ಬೆನ್ನಿದ ಪನಿ ದೊಂಪ

ವಿವೇಕ ರೈ ಮೇರು ಮಾತಾ  ಭಾಷಿಗೆರೆಗ್ ಮಾರ್ಗದರ್ಶಕೆರು : ಕಾಸರಗೋಡು ಚಿನ್ನಾ
ಮಂಗಳೂರು : ಹಿರಿಯ ವಿದ್ವಾಂಸ ಪ್ರೊ.ಬಿ.ಎ.ವಿವೇಕ ರೈ ಮೇರು  ತನ್ನ ಅನುಭವ , ಅಧ್ಯಯನದ ನೆಲೆಟಾದ್  ವಾಸ್ತವ ವಿಚಾರಲೆನ್  ಸಮಚಿತ್ತವಾದ್ ಬೊಕ್ಕ ಸ್ಪಷ್ಟವಾದ್ ಪ್ರಸ್ತುತಪಡಿಸಾವುನ  ಖಚಿತತೆ ಇಪ್ಪುನಕುಲು. ವಿವೇಕ ರೈ ಮೇರು ತುಳು, ಬ್ಯಾರಿ, ಕೊಂಕಣಿ ಸೇರಿನಂಚ ಮಾತಾ ಭಾಷಿಗೆರೆಗ್  ಮಾರ್ಗದರ್ಶಕರಾದಿತ್ತೆರ್ ಪಂಡುದು ಕೊಂಕಣಿ ಸಾಹಿತ್ಯ ಅಕಾಡೆಮಿದ  ಮಾಜಿ ಅಧ್ಯಕ್ಷೆರಾಯಿನ ಕಾಸರಗೋಡು ಚಿನ್ನಾ ಮೇರು ಪಂಡೆರು.
ಆರು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಶನಿವಾರ ಆಯೋಜನೆ ಮಲ್ದಿನ‘ಬೆನ್ನಿದ ಪನಿ ದೊಂಪ’ ವಿವೇಕ ರೈ ಅರೆನ ತುಳು ಸಾಹಿತ್ಯ ಅವಲೋಕನ ಕಾರ್ಯಕ್ರಮದ ಸಮಾರೋಪ ಸಮಾರಂಭದ ಅಧ್ಯಕ್ಷತೆಡಿತ್ತುದ್  ಪಾತೆರಿಯೆರು.
ಕರ್ನಾಟಕ ಬ್ಯಾರಿ ಸಾಹಿತ್ಯ ಅಕಾಡೆಮಿ ಮಾಜಿ ಅಧ್ಯಕ್ಷ ಬಿ.ಎ. ಮುಹಮ್ಮದ್ ಹನೀಫ್ ಆರು ಪಾತೆರ್ದ್ , ಬ್ಯಾರಿ ಅಕಾಡೆಮಿ ಪ್ರಕಟ ಮಲ್ದಿನ ಬ್ಯಾರಿ ಶಬ್ದಕೋಶ ರೂಪಿಸಾವರೆಗ್  ಪ್ರೊ.ಬಿ.ಎ.ವಿವೇಕ ರೈ ಆರು ಮಲ್ಲ  ಮಟ್ಟದ ಸಲಹೆ ಸಹಕಾರ ಕೊರ್ತೆರು ಪಂಡುದು ನೆಂಪು ಮಲ್ತೆರು.
ನಿವೃತ್ತ ಪ್ರಾಂಶುಪಾಲ ಬೊಕ್ಕ ತುಳು ಜಾನಪದ ಸಂಶೋಧಕ ಡಾ.ಪೂವಪ್ಪ ಕಣಿಯೂರು ಪಾತೆರ್ದ್ , ವಿವೇಕ ರೈ ತನ್ನ ವಿದ್ಯಾರ್ಥಿಲೆಗ್  ಬದುಕು ರೂಪಿಸಾವುನ ಬಗ್ಗೆ ಬೊಕ್ಕ ಸಂಸ್ಕ್ರತಿದ ನಡಕೆನ್  ತೆರಿಪಾದ್ ಕೊರೊಂದಿತ್ತೆರು ಪಂಡೆರು. ನೂದಾಜಿ  ಯುವ ಸಂಶೋಧಕೆರೆಗ್  ಮಾರ್ಗದರ್ಶಕೆರಾದ್ ಪ್ರೊ.ಬಿ.ಎ.ವಿವೇಕ ರೈ ಆರು ನಿರಂತರ ಬೆರಿಬಲ ಕೊರ್ಪಿನ ಕೆಲಸ ಮಲ್ತೊಂದ್  ಬತ್ತಿನಾರು ಪಂಡುದು ತೆರಿಪಾಯೆರು. 
ಕಾರ್ಯಕ್ರಮಡ್  ತುಳು ಅಕಾಡೆಮಿ ಅಧ್ಯಕ್ಷ ತಾರಾನಾಥ ಗಟ್ಟಿ ಕಾಪಿಕಾಡ್ ಪ್ರಸ್ತಾವಿಕ ಪಾತೆರಿಯೆರು. ಅಕಾಡೆಮಿ ಸದಸ್ಯೆರಾಯಿನ ಕುಂಬ್ರ ದುರ್ಗಾ ಪ್ರಸಾದ್ ರೈ, ಅಕ್ಷಯ ಆರ್ ಶೆಟ್ಟಿ, ಪಾಂಗಾಳ ಬಾಬು ಕೊರಗ ಉಪಸ್ಥಿತರಿತ್ತೆರು.
ಅಕಾಡೆಮಿ ಸದಸ್ಯ ಉದ್ಯಾವರ ನಾಗೇಶ್ ಕುಮಾರ್ ಕಾರ್ಯಕ್ರಮ ನಿರೂಪಣೆ ಮಲ್ತುದ್ ಸೊಲ್ಮೆ ಸಂದಾಯ್ತ ಮಲ್ತೆರು.


***************************************