ಅ.24‌ಗ್ ಅಮ್ಚೆ ಸಂಸಾರ್ ಸಿನೆಮಾ ಮಣಿಪಾಲದ‌ ಭಾರತ್ ಮಾಲ್ ಡ್ ಸುರುತ್ತ ಪ್ರದರ್ಶನ…

ಆರ್.ಎಸ್.ಬಿ. ಕೊಂಕಣಿ ಭಾಷೆದ ಸುರುತ್ತ ಪೂರ್ಣಾವಧಿದ ಸಿನೇಮಾ ಅಮ್ಚೆ ಸಂಸಾರ್ ತಯಾರಾದಿತ್ತುದ್, ಅ.24ದಾನಿ ಮಣಿಪಾಲದ ಭಾರತ್ ಮಾಲ್ ಡ್ ಸುರುತ್ತ ಪ್ರದರ್ಶನ ನಡಪರೆಗುಂಡ್ ಪಂಡುದ್ ನಿರ್ದೇಶಕೆರಾಯಿನ ಸಂದೀಪ್ ಕಾಮತ್ ತೆರಿಪಾದೆರ್.
ಬುಧವಾರ ಸುದ್ದಿಗೋಷ್ಠಿಡ್ ಮಾಹಿತಿ ಕೊರಿನ ಆರು, ಮಧ್ಯಮ ಬೊಕ್ಕ‌ ಬಡವರ್ಗೊಗ್ ಸೇರಿನ ರಾಜಾಪುರ ಸಾರಸ್ವತ ಬ್ರಾಹ್ಮಣ ಸಮಾಜದ ಕೂಡುಕುಟುಂಬ, ಕೃಷಿ ಆಧಾರಿತ ಬದುಕು, ಧಾರ್ಮಿಕತೆ, ಕಷ್ಟಸಹಿಷ್ಣುತೆ, ಕಟ್ಟುಪಾಡುಲು , ಪರಂಪರಾಗತ ನಂಬೊಲುಗೆದ ಬಗ್ಗೆ ಈ ಚಿತ್ರ ಬೊಲ್ಪು ತೋಜಾವರೆಗುಂಡ್ ಪಂಡೆರ್.
ಕೊರೋನಾದ ಸಂಕಷ್ಟದ ಪುರುಸೊತ್ತುದ ಪೊರ್ತುನ್ ಕ್ರೀಯಾತ್ಮಕವಾದ್ ಗಲಸೊಂಬಿನ ಉದ್ದೇಶಡ್ ಸ್ವಸಮಾಜದ ಉದಯೋನ್ಮುಖ ಕಲಾವಿದೆರೆನ್ ಒಟ್ಟು ಮಲ್ತೊಂದ್ ಅಮ್ಚೆ ಸಂಸಾರ್ (ನಮ್ಮ ಸಂಸಾರ) ಪನ್ಪಿನ ಈ ಚಿತ್ರೊನ್ ನಿರ್ಮಾಣ ಮಲ್ತುದ ಪಂಡೆರ್ .

ಉಡುಪಿ, ಕುಂದಾಪುರ, ಕಾರ್ಕಳದ ಪರಿಸರೊಡ್ ಚಿತ್ರೀಕರಣ ಮಲ್ದುಂಡ್ . 2.10 ಗಂಟೆ ಪೊರ್ತುದ ಈ ಸಿನೆಮಾಗ್ ಸುಮಾರು 25 – 30 ಲಕ್ಷ ರು. ಖರ್ಚಾತುಂಡ್. ಚಿತ್ರೊನ್ ಮೆಚ್ಚಿದ್ ಸೆನ್ಸಾರ್ ಮಂಡಳಿ ಪ್ರಮಾಣಪತ್ರೊನ್ ಕೊರ್ತೆರ್ .ಚಿತ್ರದ ಕತೆ, ಸಂಭಾಷಣೆದ ಬೇಲೆನ್‌ ಮಲ್ದಿನ ಸಂದೀಪ್ ಕಾಮತ್ ಪಂಡೆರ್.
ಸಿನೆಮಾದ ಮುಖ್ಯ ಪಾತ್ರೊಡ್‌‌ವಿಜಯ ನಾಯಕ್ ಮಾರ್ಪಳ್ಳಿ, ರೋಹನ್ ನಾಯಕ್ ಬೊಕ್ಕ ಭವ್ಯ ಪ್ರಭು ಉಲ್ಲೆರ್. ಬಾಕಿದಕುಲು ಸುಮತಿ ಕಾಮತ್, ಕುಸುಮಾ ಕಾಮತ್, ಸದಾನಂದ ನಾಯಕ್, ಪಾಂಡುರಂಗ ಪ್ರಭು, ಸಧೀರ್ ಸಣ್ಣಕ್ಕಿಬೆಟ್ಟು ನಟನೆ ಮಲ್ತುದ್ , ಶ್ರೀಕಾಂತ ನಾಯಕ್, ಪುಂಡಲೀಕ ಮರಾಠೆ ಬೊಕ್ಕ ಪೂರ್ಣಿಮಾ ನಾಯಕ್ ಅತಿಥಿ ನಟೆರಾದುಲ್ಲೆರ್. ಕಾರ್ತೀಕ್ ಮುಲ್ಕಿ ಸಂಗೀತ ನಿರ್ದೇಶನ ಮಲ್ತುದ್ , ಕಾವ್ಯಶ್ರೀ ಅಜೇರು ಬೊಕ್ಕ ಪಲ್ಲವಿ ಪ್ರಭು ಪದ ಪಂತೆರ್.
ಸುದ್ದಿಗೋಷ್ಠಿಡ್ ಸಿನೇಮಾಟೋಗ್ರಾಫರ್ ಭುವನೇಶ್ ಹಿರೇಬೆಟ್ಟು, ನಟೆರಾಯಿನ ರೋಹನ್ ನಾಯಕ್, ಪಾಂಡುರಂಗ ಪ್ರಭು, ಪುಂಡಲೀಕ ಮರಾಠೆ, ಪ್ರವೀಣ್ ಪ್ರಭು ಉಪಸ್ಥಿತರಿತ್ತೆರ್.