ದೀಕ್ಷಾ ಎಸ್.ಬ್ರಹ್ಮಾವರ

ದೀಕ್ಷಾ ಎಸ್.ಎಂ. ಬ್ರಹ್ಮಾವರ: ತುಳುನಾಡ ಕಲಾಜಗತ್ತ್‌ದ ಬೊಕ್ಕ ಅಕ್ಷರ ಲೋಕೊದ ಅಪೂರ್ವ ಪೆರ್ಮೆ

ತುಳುನಾಡ ಮಣ್ಣ್‌ಡ್ ಕಲೆ ಪನ್ಪಿನವು ಪ್ರತಿ ಇಲ್ಲದ ಉಸುಲು. ಆಂಡ ಆ ಕಲೆನ್ ಅಕ್ಷರ ಲೋಕೊದ ಒಟ್ಟುಗು ಬಿರಾದ್, ಬದ್ಕ್‌ದ ಶಿಸ್ತುದೊಟ್ಟುಗು ಪಳಗಿಸಾದ್, ಇಡೀ ಕರ್ನಾಟಕನೇ ಮೆಚ್ಚುನಂಚ ಬಲತ್ತಿನ ಪ್ರತಿಭೆ ದೀಕ್ಷಾ ಎಸ್. ಎಂ. ಬ್ರಹ್ಮಾವರ. ಮೇರ್ ಕೇವಲ ಒಂಜಿ ಪುದರ್ ಅತ್ತ್, ಕಲೆ ಬೊಕ್ಕ ಶಿಕ್ಷಣದ ನಡುಟು ಸೇತುವೆ ಆದ್ ಉಂತ್‌ದಿನ ಒಂಜಿ ಶಕ್ತಿ.

ಪುಟ್ಟು ಬೊಕ್ಕ ಬಲತ್ತ್ ಬತ್ತಿನ ಸಾದಿ: ಸಂಸ್ಕಾರದ ಅಡಿಪಾಯ
ಬ್ರಹ್ಮಾವರದ ಪೊರ್ಲುದ ಪಸಂದ್ರೊಡು ಶ್ಯಾಮ್ ಬೊಕ್ಕ ಸುಮಂಗಳ ದಂಪತಿಲೆನ ಮಗಳಾದ್ ಪುಟ್ಟಿನ ದೀಕ್ಷಾ ಮೆರೆಗ್ ಬಾಲ್ಯೊಡೇ ಶಿಸ್ತ್ ಬೊಕ್ಕ ಕಲೆ ಪನ್ಪಿನವು ಬೆರಿಯೇ ಬತ್ತಿನ ಆಸ್ತಿ. ಕಾಲೇಜಿಡ್ ಅಟೆಂಡರ್ ಆದ್ ಮಸ್ತ್ ಬಙ ಬತ್ತಿನ ಅಮ್ಮೆರೆನ ಶ್ರಮ, ಶಾಲೆದ ಮುಖ್ಯಶಿಕ್ಷಕಿ ಆದ್ ಜೋಕ್ಲೆನ ಬದ್ಕ್‌ನ್ ಬೆಳಗುನ ಅಪ್ಪೆನ ಮಾರ್ಗದರ್ಶನ ದೀಕ್ಷನ ವ್ಯಕ್ತಿತ್ವಗ್ ಬಲ ಕೊರ್ತ್ಂಡ್. ಮೇರ್ ಬಯೋಕೆಮಿಸ್ಟ್ರಿಡ್ ಎಂ.ಎಸ್ಸಿ (M.Sc) ಬೊಕ್ಕ ಬಿ.ಎಡ್ (B.Ed) ಪದವಿನ್ ಪಡೆದ್, ಅಪ್ಪೆನಂಚನೆ ಶಿಕ್ಷಕಿ ಆದ್ ವಿದ್ಯಾದಾನ ಮಲ್ಪೊಡು ಪನ್ಪಿನ ಕನೊಟು ಇತ್ತೆ ವಿಜ್ಞಾನ ಶಿಕ್ಷಕಿಯಾದ್ ಕೆಲಸ ಮಲ್ತೊಂದುಲ್ಲೆರ್.

ಕಲಾಜಗತ್ತ್‌ಗ್ ಪಾದಾರ್ಪಣೆ: ಮೂಜಿ ವರ್ಷದ ಬಾಲೆದ ಪುಟ್ಟ ಹೆಜ್ಜೆ
ದೀಕ್ಷನ ಕಲಾ ಪಯಣ ಸುರು ಆಯಿನಿ ಅಚ್ಚರಿ ಪನ್ಪಿನಂಚನೆ. ಕೇವಲ ಮೂಜಿ ವರ್ಷದ ಬಾಲೆ ಆದಿಪ್ಪುನಗನೇ ಹಾರಾಡಿ ಶಾಲೆದ ಗಣೇಶೋತ್ಸವದ ವೇದಿಕೆಡ್ ನೃತ್ಯ ಮಲ್ಪುನ ಮೂಲಕ ಕಲಾ ಲೋಕೊಗು ಪಾದಾರ್ಪಣೆ ಮಲ್ತೆರ್. ಅಂದ್ ಆ ಕಿನ್ಯ ಕಾರ್‌ಲೆಡ್ ಇತ್ತಿನ ಗೆಜ್ಜೆದ ಸೊರೊ, ಇನಿ ಇಡೀ ನಾಡೇ ಮೆಚ್ಚುನ ಮಟ್ಟ್‌ಗ್ ಬುಲೇದುಂತ್‌ನವು ಒಂಜಿ ನಂಬೆರೆಗಾವಂದಿನಂಚಿ ಸತ್ಯ. ಅಬ್ಬಕ್ಕ ದಾರಗ ಜಾನಪದ ತಂಡದ ಮೂಲಕ ಪೂರ ಜಿಲ್ಲೆಲೆಡ್ ತುಳುನಾಡ ಸಂಸ್ಕೃತಿನ್ ಪಸರ್ದ್, ಎಡ್ಡೆ ಎಡ್ಡೆ ಇನಾಮುಲೆನ್ ಪಡೆತೆರ್.

ರಂಗಭೂಮಿದ ತಪಸ್ವಿ: 500 ಪ್ರದರ್ಶನೊಲೆನ ಸಾರಥಿ
ಕರಿನ 11 ವರ್ಷೊಡ್ದು ದೀಕ್ಷಾ ರಂಗಭೂಮಿನ್ ಒಂಜಿ ತಪಸ್ಸ್‌ದಂಚನೆ ಎನ್ನೊಂದು ಬೈದೆರ್.
ಭಾಷಾ ವೈವಿಧ್ಯ: ಕುಂದಾಪ್ರ ಕನ್ನಡದ ಒಟ್ಟುಗು ತುಳು ಭಾಷೆದ ನಾಟಕೊಲೆಡ್‌ಲಾ ಮೇರ್ ಮಾಸ್ಟರ್!
ಜೀವಂತಿಕೆದ ಪಾತ್ರೊಲು: ‘ಭೂ ಕೈಲಾಸ’, ‘ಐಶು IPS’, ‘ಗಿರ್ಗಿಟ್ಲಿ’, ‘ಈ ಪೊರ್ಲು ತೂವೊಡ್ಡಿ’, ‘ದೈವದ ನಿಲೆ’ ಇಂಚಿನ ಸುಮಾರ್ 500ಡ್ದ್‌ಲಾ ಎಚ್ಚ ನಾಟಕೊಲೆಡ್ ಅಭಿನಯ ಮಲ್ತ್‌ದ್ ಜನಕುಲೆನ ಮನಸ್ ಗೆಂದ್‌ದೆರ್.
ಸೃಜನಶೀಲತೆ: ನಟನೆ ಮಾತ್ರ ಅತ್ತಂದೆ, ‘ಬದುಕಲು ಬಿಡಿ’ ಪನ್ಪಿನ ನಾಟಕೊನು ತಾನೇ ಬರೆದ್ ನಿರ್ದೇಶನ ಮಲ್ಪುನ ಒರುಟು ತನ್ನ ಸೃಜನಶೀಲತೆನ್ ತೋಜ್ಪಾದೆರ್.

ಕಿರುತೆರೆದ ‘ಜೂನಿಯರ್ ಸಾಧು ಕೋಕಿಲ’ :
ರಾಜ್ಯಮಟ್ಟದ ಟಿವಿ ಚಾನೆಲ್ ಲೋಕೊಡು ದೀಕ್ಷನ ಸಾಧನೆ ಮಲ್ಲವು.
ಗಿಚ್ಚಿ ಗಿಲಿಗಿಲಿ: ಕಲರ್ಸ್ ಕನ್ನಡದ ಗಿಚ್ಚಿ ಗಿಲಿಗಿಲಿ ಕಾರ್ಯಕ್ರಮೊಡು ‘ಬೆಸ್ಟ್ ಪರ್ಫಾರ್ಮರ್’ ಆದ್, ದೈತ್ಯ ಕಲಾವಿದೆ ಸಾಧು ಕೋಕಿಲಡ್ದೇ ‘ಜೂನಿಯರ್ ಸಾಧು ಕೋಕಿಲ’ ಪನ್ಪಿನ ಬಿರುದು ಪಡೆದಿನಿ ಮೆರೆನ ಟೈಮಿಂಗ್ ಸೆನ್ಸ್‌ಗ್ ಸಂದಿನ ಗೌರವ.
ಬಿಗ್ ಬಾಸ್ ವೇದಿಕೆ: ಬಿಗ್ ಬಾಸ್ ಸೀಸನ್ 11ದ ಫಿನಾಲೆಡ್ ಚೈತ್ರಾ ಕುಂದಾಪುರನ ಅನುಕರಣೆ (Mimicry) ಮಲ್ತ್‌ದ್ ಇಡೀ ಕರ್ನಾಟಕನೇ ಮೇರೆನಂಚಿ ತೂಪುನಂಚ ಮಲ್ತೆರ್.

ಡಿಜಿಟಲ್ ಬೊಕ್ಕ ಸಿನಿಮಾ ಲೋಕೊದ ಬೊಲ್ಪು :
‘ವಸಂತಿ’, ‘ಯಾನ್ ಸೂಪರ್ ಸ್ಟಾರ್’ ಸಿನಿಮೋಲೆಡ್ ನಟನೆ ಮಲ್ತಿನ ಮೇರ್, ‘ಟೀಂ ಕಲಾಮೃತ’ YouTube ಚಾನೆಲ್ ಮೂಲಕ ಹಾಸ್ಯದ ಒಟ್ಟುಗು ಸಮಾಜಗ್ ಎಡ್ಡೆ ಸಂದೇಶ ಕೊರ್ದು ಇನಿ Social Media Star ಆದ್ ಪುದರ್ ಪಡೆತೆರ್. ಚಂಯ್ಕ್ ಪಂಯ್ಕ್, ಬಲೆ ತೆಲಿಪಾಲೆ ಇಂಚಿನ ಕಾರ್ಯಕ್ರಮೊಲೆಡ್ ನೈಜ ಅಭಿನಯ ಮಲ್ತ್‌ದ್ ತುಳು ಜನಕುಲೆನ ಇಲ್ಲದ ಮಗಳಾತೆರ್.

ಗೌರವ ಬೊಕ್ಕ ಪ್ರಶಸ್ತಿಲು :
ಡಾ. ಶಿವರಾಮ ಕಾರಂತ ಪ್ರತಿಷ್ಠಾನ ಕೋಟ ಸನ್ಮಾನ.
ಕಲೆಕ್ಕಾದ್ ‘ಕಲಾರತ್ನ’ ಪ್ರಶಸ್ತಿ.
ಯುವಜನತೆಗ್ ಮಾದರಿ ಆದುಪ್ಪುನೆಕ್ ‘ಕುಂದಾಪ್ರ ಯುವಸಿರಿ’ ಪುರಸ್ಕಾರ.

ಒಂಜಿ ಪೊರ್ಲುದ ಸಂದೇಶ :
ದೀಕ್ಷಾನ ಬದ್ಕ್ ನಮಕ್ ಒಂಜಿ ಪಾಠ – “ಶ್ರಮ ಇತ್ತ್ಂಡ ಸಾಧನೆ ಸುಲಭ” ಪನ್ಪಿನೆನ್ ಸರಿಯಾದ್ ಪಗೆಲ್ ಶಾಲೆಡ್ ಜೋಕ್ಲೆಗ್ ಸೈನ್ಸ್ ಪಾಠ ಮಲ್ತ್‌ದ್, ರಾತ್ರೆ ಬಣ್ಣ ಪಾಡ್ದ್ ನಾಟಕೊಡು ರಂಜಿಪುನೆ ಪಂಡ ಅವು ಒಂಜಿ ಮಲ್ಲ ಸಾಹಸ. ಅಪ್ಪೆನಂಚನೆ ಶಿಕ್ಷಕಿ ಆದ್ ವಿದ್ಯಾದಾನ ಮಲ್ತೊಂದು, ಕಲಾವಿದೆಯಾದ್ ಜನೊಕುಲೆನ ಮನಸ್ ಗೆಂದೊಂದು ಇಪ್ಪುನ ದೀಕ್ಷಾ ಎಸ್.ಎಂ. ಬ್ರಹ್ಮಾವರ ಮೇರ್ ತುಳುನಾಡ ಪೆರ್ಮೆ.

ಲೇಖನ: ಸತೀಶ ಶೆಟ್ಟಿ ಚೇರ್ಕಾಡಿ ದೊಡ್ಡಮನೆ