ಗರೋಡಿದ ಸ್ರಷ್ಟಿಲೆಡ್ ಐತಿಹಾಸಿಕ ಮೌಲ್ಯೊಲ್…

ಸಹ್ಯಾದ್ರಿದ ಕಣಿವೆಡ್ ಜತ್ತುದ್,ಕರ್ನಾಟಕ ಕರಾವಳಿದ ಕಡೆಕ್ಕ್ ಪಡ್ಡಯಿದಂಚಿ ಪೋವನಗ‌ ಮಲೆನಾಡುದ ಮಟ್ಟೆಲುಡ್ ಪರ್ಮೊದಿಪ್ಪುನ ವಿಶಾಲವಾಯಿನ “ತುಳುನಾಡ್” ಸಸ್ಯಶ್ಯಾಮಲೆಯಾದ್ ಮಿನ್ಕೊಂದುಪ್ಪುನ “ಪೊರ್ಲುದ ನಾಡ್.ಪರಶುರಾಮ ಸ್ರಷ್ಟಿದ ಒಂಜಿ ಭಾಗ ಈ ತುಳುನಾಡ್ ಪನ್ಪಿನವ್ವ್ ಜನಜನಿತವಾಯಿನ ಸತ್ಯ.ಸುಮಾರ್ 2‌ಸಾರ ವರ್ಸೊಡಿಂಚಿ ತುಳುನಾಡ್ ಅತ್ತುಂಡ ತುಳುವ ಪಂಡುದೇ ಪುಗಾರ್ತೆನ್ ಪಡೆಯಿನ (ಸಾಲೆತ್ತೂರು 1936)‌ ಈ ಪ್ರದೇಶದ ಗಡಿಕ್ಕುಲ್ ಕಾಲಕಾಲೊಗ್ ಬದಲಾಂಡಲಾ ತನ್ನ ವಿಶಿಷ್ಟ ಸಂಸ್ಕ್ರತಿ ಪರಂಪರೆದ ದಿಟ್ಟಿಡಾದ್ ಈ ಪ್ರದೇಶ ಇನಿಕುಲಾ ಒಂಜಾದ್ ಒರಿದುಂಡ್.ಜಾನಪದ ನಿಲೆಟ್ ನೆತ್ತ ಆಳ ತೆರಿಯೊಡಾಂಡ ಬೋಡಾಯಿನಾತ್ ಐತಿಹಾಸಿಕ ಹಿನ್ನೆಲೆ ಮುಲ್ಪ ಉಂಡು.ತುಳು ಪಾಡ್ದನೊಲೆಡ್ ತುಳುನಾಡ್ದ ಪೆರ್ಮೆನ್ ಇಂಚ ಪ್ರಸ್ತಾಪನೆ ಮಲ್ದೆರ್.

“ಬಡಕಾಯಿ ಗಂಗೇಡ್ದ್”ತೆನ್ಕಾಯಿ ಮಲ್ಯಲ ಮುಟ್ಟ,ಕಾಯಿರಿ ಗಟ್ಟೋಡ್ದ್ ನುಗುರು ಪೊಯ್ಯ ಮುಟ್ಟ” (ಬಡಕಾಯಿದ ಗಂಗೊಳ್ಳಿ ತುದೆಡ್ದ್ ,ತೆನ್ಕಾಯಿದ ಮಲಯಾಳ ಪ್ರದೇಶ ಮುಟ್ಟ,ಪಡ್ಡಾಯಿ ಗಟ್ಟೋಡ್ದ್ ಕಡಲ ಕಿನಾರೆದ ಪೊಯ್ಯಮುಟ್ಟ) ಇತ್ತೆ ಮಾತ್ರ ಕುಂದಾಪುರಡ್ದ್ ತೆಂಕಣ ಕಾಸರಗೋಡು ಮುಟ್ಟ, ಪಶ್ಚಿಮ ಗಟ್ಟಡ್ದ್ ಕಡಲ್ದ ತಡಿಮುಟ್ಟ ಪರತೊಂದುಪ್ಪುನ ತುಳುನಾಡ್ದ ಜನಜೀವನಡ್ ಜಾನಪದ ಭಾವಭಾಂದವ್ಯದ ಏಕತೆನ್ ತೂವರೆಗ್ ಸಾಧ್ಯ..

ತುಳುನಾಡು ಪನ್ಪಿನವ್ ಒಂಜಿ ರೀತಿದ ಧಾರ್ಮಿಕ ಸಂಗ್ರಹಾಲಯದಲೆಕ್ಕ ಉಂಡು.ಬೇತೆ ಬೇತೆ ಧರ್ಮ,ಭಾಷೆ,ವಿಚಾರೊಲೆಗ್ ತುಳುನಾಡ್ ಆಶ್ರಯ ತಾಣ ಆತುಂಡ್.ಬೌದ್ದೆರ್,ಜೈನೆರ್,ಶೈವೆರ್,ವೈಷ್ಣವೆರ್,ಶಾಕ್ತ,ಗಾಣಾಪತ್ಯ ಈ ಮಾತಾ ಹಿಂದೂ ಧರ್ಮದ ಬೇತೆ ಬೇತೆ ಪಂಗಡದಕುಲು,ಕ್ರೈಸ್ತೆರ್,ಮುಸಲ್ಮಾನೆರ್ ಇಂಚ ಮಾತೆರ್ಲಾ ಸಾಮರಸ್ಯೊಡ್ ಕೂಡ್ದ್ ಬದುಕೊಂದುಪ್ಪುನ ಸಾಂಸ್ಕೃತಿಕ ಪ್ರದೇಶ.ಕೋಮು ಸಾಮರಸ್ಯ ಈ ಮಣ್ಣುದ ಗುಣ.ಬಪ್ಪಬ್ಯಾರಿಗುಲಾ ಮುಲ್ಕಿ ಬಪ್ಪನಾಡು ದುರ್ಗಾಪರಮೇಶ್ವರಿ ದೇವಸ್ಥಾನಗುಲಾ ಅಪೂರ್ವ ವಾಯಿನ ಸಂಬಂಧ ಉಂಡು.ಮುಸ್ಲಿಂ ಮೂಲದ ಬೊಬ್ಬರ್ಯ ಬೊಕ್ಕ ಆಲಿ ಭೂತೊನ್ ತುಳುವೆರ್ ನಂಬುದ್ ಪರಕೆ ಸಂದಾವೆರ್.ಕೆಲವು ದೇವಸ್ಥಾನಡ್ ಮುಸ್ಲಿಂ, ಕ್ರೈಸ್ತ ಕುಟುಂಬದ ಸಂಬಂಧ ಇನಿಕುಲಾ ಉಂಡು.ಏತೋ ದೇವಸ್ಥಾನೊಲೆಡ್ ದೇವೆರೆಗ್ ಅಲಂಕಾರ ಸೇವೆ,ವಾದ್ಯ ಸೇವೆನ್ ಕೊರ್ಪಿನ ಮುಸ್ಲಿಂ ಕುಟುಂಬ ಉಂಡು.ಅಂಚೆನೇ ಮಸೀದಿ ಇಗರ್ಜಿಗ್ ಪರಕೆ ಕೊರ್ಪಿನ ಹಿಂದೂ ಕುಟುಂಬಲಾ ಉಂಡು.ಆಟ,ಕೋಲ,ಬಲಿ,ನಾಗಮಂಡಲ,ಸಾಂತುಮಾರಿ,ಉರೂಸ್ ಉಂದು ಮಾತಾ ಸಾಂಸ್ಕೃತಿಕ ಉಚ್ಚಯೊಲೆಡ್ ತುಳುನಾಡ್ದ ಜನಸಾಮಾನ್ಯೆರ್ ಪಾಲ್ ಪಡೆಯುನ ರೂಢಿ ಉಂಡು.ದೇವೆರ್ ಬೊಕ್ಕ ಭೂತ ಒಟ್ಟುಗೇ ಪೂಜೆ ಆಪಿನ ಆರಾಧನಾ ಜಾಗೆಗ್ ಧರ್ಮಸ್ಥಳದ ಮಂಜುನಾಥ ಸ್ವಾಮಿ ಬೊಕ್ಕ ಅಣ್ಣಪ್ಪ ಪಂಜುರ್ಲಿ ಸಾಕ್ಷಿಯಾತುಂಡ್.

ಇಂಚ ತುಳುನಾಡ್ದ ಸಂಸ್ಕ್ರತಿ ಮುಲ್ಪದ ಆರಾಧನಾ ಪದ್ದತಿಡ್ ಮಸ್ತ್ ದೆಂಗುದುಂಡ್ ಪನ್ಪಿನವ್ವ್ ಸತ್ಯ ವಿಚಾರ.ಮುಲ್ಪದ ಜಾನಪದ ಆರಾಧನಾ ಪದ್ದತಿಡ್ ಕರಿದ್ ಪೋಯಿನ ಪೆರಿಯ ಜೀವಿಲೆನ ತ್ಯಾಗದ ಪರಿತಿರಿ ಉಂಡು.ಇಂಚಿನ ಆರಾಧನಾ ಪದ್ದತಿಡ್ ಅಂಚಿಗ್ ದೇವಸ್ಥಾನಲಾ ಅತ್ತ್ ಇಂಚಿ ಭೂತಸ್ಥಾನಲಾ ಅತ್ತಾವಂದಿನ ವಿಶಿಷ್ಟ ಪೂಜಾಕೇಂದ್ರವಾದ್ ಬುಲೆದ್ ಬತ್ತಿನ ಬ್ರಹ್ಮಬೈದೆರ್ ಗರೊಡಿಲು ತುಳುಮಣ್ಣುದ ಇತಿಹಾಸೊಡೇ ಒಂಜಿ ವಿಶೇಷ..ಚಂದ್ರಗಿರಿಡ್ದ್ ಭದ್ರಗಿರಿಮುಟ್ಟ ತುಳುಭಾಷಾ ಪ್ರಾಧಾನ್ಯತೆದ ಪ್ರದೇಶಡ್ಲಾ,ಭದ್ರಗಿರಿಡ್ದ್ ಬೈಂದೂರುಮುಟ್ಟ ಕನ್ನಡಭಾಷಾ ಪ್ರದೇಶದ ಸುತ್ತಲಾ ಗರೊಡಿಲು ಪಂಡುದ್ ವಿಶಿಷ್ಟ ಆರಾಧನಾ ಪದ್ಧತಿಲು ತೋಜಿದ್ ಬರ್ಪುಂಡ್.

ಸಂಗ್ರಹ:ತುಳುನಾಡ ಗರೊಡಿಗಳ ಸಾಂಸ್ಕೃತಿಕ ಅಧ್ಯಯನ(ಕನ್ನಡ). ‍‌ ತುಳುಕ್ ತಜುರ್ಮೆ:ಯಶೋದ ಕೇಶವ್. (ದುಂಬರಿಯುಂಡ್)