ಸೌಜನ್ಯ ಕೇಸ್ ಮರುತನಿಖೆ ಮಲ್ಪೊಡುಂದ್ ಮುಖ್ಯಮಂತ್ರಿ ಲೆಗ್ ಮನವಿ ಕೊರಿನ ಶ್ರೀರಾಮಸೇನೆ..

11 ವರ್ಷದ ಪಿರಾವುಡ್ 17 ವರ್ಷದ ಬಾಲಕಿ ಸೌಜನ್ಯನ ಅತ್ಯಾಚಾರ ಬೊಕ್ಕ ಕೊಲೆ ಪ್ರಕರಣ ಕೇಸ್ ನಡತುದ್ 11 ವರ್ಷ ಆಂಡಲಾ ನನಲಾ ನ್ಯಾಯ ಸಿಕ್ಕುದಿಜಿ. ನ್ಯಾಯಗಾದ್ ಆಗ್ರಹ ಮಲ್ತುದ್ ರಾಜ್ಯಾದ್ಯಂತ ಬೋಡಾಯಿನಾತ್ ಹೋರಾಟ, ಪ್ರತಿಭಟನೆಲು, ಜನಕುಲ್ ಆಕ್ರೋಶ ಮಲ್ತುಂಡಲಾ ಸರ್ಕಾರ ಒವ್ವೇ ನಿರ್ಧಾರ ದೆತೊನಂದೆ ಮನೀಪಂದೆ ಕುಲೊಂದುಪ್ಪುನವ್ವೆನ್ ಶ್ರೀರಾಮಸೇನೆ ಖಂಡಿಸಾದುಂಡ್.

ರಾಜ್ಯ ಸರ್ಕಾರ CBI ಗ್ ಮರುತನಿಖೆಗ್ ಒಪ್ಪಿಸಾವೊಡ್ ಅತ್ತುಂಡ ಹಾಲಿ ಹೈಕೋರ್ಟ್ ನ್ಯಾಯಾಧೀಶೆರೆನ ನೇತೃತ್ವಡ್ ಸಮಿತಿ ರಚನೆ‌ ಮಲ್ತುದ್ ಮರುತನಿಖೆ ಮಲ್ಪೊಡ್, ತನಿಖೆಡ್ ಕರ್ತವ್ಯ ಲೋಪ ಮಲ್ದಿನ ಸರ್ಕಾರಿ ವೈದ್ಯೆರು, ಪೊಲೀಸ್ ತನಿಖಾಧಿಕಾರಿ ಬೊಕ್ಕ ಸಂಬಂಧ ಪಟ್ಟಿನ ಕರ್ತವ್ಯಲೋಪ ಮಲ್ತಿನ ಅಧಿಕಾರಿಲೆನ್ ಅಮಾನತು ಮಲ್ತುದ್ ವಿಚಾರಣೆ ಆವೊಡು,
ಸೌಜನ್ಯನ ಕುಟುಂಬಗ್ ಬೊಕ್ಕ ಮಲ್ಪಂದಿನ ಅಪರಾಧಗ್ 6 ವರ್ಷ ಜೈಲು ಶಿಕ್ಷೆ ಅನುಭವಿಸಾದ್ ನಿರಪರಾಧಿ ಆಯಿನ ಸಂತೋಷ ರಾವ್ ಕುಟುಂಬಗ್ ತಲಾ 25 ಲಕ್ಷ ಪರಿಹಾರ ಕೊರೊಡು,
ಸೌಜನ್ಯ ಕುಟುಂಬಗ್ ರಕ್ಷಣೆ ಕೊರೊಡುಂದ್ ಶ್ರೀರಾಮಸೇನೆ ಸರಕಾರೊನ್ ಒತ್ತಾಯ ಮಲ್ದುಂಡ್.
ಈ ಸಂಬಂಧ ಸರಕಾರ ಕೂಡಲೇ ಕ್ರಮ ದೆತೊನುಜಿಡ ರಾಜ್ಯಾದ್ಯಂತ ಉಗ್ರ ಹೋರಾಟ ಮಲ್ಪೊಡಾಪುಂಡ್ ಪಂಡುದು ಉಡುಪಿ ಅಪರ ಜಿಲ್ಲಾಧಿಕಾರಿ ಮಮತಾ ದೇವಿ ಮೆರೆನ ಮುಖಾಂತರ ಮುಖ್ಯಮಂತ್ರಿಲೆಗ್ ಕೊರಿನ ಮಾನವಿಡ್ ಅಗ್ರಹ ಮಲ್ದುಂಡ್.
ಈ ಸಂದರ್ಭಡ್ ಶ್ರೀರಾಮಸೇನೆದ ಜಿಲ್ಲಾಧ್ಯಕ್ಷ ಜಯರಾಂ ಅಂಬೆಕಲ್ಲು, ಜಿಲ್ಲಾ ಮುಖಂಡರಾಯಿನ ಶರತ್ ಮಣಿಪಾಲ, ಸುಜಿತ್ ನಿಟ್ಟೂರು, ಸುದೀಪ್ ಪೂಜಾರಿ, ಕೀರ್ತಿರಾಜ್ ಕಿದಿಯೂರು, ಪ್ರಕಾಶ್ ಹೆಗ್ಡೆ, ಸಂತೋಷ್ ರಾಜ್ ಮೊಕುಲು ಉಪಸ್ಥಿತರಿತ್ತೆರು.