ವೈದ್ಯಕೀಯ ಸಂಘದ ಸೂಚನಾ ಫಲಕ ಅನಾವರಣ.

ಉಡುಪಿ ಪತ್ರಕರ್ತರ, ವೈದ್ಯಕೀಯ ಸಂಘದ ಸೂಚನಾ ಫಲಕ ಅನಾವರಣ

ಉಡುಪಿ, ಮೇ 14: ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಆಶ್ರಯಡ್  ಉಡುಪಿ ಪಂಚಮಿ ಟ್ರಸ್ಟ್ ಬೊಕ್ಕ  ಗಾಂಧಿ ಆಸ್ಪತ್ರೆದ  ಪ್ರಾಯೋಜಕತ್ವಡ್  ಬ್ರಹ್ಮಗಿರಿ ನಾಯರ್‌ಕೆರೆಡ್  ಸ್ಥಾಪನೆ ಮಲ್ದಿನ ಸೂಚನಾ ಫಲಕದ ಅನಾವರಣ ಕಾರ್ಯಕ್ರಮ ಗುರುವಾರ ನಡತುಂಡ್..

ಉಡುಪಿ ಗಾಂಧಿ ಆಸ್ಪತ್ರೆದ  ಆಡಳಿತ ನಿರ್ದೇಶಕ ಎಂ.ಹರಿಶ್ಚಂದ್ರ ನಾಮಫಲಕನ್  ಅನಾವರಣ ಮಲ್ತೆರು. ಬೊಕ್ಕ  ನಡತಿನ  ಸಭಾ ಕಾರ್ಯಕ್ರಮಡ್  ಪಾತೆರಿನ ಆರು, ಪತ್ರಕರ್ತೆರು ಪ್ರತಿಯೊಂಜಿ  ಸಂದರ್ಭಡುಲಾ ಮುಂಚೂಣಿಡಿತ್ತುದ್  ಕಾರ್ಯನಿರ್ವಹಣೆ ಮಲ್ಪುವೆರ್.. ಅಕುಲಾ ಕಾಲಕಾಲೊಗ್  ತಮ್ಮ ಆರೋಗ್ಯನ್  ತಪಾಸಣೆ ಮಲ್ಪುನವ್  ಅತೀ ಅಗತ್ಯವಾದುಂಡ್.. ಅಂಚೆನೇ  ಪ್ರಥಮ ಚಿಕಿತ್ಸೆದ  ಬಗೆಟ್   ಪತ್ರಕರ್ತೆರೆಗ್  ತರಬೇತಿ ಕೊರ್ಪಿನವ್  ಮುಖ್ಯ. ಉಂದೇಕ್ ಮಾತಾ  ನಮ್ಮ ಸಂಸ್ಥೆಡ್ದ್ ಸಹಕಾರ ಕೊರ್ಪುಂಡ್  ಪಂಡುದು ತೆರಿಪಾಯೆರು.

ಈ ಸಂದರ್ಭಡ್  ಗಾಂಧಿ ಆಸ್ಪತ್ರೆದ  ವತಿಡ್ದ್  ಭಾರತೀಯ ಸೇನೆಗ್  ಕೊರ್ಪಿನ  55,555ರೂ. ಮೊತ್ತದ ದೇಣಿಗೆದ ಚೆಕ್‌ನ್ ಉಡುಪಿ ಜಿಲ್ಲಾ ವಾರ್ತಾಧಿಕಾರಿ ಮಂಜುನಾಥ್ ಅರೆನ  ಮೂಲಕ ಉಡುಪಿ ಜಿಲ್ಲಾಡಳಿತಗ್ ಹಸ್ತಾಂತರ ಮಲ್ತೆರ್..

ಮುಖ್ಯ ಅತಿಥಿಲಾದ್  ಗಾಂಧಿ ಆಸ್ಪತ್ರೆದ  ವೈದ್ಯಕೀಯ ನಿರ್ದೇಶಕ ಡಾ.ವ್ಯಾಸರಾಜ ತಂತ್ರಿ, ಉಡುಪಿ ಕರಾವಳಿ ಐಎಂಎ ಅಧ್ಯಕ್ಷ ಡಾ.ಸುರೇಶ್ ಶೆಣೈ, ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ರಾಜೇಶ್ ಶೆಟ್ಟಿ ಅಲೆವೂರು, ಉಡುಪಿ ತಾಲೂಕು ಆರೋಗ್ಯಾಧಿಕಾರಿ ಡಾ.ವಾಸುದೇವ ಉಪಾಧ್ಯ ಉಪಸ್ಥಿತರಿತ್ತೆರು.

ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ  ಸೊಲ್ಮೆ ಸಂದಾಯ್ತ ಮಲ್ತೆರು. ಪತ್ರಕರ್ತ ಜನಾರ್ದನ ಕೊಡವೂರು ಸ್ವಾಗತ ಮಲ್ತುದ್  ಕಾರ್ಯಕ್ರಮ ನಿರೂಪಣೆ ಮಲ್ತೆರು.

ಸೂಚನಾ ಫಲಕಡ್  ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಮುಖ್ಯ ಕಚೇರಿ, ಉಡುಪಿ ಪತ್ರಿಕಾ ಭವನ(ಪ್ರೆಸ್‌ಕ್ಲಬ್), ಐಎಂಎ ಭವನ, ಉಡುಪಿ ತಾಲೂಕು ಆರೋಗ್ಯಾಧಿಕಾರಿಲೆನ  ಕಚೇರಿಗ್  ಪೋಪಿನ ಮಾರ್ಗೊನ್  ಸೂಚನೆ ಮಲ್ದುಂಡ್.