ಮಣ್ಣುದ ಮಗೆ ಇನಾಯಕ ದೇವೆರ್

||”ಮಣ್ಣ್ ದ ಮಗೆ” ಇನಾಯಕ ದೇವೆರ್|| ಅಪ್ಪೆ ಪಾರ್ವತಿ ದೇವೆರ್ ಮೈತ ಕುರೆ‌- ಮಣ್ಣ್ ಗೆತ್ತ್ ದ್ ಅವ್ವೆನ್ ಪೊರ್ಲುದ ಪಾಪೆ ಮಲ್ತ್ ದ್ ಐಕ್ ಜೀವಕಲೆ ಕೊರ್ದು ಇಲ್ಲ ಬಾಕಿಲ್ಡ್ ಕುಲ್ಲಾವೆರ್. ತನ್ಕ್ ಮಿಯ್ಯರೆ ಪೋವೊಡೂಂದಾನಗ ಜೀವ ಕಲೆ ಇತ್ತಿನ ಬಾಲೆಗ್ ಬಾಕಿಲ್ ಕಾಪರೆ ಪಂಡ್ ದ್ ಮಿಯ್ಯರೆ ಪೋಪೆರ್.ಈತಾನಗ ತಿರ್ಗಾಟೊಗು ಪೋಯಿನ

ಈಸ್ವರ ದೇವೆರ್ ಪಿರ ಇಲ್ಲಗ್ ಬರ್ಪೆರ್.ಇಲ್ಲ ಉಲಾಯಿ ಪೊಗ್ಗುನಗ ಬಾಕಿಲ್ ಕಾತೊಂದಿತ್ತಿ ಬಾಲೆ ತಡೆಪುವೆ.ತಾನ್ ಏರ್,ಈ ಇಲ್ಲದ ಮಾತ್ರ ಅತ್ತ್ ಜಗತ್ತ್ ದ ಉಲ್ಲಾಯೆ ಪಂಡಲಾ ಬಾಲೆ ಕೇನುಜೆ ತಡೆತ್ ದ್ ಉಂತಾವೆ.
ಬಾಲೆಗ್ ,ಈಸ್ವರ ದೇವೆರ್ ಏರ್ ,ತನ್ಕ್ ಲ ಈ ಉಲ್ಲಾಯಗ್ ಲಾ ಸಂಬಂಧ ದಾದ ಗೊತ್ತಿಜ್ಜಿ,ಉಂಡು ಮಲ್ತಿನ ಅಪ್ಪೆನ ಮಾತ್ರ ಗುರ್ತ ಅತ್ತಾಂದೆ ಬೇತೆ ಏರ್ನಲಾ ಗುರ್ತ ಇಜ್ಜಾಂದಿ ಬಾಲೆ , ಲೋಕೊದ ದೇವೆರೆನ್ ಇಲ್ಲ್ ಪೊಗ್ಗರೆ ಬುಡಂದೆ ಬಾಕಿಲ್ ಡೇ ಉಂತಾವೆ. ಬಾಲೆಗ್; ಅಪ್ಪೆ , ಇಂಚ ಲೋಕದ ಅಮ್ಮೆರ್,ಇಲ್ಲದ ಗುರ್ಕಾರೆ ಬರುವೆರ್ ಮಗಾ ಪನ್ಪಿನ ಸೂಚನೆ ಕೊರ್ತಿನೇ ಇಜ್ಜಿ.ಅಂಚಾದ್ ಉಂತಾಯೆ.
ಈಸ್ವರ ದೇವೆರ್ ಎನ್ನುವೆರ್ ; ಈ ಬಾಲೆ ಏರ್ ? ಒಲ್ತು ಬತ್ತೆ,ಎಂಚ ಪುಟ್ಟಿಯೆ,ಇಲ್ಲ ಬಾಕಿಲ್ದ ಗುರ್ಕಾರ್ಮೆ ಇಂಬ್ಯಗ್ ಏರ್ ಕೊರಿಯೆರ್….
ಒಂಜಿ ಉದಿಪನ ಆವೊಡ್ಡ ‌ಲೋಕೊಡು ರೀತಿ ನೀತಿ ಉಂಡು, ಈ ಕ್ರಮ ಮೀರ್ದ್ ಪಾರ್ವತಿಗ್ ಈ ಬಾಲೆ , ಇಂಬೆ ಎಂಚ ಉದಿಪನ ಆಯೆ.ಸಂಗತಿನ್ ಮಸ್ತ್ ಯೋಚಿತೆರ್ ತೆರಿಯಂದ್…ಬೊಕ್ಕೊರ ಬಗೆ ತರೊಟು ಪಂಡೆರ್ ಬಾಕಿಲ್ ಡ್ದ್ ಲಕ್ಕ್ ಲಾ ಪನ್ಪೆರ್ ದೇವೆರ್.
ಜಗತ್ತ್ ದ ದೇವೆರೆಗ್ ಈ ಬಾಲೆ ಎಂಚ ಉಂಡಾಯೆ ಪನ್ಪಿನ ಗುಟ್ಟು ತೆರಿಯಂದೆ ಪೋಂಡು.
ಬಾಲೆಗ್ ಅಪ್ಪೆನ್ ಬುಡುದು ಅನ್ಯೆರ್ನ ಗುರ್ತ ಇಜ್ಜಿ. ಬಾಕಿಲ್ ಕಾಪುನ ಕೆಲಸ ಅಪ್ಪೆ ಪಂಡಿಲೆಕ್ಕನೇ ಸಾಂಗ್ಯೊಂದುಲ್ಲೆ.
ಬಗೆತರೊಟು …ಪಂಡಲಾ ಕೇನಂದಿ ಬಾಲೆಡ ದೇವೆರೆಗ್ ಕೋಪ ಬತ್ತ್ಂಡ್.ದುಂಬುಪಿರ ಎನ್ನೂಜೆರ್,ಬಾಲೆದ ತರೆ ಕಡ್ಪುವೆರ್.ಅಪ್ಪೆನ್ ಲೆತ್ತೊಂದು ಬಾಲೆ ತರೆ ತುಂಡಾದ್ ಅಡ್ಡಾದಿಡ್ಡಿ ಬೂರುವೆ.ಮೀಯ್ಯೊಂದಿತ್ತಿನ ಪಾರ್ವತಿ ಪಾರ್
ಬತ್ತ್ ದ್ ,ತಾನು ಉಂಡುಮಲ್ತಿನ ಎನ್ನ ಮೈತ ಕುರೆ – ಮಣ್ಣ್ ದ ಮಗೆ ಸೈತ್ ಬೂರ್ದಿನೆನ್ ತೂದು ಎಡೇನೆ ಬುಲಿಪರೆ ಸುರು ಪತ್ತುವೆರ್.
ಬುಡೆದಿನ ಬುಲಿಪಾಟಿಗೆ ಕೇಂಡಿನ ಈಸ್ವರ ದೇವೆರ್ ಬತ್ತ್ ದ್ ಬುಲಿಪುನ ಕಾರಣ ಕೇನುವೆರ್.
ಪಾರ್ವತಿ ಬಾಲೆ ಉಂಡಾಯಿನ ಕತೆ ಪನ್ಪೆರ್, ತಾನ್ ಆ ಬಾಲೆ ದಾಂತೆ ಬದ್ ಕರೆ ಪಿನಯೆ, ಎಂಕ್ ಬಾಲೆ ಬೋಡು ಪಂಡ್ ದ್ ಹಠ ಕಟ್ಟುವೆರ್. ಬಾಲೆ, ಆಯೆ ಎನ್ನ ಮೈಟ್ ಬುಲೆಯಿನ ಮಣ್ಷ್ ದ ಮಗೆ,ಎನ್ನನೇ ಮಗೆ ಪನ್ಪೆರ್.
ಬಾಲೆಗ್, ಅಪ್ಪೆ, ಯಾನ್ ಏರ್ ಪನ್ಪಿನ ಸತ್ಯೊನು ಪಂಡುಜೊಲು.ಬಾಲೆ ಕೇಂಡ್ ಜೆ.ಅಂಚಾದ್ ಯನಾ ತಪ್ಪುಗ್ರಹಿತೆ.”ಪುರುಷಾವಲಂಬನೆ ಇಲ್ಲದೆ ಪ್ರಕೃತಿ ಫಲವತಿಯಾಗಲು ಸಾಧ್ಯವೇ” ಇಂಚಲಾ ಎಣ್ಣಿಯೆ : ಪಂಡ್ ದ್ ಈಸ್ವರ ದೇವೆರ್ ಎನ್ನುವೆರ್. ಈ ಸಂದರ್ಬೊ ಅವರೆ ಇತ್ತಿನವಾ ದಾನ್ನ…!
ಪಾರ್ವತಿ ….‌ಎಂಕ್ ಬಾಲೆ ಬೋಡು ಪಂಡ್ ದ್ ಮುರಿಯೊಂದು ಬುಲಿತೊಂದುಲ್ಲೆರ್.ಆರ್ ಜಗತ್ತ್ ದ ಅಪ್ಪೆನ ಜಾಗ್ ಡ್ ಇತ್ತಿನಾರಾಂಡಲಾ ತಾನ್ ಉಂಡು ಮಲ್ತಿನ ಬಾಲೆ ಎಂಕ್ ಬೋಡೇ ..ಇಂಚ ಚದಿ‌ಕಟ್ಟುವೆರ್.
“ಬಡ್ಕಾಯಿ ತರೆ ಪಾಡ್ದ್ ಜೇಯಿದಿನ ನರಮಾನ್ಯನ
ರುಂಡು ಕನಲೆ” …..ಗಣೊಕುಲೆಗ್ ಲೆತ್ತ್ ಪಣ್ಪರ್ ದೇವೆರ್. ಊರೊರ್ಮೆ ನಾಡ್ಂಡಲಾ ನರಮಾನಿ ತಿಕ್ಕೂಜಿ,ಅಕೇರಿಗ್ ಬಡ್ಕಾಯಿ ತರೆಪಾಡ್ದ್ ಜೆಯಿದಿನ‌ ಆನೆದ ತರೆ ಪತೊಂದು ಬತ್ತೆರ್ ಗಣೊಕುಲು.ಈ ತರೆನ್ ಜೋಡಿತ್ ದ್ ಜೀವ ಕಲೆ ಕೊರ್ಪೆರ್ ಈಸ್ವರ ದೇವೆರ್.
” ಗಣೊಕುಲೆಗ್ ಗುರ್ಕಾರೆ ಆದ್,ಕೋಟಿ ಕೋಟಿ ದೇವೆರ್ನಕುಲು ಉಲ್ಲೆರ್ಡಲಾ ಸುರೂತ ಪೂಜೆ ಪಡೆತೊಂದು ,ಎಸಕ ಕರಿಪುನ ದೇವೆರಾದ್ ಜಗತ್ತ್ ಡ್ ಸ್ತಾನಮಾನ ಪಡೆಲಾ” ಇಂಚ ಬಾಲೆಗ್ ವರ ಕೊರ್ಪೆರ್ ಈಸ್ವರ ದೇವೆರ್.ಬಾಲೆ ಗಜಮುಕೆ ಆಪೆ.
ತನನ್ ತನ್ನ ಇಲ್ಲ ಬಾಕಿಲ್ಡ್ ತಡತಿನಾಯಗ್ ಶಿಕ್ಷೆ ಕೊರಿಯೆರ್ ಈಸ್ವರ ದೇವೆರ್.ಪಾರ್ವತಿ ಉಂಡು ಮಲ್ತ್ ದ್ ಜೀವಕಲೆಕೊರಿನ ಬಾಲೆನ್ ಕೆರ್ದ್ ಆನೆದ ರುಂಡು ಜೋಡಿತ್ ದ್ ಕುಡೊರ ಜೀವಕಲೆ ಕೊರ್ದು
ಬಾಲೆ ಗನಪತಿಗ್ ಪಾರ್ವತಿ ಮಾತ್ರ ಅಪ್ಪೆ ಅತ್ತ್ ತಾನ್ ಅಮ್ಮೆ ಪನ್ಪಿನ ಸಂಗತಿನ್ ಜಗತ್ತ್ ಗ್ ತೆರಿಪಾವೆರ್.
ಗಣಪತಿ, ಆನೆಮೋನೆದಾಯೆ ಇಂಚ ಸಾರಕಟ್ಲೆಡ್ ಪುದಾರೆ ಪಡೆತೊಂದು,ಸುರೂತ ಪೂಜೆ ಪಡೆತೊನುನ ದೇವೆರಾದ್ ವರ್ಸೊಗೊರ ಕಟಿ ಇಲ್ಲ್ ಬುಡಂದೆ ಸಾರ್ಪತ್ಯ ಆಪುನಾರ್ ಇನಾಯಕ ದೇವೆರ್.ಈತಾಂಡಲಾ ‘ಅಪ್ಪೆ ಪಾರ್ವತಿ ದೇವಿನ ಮೈತ ಮಣ್ಷ್ ಡ್ ಮೂಡ್ದು ಬತ್ತಿನೆಟ್ಟ್ ಈರ ಮಣ್ಣ್ ದ ಮಗೆ. ಈ ಪುಗಾರ್ತೆ ಇರೆಗ್ ಸುರುಟು ಸಂದುಂಡು ದೇವೆರೆ’. ‌ • ಕೆ.ಎಲ್.ಕುಂಡಂತಾಯ ~~~~~~~~~~~~~~~~