ಜಿಲ್ಲಾ ಪತ್ರಕರ್ತರ ದಿನಾಚರಣೆ

ಉಡುಪಿ ಜಿಲ್ಲಾ ಪತ್ರಕರ್ತರ ಸಂಘಡ್ದ್ ಪತ್ರಿಕಾ ದಿನಾಚರಣೆ

ಉಡುಪಿ, ಜು.1: ಕೃತಕ ಬುದ್ದಿಮತ್ತೆ ಸುದ್ದಿಗೂಡುದ ಉಲಾಯಿ ಪ್ರವೇಶ ಮಲ್ತುಂಡ, ಭಾಷಾಂತರ, ಸುದ್ದಿ, ಸಾರಾಂಶ, ವಿವಿಧ ಶೀರ್ಷಿಕೆ ಆಯ್ಕೆ, ಕಾಪಿ ಎಡಿಟಿಂಗ್, ವೀಡಿಯೊ ಭಾಷಣದ ಟ್ರಾನ್ಸ್ಸ್ಕ್ರಿಪ್ಟ್ ರಚನೆ, ಸಬ್-ಟೈಟಲ್ ಸೇರಿನಂಚ ಬಹುತೇಕ ಕೆಲಸಲೆನ್ ಮಲ್ಪೊಲಿ. ನೆತ್ತ ಪರಿಣಾಮ ದುಂಬು ದ ಕೆಲವೇ ವರ್ಷಲೆಡ್ ಸುದ್ದಿ ಡೆಸ್ಕ್ ಡುಪ್ಪುನ ಮುಕ್ಕಾಲು ಪಾಲು ಬೊಊ ವರದಿಗಾರಿಕೆ ಕ್ಷೇತ್ರಡುಪ್ಪುನ ಶೇ.50 ಜನತ್ತ ಕೆಲಸನ್ ಈ ಲಾರ್ಜ್ ಲ್ಯಾಂಗ್ವೇಜ್ ಮಾಡೆಲ್ ಆಧರಿತ ಕೃತಕ ಬುದ್ದಿಮತ್ತೆ(ಎಐ) ತಂತ್ರಜ್ಞಾನ ದಿಂಗುದ್ ಪಾಡುಂಡ್ ಪಂಡುದು ಹಿರಿಯ ಪತ್ರಕರ್ತ ಬೊಕ್ಕ ಅಂಕಣಕಾರ ರಾಜಾರಾಂ ತಲ್ಲೂರು ಪಂಡೆರ್.

ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಆಶ್ರಯಡ್ ಉಡುಪಿ ಪತ್ರಿಕಾ ಭವನ ಸಮಿತಿ ಬೊಕ್ಕ ಉಡುಪಿ ಲಯನ್ಸ್ ಕ್ಲಬ್ ಸಹಯೋಗ ದೊಟ್ಟುಗ್ ಉಡುಪಿ ಬ್ರಹ್ಮಗಿರಿತ್ತ ಲಯನ್ಸ್ ಭವನಡ್ ಮಂಗಳವಾರ ಆಯೋಜನೆ ಮಲ್ದಿನ ಪತ್ರಿಕಾ ದಿನಾಚರಣೆಡ್ ಆರು ‘ಮಾಧ್ಯಮ: ದುಂಬು ದ 10ವರ್ಷಗಳ- ಮಿಡಿಯಾ ಕನ್ವರ್ಜೆನ್ಸ್, ಎಲ್ಎಲ್ಎಂ’ ವಿಷಯದ ಬಗೆಟ್ ವಿಶೇಷ ಉಪನ್ಯಾಸ ಕೊರಿಯೆರು.

ಭಾರತ 2023ಡ್ ಡಿಜಿಟಲ್ ಪರ್ಸನಲ್ ಡಾಟಾ ಪ್ರೊಟೆಕ್ಷನ್ ಆ್ಯಕ್ಟ್(ಡಿಪಿಡಿಪಿ)-2023ನ್ ಅಂಗೀಕರಿಸಾದುಂಡ್. ಅಯಿತ್ತ ಕರಡು ನಿಯಮಗಳನ್ನು ಇತ್ತೆನೆ ಸರಕಾರ ಪ್ರಕಟ ಮಲ್ದಿತ್ತುದ್, ಅವ್ವೆನ್ ಸಾರ್ವಜನಿಕ ಚರ್ಚೆಗಾದ್ ದೀತುಂಡ್. ಬಾರೀ ಬೇಗ ಆ ನಿಯಮೊಲು ಜಾರಿಗೆ ಬರೊಂದುಂಡ್. ಉಂದು ಮಾಧ್ಯಮಲೆನ ಬದಲಾವೊಂದುಪ್ಪುನ ಸನ್ನಿವೇಶಡ್ ಮಹತ್ವದ ಬೆಳವಣಿಗೆ ಆವೊಡು ಪಂಡೆರು.

ನಮಡ ಇದಮುಟ ಖಾಸಗಿತನ, ಬೌದ್ಧಿಕ ಹಕ್ಕು, ಕಾಪಿರೈಟ್ ಇತ್ಯಾದಿಲೆನ ಕಾನೂನುಲು ತೀರಾ ಸಡಿಲ ಆದ್ ಇತ್ತುಂಡ್. ಆಂಡ ಇತ್ತೆ ಕೃತಕ ಬುದ್ದಿಮತ್ತೆ ಸನ್ನಿವೇಶಡ್ ಕಂಪ್ಯೂಟರ್ ಲು ಎಲ್ಎಲ್ಎಂ(ಲಾರ್ಜ್ ಲ್ಯಾಂಗ್ವೇಜ್ ಮಾಡೆಲ್) ಬಳಸೊಂದ್ ಕೌಶಲಲೆನ್ ಕಲ್ತೊಂದುಲ್ಲ. ಇಂಚ ದುಂಬರಿತುದ್ ನಮ್ಮ ಕೌಶಲನ್ ಅವು ಬಳಸೊಂದ್, ತಂಕುಲು ಕಲ್ತುದ್ ನಮ್ಮ ಉದ್ಯೋಗನ್ ಒಯ್ತ್ ದೆತೊಂಬಿನ ಪರಿಸ್ಥಿತಿ ಬರ್ಪುಂಡ್ ಪಂಡುದು ಆರು ತೆರಿಪಾಯೆರು.

ಪೊಸ ಮಾಧ್ಯಮ ಟೆಕ್ನಾಲಜಿಲೆನ ಮಹಾಪ್ರವಾಹಡ್ ಸುದ್ದಿ ತಲುಪುನ ವೇಗ ಹೆಚ್ಚಾದುಪ್ಪುನೆಡ್ದಾವರ ಪ್ರಸ್ತುತ ಆದ್ ಒರಿಯುನು ಮುದ್ರಣ ಮಾಧ್ಯಮದ ಮಲ್ಲ ಸವಾಲು ಆತುಂಡ್. ಇನಿ ಜಗತ್ತಿನಾದ್ಯಂತ ಪ್ರತೀ ವರ್ಷ ಮಸ್ತ್ ಮುದ್ರಣ ಪತ್ರಿಕೆಲು ಮುಚ್ಚೊಂದುಂಡ್. ಇನಿ ಮುದ್ರಣ ಮಾಧ್ಯಮ ಒರಿಯರೆಗ್ ಕಾರಣ ಪರ ತಲೆಮಾರುದ ಓದುಗೆರೆಡಾದ್ ಮುದ್ರಣ ಮಾಧ್ಯಮ ಸದ್ಯಗ್ ಉಸುಲು ದೆಪ್ಪುಂಡ್ ಪಂಡೆರು.

ಪರ ಸ್ಯಾಟಲೈಟ್ ಆಧರಿತ ಟೆಲಿವಿಷನ್ ಚಾನೆಲ್ ಗ್ ಪೊಸತಾದ್ ಬರೊಂದುಪ್ಪುನ ಡಿಜಿಟಲ್-ವೆಬ್ ಆಧರಿತ ಚಾನೆಲ್ ಬೊಕ್ಕ ತಂತ್ರಜ್ಞಾನದೊಟ್ಟುಡ್ ಪಂತೊ ಕಷ್ಟ ಆವೊಂದುಂಡ್. ಸದ್ಯಗ್ ಅರೆಗ್ ಮುದ್ರಣ ಮಾಧ್ಯಮದಾತ್ ಬಿಕ್ಕಟ್ಟು ಇಜ್ಜಿ, ಆಂಡ ಸಾಂಪ್ರದಾಯಿಕ ಟಿವಿ ಚಾನೆಲ್ ಆದ್ ಒರಿಯುನವ್ ದೀರ್ಘಾವಧಿಡ್ ಕಷ್ಟ ಪಂಡುದು ಆರು ಪಂಡೆರು.

ಇಂಟರ್ನೆಟ್ ಆಧರಿತ ಸುದ್ದಿ ಚಾನೆಲ್ ಗ್ ಹೆಚ್ಚ ಖರ್ಚಿ ಇಜ್ಜಿ ಬೊಕ್ಕ ಸದ್ಯಗ್ ಒವ್ವೇ ಕಾನೂನಾತ್ಮಕ ಅಡೆತಡೆ ಇಜ್ಜಿ ಪನ್ಪಿನ ಕಾರಣಗ್ ಪುಟ್ಟೊಂದುಂಡ್. ಈ ವೆಬ್ ಚಾನೆಲ್ ಲು ಸಾಮಾಜಿಕ ಮಾಧ್ಯಮದ ಪ್ಲಾಟ್ ಫಾರಂಲೆಡ್ ಕ್ರಿಕೆಟ್ ಗೊಬ್ಬುದ ಪಿರ ಪೋತುಂಡ್. ಬಹುತೇಕ ವೆಬ್ ಮಾಧ್ಯಮಲೆನ ಜುಟ್ಟು ಇತ್ತೆ ಸಾಮಾಜಿಕ ಮಾಧ್ಯಮಲೆನ ಕೈಟ್ ಉಂಡು ಪಂಡುದು ಆರು ತೆರಿಪಾಯೆರು.

ಒಂಜಿ ಮಾಧ್ಯಮ ಬಾಕಿದ ಬೇತೆ ಸಾಂಪ್ರದಾಯಿಕ ಮಾಧ್ಯಮಲೆನ ಎಡ್ಡೆ ಅಂಶ(ರೇಡಿಯೋ ಧ್ವನಿ, ಟಿವಿ ದೃಶ್ಯೊಲು, ಮುದ್ರಣದ ಅಕ್ಷರೊಲು)ಲೆನ್ ತಾನು ಗಳಸೊಂದ್ , ಅವೆಲ್ಲ ಒಂಜಿ ಕಡೆ ಸೇರ್ದ್ ಲಭ್ಯ ಆವೊಂದುಂಡ್. ದುಂಬುದ 10 ವರ್ಷಡ್ ನಮ್ಮ ಭವಿಷ್ಯದ ಮೀಡಿಯಾ ಇಂಚ ಇಪ್ಪುಂಡ್. ಈ ಟ್ರೆಂಡ್ ಇತ್ತೆನೇ ಆರಂಭ ಆತುಂಡ್ . ಸುದ್ದಿ ನನ ಪಂಚೇಂದ್ರಿಯದ ಒಟ್ಟು ಅನುಭವ ಆವಡ್ ಪಂಡೆರು.

ಕಾರ್ಯಕ್ರಮನ್ ಉದಿಪನ ಅಪರ ಜಿಲ್ಲಾಧಿಕಾರಿ ಅಬೀದ್ ಗದ್ಯಾಲ್ ಪಾತೆರ್ದ್ , ಪತ್ರಕರ್ತೆರು ಪ್ರಜಾಪ್ರಭುತ್ವದ ನಾಲನೇ ಅಂಗ. ಮೂಜಿ ಅಂಗೊಲು ಸರಿಯಾದ್ ಕೆಲಸ ಮಲ್ಪಂದೇ ಇತ್ತಿನಪಗ ವಿಮರ್ಶೆ ಮಾಡುವ ಅಧಿಕಾರ ಇಪ್ಪುನ್ ಪತ್ರಿಕಾ ಮಾಧ್ಯಮಗ್ ಪತ್ರಿಕಾ ಸ್ವಾತಂತ್ರ ಬಲಿಷ್ಠವಾದುಪ್ಪುನಾತ್ ಪ್ರಜಾಪ್ರಭುತ್ವ ಬಲಿಷ್ಠ ಆದುಂಡ್. ಪತ್ರಿಕಾ ಸ್ವಾತಂತ್ರ ದೆರ್ತ್ ಪತ್ತುನ ಬೊಕ್ಕ ಪಾವಿತ್ರತೆ ಕಾಪುನ ಕೆಲಸ ಅತೀಅಗತ್ಯವಾದುಂಡ್ . ಸಮಾಜದ ಮೂಜನೇ ಕಣ್ಣು ಮಾಧ್ಯಮ ಸದಾ ಎಚ್ಚರದಿಂದ ಇರಬೇಕು. ಅಪಗ ಮಾತ್ರ ಸಮಾಜ ಸರಿಯಾಯಿನ ಸಾದಿಡ್ ನಡಪುಂಡು ಪಂಡುದು ಪಂಡೆರು.

ಅಧ್ಯಕ್ಷತೆನ್ ಸಂಘದ ಜಿಲ್ಲಾಧ್ಯಕ್ಷ ರಾಜೇಶ್ ಶೆಟ್ಟಿ ಅಲೆವೂರು ವಹಿಸಾದಿತ್ತೆರು. ಮಣಿಪಾಲ ಎಚ್ಪಿಆರ್ ಸಂಸ್ಥೆದ ಮುಖ್ಯಸ್ಥ ಹರಿಪ್ರಸಾದ್ ರೈ ಸಂಘದ ಸದಸ್ಯರೆನ ಜೋಕ್ಲೆಗ್ ಪ್ರತಿಭಾ ಪುರಸ್ಕಾರ ಪ್ರದಾನ ಮಲ್ತೆರು. ಉಡುಪಿ ಲಯನ್ಸ್ ಕ್ಲಬ್ ಅಧ್ಯಕ್ಷ ಅಲೆವೂರು ದಿನೇಶ್ ಕಿಣಿ ಸಂಘದ ಸದಸ್ಯರೆಗ್ ಗುರುತು ಚೀಟಿ ವಿತರಣೆ ಮಲ್ತೆರು. ಈ ಸಂದರ್ಭಡ್ ಹಿರಿಯ ಪತ್ರಕರ್ತ ಕುಂಜೂರು ಲಕ್ಷ್ಮೀನಾರಾಯಣ ಕುಂಡಂತಾಯೆರೆಗ್ ಪ್ರತಿಕಾ ದಿನದ ಗೌರವನ್ ಸಲ್ಲಿಸಾಯೆರ್.

ವೇದಿಕೆಡ್ ವಾರ್ತಾಧಿಕಾರಿ ಮಂಜುನಾಥ್, ಸಂಘದ ರಾಜ್ಯ ಸಮಿತಿ ಸದಸ್ಯ ಕಿರಣ್ ಮಂಜನಬೈಲು, ಉಡುಪಿ ಪತ್ರಿಕಾ ಭವನ ಸಮಿತಿದ ಸಂಚಾಲಕ ಅಜಿತ್ ಆರಾಡಿ ಉಪಸ್ಥಿತರಿತ್ತೆರು.

ಪ್ರತಿಭಾ ಪುರಸ್ಕಾರ ಪಡೆಯಿನ ಜೋಕ್ಲೆನ ಪಟ್ಟಿನ್ ಸಮಿತಿ ಸದಸ್ಯ ಮೈಕಲ್ ರೋಡ್ರಿಗಸ್ ವಾಚನ ಮಲ್ತೆರು. ಕಾರ್ಯದರ್ಶಿ ರಹೀಂ ಉಜಿರೆ ಉಪನ್ಯಾಸಕೆರೆನ ಪರಿಚಯ ಮಲ್ತೆರು. ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ ಸ್ವಾಗತ ಮಲ್ತೆರು. ಕೋಶಾಧಿಕಾರಿ ಉಮೇಶ್ ಮಾರ್ಪಳ್ಳಿ ವಂದಿಸಾದ್ . ಪತ್ರಕರ್ತೆ ರಾಧಿಕಾ ಕಾರ್ಯಕ್ರಮ ನಿರೂಪಣೆ ಮಲ್ತೆರು.