ವಿಶ್ವದ ಒವ್ವೇ ದೇಶಗ್ ಇಜ್ಜಾಂದಿನ ಕ್ಷಾತ್ರ ಪರಂಪರೆ ನಮ್ಮ ದೇಶಗುಂಡ್, ಈ ಕ್ಷಾತ್ರ ಪರಂಪರೆನ್ ಪುಟ್ಟು ಪಾಡ್ರೆಗ್ ಮಾತೆಯೆರು ಕೊರಿನ ಕೊಡುಗೆ ಬಾರೀ ಮಲ್ಲ.. ಪೆಹಲ್ಗಾವ್ ಡ್ ಉಗ್ರೆರು ಮಾತೆಯೆರೆನ ಸಿಂದೂರನ್ ಒರೆಸಿನ ಘಟನೆಡ್ ಬೊಕ್ಕ ದೇಶೊಡ್ ಇತ್ತೆ ಕುಡೊರ ಕ್ಷಾತ್ರ ಶಕ್ತಿ ಲಕ್ಕುದುಂಡ್ ಬೊಕ್ಕ ಆಪರೇಶನ್ ಸಿಂದೂರ ಮೂಲಕ ಇತ್ತೆ ವಿಶ್ವವ್ಯಾಪಿಯಾತುಂಡ್ ಪಂಡುದು ಸಾಮಾಜಿಕ ಚಿಂತಕ ಡಾ. ವಾದಿರಾಜ್ ಗೋಪಾಡಿ ಪಂಡೆರು.ಆರು ಶುಕ್ರವಾರ ಕಡಿಯಾಳಿಜ ಶ್ರೀ ಮಹಿಷಮರ್ಧಿನಿ ದೇಗುಲಡ್ ಮಾತೃಮಂಡಳಿ ಬೊಕ್ಕ ಶಬರಿಮಲೆ ಅಯ್ಯಪ್ಪ ಸೇವಾ ಸಮಾಜಂ ದ ವತಿಡ್ದ್ ಆಪರೇಶನ್ ಸಿಂಧೂರದ ವಿಜಯೋತ್ಸವ ಬೊಕ್ಕ ಭಾರತೀಯ ಸೈನಿಕೆರೆನ ಕ್ಷೇಮಗಾದ್ ದೇವಿಗ್ ಪೂತ ಪೂಜೆ ಕಾರ್ಯಕ್ರಮಡ್ ಪಾಲ್ ಪಡೆದ್ ಪಾತೆರಿಯೆರು.
ಪೆಹಲ್ಗಾವ್ ಡ್ ಪ್ರವಾಸಿಗೆರೆನ ಧರ್ಮ ಕೇಂಡುದ್ ಕೇವಲ ಪುರುಷರೆನ್ ಹತ್ಯೆ ಮಲ್ತುದ್, ಮಾತೆಯೆರೆನ ಸಿಂದೂರನ್ ಒರೆಸಿದಿಞವ್ವ್ , ಅವ್ವ್ ಕೇವಲ ರಾಜತಾಂತ್ರಿಕ ಭಯೋತ್ಪಾದನೆ ಅತ್ತ್ , ಅಯಿತ್ತ ಪಿರಾವುಡ್ ಯೋಜಿತ, ಭಾರತೀಯ ಸಂಸ್ಕೃತಿನೇ ನಾಶ ಮಲ್ಪುನ ಹುನ್ನಾರ ಉಂಡು., ಈ ಮೂಲಕ ಭಾರತೀಯ ಸಂಸ್ಕೃತಿಗ್ ಬೊಕ್ಕ ಭಾರತದ ಶಕ್ತಿಗ್ ಸವಾಲು ಪಾಡ್ದುಂಡ್ ಪಂಡೆರು.
ಭಾರತದ ಸೈನ್ಯ ಪಾಕಿಸ್ತಾನನ್ ಕೆಲವೇ ದಿನೊಟ್ ನಾಶ ಮಲ್ಪೊಲಿತ್ತುಂಡ್ , ಆಂಡ ಯುದ್ಧ ಕೇವಲ ರಡ್ಡ್ ದೇಶದ ಮಿತ್ತ್ ಮಾತ್ರ ಅತ್ತ್ ಇಡೀ ವಿಶ್ವದ ಮಿತ್ತ್ ಧೀರ್ಘ ಕಾಲದ ದುಷ್ಪರಿಣಾಮ ಬೂರುಂಡ್.. ಭಾರತೀಯೆರು ದೇಶ ವಿದೇಶೊಡುಲ್ಲೆರ್. ಅಕ್ಲೆನ ಮಿತ್ತುಲಾ ಪರಿಣಾಮ ಆಪುಂಡ್.. ಅಂಚಾದ್ ಭಾರತ ಯುದ್ಧಗ್ ಪರ್ಯಾಯವಾಯಿನ ರಾಜತಾಂತ್ರಿಕ ರೀತಿಡ್ ಪಾಕಿಸ್ತಾನಗ್ ಉತ್ತರ ಕೊರ್ತುಂಡ್.. ಉಂದೆನ್ ಇಡೀ ವಿಶ್ವನೇ ಮೆಚ್ಚಿದುಂಡ್..ಇತ್ತೆ ಆತಿನಿ ಕೇವಲ ಯುದ್ಧ ವಿರಾಮ ಮಾತ್ರ , ಭಯೋತ್ಪಾದನೆದ ವಿರುದ್ಧ ಯುದ್ಧೊನ್ ಭಾರತ ಉಂತಾಯಿಜಿ ಪಂಡುದ್ ವಿಶ್ಲೇಷಣೆ ಮಲ್ತೆರು. ಉಡುಪಿ ಶಾಸಕೆರಾಯಿನ ಯಶ್ಪಾಲ್ ಸುವರ್ಣ ಕಾರ್ಯಕ್ರಮೊಗ್ ಎಡ್ಡೆಪ್ಪು ಬಯಕಿಯೆರ್.
ಶಬರಿಮಲೆ ಅಯ್ಯಪ್ಪ ಸೇವಾ ಸಮಾಜಂ ಜಿಲ್ಲಾಧ್ಯಕ್ಷ ರಾಧಕೃಷ್ಣ ಮೆಂಡನ್, ಕಾರ್ಯದರ್ಶಿ ರಂಜಿತ್ ಶೆಟ್ಟಿ, ರಾಷ್ಟ್ರೀಯ ಮಹಿಳಾ ಆಯೋಗದ ಮಾಜಿ ಸದಸ್ಯೆ ಶ್ಯಾಮಲಾ ಕುಂದರ್, ಬಿಜೆಪಿ ಮಹಿಳಾ ಮೋರ್ಚಾದ ಜಿಲ್ಲಾಧ್ಯಕ್ಷೆ ಸಂಧ್ಯಾ ರಮೇಶ್, ಕಡಿಯಾಳಿ ಮಾತ್ರಮಂಡಳಿ ಅಧ್ಯಕ್ಷೆ ಪದ್ಮಾವತಿ ರತ್ನಾಕರ್, ಸಲಹೆಗಾರೆರಾಯಿನ ಸುಪ್ರಭಾ ಅಚಾರ್ಯ ವೇದಿಕೆಡಿತ್ತೆರು. ಶಬರಿಮಲೆ ಅಯ್ಯಪ್ಪ ಸೇವಾ ಸಮಾಜಂನ ಮಹಿಳಾ ಘಟಕದ ಅಧ್ಯಕ್ಷೆ ತಾರಾ ಉಮೇಶ್ ಆಚಾರ್ಯ ಸ್ವಾಗತಿಸಿ, ಕಾರ್ಯಕ್ರಮ ಸಂಯೋಜನೆ ಮಲ್ತೆರು.
ಪ್ರಮುಖರಖೆರಾಯಿನ ಶ್ರೀ ಹರಿಯಪ್ಪ ಕೋಟ್ಯಾನ್,ಸರೋಜ ಶೆಣೈ, ಉಷಾ ಸುವರ್ಣ, ವೀಣಾ ಎಸ್.ಶೆಟ್ಟಿ, ರಮಿತಾ ಶೈಲೇಂದ್ರ, ತಾರಾ ಸತೀಶ್, ದಿವಾಕರ್ ಶೆಟ್ಟಿ ಮಲ್ಲಾರ್, ಯಶೋಧಾ ಕೇಶವ್, ಸುಖನ್ಯ ಶೇರಿಗಾರ್ ಮೊಕುಲು ಉಪಸ್ಥಿತರಿತ್ತೆರು. ಈ ಸಂದರ್ಭಡ್ ಉಪಸ್ಥಿತರಿತ್ತಿನ ಮಾತೆಯರೆಗ್ ಸಿಂದೂರ ವಿತರಣೆ ಮಲ್ತೆರ್.
by 