ಶ್ರೀ ವಿಶ್ವಪ್ರಸನ್ನ ತೀರ್ಥ ಶ್ರೀಪಾದೆರೆನ 60 ನೇ ಪುಟ್ಟು ಪರ್ಬ..

ಶ್ರೀ ವಿಶ್ವಪ್ರಸನ್ನ ತೀರ್ಥ ಶ್ರೀಪಾದೆರೆನ 60 ನೇ ಜನ್ಮವರ್ಧಂತಿ
ಸುವರ್ಣಾಭಿಷೇಕ ದೊಟ್ಟುಗ್ ಗುರುವಂದನೆ ಮಲ್ತಿನ ಭಕ್ತೆರು.
ತಂಕಾದ್ ಬದುಕಂದೇ ಕುಡೊರಿಯನ ಹಿತಕ್ಕಾದ್ ಶ್ರಮ ಮಲ್ಪುನೇಟ್ ಜನ್ಮ ಸಾರ್ಥಕ್ಯ- ಶ್ರೀಕ್ಲೆನ ಸಂದೇಶ ..
ಪರಪುನ ನೀರುದ ಮಿತ್ತ್ ನುಂಗುದಿನ ಇರೆಲಾ ತೇಲೊಂದ್ ಬರ್ಪುಂಡ್ . ದೋಣಿಲಾ ತೇಲೊಂದ್ ಸಾಗುಂಡ್.ಆಂಡ ಇರೆತ್ತ ಮಿತ್ತ್ ಪಕ್ಕಿ ಕುಲ್ಲುಂಡಲಾ ಇರೆ ಮುರ್ಕುದ್ ಪೋಪುಂಡ್. . ‌ಆಂಡ ದೋಣಿ ಜನಕ್ಲೆನ್ ತುಂಬೊಂದ್ ದಡ ಸೇರಾವುಂಡ್ .ಇಂಚ ತನ್ನ ಅಸ್ತಿತ್ವಗ್ ಸಾರ್ಥಕ್ಯ ಕನಪುಂಡ್.ನಮ್ಮ ಮಾತೆರೆನ ಜೀವನಲಾ ದೋಣಿದಲೆಕ್ಕ ಆಂಡ ಜನ್ಮಗೊಂಜಿ ಸಾರ್ಥಕ್ಯ ಬರ್ಪುಂಡ್ . ಅಂಚಿನ ಮಲ್ಲ ಮಾನವ ಜನ್ಮ ಎಡ್ಡೆತನೊಗ್ ವಿನಿಯೋಗ ಆಪಿಲೆಕ್ಕ ತೂವೊನೊಡ್ . ಸೂರ್ಯಾಸ್ತ ತೂದ್ ಸಂಭ್ರಮ ಮಲ್ಪುವ . ಆಂಡ ಅವ್ವೇ ಸೂರ್ಯಾಸ್ತ ನಮ್ಮ ಜೀವನದ ಒಂಜಿ ದಿನ ಕಳೆದು ಪೋಪುಂಡ್ . ಮಲ್ಪೊಡಾಯಿನ ಕರ್ತವ್ಯ ಬೋಡಾಯಿನಾತ್ ಉಂಡು. ಪಂಡುದು ಎಚ್ಚರಿಕೆ ಕೊರ್ಪಿನವ್ವೆನ್ ಮದಪರೆಗ್ ಬಲ್ಲಿ ಪಂಡುದು ಶ್ರೀ ವಿಶ್ವಪ್ರಸನ್ನತೀರ್ಥ ಶ್ರೀಪಾದೆರು ಸಂದೇಶ ಕೊರಿಯೆರು .
ತಮ್ಮ 60 ನೇ ಪುಟ್ಟುಪರ್ಬದ ಪ್ರಯುಕ್ತ ಭಕ್ತಾಭಿಮಾನಿಲು ಆಯೋಜನೆ ಮಲ್ತಿನ ಗುರುವಂದನಾ ಕಾರ್ಯಕ್ರಮಡ್ ಸುವರ್ಣಾಭಿಷೇಕ ಪುಷ್ಪಾಭಿಷೇಕ ಸೇರ್ದ್ ಅಭಿವಂದನೆ ಸ್ವೀಕರಿಸಾದ್ ಅನುಗ್ರಹ ಸಂದೇಶ ಕೊರಿಯೆರು ‌.
ಉಡುಪಿ ಸಮೀಪ ಮುಚ್ಲುಕೋಡು ಸುಬ್ರಹ್ಮಣ್ಯ ದೇವಸ್ಥಾನದ ಸಭಾಂಗಣಡ್ ಕಾರ್ಯಕ್ರಮ‌ ನಡತುಂಡ್ . ವೇದಮೂರ್ತಿ ರಾಮಕೃಷ್ಣ ತಂತ್ರಿ ಬೊಕ್ಕ ವಿದ್ವಾನ್ ಲಕ್ಷ್ಮೀನಾರಾಯಣ ತಂತ್ರಿಲೆನ ನೇತೃತ್ವಡ್ ಋತ್ವಿಜೆರೆಡ್ದ್ ಶ್ರೀಕ್ಲೆಗ್ ಶ್ರೇಯಸ್ಸುನ್ ಪ್ರಾರ್ಥನೆ ಮಲ್ತುದ್ ಧನ್ವಂತರಿ ಯಾಗ ವಿರಜಾ ಹೋಮೊಲು , ಶ್ರೀ ಸುವ್ರಹ್ಮಣ್ಯ ದೇವರೆಗ್ ವಿಶೇಷ ಅಭಿಷೇಕ ಪೂಜೆ ನಡತುಂಡ್ .ಶ್ರೀಕುಲು ಯಾಗದ ಪೂರ್ಣಾಹುತಿಡ್ ಪಾಲ್‌ಪಡೆಯಿನ ಬೊಕ್ಕ ಪಟ್ಟದ ದೇವೆರಾಯಿನ ಶ್ರೀ ರಾಮವಿಠಲ ದೇವೆರೆನ ಪೂಜೆ ನಡಪಾದ್ ಭಿಕ್ಷೆ ಸ್ವೀಕಾರ ಮಲ್ತೆರ್. ಬೊಕ್ಕ ನಡತಿನ ಗುರುವಂದನಾ ಸಭಾ ಕಾರ್ಯಕ್ರಮಡ್ ವಿದ್ವಾನ್ ರಘೂತ್ತಮಾಚಾರ್ಯ ನಾಗಸಂಪಿಗೆ , ವಿದ್ವಾನ್ ವೇಂಕಟೇಶಾಚಾರ್ಯ ಕುಲಕರ್ಣಿ ಅಭಿನಂದನಾ ಪಾತೆರ ಪಾತೆರಿಯೆರ್ . ವಿದ್ವಾನ್ ಷಣ್ಮುಖ ಹೆಬ್ಬಾರ್ ಸ್ವಾಗತ ಮಲ್ತೆರ್ . ಮುಚ್ಲುಕೋಡು ಸೀಮೆದ ವಿಪ್ರಬಂಧುಲು ಶ್ರೀಕ್ಲೆಗ್ ಸುವರ್ಣಾಭಿಷೇಕ ಪುಷ್ಪಾಭಿಷೇಕ. ಫಲ ಕಾಣಿಕೆ ಮಂಗಳಾರತಿ ಅರ್ಪಿಸಾಯೆರ್ . ಸಂಘ ಸಂಸ್ಥೆದ ಪದಾಧಿಕಾರಿಲು ಶ್ರೀಕ್ಲೆಗ್ ಫಲಪುಷ್ಪ ಸಹಿತ ಅಭಿವಂದನೆ ಸಲ್ಲಿಸಾಯೆರ್ .

ವಾಸುದೇವ ಭಟ್ ಪೆರಂಪಳ್ಳಿ ಪ್ರಸ್ತಾವನೆ ಧನ್ಯವಾದ ಸಹಿತ ಕಾರ್ಯಕ್ರಮ‌ ನಿರೂಪಣೆ ಮಲ್ತೆರು . ದೇವಳದ ಅರ್ಚಕ ವೃಂದ ,ವ್ಯವಸ್ಥಾಪಕ ರಾಜಶೇಖರ್ , ಪೇಜಾವರ ಮಠದ ಸಿ‌ಇ‌ಒ ಸುಬ್ರಹ್ಮಣ್ಯ ಭಟ್ , ಇಂದು ಶೇಖರ ಹೆಗಡೆ ಶ್ರೀಕ್ಲೆನ ಆಪ್ತೆರಾಯಿನ ವಿಷ್ಣು‌ಮೂರ್ತಿ ಆಚಾರ್ಯ ,ಕೃಷ್ಣ ಭಟ್ , ಸುಬ್ರಹ್ಮಣ್ಯ ಆಚಾರ್ಯ , ಮೊಕುಲು ಸಹಕಾರ ಕೊರಿಯೆರು. ಶಾಸಕ ಕೆ ರಘುಪತಿ ಭಟ್ , ಡಾ ವ್ಯಾಸರಾಜ ತಂತ್ರಿ ಡಾ ಚಂದ್ರ ಶೇಖರ್ , ಯಶ್ಪಾಲ್ ಸುವರ್ಣ , ಭುವನೇಂದ್ರ ಕಿದಿಯೂರು ಮುರಳಿ ಕಡೆಕಾರ್ ,ಪ್ರದೀಪ್ ಕಲ್ಕೂರ ,ಪ್ರೊ ಎಂ ಬಿ ಪುರಾಣಿಕ್ , ಉಮೇಶ ಶೆಟ್ಟಿ , ಜಗದೀಶ್ ಪೈ , ಹರಿದಾಸ ಭಟ್ ಮುಂಬಯಿ , ನಾಗರಾಜ ಪುರಾಣಿಕ್ ಶಾಮಲಾ ಕುಂದರ್ , ಶ್ರೀಶ ನಾಯಕ್ ಸೇರಿನಂಚ ಭಕ್ತಾದಿಲು ಹೆಚ್ವಿನ ಸಂಖ್ಯೆಡ್ ಪಾಲ್ ಪಡೆಯೆರ್. ಚಿತ್ರನಟಿ ಬಿಜೆಪಿ ನಾಯಕಿ ಮಾಳವಿಕಾ ಬತ್ತುದ್ ಶ್ರೀಕ್ಲೆಗ್ ಗೌರವ ಸಲ್ಲಿಸಾಯೆರು ‌.