ದ ನೇತೃತ್ವಡ್  4ನೇ ರಾಷ್ಟ್ರಮಟ್ಟದ ಕರಾಟೆ ಸ್ಪರ್ಧಾ ಕೂಟ ನ.16 ಬೊಕ್ಕ  17ಗ್ ಉಡುಪಿ ಶ್ರೀ ಕೃಷ್ಣ ಮಠದ ಮದ್ವಾಂಗಣಡ್  ನಡಪರೆಗುಂಡ್ ಪಂಡುದು ಸ್ಪರ್ಧಾಕೂಟದ ಸಂಘಟನಾ ಸಮಿತಿದ  ಸಲಹೆಗಾರ ಶಿವಕುಮಾರ್ ಅಂಬಲಪಾಡಿ ಪತ್ರಿಕಾ ಗೋಷ್ಠಿಡ್  ತೆರಿಪಾದೆರು.

ನ.16 ಶನಿವಾರ ಕಾಂಡೆ  10.00ಗಂಟೆಗ್  ಉಡುಪಿ ಶ್ರೀ ಕೃಷ್ಣ ಮಠದ ಮದ್ವಾಂಗಣಡ್  ನಡಪರೆಗುಪ್ಪುನ ಉದಿಪನಾ ಸಮಾರಂಭಡ್  ಪರ್ಯಾಯ ಶ್ರೀ ಶ್ರೀ ಸುಗುಣೇಂದ್ರ ತೀರ್ಥ ಶ್ರೀಪಾದೆರು ಬೊಕ್ಕ ಶ್ರೀ ಶ್ರೀ ಸುಶ್ರೀoದ್ರ ತೀರ್ಥ ಶ್ರೀಪಾದೆರು ಆಶೀರ್ವಚನ ಮಲ್ಪರೆಗಿತ್ತುದ್, ಅಂಬಲಪಾಡಿ ಶ್ರೀ ಜನಾರ್ಧನ ಬೊಕ್ಕ ಮಹಾಕಾಳಿ ದೇವಸ್ಥಾನದ ಧರ್ಮದರ್ಶಿ ಡಾ! ನಿ.ಬೀ. ವಿಜಯ ಬಲ್ಲಾಳ್ ಅಧ್ಯಕ್ಷತೆಡ್  ಉಡುಪಿ ಶಾಸಕ ಯಶ್ಪಾಲ್ ಎ. ಸುವರ್ಣ ಸ್ಪರ್ಧಾ ಕೂಟನ್ ಉದಿಪನ ಮಲ್ಪರೆಗುಲ್ಲೆರ್..

ಕಾಪು ಶಾಸಕ ಗುರ್ಮೆ ಸುರೇಶ್ ಶೆಟ್ಟಿ ಪ್ರಶಸ್ತಿ ಫಲಕನ್ ಅನಾವರಣ ಮಲ್ಪುವೆರ್. ಉಡುಪಿ ನಗರಸಭೆ ಅಧ್ಯಕ್ಷ ಪ್ರಭಾಕರ ಪೂಜಾರಿ ಸೇರ್ದ್ ಗಣ್ಯೆರು ಪಡೆಯರೆಗುಲ್ಲೆರ್.

ಈ ಸಂದರ್ಭಡ್  ಬೇತೆ ಬೇತೆ  ಕ್ಷೇತ್ರಲೆಡ್ ಸಾಧನೆ ಮಲ್ತಿನ ಸಾಧಕರೆನ್  ಪರ್ಯಾಯ ಶ್ರೀಪಾದೆರು ಸನ್ಮಾನ ಮಲ್ಪರೆಗುಲ್ಲೆರ್.

ನ.17 ರವಿವಾರ ಬಯ್ಯ  5.00ಗಂಟೆಗ್ ಮಾಜಿ ಸಚಿವ ಪ್ರಮೋದ್ ಮಧ್ವರಾಜ್ ಅಧ್ಯಕ್ಷತೆಡ್  ನಡಪರೆಗುಪ್ಪುನ ಸಮಾರೋಪ ಸಮಾರಂಭಡ್  ಏಕಜಾತಿ ಧರ್ಮ ಪೀಠ, ದ್ವಾರಕಾಮಾಯಿ ಮಠ ಶಂಕರಪುರ ಪೀಠಾಧೀಶ್ವರ ಶ್ರೀ ಸಾಯಿ ಈಶ್ವರ್ ಗುರೂಜಿ ಮೇರು ಆಶೀರ್ವಚನ ಮಲ್ಪುವೆರ್..

ಅಖಿಲ ಕರ್ನಾಟಕ ಸ್ಪೋರ್ಟ್ಸ್ ಕರಾಟೆ ಅಸೋಸಿಯೇಷನ್(ರಿ.) ಬೊಕ್ಕ  ದಕ್ಷಿಣ ಭಾರತ ಕರಾಟೆ ಫೆಡರೇಶನ್ ಮುಖ್ಯ ಕಾರ್ಯದರ್ಶಿ ಸೆನ್ಸಾಯ್ ಭಾರ್ಗವ ರೆಡ್ಡಿ ಸಹಿತ ಗಣ್ಯೆರು ಪಾಲ್ ಪಡೆಯರೆಗುಲ್ಲೆರ್ ಪಂಡುದು ಆರು ತೆರಿಪಾಯೆರು.

ಬುಡೋಕಾನ್ ಕರಾಟೆ ಎಂಡ್ ಸೋರ್ಟ್ಸ್ ಅಸೋಸಿಯೇಷನ್ ಅಧ್ಯಕ್ಷ ಬೊಕ್ಕ ಸ್ಪರ್ಧಾ ಕೂಟದ ಸಂಘಟಕ ವಾಮನ್ ಪಾಲನ್ ಪಾತೆರ್ದ್ , 4ನೇ ರಾಷ್ಟ್ರ ಮಟ್ಟದ ಕರಾಟೆ ಸ್ಪರ್ಧಾ ಕೂಟಡ್  ಕರ್ನಾಟಕ, ಮಹಾರಾಷ್ಟ್ರ, ಕೇರಳ, ತಮಿಳುನಾಡು, ಮೇಘಾಲಯ ಸೇರಿನಂಚ  ಬೇತೆ ಬೇತೆ ರಾಜ್ಯಲೆಡ್ದ್  ಸುಮಾರು 2000ಕ್ಕೂ ಮೀರ್ದ್  ಸ್ಪರ್ದಾಳುಲು ಪಾಲ್ ಪಡೆಯರೆಗುಲ್ಲೆರ್. ‘ಗ್ರಾಂಡ್ ಚಾಂಪಿಯನ್ಶಿಪ್’ಗಾದ್ ನಡಪುನ  ಸ್ಪರ್ಧೆಡ್  14 ವರ್ಷ ತಿರ್ತುದ  ವಿಭಾಗ, 14ಡ್ದ್  18 ವರ್ಷದ ವಿಭಾಗ  ಬೊಕ್ಕ 18 ವರ್ಷ ಮಿತ್ತುದ  ವಿಭಾಗಡ್  ಪುರುಷೆರು ಬೊಕ್ಕ  ಮಹಿಳೆಯೆರೆಗ್  ಪ್ರತ್ಯೇಕವಾದ್  ಕಟಾ ಬೊಕ್ಕ  ಕುಮಿಟೆ ವಿಭಾಗಡ್ ಸ್ಪರ್ಧೆಲು  ನಡಪರೆಗುಂಡ್  ಪಂಡುದು ತೆರಿಪಾಯೆರು.

ಈ ಸಂದರ್ಭಡ್  ಉಡುಪಿ ಜಿಲ್ಲಾ ಕರಾಟೆ ಶಿಕ್ಷಕರ ಸಂಘದ ಅಧ್ಯಕ್ಷ ರೋಹಿತಾಕ್ಷ ಉದ್ಯಾವರ ಬೊಕ್ಕ ಬುಡೋಕಾನ್ ಕರಾಟೆ ಎಂಡ್ ಸ್ಪೋರ್ಟ್ಸ್ ಅಸೋಸಿಯೇಷನ್ ಕಾರ್ಯದರ್ಶಿ ಶ್ರೇಯಸ್ ಉಪ್ಪೂರು ಉಪಸ್ಥಿತರಿತ್ತೆರು.