ಅಂಬೇಡ್ಕರ್ ಜಯಂತಿ

ಸಂಘರ್ಷಡ್  ಸಾಧನೆದ  ಶಿಖರ ಏರಿನ ಬಾಬಾ ಸಾಹೇಬ್ ಅಂಬೇಡ್ಕರ್ ಅರೆನ ಆದರ್ಶಲೆನ್ ಜೀವನಡ್ ಅಳವಡಿಸಾನುಗ: ಯಶ್ ಪಾಲ್ ಸುವರ್ಣ

ಉಡುಪಿ ಏಪ್ರಿಲ್ 14 (ಕ.ವಾ): ವಿಶ್ವದ ಬಾರೀ ಮಲ್ಲ ಪ್ರಜಾಪ್ರಭುತ್ವ ದೇಶದ ವಿಸ್ತೃತ ಸಂವಿಧಾನ ರಚನೆ ಮಲ್ದಿನ ಸಂವಿಧಾನ ಶಿಲ್ಪಿ ಡಾ ಭೀಮ ರಾವ್ ಅಂಬೇಡ್ಕರ್ ಅರೆನ ಜೀವನನೇ ನಮಕ್ ಆದರ್ಶ. ಸಂಘರ್ಷದ ಮಧ್ಯೆಡುಲಾ ಸಾಧನೆ ಮಲ್ತುದ್ ಜಗತ್ತುಗ್ ಸಮಾನತೆದ ಸಾದಿ ಬೊಲ್ಪು ತೋಜಾಯಿನ ಅರೆನ ಜೀವನದ ಮೌಲ್ಯಲೆನ್ ನಮಲಾ  ಅಳವಡಿಸಾವೊನೊಡ್ ಪಂಡುದು ಶಾಸಕ ಯಶ್‌ಪಾಲ್ ಎ ಸುವರ್ಣ ಪಂಡೆರು.

ನಗರದ ಮಣಿಪಾಲ ರಜತಾದ್ರಿದ ಅಟಲ್ ಬಿಹಾರಿ ವಾಜಪೇಯಿ ಸಭಾಂಗಣಡ್ ಜಿಲ್ಲಾಡಳಿತ, ಜಿಲ್ಲಾ ಪಂಚಾಯತ್, ನಗರಸಭೆ, ಸಮಾಜ ಕಲ್ಯಾಣ ಇಲಾಖೆ ಬೊಕ್ಕ ಪ.ಜಾತಿ, ಪ.ಪಂಗಡದ ಸಂಘಟನೆದ ಸಂಯುಕ್ತ ಆಶ್ರಯಡ್ ಭಾರತ ರತ್ನ, ಸಂವಿಧಾನ ಶಿಲ್ಪಿ ಡಾ. ಬಿ.ಆರ್ ಅಂಬೇಡ್ಕರ್ ಅರೆನ 135 ನೇ ಜನ್ಮ ದಿನಾಚರಣೆ ಕಾರ್ಯಕ್ರಮನ್ ಉದ್ಘಾಟನೆ ಮಲ್ತುದ್ ಆರು ಪಾತೆರಿಯೆರು.

ಇನಿ ದೇಶಡ್  ನಮ ಮಾತೆರ್ಲ ಅನ್ಯೋನ್ಯತೆಡ್ ಬಾಳೊಂದಿತ್ತಡ ಅಯಿಕ್ ಬಾಬಾ ಸಾಹೇಬೆರೆನ ಸಂವಿಧಾನ ಕಾರಣ. ಆನಿ ಆರು ಸಮಾನತೆಗಾದ್ ಹೋರಾಟ ಮಲ್ತುದ್ ಸಮ ಸಮಾಜದ ನಿರ್ಮಾಣ ಮಲ್ದಿನೆಡ್ದಾವರ ಇನಿ ಸಾಧ್ಯ ಆಂಡ್.. ಸಮಾಜದ ಸಾಮರಸ್ಯೊನ್ ಕಾಪಾಡುನ್ ನಮ್ಮ ಕರ್ತವ್ಯ. ಆ ಮೂಲಕ ನಮ ಮಹಾನ್ ಚೇತನಲೆಗ್ ಗೌರವ ಸಲ್ಲಿಸಾಯಿಲೆಕ್ಕ ಆಪುಂಡ್ ಪಂಡೆರು.




ಕರಾವಳಿ ಅಭಿವೃದ್ದಿ ಮಂಡಳಿದ ಅಧ್ಯಕ್ಷ ಎಂ ಎ ಗಫೂರ್ ಪಾತೆರ್ದ್, ಅಂಬೇಡ್ಕರ್ ಒಂಜಿ ಶಕ್ತಿ. ಆರು ಎರೆಡಲಾ ಪಡೆಯರಾವಂದಿನ ಮಾಣಿಕ್ಯ. ಮಹಾತ್ಮ ಗಾಂಧಿ, ಜವಾಹರಲಾಲ್ ನೆಹರೂ, ಸರ್ದಾರ್ ವಲ್ಲಭಭಾಯಿ ಪಟೇಲ್ ಅಕ್ಲೆನೊಟ್ಟುಗ್  ಸೇರ್ದ್  ಸರಿ ಸಮನಾದ್ ದೇಶದ ಏಳಿಗೆಗಾದ್ ಬೆಂತೆರು. ದೇಶದ ಕಾನೂನು ಸಚಿವೆರಾದ್ ಆರು ರೂಪಿಸಾಯಿನ ಕಾನೂನುಲು ನಮಕ್ ಇನಿಲಾ ಬಲ ದಿಂಜಾದುಂಡ್. ಆರು ರೂಪಿಸಾಯಿನ ಪವಿತ್ರ ಸಂವಿಧಾನೊನ್ ಬಲಿಷ್ಠ ಮಲ್ಪುನ ಜವಾಬ್ದಾರಿ ನಮ್ಮ ಮಿತ್ತ್ ಉಂಡು. ಅರೆನ ಆಶಯದಂಚ ಬಾಳುದ್ ದೇಶೊನ್ ಅಭಿವೃದ್ಧಿದ  ಪಥಟ್ ದುಂಬು ಕೊನೊಕ ಪಂಡೆರು.


ಜಿಲ್ಲಾಧಿಕಾರಿ ಸ್ವರೂಪ ಟಿ.ಕೆ ಪಾತೆರ್ದ್ , ಬಾಬಾ ಸಾಹೇಬೆರು ಪೊಣ್ಣು ಜೋಕ್ಲೆನ ಶಿಕ್ಷಣ ಬೊಕ್ಕ ಸ್ವಾತಂತ್ರ್ಯಗ್ ಅಡಿಪಾಯ ಪಾಡಿನಾರು.. ಪೊಣ್ಣು ಜೋಕುಲಕ ಇನಿ  ಈತ್ ಮಾತಾ ಸಾಧನೆ ಮಲ್ಪರೆಗ್ ಅವಕಾಶ ಮಲ್ತ್  ಕೊರಿನಾರು. ತನ್ನ ಆಳವಾಯಿನ ಅಧ್ಯಯನಡಾದ್ ಸಂವಿಧಾನದ ರಚನೆ ಮಲ್ಚಿನಾರು. ಸಮಾನತೆ, ಸ್ವಾತಂತ್ರ್ಯ ಬೊಕ್ಕ ಭ್ರಾತೃತ್ವ ಅರೆನ ಮೂಲ ಮಂತ್ರವಾದಿತ್ತುಂಡ್ ಪಂಡೆರು.
ನಿವೃತ್ತ ಪ್ರಾಂಶುಪಾಲ ಪ್ರೊ.ಎಂ ಬಾಲಕೃಷ್ಣ ಶೆಟ್ಟಿ ಪಾತೆರ್ದ್  ದೇಶದ ಧರ್ಮಗ್ರಂಥ ಪಂಡುದು ಲೆಪ್ಪುನ ಸಂವಿಧಾನೊನ್ ತಮ್ಮ ತಪ ಬೊಕ್ಕ ತ್ಯಾಗಡಾದ್  ನಿರ್ಮಿಸಾಯಿನ ಬಾಬಾ ಸಾಹೇಬ್ ಅಂಬೇಡ್ಕರ್ ಆರು ದೇಶದ ನಾಗರಿಕೆರು ಮಾತ್ರ ಅತ್ತ್ ಗಿಡ ಮರ ಪ್ರಾಣಿ ಪಕ್ಷಿಲೆಗುಲಾ ಸಂವಿಧಾನ ಬದ್ಧ ಹಕ್ಕುಲೆನ್  ಕೊರ್ತೆರ್.. ಮಾತೆರೆಗುಲಾ ಸಮಾನ ಶಿಕ್ಷಣ, ಸಮಾನ ಉದ್ಯೋಗಾವಕಾಶ, ಪೊಂಜೊವುನಕ್ಲೆಗ್ ಸ್ವಾತಂತ್ರ  ಕೊರ್ಪಾವುನಲ್ಪ  ಮಹತ್ವದ ಪಾತ್ರ ದೆತೊಂದೆರ್ ಆರು ಅವಕಾಶಕ್ಕಾದ್ ಕಾತೊಂದ್  ಕುಲ್ಲುಜೆರ್ ಬದಲುಗ್ ಅವಕಾಶಲೆನ್  ಸೃಷ್ಟಿ ಮಲ್ತೊಂದೆರು. ಜೀವನಡ್ ಮಾತೆರೆನ್ ಕಳೆಯೊಂಡಲಾ ಧೈರ್ಯ ಕಳೆಯೊನಂದೆ. ವಿದೇಶಡ್ ಐಷಾರಾಮಿ ಬದುಕು ನಡೆಸಾವುನ ಅವಕಾಶ ಇತ್ತುಂಡಲಾ ಭಾರತಡೇ ಇತ್ತುದ್ ಸಮಾನತೆಗಾದ್ ಬೆಂತೆರು. ತಮ್ಮ ಜೀವನದ ಕಡೇತ ಎಕ್ಕ್  ಉಪ್ಪಮುಟ್ಟಲಾ ಕಲ್ಪುನ ಬುಡ್ತುಜೆರ್. ಅಂಚಿನ  ಮಹಾತ್ಮೆರೆನ್  ಅನುದಿನಲಾ  ನೆಂಪು ಮಲ್ಪೊಡ್  ಪಂಡೆರು

ಸಭಾ ಕಾರ್ಯಕ್ರಮಗ್  ದುಂಬು ಡಾ. ಬಿ.ಆರ್ ಅಂಬೇಡ್ಕರ್ ಅರೆನ  ಪುತ್ಥಳಿಗ್  ಮಾಲಾರ್ಪಣೆ ಮಲ್ತುದ್  ಬುದ್ಧ ವಂದನೆ ಕಾರ್ಯಕ್ರಮ ಮಲ್ತೆರ್.

ಕಾರ್ಯಕ್ರಮಡ್  ದ್ವಿತೀಯ ಪಿಯುಸಿ ಪರೀಕ್ಷೆಡ್  ಹೆಚ್ಚ ಅಂಕ ಪಡೆಯಿನ ವಿದ್ಯಾರ್ಥಿಲೆನ್  ಬೊಕ್ಕ ಹಿರಿಯ ಪೌರ ಕಾರ್ಮಿಕೆರೆನ್ ಸನ್ಮಾನ ಮಲ್ತೆರ್ .

ಈ ಸಂದರ್ಭಡ್ ಸಾಂಪ್ರದಾಯಿಕ ಚರ್ಮ ಕುಶಲ ಕರ್ಮಿ ಪಾಂಚಾಲಿ ಅರೆನ್  ಗೌರವ ಮಲ್ತೆರ್..

ವೇದಿಕೆಡ್ ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಪ್ರತೀಕ್ ಬಾಯಲ್, ಜಿಲ್ಲಾ ಪೊಲೀಸ್ ಅಧೀಕ್ಷಕ ಹರಿರಾಂ ಶಂಕರ್, ಅಪರ ಜಿಲ್ಲಾಧಿಕಾರಿ ಅಬಿದ್ ಗದ್ಯಾಳ ಉಪಸ್ಥಿತರಿತ್ತೆರು.

ಸಮಾಜ ಕಲ್ಯಾಣ ಇಲಾಖೆ ಉಪ ನಿರ್ದೇಶಕ ನಾರಾಯಣ ಸ್ವಾಮಿ ಸ್ವಾಗತ ಮಲ್ತುದ್, ಪ್ರಶಾಂತ್ ಶೆಟ್ಟಿ ಹಾವಂಜೆ ನಿರೂಪಣೆ ಮಲ್ತುದ್ ಕಾಪು ತಾಲೂಕು ಸಮಾಜ ಕಲ್ಯಾಣಾಧಿಕಾರಿ ಬಸವರಾಜ ವಂದಿಸಾಯೆರು.