ಕಂಗುಲು-ಕರಂಗೋಲ್

ಮಂಗಳೂರು : ಮಾಯಿಲ್ ಫಿಲ್ಮ್  ಬೊಕ್ಕ ಕಡಲ್ ಸ್ಟುಡಿಯೋಸ್, ಸಂದೇಶ ಫೌಂಡೇಶನ್ ಫಾರ್ ಕಲ್ಟರ್ ಅಂಡ್ ಎಜುಕೇಶನ್ (ರಿ) ಸಹಭಾಗಿತ್ವಡ್  ಕುದ್ಕಬಚ್ಚಿರೆ ತುಳು ಕತೆ ಪುಸ್ತಕ ಬೊಕ್ಕ ಸಾಗರ್ ಬನ್ನಂಜೆ ಬೊಕ್ಕ ಜಯಂತ್ ನಿಟ್ಟಡೆ ನಿರ್ದೇಶನ/ನಿರ್ಮಾಣದ ‘ಕಂಗುಲು-ಕರಂಗೊಲ್ ‘ (ಮೂಲನಿವಾಸಿ ಆಚರಣೆ) ಡಾಕ್ಯುಮೆಂಟರಿ ಸಿನಿಮಾ ಬುಡುಗಡೆ ಕಾರ್ಯಕ್ರಮ ಮಂಗಳೂರು ದ ಸಂದೇಶ ಫೌಂಡೇಶನ್ ಫಾರ್ ಎಜುಕೇಶನ್ (ರಿ) ನಂತೂರು  ಸಭಾಂಗಣಡೊ ಜು.19ಗ್  ನಡತುಂಡ್..

ಜನಪದ ಬೊಕ್ಕ ರಂಗಭೂಮಿ ಕಲಾವಿದ ಶೀನಾ ನಾಡೋಳಿ ಕಾರ್ಯಕ್ರಮನ್ ಉದಿಪನ ಮಲ್ತುದ್  ಶುಭ ಹಾರೈಸಿಯೆರು. ಮಲ್ಲ ಬಿನ್ನೆರಾದ್ ಸಂದೇಶ ಫೌಂಡೇಶನ್, ನಿರ್ದೇಶಕೆರಾಯಿನ ಫಾ.ರೋಶನ್ ರೋಸರಿಯೋ ಬೊಕ್ಕ ತುಳು ಸಾಹಿತಿ ಅತ್ರಾಡಿ ಅಮೃತಾ  ಬರವುಗಾರೆರ್ ಬರೆತಿನ ‘ಕುದ್ಕಬಚ್ಚಿರೆ’ ತುಳು ಕಿರುಗತಾ ಸಂಕಲನೊನ್ ಬುಡುಗಡೆ ಮಲ್ತುದ್ ಪಾತೆರ್ದ್  ಶುಭಹಾರೈಸಿಯೆರು.

ಸಾಕ್ಷ್ಯಚಿತ್ರೊನ್  ತೂದ್ ತುಳು ಜನಪದ ವಿದ್ವಾಂಸೆರಾಯಿನ ಡಾ.ವಾಸುದೇವ ಬೆಳ್ಳೆ, ಡಾ.ಯದುಪತಿ ಗೌಡ, ಕೆ.ಕೆ. ಪೇಜಾವರ, ಪಾಂಗಳ ಬಾಬು ಕೊರಗ ಮೊಕುಲು  ಮೆಚ್ಚುಗೆ ಮಲ್ತೆರು. ಕೆಲ ಕಾಲ ಚಿಂತನಾರ್ಹ ಸಂವಾದ ನಡತುಂಡ್..

ಸಂವಾದಡ್  ಸಾಕ್ಷ್ಯಚಿತ್ರ ತಂಡದ ಸೃಜನಶೀಲ ಸಾಧನೆದ ಬಗ್ಗೆ ಪ್ರಶಂಸೆ ವ್ಯಕ್ತ ಆಂಡ್.. ಆಯ್ದ ಕತಾ ವಿಜೇತರೆಗ್  ಬೊಕ್ಕ ಪಂತೊಡ್  ಪಾಲ್ ಪಡೆಯಿನ  ಮೆಚ್ಚುಗೆ ಪಡೆಯಿನ ಕತೆಗಾರೆರೆಗ್ ಇನಾಮು ಪಟ್ಟಿಯೆರ್.. ಸಾಗರ್ ಬನ್ನಂಜೆ ಬೊಕ್ಕ ಜಯಂತ್ ನಿಟ್ಟಡೆ ಸಾಕ್ಷ್ಯಚಿತ್ರದ ಬಗ್ಗೆ ಅಭಿಪ್ರಾಯ ಪಟ್ಟೊಂಡೆರು.

ಕಡಲ್ ಸ್ಟುಡಿಯೋಸ್ ಬೊಕ್ಕ ಮಾಯಿಲು ಫಿಲ್ಫ್ ಜುಗುಲ್ ಬಂಧಿ ಪಯಣಡ್  ರಡ್ಡ್  ಮೂಲನಿವಾಸಿ ಸಮುದಾಯೊಲು ಒರಿಪಾವೊಂದ್ ಬೈದಿನ  ಪರಸ್ಪರ ಸಾಮ್ಯತೆದೊಟ್ಟುಗ್ ವಿಭಿನ್ನತೆನ್  ಕಾತೊಂದ್  ಬತ್ತಿನ  ಆರಾಧನಾ ಹಿನ್ನೆಯುಪ್ಪುನ ಸಾಂಸ್ಕೃತಿಕ, ಸಾಂಪ್ರದಾಯಿಕ ಬೊಕ್ಕ ಜನಪದ ಆಚರಣೆದ ಸೊಗಡುನ್  ನಾಡುದ್ ಯಥಾಸ್ಥಿತಿಯಾದ್ ಆತೇ ಅದ್ಭುತವಾದ್ ಪೋಣಿಸಿ ಕಂಗುಲು-ಕರ್‌ಂಗೋಲು ಸಾಕ್ಷ್ಯಚಿತ್ರೊನ್ ದೃಶ್ಯ ಬೊಕ್ಕ  ಸೊರೊಟ್ ಸೆರೆ ಪಸುದ್ ಅಧ್ಯಯನ ಯೋಗ್ಯವಾದ್ ಪ್ರಸ್ತುತ ಮಲ್ದಿನವ್ ಅಭಿನಂದನಾರ್ಹವಾದುಂಡ್..

ಈ ಸಾಕ್ಷ್ಯಚಿತ್ರೊನ್ ನಿರ್ದೇಶನ ಮಲ್ದಿನಕುಲು ಸಾಧನೆದ ಉತ್ಸಾಹನ್  ನರ ನಾಡಿಲೆಡ್ ಮೈಗೂಡಿಸಾವೊಂದಿನ ಸಾಗರ್ ಬನ್ನಂಜೆ, ಜಯಂತ್ ನಿಟ್ಟಡೆ. ಛಾಯಾಗ್ರಹಣ ಬೊಕ್ಕ ಸಂಕಲನಡ್  ಸಾಥ್‌ ಕೊರಿನಕುಲು ಶಿಪಪ್ರಸಾದ್‌ ಮಣಿಪಾಲ, ಪ್ರದೀಪ್‌ ಗರ್ಡಾಡಿ ಬೊಕ್ಕ ಅಧ್ಯಯನ ತಂಡಡ್ ಪದ್ಮಾವತಿ ಇಂದಬೆಟ್ಟು, ರೋಶನ್ ರೆಂಕೆದಗುತ್ತು ಅಭ್ಯುದಯ ಅರ್ವ ಮೊಕುಲು ಉಪಸ್ಥಿತರಿತ್ತೆರು. ಪೂರ್ಣಿಮಾ ಬಂಟ್ವಾಳ ಕಾರ್ಯಕ್ರಮ ನಿರೂಪಣೆ ಮಲ್ತೆರು.