ಉಡುಪಿ ದಸರಾ-2025

ಸಾರ್ವಜನಿಕ ಶ್ರೀಶಾರದೋತ್ಸವ ಸಮಿತಿದ ದಶಮ ವರ್ಸೊದ ಸಂಭ್ರಮೊದ 5 ನೇ ಪೂರ್ವಭಾವಿ ಸಭೆ ಒಡಿಪುದ ಶ್ರೀಕೃಷ್ಣ ಮಠೊತ ರಾಜಾಂಗಣೊಡು ನಡತುಂಡ್.
ಈ ಸರ್ತಿ ದ ಶಾರದೋತ್ಸವ ಸೆಪ್ಟೆಂಬರ್ 22 ರ್ದ್ ಸುರುವಾದ್ ಅಕ್ಟೋಬರ್ 2 ತಾರೀಕ್ ಮುಟ್ಟ ಪರ್ಯಾಯ ಶ್ರೀ ಪುತ್ತಿಗೆ ಮಠೊತ ಸಹಯೋಗೊಡು ಪರ್ಯಾಯ ಶ್ರೀ ಸುಗುಣೇಂದ್ರ ತೀರ್ಥ ಶ್ರೀಪಾದೆರ್, ಬೊಕ್ಕ ಶ್ರೀ ಸುಶೀಂದ್ರ ತೀರ್ಥ ಶ್ರೀಪಾದೆರೆನ ಆಶೀರ್ವಾದದೊಟ್ಟುಗು ಭಾರೀ ಗೌಜಿಡ್ ನಡಪರೆಗುಂಡ್.
ಅಕ್ಟೋಬರ್ 3 ನೇ ತಾರೀಕ್ ಗ್ ಉಡುಪಿ ದಸರಾ ದ ಬೃಹತ್ ಶೋಭಾಯಾತ್ರೆ ಲ ನಡಪುಂಡು ಪಂಡ್ ದ್ ಶಾರದೋತ್ಸವ ಸಮಿತಿ ದ ಅಧ್ಯಕ್ಷೆರಾಯಿನ ಶ್ರೀ ಸುಪ್ರಸಾದ್ ಶೆಟ್ಟಿ ಬೈಕಾಡಿ ತೆರಿಪಾಯೆರ್.
ಈ ಸಂದರ್ಭೊಡು ಸಾರ್ವಜನಿಕ ಶ್ರೀ ಶಾರದೋತ್ಸವ ದ ದಶಮ ಸಂಭ್ರಮ “ಉಡುಪಿ ದಸರಾ” ದ ಪೋಸ್ಟರ್ ನ್ ಪರ್ಯಾಯ ಶ್ರೀ ಪುತ್ತಿಗೆ ಮಠೊತ ಸ್ವಾಮೀಜಿಲಾಯಿನ ಶ್ರೀ ಸುಗುಣೇಂದ್ರ ತೀರ್ಥ ಶ್ರೀಪಾದೆ ರ್ ಗೀತಾ ಮಂದಿರೊಡು ಬುಡುಗಡೆ ಮಲ್ತೆರ್.
ಪತ್ತನೇ ವರ್ಸೊದ ಶಾರದಾ ಪ್ರತಿಷ್ಟೆ, ಬೊಕ್ಕ ಪೂಜಾಮಹೋತ್ಸವ ಅತ್ಯಂತ ವ್ಯವಸ್ಥಿತವಾದ್ ಬೊಕ್ಕ ವೈಭವಯುತವಾದ್ ನಡಪೊಡು ಪನ್ಪಿನ ನಿಟ್ಟ್ ಡ್ ಬೇತೆ ಬೇತೆ ಸಮಿತಿಲೆನ್ ರಚನೆ ಮಲ್ತ್ ದ್ ಸದಸ್ಯರೆಗ್ ಜವಾಬ್ದಾರಿಲೆನ್ ಪಟ್ಟ್ ದ್ ಕೊರ್ಪಿನ ಕೆಲಸ ಲ ನಡತೊಂದುಂಡು. ಶ್ರೀಕೃಷ್ಣ ಮಠೊತ ರಾಜಾಂಗಣೊಡು 11 ದಿನೊತ ಕಾಲ ನಡಪರೆಗುಪ್ಪುನ ಶ್ರೀ ಶಾರದಾ ಮಹೋತ್ಸವೊಡು, 11 ದಿನೊಲ ರಂಗ್ ರಂಗ್ ದ ಸಾಂಸ್ಕೃತಿಕ, ಧಾರ್ಮಿಕ ಕಾರ್ಯಕ್ರಮೊಲು ನಡಪುಂಡ್, ಅಯಿಕಾದ್ ಜಿಲ್ಲೆ ಬೊಕ್ಕ ರಾಜ್ಯೊದ ಬೇತೆ ಬೇತೆ ಕಡೆರ್ದ್ ಪುಗಾರ್ತೆದ ಕಲಾತಂಡೊಲು ಬೊಕ್ಕ ಕಲಾವಿದೆರೆನ್ ಸಂಪರ್ಕ ಮಲ್ಪುನ ಕೆಲಸ ಆವೊಂದುಂಡು, ಶಾಲೆ ಬೊಕ್ಕ ಕಾಲೇಜಿದ ಜೋಕುಲು ಬೊಕ್ಕ ಸಾರ್ವಜನಿಕ ವಿಭಾಗೊಡು ಬೇತೆ ಬೇತೆ ಪಂತೊಲೆನ್ ಆಯೋಜನೆ ಮಲ್ಪುನ ವಿಚಾರೊಡು ಲ ಸಭೆಟ್ ತೀರ್ಮಾನ ಆಂಡ್.
ಈ ಪೊರ್ತುಡು ಪರ್ಯಾಯ ಪುತ್ತಿಗೆ ಮಠೊತ ಶ್ರೀ ನಾಗರಾಜ ಆಚಾರ್ಯ, ಪರ್ಯಾಯ ಸಮಿತಿದ
ರಮೇಶ್ ಭಟ್, ಶಾರದೋತ್ಸವ ಸಮಿತಿದ ಗುರ್ಕಾರೆ ಸುಪ್ರಸಾದ್ ಶೆಟ್ಟಿ ಬೈಕಾಡಿ, ಸಮಿತಿದ ಅರ್ಚಕೆರಾಯಿನ ದಾಮೋದರ್ ಭಟ್, ಸಮಿತಿದ ಪ್ರಮುಖೆರಾಯಿನ ಮಟ್ಟು ಲಕ್ಷ್ಮಿನಾರಾಯಣ ರಾವ್, ಜೀ. ವಿ.ಆಚಾರ್ಯ, ರಾಧಾಕೃಷ್ಣ ಮೆಂಡನ್, ಶ್ರೀಮತಿ ತಾರಾ ಆಚಾರ್ಯ, ವೀಣಾ ಎಸ್ ಶೆಟ್ಟಿ, ವಿಗ್ರಹ ರಚನಾಕಾರೆ ಶಿವಮೊಗ್ಗದ ಕುಬೇರ, ಸತೀಶ್ ಕುಮಾರ್ , ಜಯರಾಮ್ ದೇವಾಡಿಗ,ಸುರೇಶ್ ಸೇರಿಗಾರ್,ದೀಪಕ್ ಶೇಟ್, ಜಯರಾಂ ಜಿ, ಸಂತೋಷ್ ಜತ್ತನ್, ಸುಖನ್ಯಾಶೇಖರ್, ಸುಜಾತಾ ದೇವಾಡಿಗ, ಸರೋಜಾ ಶೆಣೈ, ಸರೋಜಾ ಯಶವಂತ್,ಭಾರತೀ ಎಸ್ ಶೆಟ್ಟಿ, ಪ್ರಭಾವತಿ ಅಲೆವೂರ್, ರೂಪಶ್ರೀ, ತಾರಾ ಸತೀಶ್, ಅಂಚೆನೇ ಸಮಿತಿ ದ ಪದಾಧಿಕಾರಿಲು ಬೊಕ್ಕ ಸದಸ್ಯೆರ್ ಸಭೆಟ್ ಪಾಲ್ ಪಡೆದಿತ್ತೆರ್.