ಶ್ರೀ ಕ್ರಷ್ಣ ಮಠಟ್ ಶಿವರಾತ್ರಿ

ಶ್ರೀ ಕೃಷ್ಣಮಠಟ್  ವೈಭವದ ಶಿವರಾತ್ರಿ ಆಚಾರಣೆ
            15 ಫೆಬ್ರುವರಿ 2026 ಗ್ ಉಡುಪಿದ ಶ್ರೀ ಕೃಷ್ಣಮಠಟ್ ಬಯ್ಯಗ್
6 ಘಂಟೆಡ್ದ್  ಕಾಂಡೆ 6 ಘಂಟೆಮುಟ ಅಖಂಡ ಶಿವರಾತ್ರಿ ಉತ್ಸವ ನಡಪುಂಡ್..
             ಸಪ್ತಕ್ಷೇತ್ರಲೆಡ್ ಒಂಜಾಯಿನ ಉಡುಪಿ ‘ಅಜ್ಜ- ಪುಳ್ಳಿನ ಊರು ಪಂಡುದು ಜನಜನಿತವಾಯಿನ, ಬೊಳ್ಳಿದ ಪೀಠಡ್ ಸನ್ನಿಹಿತನಾಯಿನ ಶಿವ ,ಶಿವ ಲಿಂಗಡ್ ಸನ್ನಿಹಿತನಾಯಿನ ನಾರಾಯಣ, ಇಂಚಿನ ದೈವತ್ವಡ್ ಕೂಡಿನ ಊರೇ ಶಿವ ಬೆಳ್ಳಿ . ಪಂಡ ಶಿವನ ಊರು–ಶಿವ-ಬೆಳ್ಳಿ- ಶಿವಳ್ಳಿ . (ವೇದಾದ್ರಿಸದ್ ರಜತಪೀಠಪುರೇಶ್ವರಾಭ್ಯಾಮ್ …) ಫುಳ್ಳಿ ಶಿವನ ಊರುಗ್ ಪ್ರಿತಿಡ್ ಬತ್ತಿನ ಅಜ್ಜ, ಜಗದೊಡೆಯ ಶ್ರೀ ಕೃಷ್ಣ. ಶ್ರೀ ಕೃಷ್ಣಗ್ ಶಿವನ ಮಿತ್ತ್  ಬಾರೀಮಮತೆ.  “ವೈಷ್ಣವಾನಾಂ ಅಹಂ ಶಂಭು:..” , ಶಿವಡ ವಿಶೇಷವಾದ್ ವಿಭೂತಿ ರೂಪಡ್  ಉಲ್ಲೆ ಪಂಡುದು ಶ್ರೀ ಕೃಷ್ಣೇನೇ ಭಗವದ್ಗೀತೆಡ್ ಪಂತೆ. ಶಂಭುಗುಲಾ ಅಜ್ಜನ ಮಿತ್ತ್  ಒಲುದಾಂತಿನ ಪ್ರೀತಿ. ಶ್ರೀರಾಮ ನಾಮದ ಮಹಿಮೆನ್ ತನ್ನ ಬುಡೆದಿಗ್ ಉಪದೇಶಿಸಾದ್, ರಾಮ ಮಂತ್ರದ, ವಿಷ್ಣುಸಹಸ್ರನಾಮದ ಗರಿಮೆನ್ ಜಗತ್ತುಗೇ ಸಾರಿನಿಯೇ ಶಿವೆ. ಅವ್ವೆನೇ ಪುರಂದರದಾಸೆರು ಪಂತಿನಿ – “ಸೋಮಶೇಖರ ತನ್ನ ಭಾಮೆಗ್ ಪಂಡಿನ ಮಂತ್ರ…” ಇಂಚ ಹರಿ-ಹರನ ಭಾವೈಕ್ಯತೆಗ್ ಸಾಕ್ಷಿಯಾದುಪ್ಪುನ ಕ್ಷೇತ್ರ ಉಡುಪಿ. ಅಯಿಕ್ಕೇ ಚಂದ್ರೇಶ್ವರ – ಅನಂತೇಶ್ವರ ಕೃಷ್ಣ ಮಠಕ್ಕ್ ಸೇರ್ದ್ ಒಂಜೇ ಪುಷ್ಕರಣಿ. ಅವಭೃತ ಸ್ನಾನ ಈ ಒಂಜೇ ಪುಷ್ಕರಣಿಡ್ ನಡಪುಂಡ್.. ಕೃಷ್ಣನ ಲಕ್ಷ ದೀಪೋತ್ಸವ, ಸಪ್ತೋತ್ಸವಗ್ ಕೃಷ್ಣ ಮಠಡ್ದ್ ಶ್ರೀಅನಂತೇಶ್ವರ ಬೊಕ್ಕ ಶ್ರೀಚಂದ್ರೇಶ್ವರ ದೇವೆರೆನ್ ಬರಮಲ್ತೊಂದ್ ದುಂಬುದ ರಥಟ್ ಕುಲ್ಲಾದ್  ರಥೊನ್ ಭಕ್ತೆರು ಒಯಿತುಂಡ ಪಿರಾವುದ ರಥಟ್ ಶ್ರೀಕೃಷ್ಣನ ರಥ ಈ ರಥೊತ ಪಿರಾವುಡೇ  ಬರ್ಪುಂಡು.
       
     ಅಂಚಾದ್ ಈ ಅವಿನಾಭಾವದ ಸಾಂಕೇತಿಕವಾದ್ ಶಿವರಾತ್ರಿದ ಸಂದರ್ಭಡ್ ವೈಭವದ ಆಚರಣೆನ್ ನಡಪಾವೊಡ್ ಪಂಡುದು ಶ್ರೀ ಪರ್ಯಾಯ ಶೀರೂರು ಮಠಾಧೀಶೆರಾಯಿನ ಪರಮಪೂಜ್ಯ ಶ್ರೀ ಶ್ರೀ ವೇದವರ್ಧನ ತೀರ್ಥ ಶ್ರೀಪಾದೆರು ಸಂಕಲ್ಪ ಮಲ್ದೆರ್.
         ಅಯಿಕ್ಕಾದ್  ರಾಜಾಂಗಣಡ್ ಫೆಬ್ರವರಿ 15 ಐತಾರದಾನಿ ಬಯ್ಯಗ್ ಆಜಿ ಘಂಟೆಡ್ದ್ ಮರುದಿನ  ಕಾಂಡೆ ಆಜಿ ಘಂಟೆಮುಟ್ಟ  ನಿರಂತರ ಪೂಜೆ, ಪಾರಾಯಣ, ಉಪನ್ಯಾಸ, ಭಜನೆ ಕಾರ್ಯಕ್ರಮೊಲು ನಡಪರೆಗುಂಡ್ .ರುದ್ರದೇವೆರು ನಡತಿನಂಚ ನಡಪರೆಗ್ ಸಾಧ್ಯ ಇಜ್ಜಿ.. ಅರೆಗ್ ಪ್ರೀತಿಕರ ಕಾರ್ಯೊನ್  ನಮ ಮಲ್ಪೊಡ್.. ಉಂದು ನಮ  ರುದ್ರದೇವೆರೆನ್ ಆರಾಧಿಸಾವುನ ಕ್ರಮ. ಅಂಚಾದ್  ರುದ್ರದೇವೆರೆನ ಪ್ರೀತಿಗಾದ್ ರುದ್ರಪಾರಾಯಣಾದಿಲು ಮಾತ್ರ ಅತ್ತ್ ವಿಶೇಷವಾದ್ ಮಹಾರುದ್ರದೇವರೇ ತನ್ನ  ಬುಡೆದಿ ಪಾರ್ವತಿಗ್ ಪ್ರೀತಿಡ್ ತೆರಿಪಾಯಿನಂಚ ರಾಮಮಂತ್ರ ಜಪ, ವಿಷ್ಣುಸಹಸ್ರನಾಮ ಪಾರಾಯಾಣಾದಿಲೆನ ಮೂಲಕ ರುದ್ರ ದೇವೆರೆನ ಆರಾಧ್ಯನಾಯಿನ ಶ್ರೀಕೃಷ್ಣನ ಸ್ಮರಣೆಲಾ  ನಡಪೊಡ್. ಅಪಗನೇ ರುದ್ರದೇವೆರೆನ ನಿಜವಾಯಿನ ಆರಾಧನೆ ನಡಪುಂಡು..
            ಈ ನೆಲೆಟ್  ವಿಷ್ಣುಸಹಸ್ರನಾಮ ಪಾರಾಯಾಣಾದಿಲೆನ್ , ಶಿವ ಪಂಚಾಕ್ಷರಿ ಮಂತ್ರ ಜಪೊನ್ ಆಯೋಜನೆ ಮಲ್ದುಂಡ್.
             ಮನೋ ನಿಯಾಮಕನಾಯಿನ ನಮ್ಮ ರೋಗಲೆನ್  ಪರಿಹಾರ ಮಲ್ತುದ್, ಮಂಗಳಮಲ್ಪುನ ಮಹಾದೇವನ ಈ ಪ್ರೀತಿದ  ಕ್ಷೇತ್ರಡ್ , ಪೂ, ತುಳಸಿ, ಬಿಲ್ವ ಪತ್ರೆಲೆನ್ ಅರ್ಪಿಸಾದ್ ಆಯಗ್  ಪ್ರೀತಿಯಾಪಿನ  ರೀತಿಡ್  ನಡತೊಂದುಪ್ಪುನ  ಈ ಮಹೋತ್ಸವಡ್  ನಾಡುದ  ಮಾತಾ ಸದ್ಭಕ್ತೆರು ಸಕ್ರಿಯವಾದ್ ಪಾಲ್ ಪಡೆಯೊಡ್ ಪಂಡುದ್ ಶ್ರೀಮಠದ ದಿವಾನೆರಾಯಿನ  ಡಾ. ಉದಯ ಕುಮಾರ ಸರಳತ್ತಾಯೆರು ತೆರಿಪಾದೆರ್..

ಕಾರ್ಯಕ್ರಮದ ವಿವರ :
ಸಾಯಂ : 5.45-6.00 ಪೂಜೆ
6.00- 6.30 ಪರ್ಯಾಯ ಸ್ವಾಮಿಲೆನ ಸಂದೇಶ
6.30-7.00 ಪ್ರವಚನ
7.00 – 9.30 ಸಾಂಸ್ಕೃತಿಕ ಕಾರ್ಯಕ್ರಮ
9.30-10.00 ಪೂಜೆ
10.00 – 11.00 ಪ್ರವಚನ
11.00 – 12.30 ರುದ್ರ ಪಾರಾಯಣ, ವಿಷ್ಣು ಸಹಸ್ರನಾಮ ಪಾರಾಯಣ ಪೂಜೆ
12.30-2.30 ಕುಲ್ಲುದ್ ಭಜನೆ ಪೂಜೆ
2.30-4.00ಕುಣಿದು ಭಜನೆ
4.00-5.30 ರುದ್ರ ಪಾರಾಯಣ, ವಿಷ್ಣು ಸಹಸ್ರನಾಮ ಪಾರಾಯಣ ಪೂಜೆ