ಬ್ರಹ್ಮಾವರ ರುಡ್ ಸೆಟ್ ಡ್ ಜಾಥಾ

ಬ್ರಹ್ಮಾವರ ರುಡ್ಸೆಟ್ ಡ್  ಮಾದಕ ದ್ರವ್ಯ ವಿರೋಧಿ ಜಾಗೃತಿ ಕಾರ್ಯಕ್ರಮ , ಜಾಥಾ

ಬ್ರಹ್ಮಾವರ: ಗ್ರಾಮಾಭಿವೃದ್ಧಿ ಬೊಕ್ಕ ಸ್ವ ಉದ್ಯೋಗ ತರಬೇತಿ (ರುಡ್ಸೆಟ್) ಸಂಸ್ಥೆ, ಬ್ರಹ್ಮಾವರಡ್ ಮಾದಕ ದ್ರವ್ಯ ವಿರೋಧಿ ಜಾಗೃತಿ ಕಾರ್ಯಕ್ರಮ ಬೊಕ್ಕ ಜಾಗೃತಿ ಜಾಥಾ ನಡತುಂಡ್.

ಕಾರ್ಯಕ್ರಮಡ್  ಮಲ್ಲ ಬಿನ್ನೆರಾದ್ ಪಾಲ್ ಪಡೆದ್ ಬ್ರಹ್ಮಾವರ ಪೊಲೀಸ್ ಠಾಣೆಯ ಪೊಲೀಸ್ ಸಬ್ ಇನ್ಸ್ಪೆಕ್ಟರ್ ಶ್ರೀಮತಿ ಮುಕ್ತಾ ಬಾಯಿ ಪಾತೆರ್ದ್ , ಮಾದಕ ವಸ್ತುಲೆನ ಸೇವನೆಡಾದ್ ಆಪಿನ ದುಷ್ಪರಿಣಾಮದ ಬಗ್ಗೆ  ಜನಕ್ಲೆಗ್ ಅರಿವು ಪುಟ್ಟಾದ್ , ಮಾದಕ ವಸ್ತು ಮುಕ್ತ ಸಮಾಜ ನಿರ್ಮಾಣ ಮಲ್ಪುನ  ಅಗತ್ಯವಾದುಂಡ್  ಪಂಡುದು ಪಂಡೆರು. ಪ್ರತಿಯೊರಿಲ್  ಸ್ವತಃ ಜಾಗೃತರಾಪಿನ  ಒಟ್ಟುಗ್   ಸುತ್ತಮುತ್ತ ಉಪ್ಪುನಕ್ಲೆಗುಲಾ  ಜಾಗೃತಿ ಪುಟ್ಟಾವುನ ಜವಾಬ್ದಾರಿನ್  ದೆತೊಂದ್, ಎಡ್ಡೆ  ನಾಗರಿಕ ಸಮಾಜ ನಿರ್ಮಾಣಗ್  ಕೈಜೋಡಿಸಾವೊಡ್  ಪಂಡುದು ಲೆಪ್ಪು ಕೊರಿಯೆರು.

ಕುಡೊರಿ ಮಲ್ಲ ಬಿನ್ನೆರಾದಿತ್ತಿನ ಲೀಡ್ ಡಿಸ್ಟ್ರಿಕ್ಟ್ ಮ್ಯಾನೇಜರ್ ಶ್ರೀ ಹರೀಶ್ ಜಿ ಪಾತೆರ್ದ್ , ದೇಶದ ಅಭಿವೃದ್ಧಿಗ್ ಮಾದಕ ವಸ್ತುಲೆನ  ಬಳಕೆನ್  ಸಂಪೂರ್ಣವಾದ್ ತಡೆಗಟ್ಟುನ ಅತ್ಯಗತ್ಯವಾದುಂಡ್. ಕಾನೂನು ಜಾರಿಡಿತ್ತುಂಡಲಾ ಸಮಾಜ ವಿರೋಧಿ ಶಕ್ತಿಲು  ಯುವಜನಕ್ಲೆನ್  ತಪ್ಪು ಸಾದಿಗ್ ಕನಪಿನವ್  ಆತಂಕಕಾರಿ. ಕಾನೂನುಬಾಹಿರ ಚಟುವಟಿಕೆಲು ತೋಜಿದ್ ಬತ್ತಿನಲ್ಪ ಸಂಬಂಧಪಟ್ಟಿಞ  ಇಲಾಖೆಗ್ ಕೂಡಲೇ ಮಾಹಿತಿ ಕೊರ್ದು, ಜಾಗೃತಿ ಮೂಡಿಸಾವುನ ಕಾರ್ಯಡ್ ಮಾತೆರ್ಲ ಭಾಗಿಯಾವೊಡ್  ಪಂಡುದು ಪಂಡೆರು.

ಕಾರ್ಯಕ್ರಮದ ಅಧ್ಯಕ್ಷತೆಡಿತ್ತಿನ  ರುಡ್ಸೆಟ್ ಸಂಸ್ಥೆದ ನಿರ್ದೇಶಕ ಡಾ. ಬೊಮ್ಮಯ್ಯ ಎಂ. ಪಾತೆರ್ದ್ , ಮಾದಕ ವಸ್ತುಲೆನ ದುಷ್ಪರಿಣಾಮದ ಬಗ್ಗೆ ಯುವಜನತೆಗ್ ಅರಿವು ಮೂಡಿಸಾವುನವ್  ಕಾರ್ಯಕ್ರಮದ ಪ್ರಮುಖ ಉದ್ದೇಶವಾದುಂಡ್.ಎಡ್ಡೆ  ಚಿಂತನೆ ಬೊಕ್ಕ ಎಡ್ಡೆ ಜೀವನಶೈಲಿದ  ಮೂಲಕ ವ್ಯಕ್ತಿ ಬೊಕ್ಕ ದೇಶದ ಅಭಿವೃದ್ಧಿಗ್ ಪ್ರತಿಯೊರಿಲಾ  ಕೊಡುಗೆ ಕೊರೊಡು ಪಂಡುದು ಶಿಬಿರಾರ್ಥಿಲೆಗ್ ಲೆಪ್ಪು ಕೊರಿಯೆರು.

ಈ ಸಂದರ್ಭಡ್ ಬ್ರಹ್ಮಾವರ ಪೊಲೀಸ್ ಠಾಣೆದ ಪ್ರೊಬೇಷನರಿ ಪೊಲೀಸ್ ಸಬ್ ಇನ್ಸ್ಪೆಕ್ಟರ್ ಕುಮಾರಿ ಆಶ್ರಿತ ಶೆಟ್ಟಿ ಮೇರು ಮಾದಕ ವಸ್ತುಲೆನ  ದುರುಪಯೋಗ ತಡೆಗಟ್ಟುನ ಬಗ್ಗೆ ಪ್ರತಿಜ್ಞಾ ವಿಧಿ ಬೋಧಿಸಾಯೆರು. ಬೊಕ್ಕ ಗಣ್ಯೆರು, ಸಿಬ್ಬಂದಿ ಬೊಕ್ಕ ಸಂಸ್ಥೆದ  ಶಿಬಿರಾರ್ಥಿಲು ಬ್ರಹ್ಮಾವರ ರುಡ್ಸೆಟ್ ಸಂಸ್ಥೆಡ್ದ್  ಕೃಷಿ ವಿಜ್ಞಾನ ಕೇಂದ್ರ ಮುಟ್ಟ ಮಾದಕ ದ್ರವ್ಯ ವಿರೋಧಿ ಜಾಗೃತಿ ಜಾಥಾ ಮಲ್ತೆರು.

ಕಾರ್ಯಕ್ರಮನ್  ಉಪನ್ಯಾಸಕಿ ಶ್ರೀಮತಿ ಚೈತ್ರ ಕೆ. ನಿರೂಪಣೆ ಮಲ್ತೆರು. ಕಚೇರಿ ಸಹಾಯಕ ಶ್ರೀ ಶಾಂತಪ್ಪ ಸ್ವಾಗತ ಮಲ್ತುದ್, ಹಿರಿಯ ಕಚೇರಿ ಸಹಾಯಕ ಶ್ರೀ ರವಿ ವಂದಿಸಾಯೆರು.