ಕೋಟಿ ಚೆನ್ನಯ್ಯ ಸುಪ್ರಭಾತ

ಗರಡಿದ  ಸೇವಾವರ್ಗದಕ್ಲೆಗ್  ಆತ್ಮವಿಶ್ವಾಸ ದಿಂಜಾವುನ ಸತ್ಕಾರ್ಯ ಆವೊಡ್

ತುಳುನಾಡುದ  ಗರಡಿಲೆನ ನಂಬೊಲುಗೆ ಬೊಕ್ಕ ಸೇವಾ ಪರಂಪರೆ ಅವಿಚ್ಛಿನ್ನವಾಯಿನವ್ ಹಿರಿಯೆರೆನ ಕಾಲಡಿಂಚಿಲಾ ಸತ್ಯ ,ಶ್ರದ್ಧೆದೊಟ್ಟುಗ್  ಗುರುತಿಸಾವೊಂದಿನ ಅರ್ಚಕೆರ್ ,ದರ್ಶನ ಪೂಜಾರಿ ಬಂಧುಲೆನ್ ಗುರುತಿಸಾವುನ ಬೊಕ್ಕ ಅಕ್ಲೆಗ್ ಆತ್ಮವಿಶ್ವಾಸ ದಿಂಜಾವುನ ಸತ್ಕಾರ್ಯ ಆವೊಡ್. ಈ ನಿಟ್ಟುಡ್ ಬೈದಶ್ರೀ ಆಯೋಜನೆ ಮಲ್ದಿನ ಕಾರ್ಯಕ್ರಮ ಸಾರ್ಥಕವಾಯಿನವ್. ಪಂಡುದು ಮಾಜಿ ಸಚಿವೆರಾಯಿನ  ವಿನಯ ಕುಮಾರ್ ಸೊರಕೆ ಅಭಿಪ್ರಾಯಪಂಡೆರ್.. ಶ್ರೀಯುತೆರು ಶ್ರೀ ಬ್ರಹ್ಮಬೈದರ್ಕಳ ಸಾಂಸ್ಕೃತಿಕ ಅಧ್ಯಯನ ಕೇಂದ್ರದ ವತಿಡ್ದ್  ನಡತಿನ ಉಡುಪಿ ತಾಲೂಕುದ  ಗರಡಿದ  ಪೂಪೂಜನೆದಕುಲು ಬೊಕ್ಕ ದರ್ಶನ ಪೂಜಾರಿನಕ್ಲೆನ  ಸಮಾಲೋಚನೆ ಬೊಕ್ಕ ಸಮಾವೇಶ ಕಾರ್ಯಕ್ರಮೊನ್  ಉದಿಪನ ಮಲ್ತುದ್ ಪಾತೆರ್ದ್ , ಗರಡಿದ ಸಮಗ್ರತೆದ ಬಗೆಟ್ ಅಧ್ಯಯನ ಮಲ್ತೊಂದ್, ಭವಿಷ್ಯಗ್ ಪೂರಕ ಆಪಿನ ರೀತಿಡ್  ಬೈದಶ್ರೀ ಸಂಸ್ಥೆ ಆರಂಭ ಆಯಿನೇಡಿಂಚಿಡುಲಾ  ಬೋಡಾಯಿನಾತ್  ಮಾದರಿ ಕಾರ್ಯಕ್ರಮಲೆನ್ ಸಂಘಟನೆ ಮಲ್ದುಂಡ್ .ದುಂಬುದ  ದಿನಟ್  ಅವಿಭಜಿತ ಜಿಲ್ಲಾ ಮಟ್ಟಡ್ ಉಂದುವೇ  ಮಾದರಿದ  ಕಾರ್ಯಕ್ರಮ ನಡತುದ್  ದುಂಬಗ್ ಸಮಸ್ತ ಗರಡಿ ಚಾಕರಿದಕ್ಲೆನ  ಸಮಾವೇಶ ನಡಪಡ್ . ಈ ಸಮಾವೇಶ ಗರಡಿದ ಬಹುತೇಕ ಬೇಡಿಕೆಲೆಗ್  ಅನುಕೂಲ ಕಲ್ಪಿಸಾವುನ ನಿಟ್ಟುಡ್  ಸೂಕ್ತ ವೇದಿಕೆ ಆವಡ್. ಈ ಅರ್ಥಪೂರ್ಣ ವಿಚಾರಡ್  ಯಾನ್ಲಾ  ಸಕ್ರೀಯವಾದ್  ಸಹಕಾರ ಮಲ್ಪುವೆ ಬೊಕ್ಕ ಸರ್ಕಾರಿ ಮಟ್ಟದ ಸೌಲಭ್ಯಲೆಗ್  ಅಗತ್ಯವಾದ್ ಸ್ಪಂದಿಸಾವೆ ಪಂಡೆರ್..

ಕಾರ್ಯಕ್ರಮದ ಅಧ್ಯಕ್ಷತೆಡಿತ್ತಿನ ಶ್ರೀ ಬ್ರಹ್ಮಬೈದರ್ಕಳ ಸಾಂಸ್ಕೃತಿಕ ಅಧ್ಯಯನ ಕೇಂದ್ರದ ಅಧ್ಯಕ್ಷೆರಾಯಿನ  ಸೂರ್ಯೋದಯ್ ಪೆರಂಪಳ್ಳಿ ಪಾತೆರ್ದ್ , ಗರಡಿದ ಐತಿಹ್ಯ ಒರಿಪಾದ್  ಬುಲೆಪಾವರೆಗ್  ಸೇವಾವರ್ಗದಕ್ಲೆನ ಸತ್ಪಾತ್ರ ಸದಾ ಸ್ಮರಣೀಯವಾಯಿನವ್. ಅಕ್ಲೆನ್  ಗುರುತಿಸಾವುನವ್ ಬೈದಶ್ರೀದ  ಭಾಗ್ಯ ಬೊಕ್ಕ ಪುಣ್ಯಪ್ರದ ಸಂಗತಿ. ಗರಡಿ ಆರಾಧನಾ ವಿಧಾನ  ವೈದಿಕ ಪ್ರಭಾವಗ್  ಬೂರಂದೆ ಮೂಲ ಸಂಪ್ರದಾಯ,ಪರಂಪರೆನೇ ಅನುಕರಣೆಯಾವಡ್ ಪಂಡೆರು.
ಉಡುಪಿ ತಾಲ್ಲೂಕು ವ್ಯಾಪ್ತಿದ  22 ಗರಡಿದ ಪೂ ಪೂಜನೆದಕುಲು ಬೊಕ್ಕ ದರ್ಶನ ಪೂಜಾರಿನಕ್ಲೆನ್ ಮಾನಾದಿಗೆ ಮಲ್ತೆರ್. ಈ ಪೊರ್ತುಡ್ ಬೈದಶ್ರೀ ಪುಟ್ಟು ಬೆಳವಣಿಗೆದ ಬಗೆಟ್ ಉದಯ ಬೊಕ್ಕ ವಿಕಾಸ ಫಲಕನ್ ಅನಾವರಣ ಮಲ್ತೆರು.

ಸಂಪನ್ಮೂಲ ವ್ಯಕ್ತಿಯಾದ್  ಪಾಲ್ ಪಡೆಯಿನ ಪಾಂಗಾಳ ಗುಡ್ಡೆ ಗರೋಡಿ ಸುಧಾಕರ ಡಿ ಅಮೀನ್ ಪಾತೆರ್ದ್  ಕೋಟಿ ಚೆನ್ನಯರೆನ  ಸತ್ಯದ ನಡೆನುಡಿತ್ತ  ಪಾಲನೆಯಾಪಿನೇಟ್ ಗರಡಿದ  ಪಾತ್ರ ಮಹತ್ವದ್ದಾದುಂಡ್. ಆಧುನಿಕ ದಿನಮಾನಡ್ ಗರಡಿದ  ಪ್ರತಿಯೊಂಜಿ  ಚಟುವಟಿಕೆ ಗುರುಹಿರಿಯರೆನ ಸಂಸ್ಕೃತಿ ಪ್ರಧಾನವಾದ್  ದುಂಬರಿಯೊಡ್ ಪಂಡುದ್  ಆಶಿಸಾಯೆರು.  ಸಂಪನ್ಮೂಲ ವ್ಯಕ್ತಿಯಾದಿತ್ತಿನ  ಕಿನ್ನಿಮೂಲ್ಕಿ ಗರಡಿದ ಭಾಸ್ಕರ ಸುವರ್ಣ ಹಿರಿಯೆರೆನ ಮಾರ್ಗದರ್ಶನದೊಟ್ಟುಗ್ ಯುವಜನತೆ ಭಕ್ತಿ ಶ್ರದ್ಧೆಡ್ ಗರಡಿದ  ಸೇವೆಡ್  ತೊಡಗಿಸಾವೊನೊಡ್ ಪಂಡೆರ್. ಅಂಜಾರು ಗರಡಿದ ಸುಂದರ ಪೂಜಾರಿ ಗರಡಿದ ಶಿಷ್ಟಾಚಾರ ಪಾಲನೆಡ್  ವ್ಯತ್ಯಾಸ ಅವರೆ ಬಲ್ಲಿ ಪಂಡೆರು. ಪಕ್ಕಿಬೆಟ್ಟು ಗರಡಿದ  ಮೋಹನ ಪೂಜಾರಿ ವಿಶಿಷ್ಟವಾಯಿನ ಹಿನ್ನೆಲೆ ಉಪ್ಪುನ  ಗರಡಿ ಆರಾಧನಾ ಕ್ರಮಕುಲು ಆದ್ಯತೆಡ್  ಬೊಕ್ಕ ಬದ್ದತೆಡ್ ನಡತೊನೊಡ್ ಪಂಡುದು ಆಶಿಸಾಯೆರು. ಈ  ಸಂದರ್ಭಡ್  ಬೈದಶ್ರೀ ಸಂಸ್ಥೆ  ತಯಾರ್ ಮಲ್ದಿನ ‘ಕೋಟಿ ಚೆನ್ನಯ ಸುಪ್ರಭಾತ’ ನ್ ಲೋಕಾರ್ಪಣೆ ಮಲ್ತೆರ್. ಸುಪ್ರಭಾತ ರಚನೆ ಮಲ್ದಿನೇಟ್ ಒರಿ ,ಬೈದಶ್ರೀ ಗೌರವಾಧ್ಯಕ್ಷೆರಾಯಿನ ದಾಮೋದರ ಕಲ್ಮಾಡಿ ಸುಪ್ರಭಾತದ ಬಗೆಟ್ ವಿವರ ಕೊರಿಯೆರು.
ಗರಡಿದ  ಸೇವಾವರ್ಗದಕ್ಲೆಗ್  ಮಾಸಿಕ ವೇತನ ಕೊರೊಡು ಪನ್ಪಿನ  ಬಗೆಟ್ ಬೈದಶ್ರೀದ  ಮನವಿನ್ ಮಾನ್ಯ ಮುಖ್ಯಮಂತ್ರಿಲೆಗ್  ವಿನಯ ಕುಮಾರ್ ಸೊರಕೆನ ಮುಖಾಂತರ ಕೊರಿಯೆರ್.
ಬೈದಶ್ರೀ ಸಂಸ್ಥೆದ  ಪ್ರಧಾನ ಕಾರ್ಯದರ್ಶಿ ಹರೀಶ್ ಎಂಕೆ ಸ್ವಾಗತ ಮಲ್ತುದ್,ಪ್ರಸ್ತಾವನೆ ಮಲ್ತೆರು. ಉಗ್ಗೆಲ್ಬೆಟ್ಟು ಗರಡಿ ಅಧ್ಯಕ್ಷೆರಾಯಿನ  ದಯಾನಂದ ಕರ್ಕೇರ ಸಮಾಲೋಚನೆದ ಸಮನ್ವಯಕಾರೆರಾದ್  ಕಾರ್ಯಕ್ರಮನ್ ನಿರೂಪಣೆ ಮಲ್ತೆರು. ಬೈದಶ್ರೀ ಕೋಶಾಧಿಕಾರಿ ಮಹೇಶ್ ಎಸ್ ಸುವರ್ಣ ಸೊಲ್ಮೆ ಸಂದಾಯ್ತ ಮಲ್ತೆರು.