ಉಚ್ಚಿಲ ಶ್ರೀ ಮಹಾಲಕ್ಷ್ಮೀ ದೇಗುಲಡ್ ಗೌಜಿದ ‘ಉಡುಪಿ –ಉಚ್ಚಿಲ ದಸರಾ-2025’
ಉಚ್ಚಿಲ : ದಕ್ಷಿಣ ಕನ್ನಡ ಮೊಗವೀರ ಮಹಾಜನ ಸಂಘ ಸಂಚಾಲಿತ ಉಚ್ಚಿಲ ಶ್ರೀ ಮಹಾಲಕ್ಷ್ಮೀ ದೇವಸ್ಥಾನಡ್ 4ನೇ ಸರ್ತಿ ಗ್ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ ಬೊಕ್ಕ ಭಕ್ತಾಭಿಮಾನಿಲೆನ ಸಹಕಾರದೊಟ್ಟುಗ್ “ಉಡುಪಿ-ಉಚ್ಚಿಲ ದಸರಾ-2025” ಸೆಪ್ಟೆಂಬರ್ 22ಡ್ದ್ ಅಕ್ಟೋಬರ್ 2 ಮುಟ್ಟ ಶ್ರೀ ಕ್ಷೇತ್ರದ ಶ್ರೀಮತಿ ಶಾಲಿನಿ ಡಾ. ಜಿ. ಶಂಕರ್ ಸಭಾಂಗಣಡ್ ನಡಪರೆಗುಂಡ್ ಪಂಡುದು ಸಂಸ್ಥೆದ ಗೌರವ ಸಲಹೆಗಾರ ನಾಡೋಜಾ ಡಾ. ಜಿ ಶಂಕರ್ ಮಾಹಿತಿ ಕೊರಿಯೆರು.
ಉಚ್ಚಿಲ ಶ್ರೀ ಮಹಾಲಕ್ಷ್ಮಿ ದೇವಸ್ಥಾನಡ್ ಕರಿನ 3 ವರ್ಷಡಿಂಚಿ ಆಯೋಜನೆ ಮಲ್ದಿನ ದಸರಾ ಮಹೋತ್ಸವ ಜಾಗತಿಕ ಮಟ್ಟಡ್ ಖ್ಯಾತಿ ಪಡೆದುಂಡ್.. ಆಕರ್ಷಕವಾದ್ ನಿರ್ಮಾಣ ಮಂಟಪಡ್ ನವದುರ್ಗೆಯೆರು ಬೊಕ್ಕ ಶ್ರೀ ಶಾರದಾ ಮಾತೆನ ವಿಗ್ರಹಲೆನ್ ಪ್ರತಿಷ್ಠಾಪನೆ ಮಲ್ತುದ್ 11 ದಿನ ಕಾಲ ಶಾಸ್ತ್ರೋಕ್ತವಾದ್ ಪೂಜೆ ಮಲ್ಪುಂಡ್. ಸೆ. 22ಗ್ ಕಾಂಡೆ 9 ಗಂಟೆಗ್ ನವದುರ್ಗೆಯೆರೆನ ಬೊಕ್ಕ ಶ್ರೀ ಶಾರದಾ ಮಾತೆನ ವಿಗ್ರಹಲೆನ್ ಕ್ಷೇತ್ರದ ತಂತ್ರಿಲಾಯಿನ ಶ್ರೀ ಕುಕ್ಕಿಕಟ್ಟೆ ರಾಘವೇಂದ್ರ ತಂತ್ರಿ ಬೊಕ್ಕ ಪ್ರಧಾನ ಅರ್ಚಕೆರಾಯಿನ ರಾಘವೇಂದ್ರ ಉಪಾಧ್ಯಾಯೆರೆನ ನೇತೃತ್ವಡ್ ಪ್ರತಿಷ್ಠಾಪನೆ ಮಲ್ಪುಂಡ್..
ಶರನ್ನವರಾತ್ರಿದ ಪ್ರಯುಕ್ತ ಶ್ರೀ ಕ್ಷೇತ್ರಡ್ ಪ್ರತೀದಿನ ಕಾಂಡೆ 9 ಗಂಟೆ ಡ್ದ್ ಮಧ್ಯಾಹ್ನ 12 ಗಂಟೆಮುಟ ಚಂಡಿಕಾಹೋಮ, ಮಧ್ಯಾಹ್ನ 12 ಗಂಟೆ ಡ್ದ್ 3 ಗಂಟೆಮುಟ್ಟ ಅನ್ನಸಂತರ್ಪಣೆ, ಬಯ್ಯ 6.30ಗಂಟೆಡ್ದ್ ಭಕ್ತೆರೆಗ್ ಪ್ರಸಾದ ವಿತರಣೆ, 5.30 ಗಂಟೆ ಡ್ದ್ 6.15ಮುಟ್ಟ ಸುಮಂಗಲೆಯೆರೆಡ್ದ್ ಸಾಮೂಹಿಕ ಕುಂಕುಮಾರ್ಚನೆ ನಡಪರೆಗುಂಡ್..ದಿನೊಲಾ ಕಾಂಡೆ 10 ಗಂಟೆ ಡ್ದ್ ಭಜನಾ ಕಾರ್ಯಕ್ರಮ, ದಿನೊಲಾ ಬಯ್ಯಗ್ ಧಾರ್ಮಿಕ ಸಭಾ ಕಾರ್ಯಕ್ರಮ, ದಿನೊಲಾ ರಾತ್ರೆಗ್ 8.30 ಗಂಟೆ ಡ್ದ್ ಕಲ್ಪೋಕ್ತ ಪೂಜೆ, ಅ.2, ಗುರುವಾರ ವಿಜಯದಶಮಿದಾನಿ ಸಾಮೂಹಿಕ ಮಹಾಚಂಡಿಕಾಯಾಗ ಬೊಕ್ಕ ಮಹಾಪೂರ್ಣಾಹುತಿ ನಡಪರೆಗುಂಡ್ ಪಂಡೆರು.
ದಿನೊಲಾ ಸಾಂಸ್ಕೃತಿಕ ಕಾರ್ಯಕ್ರಮದ ಅಂಗವಾದ್ ರಂಗೋಲಿ ಸ್ಪರ್ಧೆ, ಚಿತ್ರಕಲಾ ಸ್ಪರ್ಧೆ, ಪೊಂಜೊವುನಕ್ಲೆಗ್ ಪಿಲಿಕುಣಿತ ಸ್ಪರ್ಧೆ, ದೇಹದಾಢ್ಯ ಸ್ಪರ್ಧೆ, ನೃತ್ಯ ಸ್ಪರ್ಧೆ, ನಾಟಕ, ಸುಗಮ ಸಂಗೀತ, ಯಕ್ಷಗಾನೊಲು ನಡಪರೆಗುಂಡ್..
ದಸರಾ ಸಂದರ್ಭಡ್ ಶ್ರೀ ಕ್ಷೇತ್ರ ಸಂದರ್ಶನ ಮಲ್ಪರೆಗ್ ಮಂಗಳೂರುಡ್ದ್ ಬರ್ಪಿನ ಭಕ್ತಾದಿಲೆನ ವಾಹನೊಲು ಸರಸ್ವತಿ ಶಾಲೆದ ಮೈದಾನಡ್ ಬೊಕ್ಕ ಉಡುಪಿಡ್ದ್ ಬರ್ಪಿನ ವಾಹನಲೆಗ್ ಮಹಾಲಕ್ಷ್ಮಿ ಇಂಗ್ಲೀಷ್ ಮೀಡಿಯಂ ಶಾಲೆದ ಪಕ್ಕದ ಮೈದಾನಡ್ ಪಾರ್ಕಿಂಗ್ ವ್ಯವಸ್ಥೆ ಮಲ್ಪುಂಡ್.. ಭಕ್ತೆರೆಗ್ ಸುಲಭವಾದ್ ದೇವೆರೆನ ದರ್ಶನ ಪಡೆಯರೆಗ್ ಅವಕಾಶ ಮಲ್ತ್ ಕೊರ್ರೆಗ್ ಬೊಕ್ಕ ಮಹಾ ಅನ್ನಸಂತರ್ಪಣೆ ಕಾರ್ಯೊಗ್ ಸಹಕಾರ ಮಲ್ಪರೆಗ್ ದಿನೊಲಾ 1,500 ಸ್ವಯಂಸೇವಕೆರು, ಸ್ವಚ್ಛತಾ ಕಾರ್ಯಕ್ರಮಡ್ ಮಹಿಳಾ ತಂಡೊಲು, ಸ್ಕೌಟ್ಸ್ ಬೊಕ್ಕ ಗೈಡ್ಸ್ ವಿದ್ಯಾರ್ಥಿಲು ಸಹಕಾರ ಕೊರ್ಪೆರ್.
ಸೆ. 21ಗ್ ಬಯ್ಯಗ್ 6.30ಗಂಟೆಗ್ ಪಡುಬಿದ್ರಿಡ್ದ್ ಕಾಪು ಕಡಲ ತೀರಮುಟ್ಟ ಮಲ್ದಿನ ವಿದ್ಯುದ್ದೀಪಾಲಂಕಾರದ ಉಧ್ಘಾಟನಾ ಸಮಾರಂಭ ಗಣ್ಯೆರೆನ ಉಪಸ್ಥಿತಿಡ್ ನಡಪರೆಗುಂಡ್ ಪಂಡೆರು.ದಸರಾ ಮಹೋತ್ಸವ ಪ್ರಯುಕ್ತ ಫಲಪುಷ್ಪ ಪ್ರದರ್ಶನ, ಗುಡಿ ಕೈಗಾರಿಕಾ ಪ್ರಾತ್ಯಕ್ಷಿಕೆ, ಸಮುದ್ರದ ಜೀವದ ಮೀನು ಬೊಕ್ಕ ತುದೆ ಮೀನುಲೆನ ಪ್ರದರ್ಶನ, ಮರಳು ಕಲಾಕೃತಿ, ಕುಬ್ಜ ಸಹೋದರೆರೆನ ಕಲಾಕೃತಿ, ಜನಜಾಗೃತಿ ಕಲಾಕೃತಿ, ವಿಶೇಷ ಶಾಲೆ ಜೋಕ್ಲೆನ ಕಲಾಕೃತಿ ಸೇರಿನಂಚ ಬೇತೆ ಬೇತೆ ಪ್ರದರ್ಶನೊಲು ಉಪ್ಪುಂಡ್..
ಕಾಪು ಬೀಚ್ ಡ್ ಗಂಗಾರತಿ, ರಸಮಂಜರಿ, ಆಕರ್ಷಕ ಸುಡುಮದ್ದು ಪ್ರದರ್ಶನ, ಬೊಕ್ಕ ನವದುರ್ಗೆಯೆರೆಗ್ , ಶಾರದಾ ಮಾತೆ ಬೊಕ್ಕ ಅಂಬಾರಿ ತುಂಬುದಿನ ಆನೆಗ್ ಡ್ರೋನ್ ಮೂಲಕ ಪುಷ್ಪಾರ್ಚನೆ ಮಲ್ಪುನ ಕಾರ್ಯಕ್ರಮ ಕೂಡ ವಿಶೇಷ ವ್ಯವಸ್ಥೆ ಮಲ್ದುಂಡ್.. ಪತ್ರಿಕಾಗೋಷ್ಠಿಡ್ ದ.ಕ ಮೊಗವೀರ ಮಹಾಜನ ಸಂಘದ ಅಧ್ಯಕ್ಷ ಜಯ ಸಿ . ಕೋಟ್ಯಾನ್ ಬೆಳ್ಳಂಪಳ್ಳಿ, ಉಪಾಧ್ಯಕ್ಷ ಮೋಹನ್ ಬೇಂಗ್ರೆ, ಕಾರ್ಯದರ್ಶಿ ಶರಣ್ ಕುಮಾರ್ ಮಟ್ಟು, ಕ್ಷೇತ್ರಾಡಳಿತ ಸಮಿತಿ ಅಧ್ಯಕ್ಷ ಗಿರಿಧರ ಸುವರ್ಣ, ಉಚ್ಚಿಲ ದಸರಾ ಉತ್ಸವ ಸಮಿತಿ ಅಧ್ಯಕ್ಷ ವಿನಯ ಕರ್ಕೇರ, ಮಹಿಳಾ ಸಂಚಾಲಕಿ ಸಂಧ್ಯಾದೀಪ ಸುನೀಲ್, ದೇವಳದ ಪ್ರಧಾನ ಅರ್ಚಕ ರಾಘವೇಂದ್ರ ಉಪಾಧ್ಯಾಯ, ಉಷಾ ರಾಣಿ ಮಂಗಳೂರು, ಮನೋಜ್ ಕಾಂಚನ್, ಸುಜಿತ್ ಸಾಲ್ಯಾನ್, ಸತೀಶ್ ಬಾರ್ಕೂರು, ಶಿವಕುಮಾರ್ ಮೆಂಡನ್, ಸುಗುಣ ಕರ್ಕೇರ ಬೊಕ್ಕ ದೇವಳದ ಪ್ರಧಾನ ವ್ಯವಸ್ಥಾಪಕ ಸತೀಶ್ ಅಮೀನ್ ಪಡುಕರೆ ಉಪಸ್ಥಿತರಿತ್ತೆರು.
by 