ನಾಗರಪಂಚಮಿದ ಎಡ್ಡೆಪ್ಪುದ ದಿನತಾನಿ ಪಂಚವರ್ಣದ ನಾಗನಡೆತ ಮಣ್ಣ್ ಪಂಡುದೇ ಪುಗರ್ತೆ ಪಡೆದಿನ ತುಲುನಾಡೊರ್ಮೆ ನಾಗಗ್ ತನುತಂಬಿಲ,ಪಂಚಾಮ್ರತ ಅಭಿಷೇಕ ಮಲ್ತುದ್ ನಾಗದೇವೆರೆನ್ ಸಂತ್ರಪ್ತಿ ಮಲ್ತೆರ್.ನಂಬಿನ ಭಕ್ತರೆಗ್ ಇಂಬು ಕೊರ್ಪಿನ ನಾಗದೇವೆರೆಗ್ ನಾಗರಪಂಚಮಿದಾನಿ ತನು ಮಲ್ತುಂಡ ನಾಗದೇವೆರ್ ಸಂತ್ರಪ್ತಿಯಾದ್ ಭಕ್ತೆರೆನ ಇಷ್ಟೊನ್ ಈಡೇರಿಸಾವೆರ್..ವಿದ್ಯೆ,ಆರೋಗ್ಯ,ಐಶ್ವರ್ಯ ಸುಖ ಸಂಪತ್ತು ಕೊರ್ದ್ ಕಾಪುವೆರ್..ನಮ್ಮ ಇಷ್ಟೊನ್ ನಾಗದೇವೆರೆಡ ಭಕ್ತಿಡ್ ನಟ್ಟಿಯಡ ಖಂಡಿತ ನೆರವೇರುಂಡ್..
ನಾಗರಪಂಚಮಿದಾನಿ ತುಲುವೆರ್ ಕೆಲವ್ ಕಡೆಟ್ ಕುಟುಂಬದ ನಾಗಗ್ ತನು ಪಾಡುವೆರ್.ಕೆಲವೆರ್ ತಂಕುಲು ತಲವೂರುದಿಪ್ಪುನ ಜಾಗಡ್ ಜಾಗಗ್ ಸಂಬಂಧ ಪಟ್ಟಿನ ನಾಗಗ್ ತನು ಪಾಡುವೆರ್.ಬೊಕ್ಕ ಕೆಲವೆರ್ ಮೂಲಸ್ಥಾನಡ್ ತನು ಪಾಡುವೆರ್..ಅಂಚೆನೇ ಕೆಲವೆರ್ ದೇವಸ್ಥಾನೊಲೆಡ್ ನಾಗದೇವೆರ್ನ ಸನ್ನಿಧಿಡ್ ತನು ಪಾಡುದ್ ತನ್ನ ಇಷ್ಟಾರ್ಥ ಸಿದ್ದಿಗ್ ನಾಗದೇವೆರೆಡ ನಟ್ಟೊನುವೆರ್..ಇಂಚ ತುಲುವೆರ್ ಅನಾದಿಕಾಲೊಡಿಂಚಿ ನಂಬೊಂದ್ ಬೈದಿನ ನಾಗಾರಾಧನೆ ತುಲುನಾಡೊರ್ಮೆ ತುಲುವೆರೆನ ಸುರುತ್ತ ಪರ್ಬದ ಆಚರಣೆ ಆದ್ ಗೌಜಿಡ್ ನಡಪುಂಡ್.
ಈ ಸರ್ತಿ ಕೊರೊನಾ ಮಹಾಮಾರಿದ 3ನೇ ಅಲೆತ್ತ ಪೋಡಿಗೆಡ್ ಉಪ್ಪುನೆಡ್ದಾವರ ಕೋವಿಡ್ ನಿಯಮ ಪಾಲನೆ ಮಲ್ತೊಂದ್ ನಾಗರಪಂಚಮಿದ ಆಚರಣೆ ಮಲ್ತೊಂದಿಪ್ಪುನವ್ವ್ ಕೆಲವ್ ಕಡೆಟ್ ತೋಜಿದ್ ಬತ್ತುಂಡ್..ಒಟ್ಟಾರೆಯಾದ್ ಪನೊಡಾಂಡ ಕೊರೊನಾ ಮಹಾಮಾರಿ ಆಯಿನಾತ್ ಬೇಗ ಸಂಪೂರ್ಣವಾದ್ ನಿರ್ಮೂಲ ಆವಡ್ ಪಂಡುದ್ ನಾಗದೇವೆರೆಡ ನಮ ಮಾತೆರ್ಲಾ ಭಕ್ತಿಡ್ ನಟ್ಟೊನುಗಾ.
by 