ಕ್ರಷಿಕ್ ಸಂಬಂಧಪಟ್ಟಿನ ಸಂದೇಶ ಕೊರ್ಪಿನ ಯುಗಾದಿ.

| ಕೃಷಿಕ್ ಸಂಬಂಧ ಪಟ್ಟಿನ ಸಂದೇಶವಿಪ್ಪುನ ಯುಗಾದಿ|

ಕಪ್ಪುಗು ಎಡ್ಡೆನಾ, ಬೊಲ್ದುಗು ಎಡ್ಡೆನಾ...? ಕೋಲ, ಬಲಿ, ಅಂಕ, ಆಯನೊಲೆನ ಉತ್ಸಾಹ, ನಾಗ - ಬಹ್ಮಲೋಕ,ದೈವೊಲೆನ ಸಾಮ್ರಾಜ್ಯ ಸೃಷ್ಟಿಯಾವೊಂದ್ ಪ್ರತಿ ರಾತ್ರೆಲಾ ದಿವ್ಯವಾದುಪ್ಪುನ ಶ್ರಾಯ. ನೇಕ್ ಪೂರಕವಾದ್ ಒದಗುದ್ ಬೈದುಂಡ್ ವಸಂತ ಋತುತ ಬಿನ್ನಾಣ. ಈ ನಡುಟ್ ಕಾಲ ನಿಯಾಮಕ ಸೂರ್ಯ ಮೇಷ ರಾಶಿ ಪ್ರವೇಶ ಮಲ್ತುದ್ ಪೊಸ ಕ್ರಮಣ ಆರಂಭ ಮಲ್ಪುನ ಪರ್ವ ಕಾಲ ‘ಸೌರಯುಗಾದಿ’. ಗೌಜಿ - ಗದ್ದಲ ಉಪ್ಪಂದೆ, ಸಂಭ್ರಮದ ವಿಧಿಯಾಚರಣೆಲು ಉಪ್ಪಂದೆ ‘ಇಗಾದಿ’ ಸೌರ ಮಾನಿಲೆಗ್ ‘ವರ್ಷಾರಂಭ’ಪನ್ಪಿನ ಶ್ರದ್ಧೆದೊಟ್ಟುಗ್ ಆಚರಣೆ ಆಪುಂಡ್. ಆಂಡ ಕೃಷಿನ್ ಆಧಾರ ದೀಯೊಂದಗ ಜೀವನ ನಡಪಾವುನ ಮಣ್ದುದ ಜೋಕ್ಲೆಗ್ ಕೃಷಿ ಕಾರ್ಯೊನ್ ಸುರು ಮಲ್ಪುನ ದಿನ ಸೌರ ಯುಗಾದಿ. ಸೌರಪದ್ಧತಿದಂಚ ತುಳುವೆರೆನ ಸುರುತ್ತ ತಿಂಗೊಲು ‘ಪಗ್ಗು’. ಪಗ್ಗು ತಿಂಗೊಲ್ದ ಪದಿನೆಂಡ್ಮ ಅತ್ತುಂಡ ದುಂಬುದ ದಿನಕ್ಲೆಡ್ ಕೃಷಿಟ್ ಸಂಪೂರ್ಣ ತೊಡಗಿಸಾವೊಂಬಿನ ಬೆನ್ನಿದಾಯಗ್ ಸೌರ ಯುಗಾದಿದಾನಿ ಸಾಂಕೇತಿಕವಾದ್ ತನ್ನ ಚಟುವಟಿಕೆಲೆನ್ ಸುರು ಮಲ್ಪುನ ನಿಯಮ ರೂಢಿ ಆತುಂಡ್. ಜಾತ್ರೆ-ನೇಮೊಲೆನ್ ಸೇರ್ದ್ ಶುಭ ಶೋಭನಾದಿಲೆನ ಗುಂಗುಡ್ ಪಿದಾಯಿ ಬತ್ತುದ್ ಕೃಷಿಕ್ ತೊಡಗಾವೊನ್ಲ ಪನ್ಪಿನ ಆಶಯಲಾ ‘ಸೌರಯುಗಾದಿದ ಆಚರಣೆಡ್ ಉಂಡು. ಪೊಸ ವರ್ಷ ಸುರು ಆಪಿನೆಡ್ದಾವರ ಶುಭ ಪ್ರತೀಕ್ಷೆಲಾ ಸೌರಯುಗಾದಿದ ಆಶಯವಾದುಂಡ್ ಕೃಷಿ ಬೊಕ್ಕ ದುಂಬುದ ವರ್ಷದ ಜೀವನ ನಿರಾತಂಕವಾದ್ ನಡಪಡ್ ಪನ್ಪಿನ ಪರಕೆದೊಟ್ಟುಗ್ ‘ಕಣಿ’ ದರ್ಶನ. ಈ ಮೂಲಕ ಪೊಸ ವರ್ಷದ ಸುರುತ್ತ ದಿನ ಮಂಗಲದ್ರವ್ಯಲ್ ಉಪ್ಪುನ ‘ಕಣಿ’ ತೂಪಿನವ್ ಕೆಲವ್ ಕಡೆಟ್ ಪ್ರಧಾನ ವಿಧಿಯಾದ್ ನಡತೊಂದುಂಡ್ ದೇವಾಲಯಲೆಗ್ ಪೋಪಿನ, ದೈವೊಲೆಗ್ ಸೇವೆ ಕೊರ್ಪಿನ ಮುಖ್ಯ ಆಚರಣೆಯಾದುಪ್ಪುನ ಕ್ರಮಲಾ ಚಾಲ್ತಿಡುಂಡ್. ತುಳುನಾಡುದ ಉದ್ದಗುಲಾ ವೈವಿಧ್ಯತೆಡ್ ನಡಪುನ ‘ಇಗಾದಿ’ ಅತ್ತುಂಡ ‘ಯುಗಾದಿ’ ‘ವಿಷು’ ಪಂಡುದೇ ವಿಶೇ?ಷವಾದ್ ‘ಬಿಸು’ಆದ್ ಸ್ವೀಕಾರ ಮಲ್ತೊಂದ್ ನಡತೊಂದುಂಡ್. ಆಂಡ ಕೃಷಿಕನ ಲಕ್ಷ್ಯವಿಪ್ಪುನ್ ದುಂಬುದ ವರ್ಷದ ಬೆನ್ನಿದ ಸ್ವರೂಪ ಎಂಚ ಉಪ್ಪೊಡ್ ಪಂಡುದ್ ನಿರ್ಧಾರ ಮಲ್ಪುನೇಟ್. ಅಯಿಕ್ಕಾದ್ ಆಯೆ ‘ಯುಗಾದಿ ಫಲ’ ಕೇನುನೇಟ್ ಆಸಕ್ತೆ ಅದುಪ್ಪುವೆ. ಈ ವರ್ಷದ ಬರ್ಸ ಎಂಚ ಏಪ ಪಂಡುದ್ ಪಂಚಾಂಗ ವಿವರಣೆ ಕೊರ್ಪಿನ ‘ಯುಗಾದಿ ಫಲ’ ಬರ್ಸದ ಪ್ರಮಾಣೊನ್ ತೆರಿಪಾವುಂಡ್. ಒವ್ ಬಣ್ಣದ ಧಾನ್ಯೊದ ಬುಲೆ ಎಡ್ಡೆ ಬುಲೆಯು ಪನ್ಪಿನ ಭವಿಷ್ಯೊನ್ ತೆರಿಯುನ ಕುತೂಹಲಲಾ ರೈತನವ್. ‘ಕಪ್ಪುಗು ಎಡ್ಡೆನಾ, ಬೊಲ್ದುಗು ಎಡ್ಡೆನಾ’ (ಕಪ್ಪು ಬಣ್ಣದ ಧಾನ್ಯ ಅತ್ತುಂಡ ಅರಿಯಾಪಿನ ಬಾರುದ ತಳಿ ಆವಾ ಬೊಲ್ದು ಬಣ್ಣ ಆವಾ ಅತ್ತುಂಡ ಒವ್ವ್ ಎಡ್ಡೆ ) ಪನ್ಪಿನ ನಿರ್ಧಾರಗ್ ಬತ್ತುದ್ ‘ಕಜೆಬಿದೆ’ ಅತ್ತುಂಡ ‘ಮಡಿಬಿದೆ’ನ್ ‘ಕೈಬಿತ್ತ್’ ಪಾಡುನಿ ಪನ್ಪಿನ ಯುಗಾದಿದಾನಿ ನಡಪಾವುನ ಕೃಷಿ ಆರಂಭದ ಪ್ರಕ್ರಿಯೆಡ್ ಅನುಸಾವುನ ಪದ್ಧತಿ ಇತ್ತುಂಡ್ ಪಂಡುದು ಹಿರಿಯ ಕೃಷಿಕೆರು ಇನಿಕುಲಾ ನೆಂಪು ಮಲ್ಪುವೆರ್. ಅಂಡ ಕೃಷಿಯೇ ನಾಶ ಆವೊಂದುಪ್ಪುನ ಈ ಕಾಲಘಟ್ಟೊಡ್ ಅಲ್ಪ ಒರಿ ಮುಲ್ಪ ಒರಿ ಪೂರ್ಣ ಪ್ರಮಾಣದ ಕೃಷಿಕೆ ತಿಕ್ಕುವೆ.ಆಯಡ ಈ ಪರಂಪರೆ ಒರಿದುಪ್ಪು. ಭೂ ಸುಧಾರಣೆದ ಪೂರ್ವೊಡ್ ‘ಬೆನ್ನಿಬುಡ್ಪುನಿ ಬೊಕ್ಕ ಬೆನ್ನಿಮಲ್ಪುನಿ’ ಪನ್ಪಿ ನಿರ್ಣಯಗ್ ಯುಗಾದಿ ನಿಗದಿತ ದಿನವಾದಿತ್ತುಂಡ್. ದಾಯೆಗ್ ಪಂಡ ಕೃಷಿ ಸುರು ಆಯಿನೇ ಮುಲ್ಪಡ್ದ್ ಆಯಿನೆಡ್ದಾವರ ಭೂ ಒಡೆಯಗ್ ದುಂಬುದ ವರ್ಷದ ಅತ್ತುಂಡ ಪೊಸ ವರ್ಷಡ್ ಕೃಷಿ ದುಂಬರಿಪರೆಗ್ ‘ಬುಳೆಪು ಕಾಣಿಕೆ’ ಕೊರ್ದ್ ಅಪ್ಪಣೆ ಕೇನುನ ಕ್ರಮಲಾ ಮದತ್ ಪೋತುಂಡ್. ಆಂಡ ಊರ ದೇವಾಲಯಗ್ ಈ ಕಾಣಿಕೆ ಸಂದಾಯದ ಸಂಪ್ರದಾಯ ಇನಿಕುಲಾ ಕೆಲವ್ ಕಡೆಟ್ ಉಂಡು. ಇಲ್ಲದ ಹಿರಿಯೆರೆನ್ ಗೌರವಡ್ ತೂಪಿನ ಪಂಡ ಅಕಲೆಗ್ ನಮಸ್ಕಾರ ಮಲ್ಪುನ ಸತ್‌ಸಂಪ್ರದಾಯವಾದುಂಡ್.ಇಲ್ಲದಕ್ಲೆಗ್ ಬೊಕ್ಕ ಪೂರ್ಣ ಕಾಲಿಕ ಕೆಲಸದಕ್ಲೆಗ್ ಪೊಸ ಕುಂಟು ಕೊರ್ಪಿನ ಕ್ರಮಲಾ ‘ಇಗಾದಿ’ದಾನಿ ನಡಪುಂಡ್.. ಇಗಾದಿದ ಅಂಗವಾದ್ ‘ತಾರಾಯಿ ಕುಟ್ಟುನಿ’ ಒಂಜಿ ಜನಪದ ಆಟವಾದ್ ‘ಬಿಸುತ ಕಟ್ಟ’ ಪನ್ಪಿ ಕೋರಿದ ಅಂಕಲಾ ‘ಬಿಸು’ ಅಂಗವಾದ್ ನಡಪುಂಡ್.

ಪರ್ಬದ ಆಚರಣೆದ ಗುರಿ ಕುಷಿಟ್ ಉಪ್ಪುನವ್. ಆಂಡ ಯುಗಾದಿ ಸರಳ, ಭಾವನಾತ್ಮಕ ಆಚರಣೆಯಾದ್ ನಡಪುಂಡ್.
ಮುಲ್ಪ ಪರತ್ ಕೈಪೆನ್ ಮದಪುನ ‘ಸೀಪನ್ ಬಯಕುನ ನಿರೀಕ್ಷೆ ಉಂಡು. ಕೈಪೆಡುಲಾ ಸೀಪೆಡುಲಾ ಆನಂದಿಸಾವುನ ಅಧ್ಯಾತ್ಮ ಉಂಡು. ಒಟ್ಟಾರೆಯಾದ್ ‘ಕರ್ತವ್ಯ’ಗ್ ಎಚ್ಚರಿಕೆ ಉಂಡು. ‘ತೊಡಗಿಸಾವೊನ್ಲ” ಪನ್ಪಿನ ಸಂದೇಶ ಉಂಡು. ಅವ್ ದಾದ ಇತ್ತುಂಡಲಾ ಕೃಷಿ ಆರಂಭಗ್ ಇಗಾದಿ (ಯುಗಾದಿ ಅತ್ತುಂಡ ಬಿಸು) ಪನ್ಪಿನ ಅನುಸಂಧಾನ ಇತ್ತುಂಡ ಮಾತ್ರ.
ಆಂಡ ಈ ಕಾಲೊಡುಲಾ ‘ಇಗಾದಿ’ ನೆನಪುಂಡ್, ಯುಗಾದಿ ಆಚರಣೆಡ್ ಉಂಡು, ‘ಬಿಸು ಕಣಿ’ತ್ತ ದರ್ಶನ ಸಂಭ್ರಮೊಡ್ ನಡತೊಂದುಂಡ್ ಪನ್ಪಿನ ಮಾತ್ರ ಸಂತಸದ ಸಂಗತಿ. ವೈವಿಧ್ಯಮಯ ಕಲ್ಪನೆದೊಟ್ಟುಗ್ ಸೂಕ್ತ ಅನುಸಂಧಾನ ವಿಧಾನಡ್ ‘ಸೌರಯುಗಾದಿ’ ನಡಪುಂಡ್. ನೆತ್ತ ಹಿನ್ನೆಲೆ ಕೃಷಿ ಆಧಾರಿತ ಬದುಕುದ ಒಂಜಿ ನೋಟ.
———————

ಪರತ್ ಕೈಪೆನ್ ಮದತುದ್ ದುಂಬುದ ಪಜ್ಜೆ ದೀಪುನ ಸಂಭ್ರಮದ ನಡುಟುಲಾ ‘ಬಾಗುನ’ (ನಮಸ್ಜಾರ ದ) ಸಂದೇಶ ಉಂಡು.
‘ಕಣಿ’ ಪನ್ಪಿನ ಪರುಂದ್ , ಕಾಯಿ, ಅರಿ, ಕನ್ನಡಿ, ಬಂಗಾರ್ ಇಂಚಿನ ಮಂಗಳ ದ್ರವ್ಯಲೆನ್ ದೇವೆರೆನ ದುಂಬು ಜೋಡಿಸಾದ್ ಯುಗಾದಿದಾನಿ ಕಾಂಡೆ ಲಕ್ಕಿನ ಕೂಡ್ಲೆ ತೂಪಿನ ಮಂಗಲದ್ರವ್ಯ ದರ್ಶನ ಪ್ರಕ್ರಿಯೆ.
‘ಕಣಿ’ಡ್ದ್ ಶುಭಫಲತ್ತ ನಿರೀಕ್ಷೆ ಉಂಡು.
‘ವಿಷು’ ಪನ್ಪಿನವ್ ‘ಸೌರಯುಗಾದಿ’. ಉಂದು ತುಳುವೆರೆಡ ‘ಬಿಸು’ ಆಂಡ್. ಈ ಪುದರುಡ್ ವಿವಿಧ ಸಾಮೂಹಿಕ ಆಚರಣೆಲು ಇಂಚಪ್ಪೊಗ್ ನಡಪುಂಡ್.
ಉತ್ತರಡ್ದ್ ದಕ್ಷಿಣ ತುಳುನಾಡುದಂಚಿ ಗಮನಿಸಾಂಡ ನಾಲ್ ಐನ್ ವಿಧತ್ತ ಸೌರ ಯುಗಾದಿದ ಆಚರಣಾ ವೈವಿಧ್ತ ಉಂಡು.
“ನಾಲೆರು ಮಾದಾವುನಿ, ಕೈಬಿತ್ತ್ ಪಾಡುನಿ” ಯುಗಾದಿದ ಪರ್ವಡ್ ನಡಪುನ ಕೃಷಿ ಆರಂಭದ ಕಾರ್ಯ.
ಸೌರಯುಗಾದಿಡ್ ಜಾನಪದ – ಶಿಷ್ಟ ಸಂಸ್ಕೃತಿಲೆನ ಸುಗಮ ಸಮಾಗಮದ ಆಚರಣಾ ವಿಧಾನ ಉಂಡು.
‘ಕಣಿ’ತ್ತ ಒಟ್ಟುಗ್ ಅಟ್ಟದ ಮೇಲುಡುಪ್ಪುನ ‘ತಾಳೆಗರಿ’ತ್ತ ಗ್ರಂಥೊಲೆನ್ ಸ್ವಚ್ಛ ಮಲ್ತುದ್ ದೀಪಿನ ಕ್ರಮಲಾ ಉಂಡು. ಇಂಚಪ್ಪೊಗ್ ಪಂಚಾಂಗ(ಹೊಸತು)ನ್ ದೀಪಿನಲಾ ರೂಢಿಯಾದುಂಡ್.
ಯುಗಾದಿ ಫಲ : ಸೀಮೆದ ದೇವಾಲಯಲೆಡ್
ಗ್ರಾಮ ದೇವಸ್ಥಾನಲೆಡ್ ,ಐಗಳ ಮಠೊಟ್
ಗೌರವಾನ್ವಿತರ ಇಲ್ಲಡ್ “ಯುಗಾದಿಫಲ” ಓದುನ ಕ್ರಮ ಇತ್ತುಂಡ್.ಅಲ್ಪ ಹಿರಿಯ ರೈತೆರು ಪೋದ್ ತಂಕುಲೆಗ್ ಬೋಡಾಯಿನ ಮಾಹಿತಿಲೆನ್ ಪಡೆತೊಂದಿತ್ತೆರ್.
—————————-