ಪುಷ್ಪಾನಂದ ಫೌಂಡೇಶನ್

ಪುಷ್ಪಾನಂದ ಫೌಂಡೇಶನ್ 554 ವಿದ್ಯಾರ್ಥಿಲೆಗ್ ಪ್ರತಿಭಾ ಪುರಸ್ಕಾರ ವಿತರಣೆ

*ವಿದ್ಯಾರ್ಥಿ ಜೀವನಡೇ  ಶಿಕ್ಷಣದ ಒಟ್ಟುಗ್ ಆರೋಗ್ಯದ ಬಗ್ಗೆಲಾ  ವಿಶೇಷ ಕಾಳಜಿ ಇಪ್ಪಡ್ : ಡಾ. ಶ್ರುತಿ ಬಲ್ಲಾಳ್*

ವಿದ್ಯಾರ್ಥಿ ಜೀವನಡೇ ಶಿಕ್ಷಣದೊಟ್ಟುಗ್  ಶಿಸ್ತು ಬದ್ಧ ಜೀವನ ಶೈಲಿ, ಎಡ್ಡೆ  ಆರೋಗ್ಯದ ಬಗ್ಗೆ ಕಾಳಜಿವಹಿಸಾವುನ ಮೂಲಕ ವಿದ್ಯಾರ್ಥಿಲು ಆರೋಗ್ಯವಂತ ಸಮಾಜ ನಿರ್ಮಾಣ  ಮಲ್ತೊನೊಡ್ .  ಶಾಸಕ ಯಶ್ ಪಾಲ್ ಸುವರ್ಣ  ಮೇರು ಶಿಕ್ಷಣಗ್  ಪ್ರೋತ್ಸಾಹ ಮಲ್ಪುನ ನಿಟ್ಟುಡ್ ಕೊರ್ಪಿನ ಪ್ರತಿಭಾ ಪುರಸ್ಕಾರ ನಿಕ್ಲೆನ ದುಂಬುದ ಶೈಕ್ಷಣಿಕ ಸಾಧನೆಗ್ ಸಹಕಾರಿಯಾವಡ್ ಪಂಡುದು ಉಡುಪಿದ ಖ್ಯಾತ ಮಧುಮೇಹ ತಜ್ಞ ವೈದ್ಯೆರಾಯಿನ  ಡಾ. ಶ್ರುತಿ ಬಲ್ಲಾಳ್ ಪಂಡೆರು.

ಪುಷ್ಪಾನಂದ ಫೌಂಡೇಶನ್ ವತಿಡ್ದ್  ಎಸ್. ಎಸ್. ಎಲ್. ಸಿ. ಬೊಕ್ಕ ದ್ವಿತೀಯ ಪಿಯುಸಿ ಪರೀಕ್ಷೆಡ್ ಎಡ್ಡೆ ಸಾಧನೆ ಮಲ್ದಿನ ಉಡುಪಿ ತಾಲೂಕುದ  554 ಪ್ರತಿಭಾವಂತ ವಿದ್ಯಾರ್ಥಿಲೆಗ್ ಪ್ರತಿಭಾ ಪುರಸ್ಕಾರ ವಿತರಣಾ ಸಮಾರಂಭದ ಉದ್ಘಾಟನೆ ನೆರವೇರಿಸಾದ್ ಆರ್ ಪಾತೆರಿಯೆರು.

ಸಮಾರಂಭದ ಅಧ್ಯಕ್ಷತೆಡ್  ಪುಷ್ಪಾನಂದ ಫೌಂಡೇಶನ್ ಪ್ರವರ್ತಕೆರಾಯಿನ ಶಾಸಕ ಯಶ್ ಪಾಲ್ ಸುವರ್ಣ ಪಾತೆರ್ದ್  ಅಪ್ಪೆ ಅಮ್ಮನ  ಪುದರುಡ್  ಆರಂಭ ಮಲ್ದಿನ ಫೌಂಡೇಶನ್ ಮೂಲಕ ಪ್ರತಿವರ್ಷ ಸಾರಗಟ್ಟಲೆ ವಿದ್ಯಾರ್ಥಿಲೆಗ್ ಪ್ರತಿಭಾ ಪುರಸ್ಕಾರ ಕೊರ್ಪಿನ ಮೂಲಕ ವಿದ್ಯಾರ್ಥಿಲೆಗ್ ಪ್ರೋತ್ಸಾಹ ಕೊರ್ಪಿನ  ಕಾರ್ಯಕ್ರಮ ಬಾರೀ ಖುಷಿ ಕೊರ್ಪುಂಡ್., ಪ್ರತಿಭಾ ಪುರಸ್ಕಾರ ಪಡೆಯಿನ ವಿದ್ಯಾರ್ಥಿಲೆನ ಸಾಧನೆ ಬಾಕಿದ ವಿದ್ಯಾರ್ಥಿಲೆಗ್ ಪ್ರೇರಣೆ ಕೊರಡ್ ಪಂಡೆರು.

ಸಮಾರಂಭಡ್  ಮುಖ್ಯ ಅತಿಥಿಯಾದಿತ್ತಿನ  ಉಡುಪಿ ನಗರಸಭೆತ ನಿಕಟಪೂರ್ವ ಅಧ್ಯಕ್ಷೆರಾಯಿನ ಪ್ರಭಾಕರ ಪೂಜಾರಿ ಪಾತೆರ್ದ್ ಶಾಸಕ ಯಶ್ ಪಾಲ್ ಸುವರ್ಣೆರ್ ಅರೆನ ಪುಷ್ಪಾನಂದ ಫೌಂಡೇಶನ್ ಬೊಕ್ಕ ಮೀನು ಮಾರಾಟ ಫೆಡರೇಶನ್ ಬೊಕ್ಕ ಮಹಾಲಕ್ಷ್ಮೀ ಬ್ಯಾಂಕ್  ಮುಖೇನ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆದ  ಸಾರ  ವಿದ್ಯಾರ್ಥಿಲೆನ ಶಿಕ್ಷಣಗ್ ಪ್ರೋತ್ಸಾಹಿಸಾವುನ ಮೂಲಕ ಶಿಕ್ಷಣದ ಬಗ್ಗೆ ತನ್ನ ಸಾಮಾಜಿಕ ಬದ್ಧತೆನ್ ನಿರೂಪಿಸಾದೆರ್ ಪಂಡೆರು.

ಸಮಾರಂಭಡ್ ಉಪಸ್ಥಿತರಿತ್ತಿನ ಅಜ್ಜರಕಾಡು ವಾರ್ಡ್ ದ ಮಾಜಿ ನಗರಸಭಾ ಸದಸ್ಯೆ  ಶ್ರೀಮತಿ ರಶ್ಮಿ ಸಿ. ಭಟ್, ಬಾಲಕಿಯರ ಸರಕಾರಿ ಪದವಿ ಪೂರ್ವ ಕಾಲೇಜಿದ ಉಪಾಧ್ಯಕ್ಷೆ ಶ್ರೀಮತಿ ನಿರುಪಮಾ ಪ್ರಸಾದ್ ಶೆಟ್ಟಿ, ಕಾಲೇಜಿದ ಪ್ರಾಂಶುಪಾಲೆರಾಯಿನ ಶ್ರೀ ಜಗದೀಶ್ ಕುಮಾರ್, ಪ್ರೌಢಶಾಲಾ ವಿಭಾಗದ  ಮುಖ್ಯೋಪಾಧ್ಯಾಯಿನಿ ಶ್ರೀಮತಿ ಇಂದಿರಾ ವಿದ್ಯಾರ್ಥಿಲೆಗ್ ಶುಭ ಹಾರೈಸಿಯೆರು. ಶ್ರೀಮತಿ ವಿಜೇತ ಶೆಟ್ಟಿ ಕಾರ್ಯಕ್ರಮ ನಿರೂಪಣೆ ಮಲ್ತೆರು.