ಡೆಂಗ್ಯು ಜಾಗ್ರತಿ

ಉಡುಪಿ ಪತ್ರಿಕಾ ಭವನ ಪರಿಸರಡ್ ಪತ್ರಕರ್ತೆರೆಡ್ದ್ ಡೆಂಗ್ಯು ಬಗ್ಗೆ ಜಾಗೃತಿ, ಲಾರ್ವ ಸಮೀಕ್ಷೆ

ಉಡುಪಿ, ಜು.12: ಉಡುಪಿ ಜಿಲ್ಲಾ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಇಲಾಖೆದ  ವತಿಡ್ದ್ ಡೆಂಗ್ಯು ರೋಗ ಪರಡುನ ಈಡೀಸ್  ಉಮಿಲ್ ಉತ್ಪತ್ತಿ ತಾಣಲೆನ್  ನಾಶ ಮಲ್ಪುನ  ದಿನದ ಪ್ರಯುಕ್ತ ಶುಕ್ರವಾರ ಉಡುಪಿ ಪತ್ರಿಕಾ ಭವನದ ಪರಿಸರಡ್  ಪತ್ರಕರ್ತೆರು ಲಾರ್ವ ಸಮೀಕ್ಷೆ ಮಲ್ತುದ್ , ಲಾರ್ವಲೆನ್  ನಾಶ ಮಲ್ತುದ್, ಸಾರ್ವಜನಿಕೆರೆಗ್  ಕರಪತ್ರ ವಿತರಣೆ ಮಲ್ತುದ್, ಡೆಂಗ್ಯು ಕಾಯಿಲೆದ ಬಗೆಟ್  ಅರಿವು ಪುಟ್ಟಾಯೆರ್.

ಉಡುಪಿ ರೋಗವಾಹಕ ಆಶ್ರಿತ ರೋಗಲೆನ ನಿಯಂತ್ರಾಣಾಧಿಕಾರಿ ಡಾ. ಪ್ರಶಾಂತ್ ಭಟ್ ನೇತೃತ್ವಡ್ ನಡತಿನ  ಈ ಕಾರ್ಯಕ್ರಮಗ್ ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ರಾಜೇಶ್ ಶೆಟ್ಟಿ ಚಾಲನೆ ಕೊರಿಯೆರು. ಕರಿನ ವರ್ಷ ಈ ಪರಿಸರಡ್  ಡೆಂಗ್ಯು ಪ್ರಕರಣಲು  ಹೆಚ್ಚಾದಿತ್ತಿನ ಬೊಕ್ಕ  ಪ್ರಸ್ತುತ ಜಿಲ್ಲೆಡ್  ಡೆಂಗ್ಯು ಪ್ರಕರಣಲು ಜಾಸ್ತಿಯಾವೊಂದುಪ್ಪುನ  ನಿಟ್ಟುಡ್ ಈ ಕಾರ್ಯಕ್ರಮ ನಡತುಂಡ್

ಪತ್ರಕರ್ತೆರು ಪತ್ರಿಕಾ ಭವನದ ಸುತ್ತ ರೆಡ್‌ಕ್ರಾಸ್ ಭವನ, ಕಾಮಗಾರಿ ನಡತೊಂದುಪ್ಪುನ ಕಟ್ಟಡ ಬೊಕ್ಕ ಇಲ್ಲಗ್ ಪೋದು ಡೆಂಗ್ಯು ಪರಡುನ ಈಡೀಸ್ ಉಮಿಲುದ ಲಾರ್ವಲೆನ್  ಸಮೀಕ್ಷೆ ಮಲ್ತೆರು. ಪೂತ ಕುಂಡ, ಕಡೆಪಿನ ಕಲ್ಲು, ಪ್ಲಾಸ್ಟಿಕ್ ಮುಚ್ಚಳಡುಪ್ಪುನ ನೀರುಡ್ ಲಾರ್ವನ್ ಪತ್ತೆ ಮಲ್ತಿ ಬೊಕ್ಕ   ಅವ್ವೆನ್  ನಾಶ ಮಲ್ತೆರ್. ಈ ಪೊರ್ತುಡ್  ಸಾರ್ವಜನಿಕೆರೆಗ್  ಕರಪತ್ರಲೆನ್  ವಿತರಣೆ ಮಲ್ತುದ್ ನೀರು ಉಂತಾಂದಿಲೆಕ್ಕ  ತೂವನರೆಗ್ ಬೊಕ್ಕ  ಪರಿಸರ  ಸ್ವಚ್ಛವಾದ್ ದೀಯೊಂಬಿಲೆಕ್ಕ ಮಾಯಿತಿ ಕೊರಿಯೆರ್.

ಈ ಸಂದರ್ಭಡ್  ಆರೋಗ್ಯ ಇಲಾಖೆದ  ಕೀಟಶಾಸ್ತ್ರ ತಜ್ಞೆ ಮುಕ್ತ, ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರರ್ತರ ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ, ಕೋಶಾಧಿಕಾರಿ ಉಮೇಶ್ ಮಾರ್ಪಳ್ಳಿ, ಮಾಜಿ ಅಧ್ಯಕ್ಷ ಜಯಕರ ಸುವರ್ಣ  ಉಪಸ್ಥಿತರಿತ್ತೆರು.