ಪೊಣ್ಣು
ಪ್ರೀತಿ ಕೊರ್ಪಿ ಅಪ್ಪ ಮೋಕೆ ಮಲ್ಪಿ ಮಾಮು ಕೊಂಡಾಟದ ಮೆಗ್ದಿ ಜಾಹ್ನವಿ(ಜಾನು)ಉಂದು ನಮಿತನ ಸಂಸಾರ ಪ್ರಾಯ 30 ಕರೀಂಡಲಾ ಮದ್ಮೆ ಆವಂದೆ ಕುಲ್ದಲ್ ಈ ಕಿನ್ಯ ಸಂಸಾರಗಾದ್
ಜಾನು ಎಡ್ಡೆ ಓದುದು ದುಂಬು ಬರೊಡು ಪನ್ಪಿ ಆಸೆ ನಮಿತಗ್ ಆಂಡ ಓದುನ ಮಿತ್ತ್ದ ಆಸಕ್ತಿ ಕಮ್ಮಿ ಇತ್ತಿ ಜಾನು ಬಸ್ಸ್ಡ್ ಏಪಲಾ ತಿಕ್ಕುನ ಒಂಜಿ ಆಣನ್ ಮೋಕೆ ಮಲ್ತೊಂದಿತ್ತಲ್ ಆಯೆನೇ ಶಶಾಂಕ್ ಆಯೆ ಏಪಲಾ ಅಲೆಡ ಮದ್ಮೆದ ಒತ್ತಾಯ ಮಲ್ತೊಂದಿತ್ತೆ ಒಂಜಿ ದಿನ ಜಾನು ಧೈರ್ಯೊಡು ಬತ್ತ್ ಅಕ್ಕಡ ಶಶಾಂಕ್ನ ವಿಷಯ ಪನ್ಪಲ್ ಒರ ಮೆಗ್ದಿಡ ಬೆಚ್ಚ ಆಂಡಲಾ ನಮ್ಮ ಸಂಸಾರ ಮುಂದುವರಿಯೊಡು ಪನ್ಪಿ ಸ್ವಾರ್ಥೊಡು ಅಪ್ಪನ್ಲಾ ಮಾಮುನುಲಾ ಒಪ್ಪಿಸಾವಲ್ ಸಾಲ ಮೂಲ ಮಲ್ತ್ ಗೌಜಿಡೇ ಮದ್ಮೆ ಮಲ್ತ್ದ್ ಇಲ್ಲಗ್ ಅರ್ವತೆ ಆದ್ ಶಶಾಂಕ್ನ್ ಇಲ್ಲಗ್ ಸೇರ್ಸಾವಲ್
ದಿನ ಇಡೀ ಕುಸಿತ ವಾತಾವರಣ ಇಲ್ಲದ ರೂಪೊನೇ ಬದಲಾಪುಂಡು
ರಡ್ಡ್ ಮೂಜಿ ತಿಂಗೊಲುಡೇ ಜಾನು ಅಪ್ಪೆ ಆಪುನ ಸುದ್ದಿ ಕೊರ್ಪಲ್ ಕುಸಿತ ಮಿತ್ತ್ ಕುಸಿ ಉಂದುವೇ ನೆವನ ಪಂಡ್ದ್ ಇತ್ತಿನ ಬೇಲೆನ್ಲಾ ಬುಡ್ದು ಬೊಡೆದಿನ ಚಾಕಿರಿಗಾದ್ ಇಲ್ಲಡ್ ಕುಲ್ಲುವೆ ಶಶಾಂಕ್ ಬೆನ್ಪುನ ಕೈ ರಡ್ಡ್ ತಿನ್ಪುನ ಬಾಯಿ ಐನ್ ಆನಗ ಒಂತೆ ಎಚ್ಚನೇ ಬಂಙ ಆಪುಂಡು ನಮಿತಗ್ ಆಂಡಲಾ ಅಕ್ಲೆಗಾದ್ ಮಾತಾ ಸಹಿಸೊಂದು ತೆಲ್ತೊಂದೇ ಉಪ್ಪುವಲ್ ತಿಂಗೊಲು ಕರಿಯೊಂದು ಬತ್ತಿಲೆಕ್ಕ ಜಾನುನ ಸರೀರೊಡುಲಾ ಬದಲಾವಣೆ ಆವೊಂದು ಬತ್ತ್ಂಡ್ ಇಲ್ಲದುಲಾಯಿ ಪಿದಾಯಿದ ಬೇಲೆ ಜಬೆದಾರಿ ಸೇರ್ದ್ ನಮಿತ ಸೊರಗೊಂದು ಬತ್ತಲ್
ಆ ಒಂಜಿ ರಾತ್ರೆ ಎನ್ನಂದಿನ ನಡತ್ತ್ಂಡ್ ಆ ಇಲ್ಲಲ್ ನಡುರಾತ್ರೆ ನಮಿತಗ್ ಏರಾ ತನ್ನ ಮಿತ್ತ್ ಕೈ ಪಾಡ್ಲೆಕ್ಕಾದ್ ಒರಾನೇ ಬೊಬ್ಬೆ ಪಾಡ್ದ್ ಲಕ್ಕ್ದ್ ಲೈಟ್ ಪಾಡ್ದ್ ತೂನಗ ಕಣ್ಣೆದುರು ಶಶಾಂಕ್ ಬೊಬ್ಬೆ ಕೇಂದ್ ಮಾಮುಲಾ ಅಪ್ಪಲಾ ಬರ್ಪೆರ್ ಪರಿಸ್ಥಿತಿನ್ ಒರಿಯೊರಿ ಒಂಜೊಂಜಿ ನಮೂನೆ ಅರ್ಥ ಮಲ್ತೊಂಡೆರ್ ಮದ್ಮೆ ಆಯರೆ ಪನ್ನಗ ಆಯೆರೆ ಆಯಿಜಿ ಇತ್ತೆ ಮೆಗ್ದಿನ ಛೇ ಪಂದ್ ಅಮ್ಮೆರ್ ಪಿದಯಿ ಪೋಪೆರ್ ಮಾಮು ನಮಿತನ ಮೋನೆ ತೂದು ತರೆ ತಿರ್ತ್ ಪಾಡ್ದ್ ಪೋಪೆರ್ ಜಾನು ಪಿದಯಿಡೇ ಪೂರ ಕೆಬಿ ಕೊರ್ದು ಬುಲ್ತೊಂದು ಕೋಣೆಗ್ ಪೋಪಲ್ ಶಶಾಂಕ್ಲಾ ಅಲೆ ಬೆರಿಟೇ ಪೋಪೆ
ಮನದಾನಿಡ್ದ್ ಆ ಇಲ್ಲದ ರೂಪೊನೆ ಬದಲಾಪುಂಡು ಆತ್ ಕುಸಿಟಿತ್ತಿನ ಇಲ್ಲಡಿತ್ತೆ ಮೌನ ದಿಂಜಿದ್ಂಡ್ ಒರಿಯಗೊರಿ ಮೋನೆ ಕೊರ್ದು ಪಾತೆರುನವೇ ಉಂತುಂಡು ನಮಿತ ಮನಸ್ಡೇ ಕೊರಗೊಂದು ಉಲ್ಲಲ್ ಒರಿಯನೊರಿಯನ ನಡುಟು ಸಕುನಿ ಬುದ್ದಿದ ಶಶಾಂಕ್ ಸೂ ಪಾಡೊಂದೇ ಇತ್ತೆ
ಒಂಜಿ ಎಡ್ಡೆ ಗಳಿಗೆಡ್ ಜಾನು ಪೊಣ್ಣು ಬಾಲೆಗ್ ಜನ್ಮ ಕೊರ್ಪಲ್ ಆಸ್ಪತ್ರೆಡ್ದ್ ಈ ಇಲ್ಲಗ್ ಬರಿಯೆರೆ ಮನಸಿಜ್ಜಂದೆ ಬೇತೆ ಇಲ್ಲ್ ತೂಲೆ ಪಂದ್ ಹಠ ಕಟ್ಟುವಲ್ ಜಾನು
ಶಶಾಂಕ್ ಉಲಯುಲಾಯಿಡೆ ಕೋಪ ಬತ್ತ್ಂಡಲಾ ಮಾಮನ ಎದುರುಡು ಕೂಲಿ ತುಚ್ಚಿದ್ ಕುಲ್ಲುವೆ ಬೇತೆನೆ ಬಾಡಿಗೆ ಇಲ್ಲಗ್ ರಾಮಣ್ಣೆ ಬೊಕ್ಕ ಜಾನುನ ಸಂಸಾರ ಶಿಫ್ಟ್ ಆಪುಂಡು ಒಟ್ಟುಗು ಬಾಲೆದ ಚಾಕ್ರಿಗೊಂಜಿ ಪೊಣ್ಣು
ಇಂಚಿಡ್ ನಮಿತ ಸಂಸಾರಗಾದ್ ಮಲ್ತಿ ಸಾಲ ಬಾಕಿದಕ್ಲೆಗ್ ಉಪದ್ರ ಆಯೆರೆ ಬಲ್ಲಿ ಪಂದ್ ಬೆನೊಂದೇ ಇತ್ತಲ್ ಅಲೆನ ಬೆರಿಸಾಯಗ್ ಮಾಮುಲ ಒಟ್ಟುಗೇ ಇತ್ತೆರ್ ಆಂಡ ನಮಿತ ಮನಸ್ಡೊಂಜಿ ನಿರ್ಧಾರ ಮಲ್ತ್ದ್ ಇತ್ತಿತ್ತೆ ಮೌನಿ ಆತಲ್ ಇನಿ ಅಲೆ ಪಾಲ್ಗ್ ಕಡೆತ ದಿನ ಪೂರಾ ಸಾಲ ಸಂದಾದ್ ಇನಿಕ್ ತನ್ನ ಜೀವನೊಗು ಮುಕ್ತಿ ಕೊರೊಡುಂದೇ ತಯಾರಾದ್ ಇಲ್ಲಗ್ ಬರ್ಪಲ್
ಇಲ್ಲ ಜಗಲಿಡೊಂಜಿ ಕಿನ್ಯ ಪೊಣ್ಣು ಏರ್ಂದ್ ಕೇನ್ನಗ ಕೈಕ್ ಕಾಕಜಿ ಕೊರ್ಪಲ್ ಕಾಕಜಿಡ್
ತಪ್ಪಾಂಡಕ್ಕ ಮಲ್ಪಂದಿ ತಪ್ಪುಗು ನಿಕ್ಕ್ ಶಿಕ್ಷೆ ಕೊರಿಯ ಐಕ್ ದೇವೆರೆಂಕ್ ಎಡ್ಡೆ ಶಿಕ್ಷೆನೆ ಕೊರಿಯೆರ್ ನಿಕ್ಕ್ ಮೋನೆ ತೋಜಾವುನ ಯೋಗ್ಯತೆ ಎಂಕಿಜ್ಜಕ್ಕ ನಿನನ್ ನಂಬಂದೆ ಶಶಾಂಕ್ನ್ ನಂಬಿಯೇ ಒಂತೆ ಸಮಯೊಡೇ ಆಯೆ ಆಯನ ಬುದ್ದಿ ತೋಜಾಯೆ ಬಾಲೆ ತೂಯೆರೆ ಬತ್ತಿ ಪೊಣ್ಣನೇ ಪತೊಂದು ಬಲ್ತೆ ಉಂದೇ ಎತೆಟ್ ಅಪ್ಪಲಾ ಕಣ್ಣ್ ಮುಚ್ಚಿಯೆರ್ ನನ ಜಾಸ್ತಿ ಸಮಯ ಎಂಕಿಜ್ಜಕ್ಕಾ ಅಂಚಿನ ಕಾಯಿಲೆಡ್ ಯಾನುಲ್ಲೆ ಆಂಡ ಆತ್ನೇಟ ಯಾನ್ ಕಾಪುಜಿ ಅಯಿಡ್ದ್ ದುಂಬೇ ಪೋವೊಂದುಲ್ಲೆಕ್ಕಾ ಆಲ್ ನನ ನಿನ್ನ ಮಗಲ್
ನಿನ್ನ ಜಾನು
ಮಾತಾ ಜಬೇದಾರಿ ಕರೀಂಡ್ ಎನ್ನಿನಾಲೆಗ್ ಕುಡ ಸುರುಡ್ದೇ ಜೀವನ ಆರಂಭ ಬಾಲೆನ್ ಅರಾದ್ ಪತ್ತ್ದ್ ಕಣನೀರ್ ಒಚ್ಚಿದ್ ಮಾಮುನ ಮೋನೆ ತೂದು ತೆಲಿಪುವಲ್ ನಮಿತ
ಎಡ್ಡೆ ಆಲೆ ಜಾಸ್ತಿ ಎಡ್ಡೆ ಆವೊಡ್ಚಿ
ಸತ್ಯ ಆಧಾರಿತ ಕಾಲ್ಪನಿಕ ಕಥೆ
ದಿವ್ಯಶ್ರೀ ಪುತ್ತೂರು
ತುಲುವೆರೆ ಕಲ
by 