ಉಡುಪಿ ಪೊಸ ಧರ್ಮಾಧ್ಯಕ್ಷೆರೆನ ಪೀಠಾರೋಹಣ.

ಏಪ್ರಿಲ್ 20ಗ್  ಉಡುಪಿದ ಪೊಸ  ಧರ್ಮಾಧ್ಯಕ್ಷೆರೆನ ಪೀಠಾರೋಹಣ ಬೊಕ್ಕ ಅಭಿಷೇಕ ಸಮಾರಂಭ

ಉಡುಪಿ: ಉಡುಪಿ ಧರ್ಮಕ್ಷೇತ್ರದ ದ್ವಿತೀಯ ಧರ್ಮಾಧ್ಯಕ್ಷೆರಾದ್ ಅತಿ ಗೌರವಾನ್ವಿತ ಡಾ. ಲೆಸ್ಲಿ ಕ್ಲಿಫರ್ಡ್ ಡಿ’ಸೋಜಾ ಅರೆನ ಧರ್ಮಾಧ್ಯಕ್ಷೆರೆನ  ಅಭಿಷೇಕ   ಬೊಕ್ಕ ಪೀಠಾರೋಹಣ ಸಮಾರಂಭ ಏಪ್ರಿಲ್ 20, 2026ಗ್ ಸೋಮವಾರ ಕಾಂಡೆ 9 ಗಂಟೆಗ್ ಕಲ್ಯಾಣಪುರದ ಮಿಲಾಗ್ರಿಸ್ ಕಾಲೇಜು ಮೈದಾನಡ್ ನಡಪರೆಗುಂಡ್ ಪಂಡುದು  ಉಡುಪಿ ಧರ್ಮಪ್ರಾಂತ್ಯದ ಸಾರ್ವಜನಿಕ ಸಂಪರ್ಕಾಧಿಕಾರಿ ವಂ|ಡೆನಿಸ್ ಡೆಸಾ ತೆರಿಪಾಯೆರು.

ಆರು ಬುಧವಾರ ಉಡುಪಿ ಶೋಕಮಾತಾ ಚರ್ಚಿನ ಆವೆ ಮರಿಯಾ ಸಭಾಂಗಣಡ್  ಆಯೋಜನೆ ಮಲ್ದಿನ ಸುದ್ದಿಗೋಷ್ಠಿಡ್  ಪಾತೆರಿನ ಗೋವಾ ಬೊಕ್ಕ ದಮನ್ ಮಹಾಧರ್ಮಪ್ರಾಂತ್ಯದ ಮಹಾಧರ್ಮಾಧ್ಯಕ್ಷೆರು ಬೊಕ್ಕ FABC ಬೊಕ್ಕ CCBI ಅಧ್ಯಕ್ಷೆರಾಯಿನ  ಕಾರ್ಡಿನಲ್ ಫಿಲಿಪ್ ನೆರಿ ಫೆರಾವೊ ಅರೆನ  ನೇತೃತ್ವಡ್  ಪವಿತ್ರ ಬಲಿಪೂಜೆ ಸಂದರ್ಭಡ್  ಪೊಸ  ಧರ್ಮಾಧ್ಯಕ್ಷೆರೆಗ್  ಅಭಿಷೇಕ ನಡಪರೆಗುಂಡ್.. ಬೆಂಗಳೂರು ಮಹಾಧರ್ಮಾಧ್ಯಕ್ಷ ಡಾ. ಪೀಟರ್ ಮಚಾದೊ ಬೊಕ್ಕ ಉಡುಪಿ ಧರ್ಮಕ್ಷೇತ್ರದ ಪ್ರೇಷಿತ ಆಡಳಿತಾಧಿಕಾರಿ ಡಾ. ಜೆರಾಲ್ಡ್ ಐಸಾಕ್ ಲೋಬೊ ಸಹ-ಅಭಿಷೇಕಕಾರೆರಾದ್ ಪಾಲ್ ಪಡೆಯರೆಗುಲ್ಲೆರ್.

ಈ ಐತಿಹಾಸಿಕ ಸಮಾರಂಭಡ್  ಭಾರತ ಬೊಕ್ಕ ನೇಪಾಳದ ಅಪೊಸ್ತೊಲಿಕ್ ನುನ್ಸಿಯೋ (ಪೋಪ್ ಅವರ ವ್ಯಾಟಿಕನ್ ರಾಯಭಾರಿ)                 ಡಾ. ಲಿಯೋಪೋಲ್ಡೊ ಗಿರೆಲ್ಲಿ, ಬೇತೆ ಬೇತೆ ಮಹಾಧರ್ಮಾಧ್ಯಕ್ಷೆರು, ಧರ್ಮಾಧ್ಯಕ್ಷೆರು, ಧರ್ಮಗುರುಕುಲು, ಧಾರ್ಮಿಕ ಸಹೋದರ-ಸಹೋದರಿಯೆರು, ರಾಜಕೀಯ ನಾಯಕೆರು, ವಿವಿಧ ಸಮುದಾಯಗಳ ಗಣ್ಯೆರು ಬೊಕ್ಕ ಸಾರ ಭಕ್ತೆರು ಸೇರಿನಂಚ ಸುಮಾರು 5000ಕ್ ಲಾ ಜಾಸ್ತಿ  ಜನ ಪಾಲ್ ಪಡೆಯುನ ನಿರೀಕ್ಷೆ ಉಂಡು..

ಧಾರ್ಮಿಕ ವಿಧಿವಿಧಾನಡ್  ಬೊಕ್ಕ ಅವ್ವೇ ವೇದಿಕೆಡ್ ಪೊಸ  ಧರ್ಮಾಧ್ಯಕ್ಷರೆಗ್ ಪೌರ ಸನ್ಮಾನ ಕಾರ್ಯಕ್ರಮ ನಡಪುಂಡ್.. ಉಡುಪಿ ಜಿಲ್ಲಾ ಉಸ್ತುವಾರಿ ಸಚಿವೆ ಶ್ರೀಮತಿ ಲಕ್ಷ್ಮೀ ಹೆಬ್ಬಾಳಕರ್ ಬೊಕ್ಕ ಉಡುಪಿ ಶಾಸಕ ಶ್ರೀ ಯಶಪಾಲ್ ಸುವರ್ಣ  ಜಿಲ್ಲೆದ ನಾಗರಿಕೆರೆನ ಪರವಾದ್  ಅಭಿನಂದನೆ ಮಲ್ಪುವೆರ್.

ನಿವೃತ್ತ ಧರ್ಮಾಧ್ಯಕ್ಷೆರಾಯಿನ  ಡಾ. ಜೆರಾಲ್ಡ್ ಐಸಾಕ್ ಲೋಬೊ ಮೇರು 2012ಡ್ದ್  2026ಮುಟ್ಟ  13 ವರ್ಷ ಕಾಲ ಉಡುಪಿ ಧರ್ಮಕ್ಷೇತ್ರದ ಧರ್ಮಾಧ್ಯಕ್ಷೆರಾದ್  ಸೇವೆ ಸಲ್ಲಿಸಾದ್ ಇತ್ತೆ ನಿವೃತ್ತರಾತೆರ್. ತಮ್ಮ ಸೇವಾ ಅವಧಿಡ್  ಯುವಕೆರು, ಬಡವೆರು ಬೊಕ್ಕ ಹಿಂದುಳಿದ ವರ್ಗದ ಬಗ್ಗೆ ವಿಶೇಷ ಕಾಳಜಿ ತೋಜಾಯಿನ  ಆರು ಸರಳತೆ, ವಿನಯ ಬೊಕ್ಕ ಸೌಮ್ಯ ಸ್ವಭಾವಡಾದ್  ಮಾತೆರೆನ ಮೆಚ್ಚುಗೆ ಪಡೆದೆರ್.. ಜಿಲ್ಲೆಡ್ ಮಾತಾ  ಧರ್ಮದೊಟ್ಟುಗ್  ಎಡ್ಡೆ  ಸಂಬಂಧ ದೀಯೊಂದಿನ ಆರು ಸರ್ವ ಧರ್ಮ ಸಮನ್ವಯತೆಗ್ ವಿಶೇಷ ಕೊಡುಗೆ ಕೊರ್ತೆರ್.

ಪೊಸ ಧರ್ಮಾಧ್ಯಕ್ಷೆರೆನ ಬಗ್ಗೆ : ಪೋಪ್ ಲಿಯೋ XIV ಆರು 2026 ಜನವರಿ 31ಗ್ ಡಾ. ಲೆಸ್ಲಿ ಸಿ. ಡಿ’ಸೋಜಾ ಅರೆನ್ ಉಡುಪಿ ಧರ್ಮಕ್ಷೇತ್ರದ ಪೊಸ ಧರ್ಮಾಧ್ಯಕ್ಷೆರಾದ್ ನೇಮಕ ಮಲ್ದೆರ್.

1962 ಆಗಸ್ಟ್ 19ಗ್ ಉಡುಪಿ ಜಿಲ್ಲೆದ ಎರ್ಮಾಳ್ ಡ್ ಪುಟ್ಟಿನ ಆರು ಮೈಸೂರು ವಿಶ್ವವಿದ್ಯಾಲಯಡ್ದ್  ಕಲಾ ಪದವಿ ಪಡೆದೆರ್. ಮಂಗಳೂರು ಸೆಂಟ್ ಜೋಸೆಫ್ ಇಂಟರ್ ಡಯೋಸಿಸನ್ ಗುರುಮಠಟ್ ತತ್ವಶಾಸ್ತ್ರ ಬೊಕ್ಕ ಧರ್ಮಶಾಸ್ತ್ರ ಅಧ್ಯಯನ ಮಲ್ತುದ್, ಬೆಲ್ಜಿಯಂನ ಲೂವನ್ ಕ್ಯಾಥೋಲಿಕ್ ವಿಶ್ವವಿದ್ಯಾಲಯಡ್ ನೈತಿಕ ಧರ್ಮಶಾಸ್ತ್ರಡ್ ಡಾಕ್ಟರೇಟ್ ಪಡೆದೆರ್.

1990 ಮೇ 10ಗ್ ಧರ್ಮಗುರುಕುಲಾದ್ ಅಭಿಷೇಕ ಆಯಿನ  ಆರು ಮಂಗಳೂರು ಬೊಕ್ಕ ಉಡುಪಿ ಧರ್ಮಕ್ಷೇತ್ರಲೆಡ್ ಸಹಾಯಕ ಧರ್ಮಗುರುಕುಲಾದ್, ಪ್ರಾಧ್ಯಾಪಕ ಬೊಕ್ಕ ವಿವಿಧ ಚರ್ಚುಲೆಡ್  ಧರ್ಮಗುರುಕುಲಾದ್ ಸೇವೆ ಸಲ್ಲಿಸಾದೆರ್.

ಉಡುಪಿ ಧರ್ಮಕ್ಷೇತ್ರ ಬಗ್ಗೆ: ಉಡುಪಿ ಧರ್ಮಕ್ಷೇತ್ರನ್ 2012 ಜುಲೈ 16ಗ್ ಪೋಪ್ ಬೆನೆಡಿಕ್ಟ್ XVI ಆರು ಘೋಷಣೆ ಮಲ್ದಿತ್ತೆರು. ಆನಿ ಶಿಮೋಗ ಧರ್ಮಕ್ಷೇತ್ರದ ಧರ್ಮಾಧ್ಯಕ್ಷರಾದಿತ್ತಿನ ಜೆರಾಲ್ಡ್ ಐಸಾಕ್ ಲೋಬೊ ಅರೆನ್ ಸುರುತ ಧರ್ಮಾಧ್ಯಕ್ಷೆರಾದ್  ನೇಮಕ ಮಲ್ದೆರ್..

ಈ ಧರ್ಮಕ್ಷೇತ್ರ ಕಾರ್ಕಳ, ಕುಂದಾಪುರ, ಕಾಪು, ಬೈಂದೂರು, ಹೆಬ್ರಿ, ಬ್ರಹ್ಮಾವರ ಬೊಕ್ಕ ಉಡುಪಿ ತಾಲೂಕುಲೆಡ್ ಉಂಡು. ಬೆಂಗಳೂರು ಮಹಾಧರ್ಮಪ್ರಾಂತ್ಯದ ಅಧೀನಡುಪ್ಪುನ ಈ ಧರ್ಮಕ್ಷೇತ್ರದ ಪ್ರಧಾನ ದೇವಾಲಯ ಕಲ್ಯಾಣಪುರದ ಮಿಲಾಗ್ರಿಸ್ ಕ್ಯಾಥೆಡ್ರಲ್ ಆತುಂಡ್.

ಸುಮಾರು 5,924 ಚದರ ಕಿಲೋಮೀಟರ್ ವ್ಯಾಪ್ತಿದ ಈ ಧರ್ಮಕ್ಷೇತ್ರಡ್  60,338 ಕ್ಯಾಥೋಲಿಕ್ ಭಕ್ತೆರು ಉಲ್ಲೆರ್. 51 ಚರ್ಚುಲು, ಒಂಜಿ  ಬಸಿಲಿಕಾ, ಮೂಜಿ ತೀರ್ಥಕ್ಷೇತ್ರಲು ಬೊಕ್ಕ ಏಳು ಉಪಕೇಂದ್ರೊಲ್  ಉಂಡು..

ಶಿಕ್ಷಣ ಕ್ಷೇತ್ರಡ್  ನರ್ಸರಿ ಶಾಲೆ, ಪ್ರಾಥಮಿಕ , ಪ್ರೌಢ ಶಾಲೆ, ಕಾಲೇಜುಲು ಸೇರಿನಂಚ ಅನೇಕ ಶಿಕ್ಷಣ ಸಂಸ್ಥೆಲೆನ್ ನಿರ್ವಹಣೆ ಮಲ್ತೊಂದಿತ್ತುದ್ , ಸಮಾಜಸೇವೆ ಕ್ಷೇತ್ರಡುಲಾ ವೃದ್ಧಾಶ್ರಮಲು, ಆಸ್ಪತ್ರೆಲು, ಅನಾಥಾಶ್ರಮಲು ಬೊಕ್ಕ ಪುನರ್ವಸತಿ ಕೇಂದ್ರಲೆನ್  ನಡಪಾವುನ ಮೂಲಕ ಮಹತ್ವದ ಸೇವೆ ಸಲ್ಲಿಸಾವೊಂದುಂಡ್..   ಧಾರ್ಮಿಕ, ಶೈಕ್ಷಣಿಕ ಬೊಕ್ಕ ಸಾಮಾಜಿಕ ಕ್ಷೇತ್ರಲೆಡ್  ಉಡುಪಿ ಧರ್ಮಕ್ಷೇತ್ರವು ಮಹತ್ವದ ಪಾತ್ರ ದೆತೊಂದುಂಡ್.
ಸುದ್ದಿಗೋಷ್ಠಿಡ್ ಉಡುಪಿ ಧರ್ಮಪ್ರಾಂತ್ಯದ ಪ್ರೇಷಿತ ಆಡಳಿತಾಧಿಕಾರಿ ವಂ|ಡಾ|ಜೆರಾಲ್ಡ್ ಐಸಾಕ್ ಲೋಬೊ, ಕಾರ್ಯಕ್ರಮದ ಸಂಚಾಲಕೆರು ಬೊಕ್ಕ ಕಲ್ಯಾಣಪುರ ಮಿಲಾಗ್ರಿಸ್ ಕ್ಯಾಥೆಡ್ರಲ್ ಧರ್ಮಗುರುಕುಲಾಯಿನ  ವಂ|ಫರ್ಡಿನಾಂಡ್ ಗೊನ್ಸಾಲ್ವಿಸ್, ಧರ್ಮಪ್ರಾಂತ್ಯದ ಕುಲಪತಿಲಾಯಿನ ವಂ|ಸ್ಟೀವನ್ ಡಿಸೋಜಾ, ಮಾಧ್ಯಮ ಸಂಯೋಜಕೆರಾಯಿನ  ಮೈಕಲ್ ರೊಡ್ರಿಗಸ್ ಉಪಸ್ಥಿತರಿತ್ತೆರು