ಮಹಿಳಾ ದಿನಾಚರಣೆ ವಿಶೇಷ

ಡಾ. ಅನು ಡೆಂಟಲ್ ಬೊಕ್ಕ ಆಯುರ್ವೇದ ಅಂಚೆನೆ ಚೈತನ್ಯ ಫೌಂಡೇಶನ್ ಕಡೆಕಾರ್ ಮೊಕ್ಲೆನ ಜಂಟಿ ಆಶ್ರಯಡ್ ವಿಶ್ವ ಮಹಿಳಾ ದಿನಾಚರಣೆ ಅಂಬಲಪಾಡಿ ಕಾರ್ತಿಕ್ ಎಸ್ಟೇಟ್ ಸಭಾಂಗಣಡ್ ನಡತುಂಡ್.. ಮುಖ್ಯ ಅತಿಥಿಯಾದ್ ಬತ್ತಿನ
ಚಲನಚಿತ್ರ ನಟಿ ಬೊಕ್ಕ‌ ಭರತನಾಟ್ಯ ಕಲಾವಿದೆ ಮಾನಸಿ ಸುಧೀರ್ ಮೇರ್ ಕಾರ್ಯಕ್ರಮನ್ ಉದಿಪನ ಮಲ್ತುದ್ ಪಾತೆರ್ದ್ ಈ ವರುಷದ ವಿಶ್ವ ಮಹಿಳಾ ದಿನಾಚರಣೆದ ವಿಷಯ ಡಿಜಿಟ್-ಆಲ್ : ಇನೋವೇಶನ್ ಆಂಡ್ ಟೆಕ್ನೋಲಜಿ ಫಾರ್ ಜೆಂಡರ್ ಇಕ್ವಾಲಿಟಿ. ಈ ನಿಟ್ಟುಡ್ ಈ ಡಿಜಿಟಲ್ ಪ್ರಪಂಚಡ್ ಮಾತಾ ಮಹಿಳೆಯೆರು ಕ್ರೀಯಾಶೀಲವಾದ್ , ಧನಾತ್ಮಕವಾದ್ ಜಾಸ್ತಿ ತೊಡಗಿಸಾವೊನೊಡ್ ಬೊಕ್ಕ ಸಮಾಜ ಲಿಂಗ ತಾರತಮ್ಯವಿಪ್ಪಂದೆ ತಮ್ಮ ಅನಿಸಿಕೆಲೆನ್ ಕೊರ್ಪಿನೇಟ್ ಪ್ರಭುದ್ಧರಾವೊಡ್ ಪಂಡೆರು.

ಸಂಪನ್ಮೂಲ ವ್ಯಕ್ತಿಯಾದಿತ್ತಿನ ಪ್ರಸೂತಿ ತಜ್ಞೆ ಡಾ. ರಾಜಲಕ್ಷ್ಮೀ ಪಾತೆರ್ದ್ ಆರೋಗ್ಯ ಕ್ಷೇತ್ರಡ್ ಮಹಿಳೆಯೆರು ಪ್ರಾಚೀನ ಕಾಲೊಡಿಂಚಿಲಾ ತಮ್ಮ ಪ್ರಾಮುಖ್ಯತೆನ್ ತೋಜಾದೆರ್. ಪಿರಾಕುದ ಕಾಲೊಡ್ ಅನುಭವದ ಆಧಾರೊಡ್ ಮಹಿಳೆಯೆರು ಇಲ್ಲಡೇ ಪೆದ್ಪಾವೊಂದಿತ್ತೆರ್. ಇನಿ ಆರೋಗ್ಯ ಕ್ಷೇತ್ರೊಡ್ ಸುಮಾರು ೭೦ ಶೇಕಡಾ ಜನ ಮಹಿಳೆಯೆರುಲ್ಲೆರ್ ಪನರೆಗ್ ಕುಷಿ ಆವೊಂದುಂಡ್ ಪಂಡೆರು.

ಕುಡೊರಿ ಸಂಪನ್ಮೂಲ ವ್ಯಕ್ತಿಯಾದಿತ್ತಿನ ಮಧುಮೇಹ ತಜ್ಞೆ ಡಾ. ಶ್ರತಿ ಬಲ್ಲಾಳ್ ಪಾತೆರ್ದ್ ಶಿಸ್ತು ಬದ್ಧವಾಯಿನ ಜೀವನ ಶೈಲಿದ ಮುಖೇನ ಪೊಣ್ಣು ತನ್ನ , ತನ್ನ ಕುಟುಂಬ ಬೊಕ್ಕ ಸಮಾಜದ ಆರೋಗ್ಯ ಕಾಪಾಡರೆಗ್ ಸಾಧ್ಯ ಪಂಡೆರು.

ಈ ಸಂದರ್ಭಡ್ ವಿವಿಧ ಕ್ಷೇತ್ರೊಲೆಡ್ ಸಾಧನೆ ಮಲ್ತಿನ ಮಹಿಳಾ ಸಾಧಕೆರಾಯಿನ ಚೈತ್ರ ಶೆಟ್ಟಿ, ನೀಲಾವತಿ ಎ, ವಿಮಲಾಕ್ಷಿ ದಿವಾಕರ್, ಲೀಲಾ ಭಟ್, ಪೂರ್ಣಿಮಾ ಜನಾರ್ಧನ್, ಶಾಲಿನಿ ಶೆಟ್ಟಿ ಮೊಕ್ಲೆನ್ ಮಾನಾದಿಗೆ ಮಲ್ತೆರ್.
ಮುಖ್ಯ ಅತಿಥಿಯಾದ್ ಉದ್ಯಮಿ ಸುಜಾತಾ ಬಾಳಿಗ, ಭಾಜಾಪಾ ರಾಜ್ಯ ಉಪಾಧ್ಯಕ್ಷೆ ನಯನಾ ಗಣೇಶ್, ಕೆಪಿಸಿಸಿ ವಕ್ತಾರೆ ವೆರೋಣಿಕಾ ಕರ್ನೇಲಿಯೋ, ಅಂಬಲಪಾಡಿ ಕಿದಿಯೂರು ವಿದ್ಯಾಸಮುದ್ರ ಶಾಲೆದ ಪ್ರಾಂಶುಪಾಲೆ ಶ್ಯಾಮಲಾ ಪ್ರಸಾದ್, ಕನ್ನಡ ಸಂಸ್ಕೃತಿ ಇಲಾಖೆದ ಉಪ ನಿರ್ದೇಶಕಿ ಪೂರ್ಣಿಮಾ, ಸಾಫಲ್ಯಾ ಟ್ರಸ್ಟ್ ನ ಪ್ರವರ್ತಕರಾಯಿನ ನಿರುಪಮಾ ಪ್ರಸಾದ್ ಶೆಟ್ಟಿ, ಚೈತ್ಯನ ಫೌಂಡೇಶನ್ ದ ಪ್ರವರ್ತಕರಾಯಿನ ಸುನೀಲ್ ಸಾಲ್ಯಾನ್ ಕಡೆಕಾರು ಉಪಸ್ಥಿತರಿತ್ತೆರ್.

ಅನು ಡೆಂಟಲ್ & ಅಯುರ್ವೇದದ ಡಾ. ಅನುಪಮಾ ಸುನೀಲ್ ಸ್ವಾಗತ ಮಲ್ತುದ್ . ಡಾ. ರಕ್ಷಾ ವಂದಿಸಾಯೆರ್. ಡಾ. ಶ್ರೀಲಕ್ಷ್ಮೀ ಕಾರ್ಯಕ್ರಮ ನಿರ್ವಹಣೆ ಮಲ್ತೆರ್.