ಕಾರಂತೆರೆನ ಬರವು

ಪೊಣ್ಣಗ್ ಸಮಾನತೆದ ಸಮರ್ಥ ಪ್ರತಿಪಾದನೆ ಕಾರಂತೆರೆನ ಬರವು : ಅಬೀದ್ ಗದ್ಯಾಳ್

ಶಿವರಾಮ ಕಾರಂತೆರು ಬರೆಪಿನ ಕಾಲೊಡು ನಮ್ಮ ಸಮಾಜಡ್ ಮಹಿಳಾ ಅಸಮಾನತೆ ಹೆಚ್ಚಾದಿತ್ತುಂಡ್. ಉಂದೆಟಾದ್ ಅರೆನ ಕಾದಂಬರಿಲೆನ ಕೇಂದ್ರಡ್ ಪೊಣ್ಣನ ಪಾತ್ರ ಪ್ರಧಾನವಾದುಂಡ್. ಅರೆನ ಚೋಮನಗುಡಿ ಕಾದಂಬರಿದ ಬೊಳ್ಳಿದಂಚಿನ ಪಾತ್ರೊಲು ಎಡ್ಡೆ ಉದಾಹರಣೆ. ಮಹಿಳೆಯೆರೆನ ಸಾಮಾಜಿಕ ಸಮಸ್ಯೆಲೆನ್ ಅರ್ಥಮಲ್ತೊನರೆಗ್ ಕಾರಂತೆರೆನ ಬರವು ಸಹಕಾರಿಯಾದುಂಡ್ ಪಂಡುದು ಅಪರ ಜಿಲ್ಲಾಧಿಕಾರಿ ಅಬೀದ್ ಗದ್ಯಾಳ್ ಪಂಡೆರು. ಆರು ಇನಿ ಅಜ್ಜರಕಾಡುದ ನಗರ ಕೇಂದ್ರ ಗ್ರಂಥಾಲಯ ಸಭಾಂಗಣಡ್ ಡಾ. ಶಿವರಾಮ ಕಾರಂತ ಟ್ರಸ್ಟ್ ವತಿಡ್ದ್ ನಡತಿನ ಉಡುಪಿ ಜಿಲ್ಲಾ ಲೇಖಕಿಯೆರೆನ ಬೊಕ್ಕ ವಾಚಕಿಯೆರೆನ ಸಂಘದ ಸಹಯೋಗಡ್ ನಡತಿನ ಡಾ ಶಿವರಾಮ ಕಾರಂತರ ಕಾದಂಬರಿಲೆಡ್ ಸ್ತ್ರೀ ಸಂವೇದನೆ ಪನ್ಪಿನ ಒಂಜಿ ದಿನತ್ತ ವಿಶ್ವ ವಿದ್ಯಾನಿಲಯ ಮಟ್ಟದ ವಿಚಾರ ಸಂಕಿರಣನ್ ಉದಿಪನ ಮಲ್ತುದ್ ಪಾತೆರಿಯೆರು.

ಕಾರ್ಯಕ್ರಮದ ಅಧ್ಯಕ್ಷತೆಡಿತ್ತಿನ ಶಿವರಾಮ ಕಾರಂತ ಟ್ರಸ್ಟ್ ದ ಅಧ್ಯಕ್ಷೆ ಡಾ. ಗಣನಾಥ ಶೆಟ್ಟಿ ಎಕ್ಕಾರು, ಮಹಿಳಾ ಅಸಮಾನತೆದ ಸಂಕೀರ್ಣ ಸಮಸ್ಯೆಲೆನ್ ಕಾರಂತೆರು ತಮ್ಮ ಬರವುಡ್ ಅಭಿವ್ಯಕ್ತ ಮಲ್ದೆರ್ ಪಂಡೆರು. ಮುಖ್ಯ ಅತಿಥಿಲಾದಿತ್ತಿನ ಜಿಲ್ಲಾ ಲೇಖಕಿಯೆರೆನ ಬೊಕ್ಕ ವಾಚಕಿಯೆರೆನ ಸಂಘದ ಸ್ಥಾಪಕ ಅಧ್ಯಕ್ಷೆ ವಸಂತಿ ಶೆಟ್ಟಿ ಬ್ರಹ್ಮಾವರ ಕಾರಂತೆರು ಮಲ್ದಿನ ಮಾರ್ಗದರ್ಶನನ್ ನೆಂಪು ಮಲ್ತೆರು. ಜಿಲ್ಲಾ ಲೇಖಕಿಯೆರೆನ ಬೊಕ್ಕ ವಾಚಕಿಯೆರೆನ ಸಂಘದ ಕಾರ್ಯದರ್ಶಿ ಡಾ. ಸುಮಾ ಎಸ್. ಪ್ರಸ್ತಾವಿಕವಾದ್ ಪಾತೆರಿಯೆರು.

ಕಾರ್ಯಕ್ರಮಡ್ ಖ್ಯಾತ ಲೇಖಕಿ ಬೊಕ್ಕ ಭಾಷಾಂತರ ತಜ್ಞೆ ಡಾ. ಪಾರ್ವತಿ ಜಿ. ಐತಾಳ್, ಜಿಲ್ಲಾ ಕೇಂದ್ರ ಗ್ರಂಥಾಲಯದ ಮುಖ್ಯ ಗ್ರಂಥಾಲಯಾಧಿಕಾರಿ ಜಯಶ್ರೀ ಎಂ. ಉಡುಪಿ ಜಿಲ್ಲಾ ಲೇಖಕಿಯೆರೆನ ಬೊಕ್ಕ ವಾಚಕಿಯರ ಸಂಘದ ಅಧ್ಯಕ್ಷೆ ಡಾ. ನಿಕೇತನ, ಟ್ರಸ್ಟ್ ದ ಸದಸ್ಯೆರಾಯಿನ ಚೇತನ್ ಕೋವಾಡಿ ಡಾ. ಪ್ರಸಾದ್ ರಾವ್, ಜಿ.ಎಂ ಶರೀಫ್ ಹೂಡೆ ಉಪಸ್ಥಿತರಿತ್ತೆರು. ಕಾರ್ಯಕ್ರಮಡ್ ಡಾ. ಶಿವರಾಮ ಕಾರಂತ ಟ್ರಸ್ಟ್‌ ದ ಸದಸ್ಯ ಕಾರ್ಯದರ್ಶಿ ಪೂರ್ಣಿಮಾ ಸ್ವಾಗತ ಮಲ್ತುದ್, ಪೂರ್ಣಿಮಾ ಸುರೇಶ್ ನಿರೂಪಣೆ ಮಲ್ತುದ್, ಟ್ರಸ್ಟ್ ದ ಸದಸ್ಯ ಸತೀಶ್ ಕೊಡವೂರು ವಂದಿಸಾಯೆರು.