ಪತ್ತನಾಜೆ.

ಬೆನ್ನಿ ಬದ್ಕ್‌ದೊಟ್ಟುದ ಒಂಬುಗೆಗೊಂಜಿ ಗಡು ಪತ್ತನಾಜೆ

ನೀರ ಮೇಲ್‌ಡ್ ಪಾಂಬು ಪುಡೆಮಿನ್/ಬೂಮಿನ್ ಅಪ್ಪೆ ಪಂದ್ ಮಾನಿತಿನ ನರಮಾನಿ ಪುಡೆಮಿ ಮೇಲ್ಮೆಡ್ ಇಪ್ಪುನ ಸರ್ವ ಜೂವೊ ಜಂತುಲೆಡ್ಲಾ ದೇವೆರೆನ್ ತೂದು ಪೂಜನೆ ಮಲ್ಪುನಕ್ಲ್. ಗಡಿ ಗಡಿ ಮಲ್ಪಿ ತಪ್ಪುಲೆನ್ ಮಾಪಿತ್ ‘ಕ್ಷಮಯಾಧರಿತ್ರಿ’ ಪನ್ಪವೊನ್ನ ಬೂಮ್ಯಪ್ಪೆನ ಜಕ್ಕೆಲ್‌ಡ್ ತೆಲಿತ್ತ್ ನಲಿಪ್ಪುನ ಒಟ್ಟುಡು ಆಲೆನ್ ಪೂಜೆ ಮಲ್ಪೆರೆಲ, ಬೆನ್ನಿ ಸಾಗೊಳಿ ಮಲ್ಪೆರೆಲಾ ದಿನ, ಗಡು ನಿಗಂಟ್ ಮಲ್ತಿನಕ್ಲ್ ನಮ್ಮ ಪೆರಿಯ ತರೆಮಂದೆಲ್. ಒರ್ಸೊ ಇಡೀ ಮಿನದನ ಮಲ್ತೊಂದೇ ಕುಲ್ಲ್ಂಡ ಒರ್ಸೊದ ಬಂಜಿದ ಪಡಿಕ್ಕ್ ತತ್ವಾರ ಬರ್ಪುನವು ಸಾಜ. ಅವೆಕ್ಕ್ ಬೋಡಾದ್ ಮಿನದನ ಮುಗಿತ್ ಬೆನ್ನಿ ತೊಟ್ಟೆರೆ ನಮ್ಮ ಪೆರಿಯ ಮಂದೆಲೆ ನಿಗಂಟ್‌ದ ಗಡುವೇ ಈ ಪತ್ತನಾಜೆ. ಉಂದು ತುಳುನಾಡ ಜನಮಂದೆಲ್ ಮಲ್ಪಿ ಗೌಜಿ, ಗಮ್ಮತ್ತ್, ಎಡ್ಡೆ ಮೆಲ್ಲಿಲೆನ್ ಮಾತ ಉಂತವುನ ಗಡುತ್ತ ದಿನೊ.

ತುಳುವೆರೆ ಕಾಲಕೊಂದೆದ ರಡ್ಡನೇ ತಿಂಗೊಲಾಯಿ ಬೇಸ ತಿಂಗೊಲುಡು ಪತ್ತ್ ಪೋಪುನಾನಿಗ್ ಪಂಡ ಗ್ರೇಗೋರಿಯನ್ ಕ್ಯಾಲೆಂಡರ್ ಪ್ರಕಾರ ಮೇ ತಿಂಗೊಲುದ 24 ಅತಂಡ 25ನೇ ತಾರೀಕ್‌ದಾನಿ ತುಳುವೆರೆ ಬಿತ್ತಿಲ್‌ಡ್ ಪತ್ತನಾಜೆದ ಗೌಜಿ. ಪಗ್ಗು ಸಂಕ್ರಾಂದಿ ಕರಿದ್ ಬೇಸ ಸಿಂಗೊಡೆಡ್ದ್ ಪತ್ತ್ ದಿನಕ್ಕಾನಗ ಪತ್ತ್ ಪನಿ ಪಾರಾದ್ ಬರ್ಸದ ದಿಬ್ಬಣ ಪಿದಡ್ನಗ ಕಂಡೊದ ಬೆನ್ನಿಗ್ ಬೋಡಾಯಿ ಅತ್ಯಾರ್ ಪತೊಂದು ಪೋಪಿ ಬೆನ್ನಿದಾಯನ ಬೆರಿಯೇ ಇಲ್ಲದ ಹಿರಿಕಿರಿ ಜೂವೊಲುಲಾ ಬೆರಿಸಾಯೊಗುಂತುವೆರ್. ಅಂಚಾದ್ ಆ ಪೊರ್ತು ಇಲ್ಲಡ್ ಗೌಜಿ ಗಮ್ಮತ್ತ್ ಮಲ್ತೊಂದು ಕುಲ್ಲುನ ಏತ್ ಸರಿ..? ಅವೆನ್ನ ಪಿರವು ಬಲಿಪ್ಪುನಕ್ಲ್ ಏರ್..? ಪನ್ಪಿ ಪ್ರಶ್ನೆಲೆಗ್ ಸದು ನಾಡುನ ಬದಲ್ ತನ್ಕುಲು ಮಾತ ಒಂಜೇ ಮನಸ್‌ಡ್ ಬೇಲೆದಂಚಿ ಒಗ್ಗೊನುನವೇ ಸರಿ ಪಂದ್ ಎನ್ನಿವೆರ್. ಅವೆಕ್ಕಾದ್ ಅಟ್ಟನೆಗ್ ತೊಟ್ಟುವೆರ್. ಆಂಡ ಈ ಆಧುನಿಕ ಜೀವನೊದ ಆಧುನಿಕ ಜೀವನ ಶೈಲಿಗ್ ಪತ್ತನಾಜೆದ ಉಲಾರ್ಥ ತೆರಿಯಂದ್ ನಿಜ. ಆಂಡ ಇನಿಕ್‌ಲಾ ಮುಲ್ಪದ ಮಣ್ಣ್‌ದ ಪರತಿರಿಟ್ ಅರಲ್‌ದ್ ಬತ್ತಿನ ಮೂಲ ಆಚರಣೆಲೆಗ್ ಈ ಪತ್ತನಾಜೆದ ಸಮ್ಮಂದ ಉಂಡೇ ಉಂಡು. ಪತ್ತನಾಜೆ ಪನ್ನಗ ‘ಪತ್ತುನ ಅಜೆ’ ಪಂಡ ಬೆನ್ನಿ ಬೇಲೆ ಸುರು ಮಲ್ಪೆರೆ ಪತ್ತುನ ಗಡು ಅತಂಡ ಪಜ್ಜೆ ಪನೊಲಿ. ಅಂಚನೇ ಪತ್ತನೇ ಅಜೆ ಪಂಡ ಬರ್ಸ ಸುರು ಆಪುನ ಪೊರ್ತು ಸರಿಯಾದ್ ಬೇಸ ಪತ್ತೆನಾನಿ. ಅಂಚಾದ್ ಬೆನ್ನಿಗ್ ಪಿದಡುನ ಪಜ್ಜೆಲೆಗೊಂಜಿ ಅಜೆ ಅತಂಡ ದಿನ ಪಂದ್ ಪನೊಲಿ.

ಹಿರಿಯ ವಿದ್ವಾಂಸೆರ್ ಆದುಪ್ಪುನ ಕೆ.ಎಲ್ ಕುಂಡಂತಾಯೆರ್ ಪತ್ತನಾಜೆದ ಬಗೆಟ್ ಇಂಚ ಪನ್ಪೆರ್, “ಊರೊರ್ಮೆ ಆಟ, ಕೋಲ, ನೇಮ, ಬಂಡಿ, ಅಂಕ, ತೇರಾಯನತ ಗೌಜಿ. ಮದಿಮೆ ಮಾಸಿರಿತ ಗದ್ದಲ, ಅರ್ತಿಕುಸಲ್ ಇಂಚ ಸಂಬುರ್ಮ ಉಪ್ಪುನಗ ದಿನ ಕುಲ್ಲುಜಿ. ಬೇಶಡ್ ಪತ್ತ್ ಪೋಪುಂಡು, ಪತ್ತನಾಜೆ ಬರ್ಪುಂಡು. ಅಂದ್, ಪತ್ತನಾಜೆ ಬೆನ್ನಿದ ಮಗನ್ ಮೆನ್ತ್‌ದ್, ಯಾರು ಸಂಬುರ್ಮೊ! ಆಕಾಸ ತೂಲ.. ಕಂಡೊಲೆನ್ ತೂಲ.. ಮುರಾನಿ ಇಗಾದಿದಾನಿ ಪಾಡ್ದಿನ ಪುಂಡಿಬಿತ್ತ್ ಎಂಚ ಕೊಡಿದ್ಂಡ್.. ನಾಲೆರು ಮಾದಾಯಿನ ಅಚ್ಚಿ ಅಂಚೆನೆ ಉಂಡು.. ಪಗ್ಗುಡು ಪದಿನೆಡ್ಮ ಪೋಪಿನಾನಿ ಪಾಡ್ದಿನ ನೇಜಿ ಎಂಚ ನೆಗತ್‌ದ್ಂಡ್ ತೂಲ.. ಮರಿಯಲ ಸುರು ಆಪಿನ ಲಚ್ಚಣ ಪತ್ತನಾಜೆದ ಮಲಕ ತೂಲ.. ನನಲಾ ದಾಯೆಗ್ ಗಡಿಬಿಡಿ ಗದ್ದಲ… ತೊಡಗ್ ಬೆನ್ನಿಗ್ ಪನ್ಪುಂಡು ಪತ್ತನಾಜೆ.”

ಪತ್ತ್ ಪನ್ಪಿನೆಕ್ ವಿಶೇಷ ಮಾನ್ಯತೆ ಕೊರ್ನಕ್ಲ್ ನಮ್ಮ ಪೆರಿಯೆರ್. ‘ಪತ್ತ್ ಇತ್ತಿನಲ್ಪ ಮುತ್ತು ಉಂಡು’, ‘ಪತ್ತ್ ಸೇರ್ದಿನ ತಲೊಟು ಮುತ್ತುಂಡುಗೆ’, ಪನ್ಪಿ ಪಾತೆರದಂಚನೆ ಪತ್ತೆರ್ ಕೈಕೂಡಾಯಿ ಬೇಲೆ ಬೇಗ ಸಾಗುಂಡು ಪನ್ಪೆರ್. ಅಂಚನೇ ಪತ್ತ್ ದಿಕ್ಕ್, ಪತ್ತ್ ಬಿರೆಲ್, ಪತ್ತಾಯ, ಪತ್ತಪ್ಪೆ ಬಾಲೆಲ್, ‘ಪತ್ತಪ್ಪೆ ಜೋಕುಲು ಒಂಜಪ್ಪೆ ಬಾಲೆಲೆಲೆಕೊ’, ಪತ್ತೆರಿ ಕೂಟೊ ಇಂಚ ಅಲ್ಪಲ್ಪ ಪತ್ತ್ ನೆಗಪುಂಡು. ಪತ್ತೆರಿ ಕೂಟೊ ಪಂಡ ಮಿತ್ತಕರೆ ಬಾಲವೆರ್, ತಿರ್ತಕೆರೆ ಬಾರಗೆರ್, ಕೋಟೆ ಪೇಂಟೆ ಸೆಟ್ಟಿ, ಸೀನಿವಾರೆರ್, ಪಟ್ಟದ ಗುರ್ಕಾರೆರ್, ನಾಲ್ ನರಕಂದ ಬುದ್ಯಂತೆರ್, ಸೇನವೇರ್, ನಟ್ಟಿಲ್ದ ನಾಲಿಲ್ಲದಕುಲು ಪಂದ್ ಪತ್ತ್ ಸಮುದಾಯದಕ್ಲ್ ಸೇರಿ ಊರ್ದ ಹಿರಿಯೆರ್ ಬೊಕ್ಕ ಗುರ್ಕಾರೆರ್ ಸೇರಿ ಪಂಚಾಯಿತಿಕೆದ ಕೂಟೊ.

ಅಂಚನೇ ‘ಸೈತಿ ಸೂತಕ ಪತ್ತ್, ಪೆದಿ ಸೂತಕ ಪತ್ತೊಂಜಿ’ ಪನ್ಪಿನ ಪಾತೆರಲಾ ನಮ್ಮ ಪೆರಿಯೆರ್ ಪನ್ಪಿನ ಕೇನುವೊ. ಪಂಡ ನರಮಾನಿ ಸೈತಿ ಬೊಕ್ಕ ಇಲ್ಲಡ್ ಇಪ್ಪುನ ನಕಾರಾತ್ಮಕತೆ ಪತ್ತ್ ದಿನ ಮಾತ್ರ ಒರಿಯುಂಡು. ದಾಯೆ ಪಂಡ ಸೈತಿನಕ್ಲೆನ್ ಪೊತ್ತದಾ, ಮಣ್ಣ್ ಮಲ್ತ್‌ದಾ ಆನಗ ಆಡೆಗ್ ಎಚ್ಚಿನವು ಮಾಜುಂಡು. ಅಂಚನೇ ಪುಣತ್ತ ಮೆಯಿಡ್ದ್ ಬುಡ್ಡಿಪ್ಪುನ ಬ್ಯಾಕ್ಟಿರಿಯಾಲ್ ಪತ್ತ್ ದಿನ ಇಲ್ಲಡ್ ಮಲ್ಪಿ ಸೂತಕ ಸುದ್ದ, ತಲಿಪು, ಸುದ್ದಾಚಾರಡ್ ಮುಗಿಯುಂಡು ಪಂದ್ ಪೆರಿಯೆರೆ ನಂಬೊಲ್ಗೆ. ಆಂಡ ಪೆದಿ ಸೂತಕ ಒಂಜಿ ದಿನ ಎಚ್ಚ ಪಂದ್ ದಾಯೆ ಪಂಡ ಇಲ್ಲಡ್ ಬಾಲೆ ಪುಟ್ಟಿ ಬೊಕ್ಕ ಇಲ್ಲಡೇ ಇಪ್ಪುನೆಡ್ ಪೆದ್ಮೆದಿ ಮೆಯಿ ಸುದ್ದೊಗು ಬೊಕ್ಕ ಬಾಲೆದ ಮೆಯಿತ ಅಮೆ ಕರಿಯೆರೆ ದಿನ ಎಚ್ಚ ಬೋಡು ಪಂದ್ ತೆರಿದಿತ್ತೆರ್ ಪುಸ್ತಕದ ಪಾಠ ಕಲ್ಪಂದೆ, ಅನುಭವೊದ ಪಾಠ ಕಲ್ತಿ ನಮ್ಮ ಹಿರಿಯಕ್ಲ್.

ದುಂಬುಡು ನೀರ್‌ದ ಆಸರೆ ಇತ್ತಿನಕುಲು ಬಿಸುತಾನಿ ನೇಜಿ ಪಾಡೊಂದಿತ್ತೆರ್. ಉಂದೆಡ್ದಾದ್ ಪತ್ತನಾಜೆ ಕರಿದ್ ಬರ್ಸ ಬನ್ನಗ ನಟ್ಟಿದ ಬೇಲೆ ಸುರು ಮಲ್ಪೆರೆ ಸುಲಭ ಆವೊಂದು ಇತ್ತ್ಂಡ್. ತುಳುನಾಡ್‌ಡ್ ಆಜಿ ತಿಂಗೊಲು ಮರಿಯಾಲ. ಆಜಿ ತಿಂಗೊಲು ಅರೆಗಾಲ ಪನ್ಪಿನವು ದುಂಬುದ ಕಾಲೊದ ನಂಬೊಲ್ಗೆ. ಆ ಪೊರ್ತುಡು ಮುಲ್ಪದ ಮರಿಯಾಲ ಪಂಡ ನಾಲೈನ್ ತಿಂಗೊಲು ಬುಡಂದೆ ಬರ್ಪಿನ ದಿರಿಕೂಟ ಬರ್ಸ, ಗಾಳಿ, ಮೆಂಚಿ, ತೆಡಿಲ್. ಅಂಚಾದ್ ಮರಿಯಾಲೊಡು ವಾ ರೀತಿದ ಗೌಜಿ, ಗಮ್ಮತ್ತ್, ಜಾತ್ರೆ, ಅಂಕ ಆಯನ ಮಲ್ಪುಲೆಕನೇ ಇಜ್ಜಿ. ಅಯಿಕಾದೇ ಪತ್ತನಾಜೆದಾನಿ ಈ ಮಾತಾ ಗೌಜಿಲೆನ್ ಕೈದ್ ಮಲ್ಪುನ ನಿರ್ಧಾರ ಮಲ್ತೆರ್. ಅಂಚ ಪತ್ತನಾಜೆಗ್ ಬಾರೀ ಮಹತ್ವ ಬತ್ತ್‌ಂಡ್.

ಅತ್ತಂದೆ ಪಗ್ಗು ಪದಿನೆನ್ಮೆನ್ ಸಿರಿ ಪುಟ್ಟಿ ದಿನ ಪಂದ್ ಪನ್ಪೆರ್. ಪಂಡ ಬಿಸುತಾನಿ ಪುಂಡಿ ಬಿತ್ತ್ ಪಾಡ್ದ್ ಬೆನ್ನಿಗ್ ತೊಟ್ಟಿನಕ್ಲೆಗ್ ಪದಿನೆನ್ಮ ದಿನೊಟು ಪಾಡಿ ಬಾರ್ ಮುಂಗೆ ಕೊಡಿದ್ ಸಿರಿ ನೆಗಪುನ ದಿನೊಲಾ ಅಂದ್. ಅಲ್ತ್ ಬೊಕ್ಕ ಇರ್ವತ್ತ ರಡ್ಡ್ ದಿನತ್ ಬೇಸ ಪತ್ತ್ ಆಪುಂಡು. ಸಿರಿ ಪುಟ್ಟಿ ನೇಜಿ ನಟ್ಟಿಗ್ ತಯಾರಾಪುಂಡು. ಎಚ್ಚ ದಿನೊ ಬುಡ್ದಾನಗ ನೇಜಿ ಕನೆ ಪುಡಯೆರೆ ಸುರು ಆಂಡ ಅವು ನಟ್ಟಿ ನಡ್ಯೆರೆ ಆವಂದ್. ಅತ್ತಂದೆ ಪುಂಡಿ ಬಿತ್ತ್ ಪಾರಾದ್ ರಾಸಿ ರಾಸಿ ಕೊಡಿತ್ತಿ ನೇಜಿಲಾ ಬಲಕ್ಕೆ ದಾಂತೆ ಲಾಚಾರ್ ಆದ್ ಕುರಲ್ ಕಟ್ಟುನೆಕ್ ಬಙ ಆವು. ಅತ್ತಂದೆ ಕುರಲ್ ಪುಡಯಿನವುಲಾ ದಡ್ಡ್ ಆವು. ಅಂಚಾದ್ ಬೆನ್ನಿಗ್ ಸರಿಯಾಯಿನ ಪೊರ್ತು ಪಂಡ ಅವು ಪತ್ತನಾಜೆದ ಬೆರಿಕ್ಕ್ ಪನಿ ಪಾರಾವೊಂದು ಬರ್ಪಿ ಪಿರಿ ಬರ್ಸದ ಏಲ್ಯನೇ ಸರಿ.

ಬೆನ್ನಿಗ್ ತೊಡಗೊಡಾಂಡ ಬೇಶದ ತನು ಮೈಪೊಡು, ತಂಬಿಲ ಕಟ್ಟಾವೊಡು, ಬೂತೊಲೆಗ್ ಬೇಸದ ಬೋಗ ಮಲ್ಪೊಡು. ಬೆನ್ನಿ ಏರ್ ಮೀರ್ ಇಜ್ಜಾಂದೆ ಪೊರ್ಲುಡು ಕೋಡಿ ಎತ್ತಡ್, ಬುಲೆ ಭಾಗ್ಯ ದಿಂಜಿದ್ ಬರಡ್ ಪನ್ಪಿನ ಸುಗಿಪು ಇತ್ತ್ಂಡ್. ಅವೆಕ್ ಸುರುಕಾದ್ ಇಲ್ಲ್-ಬಿತ್ತ್‌ಲ್, ಜೋಕುಲು-ಬಾಲೆಲ್, ಕಂಜಿ-ಕೈಕಂಜಿ, ಬೇಲೆ-ಬೆನ್ಕೆ, ಮಾನ-ಪೆರಣ ಕಾಪುನ ದೈವೊ-ದೇವೆರ್, ನಾಗೆ-ಬಿರ್ಮೆರೆಗ್ ಅಗೆಲ್-ತಂಬಿಲ, ತನು-ಪನಿಯಾರ, ಪೂ-ಪೂಜನೆ ಮಲ್ತ್ ಮದಿಪು ನಟ್ಟೊಂದು, ಅಭಯೊದ ಸಿರಿಗಂಧ ಪುರ್ಸಾದೊ ಪತ್ತುವೆರ್. ಗುಡ್ಡೆ ಬೈಲ್ ಕಾಪುನ ಗುಡ್ಡೆದ ರಾವುಗು, ಪೆತ್ತ ಕೈಕಂಜಿನ್ ಕಾಪುನ ಬನೊತ್ತ ಭೈರವಗ್, ಜೋಕುಲು ಬಾಲೆಲೆನ್ ಕಾಪುನ ರಾಪುದ ಗುಳಿಗಗ್ ಕೋರಿ ಬಿಂದ್ ಮಲ್ಪುವೆರ್. ಸಾನೊಡು ಪತ್ತನಾಜೆದ ನಂದಲ ಬೆಳಗಾದ್, ಪನಿಯಾರೊ ಬಲಸ್‌ದ್, ಅಗೆಲ್ ತಮ್ಮನ ಕೊರ್ದ್ ಕುಟುಮೊದ ಆರಾಬಾರ ಕಾಪುದ ಕಾರ್ನಿಕೊಲೆಗ್ ಒಪ್ಯಾವೆರ್.

ತಿರ್ಗಾಟ ಸುರು ಮಲ್ತಿನ ದೇವಾಲ್ಯೊಡ್ದು ಪಿದಾಡ್ದಿನ ಆಟದ ಮೇಲೋಲು ಪಿರ ದೇವಾಲ್ಯೊಗು ಸೇರುನ ಪೊರ್ತು. ನಾಗ ಮಂಡಲ, ಜಕ್ಕೆದ ಬಲಿ, ಕೋಲ ನೇಮೊಲು ಪತ್ತನಾಜೆಡ್ದ್ ಬೊಕ್ಕ ನಡಪುಜಿ, ದೇವಲ್ಯದ ಮೂಜಿ ಪೊರ್ತುದ ಬಲಿ ಪತ್ತನಾಜೆಗ್ ಕೈದಾಪುಂಡು. ಬೊಕ್ಕ ಪರ್ಬ ಕರಿಬೊಕ್ಕ ಉಂದು ಮಾತ ಸುರು ಆವೊಡು ಪನ್ಪಿನ ಪೂರ್ವದ ಕಟ್ಟ್. ಮಿನದನ ಮಲ್ಪೆರೆ, ತೂಯೆರೆ ಪುರ್ಸೊತು ದಾಂತಿ ಜನಮಂದೆಲೆ ಮನಸ್ ತೆರಿದ್ ನಡಪಿ ಆನಿದ ಕಾಲೊದ ಮನೋರಂಜನೆದ ಮಾಮಲ್ಲ ಪುಗರ್ತೆದ ಯಕ್ಷಗಾನ ಮೇಲೊದಕ್ಲ್ ಆಟ ಕೂಟೊಲೆನ್ ಉಂತಾವು ನಿಲೆಟ್ ಪತ್ತನಾಜೆಗ್ ಕಡೇತ್ತ ಆಟೊ ಗೊಬ್ಬ್‌ದ್ ಗೆಜ್ಜೆ ಬಿಚ್ಚಾದ್ ಪೆಟ್ಯೆ ಪತೊಂದು ಅಕ್ಲೆ ಇಲ್ಲದಂಚಿ ಮೋನೆ ಪಾಡ್ವೆರ್. ಆನಿಡ್ದ್ ಅಕ್ಲೆನ ಪಜ್ಜೆಲಾ ಪೋವೊಂದು ಇತ್ತಿನಿ ಪುಡೆಮಿ ಅಪ್ಪೆನ ಪೂಜನೆ ಆಯಿನ ಬೆನ್ನಿ ಸಾಗೊಳಿದಂಚಿ. ಬೆನ್ನಿ ಬೇಲೆ ಮುಗಿದ್, ಬುಲೆಸೆಳೆ ಒಟ್ಟು ಮಲ್ತ್, ಜೋಕೆ ಮಲ್ಪುನ ಮುಟ್ಟ ಆಟೊ ಕೂಟೊಲೆಗ್ ನಿಲೆ ಇಜ್ಜಿ. ಆಂಡ ಕೆಲವೊರ ಬೆನ್ನಿದ ಪುರ್ಸೊತುದ ಇಡೆಟ್ ಯಕ್ಷಗಾನ ಭಾಗವತಿಕೆ, ಪಾತೆರಕತೆ ತೆರಿನ ನಿರೆಕರೆತ ಒಂಜಾತ್ ಜನೊ ಒವ್ವಾಂಡಲಾ ಇಲ್ಲ್, ಜಾಲ್‌ಲೆಡ್ ಒಟ್ಟು ಸೇರೊಂದು ತಾಳಮದ್ದೋಲಿ ಮಲ್ಪುನವು ಉಂಡು. ಇಂಚಿಪಗ್ ಮೇಳೊದ ಒಡ್ಡೋಲಗ ಪತ್ತನಾಜೆಗ್ ಉಂತಿಬೊಕ್ಕ ಮರ್ಯಾಲೊದ ಬೆನ್ನಿದ ಬೇಲೆ ದಾಂತೆ ಇಪ್ಪುನಗ, ಕಲಾವಿದೆರೆ ಬಂಜಿದ ಪಡಿಕ್ಕ್ ಆದೆರ್ಪು ಆದ್‌ಲಾ ಒರಿಯೆರೆ ಐನ್ ಪತ್ತ್ ಕಲಾವಿದೆರ್ ಚಿಕ್ಕಮೇಳ ಕಟ್ಟೊಂದು, ಒಂಜತ್ತಂಡ ಒಂಜಿ ಪ್ರಸಂಗ ಪತೊಂದು, ಇಲ್ಲಿಲ್ಲಡ್ ಆಟ ಮಲ್ಪುನ ವಾಡಿಕೆ ಸುರು ಮಲ್ತ್, ಪರ್ಬ ಮುಟ್ಟ ದುಂಬು ಕೊನೊಪೆರ್.

ಕಾಟ್ ಕಲ್ಲ್‌ಡಾ, ಮಣೆ ಮಂಚಾವುಡಾ ನಿಲೆ ಮಲ್ತ್ ಕೂಜಿ ನೀರಾ, ಗಿಂಡೆ ಪೇರಾ, ಕಾಟ್ ಪೂವಾ, ಕೇಪುಳದ ಎಸಲಾ ದೀದ್, ಪಿರಿನಿನೆ ಪೊತ್ತಾದ್, ಉಡಲ ಬಗ್ತಿಡ್ ನಂಬೊಂದು ಬತ್ತಿ ದೈವೊಲೆನ್ ಮೂರ್ತೊ ರೂಪುಡು ತೂಪಿ ನಿಲೆಟ್ ನಡಪಾವೊಂದು ಬರ್ಪಿ ಒರ್ಸಾದಿ ಕೊಲೊ, ನೇಮೊ, ಒಲಸರಿ, ಬಂಡಿ ಉಚ್ಚಯೊಲು, ಎನ್ನಿ ಕಜ್ಜೊ ಕೈಗೂಡಿ ನಿಲೆಟ್ ಪಂಡಿ ಪರಕೆ ಬೂಟ್ಯೆರೆ ಕೊರ್ಪಿನ ಧರ್ಮನೇಮೊಲೆನ್ ಉಂತಾವುನ ನಿಲೆಟ್ ದೈವೊ ಚಾಕಿರಿ ಮಲ್ಪಿ ವರ್ಗೊದಕ್ಲ್ ಕಡೇತ ಸೇವೆ ಕೊರ್ದ್, ಅಕ್ಲೆನ ನಂಬುಗೆದ ಸಗ್ತಿಲೆನ್ ಸುಗಿತ್, ದೈವ ನಲಿಕೆಡ್ ಸೊರೊ ಲಕ್ಕಾಯೆರೆ ಕಟ್ಟು ಗಗ್ಗರೊನು ಗಿದಿತ್, ಬಗ್ತಿಡ್ ಕಣ್ಣ್‌ಗೊತ್ತೊಂದು ಪೆಟ್ಯೆಡ್ ದೀಪೆರ್. ಆನಿಡ್ದ್ ದೈವೊಲು ಗಟ್ಟ ಬಡ್ತೂವೊ ಪನ್ಪಿ ನಂಬೊಲ್ಗೆ. ಉಂದು ದೈವೊಲೆಗ್ ಆಗಭೋಗ ಕರಿಪೆರೆ ಬಙ ಆಪುನೆಕ್ ಹಿರಿಯಕ್ಲ್ ಪಾಡಿ ಕಟ್ಟ್‌ಪಾಡ್‌ನ್ ಪ್ರಶ್ನೆ ಮಲ್ಪುನಕ್ಲೆಗ್ ಕೊರ್ಪಿ ಸದು ಆತೇ. ಪತ್ತನಾಜೆಡ್ದ್ ಬೊಕ್ಕ ಅಕ್ಲೆನ ಪಜ್ಜೆಲ್ ಪಿದಾಡುನುಲಾ ಮೂಲೊಡ್ದು ಬತ್ತಿನನಾ, ಗೇಣಿಗ್ ಬೆನ್ಪುನನಾ ಅತಂಡ ದೈವೊ ಚಾಕಿರಿಗ್ ಉಂಬೊಲಿಯಾದ್ ಬತ್ತಿನನಾ ಬೆನ್ನಿದ ಕಲೊಕ್ಕು. ಪಡಿಯರಿ ಪತ್ತುನ ಸಂಸಾರೊಗು ಒರ್ಸೊ ಇಡೀ ಬಂಜಿದ ಪಡಿ ಕಟ್ಟುನ ಬೇಲೆ ಆವೊಡು ಪಂದ್ ಆಂಡ ಬೆನ್ನಿದ ಕಂಡೊಗು ಪುಡ್ಯೊಡು ಪಂದ್ ತೆರಿನ ಪೆರಿಯ ಮಂದೆಲ್ ಕೊಲೊ ನೇಮೊಗುಲಾ ಅಯಿನ್ನನೇ ಆಯಿನ ಗಡು ನಿಗಂಟ್ ಮಲ್ತ್ ಇತ್ತೆರ್. ಆತೆ ಅತ್ತಂದೆ ದುಂಬುದ ಕಾಲೊಡು ಬೋಡಾಯಿನಾತ್ ವಾಹನ ಸೌಕರ್ಯ ದಾಂತೆ ಇಪ್ಪುನಗ ನೇಮೊ ನೆರಿಕ್ಕ್ ಬೋಡಾಯಿ ಸೊತ್ತುಲೆನ್ ಪತೊಂದು ನಡತೊಂದು ಪೋನಗ ಬರ್ಸಗ್ ಚಂಡಿ ಆಪುನ ಒಟ್ಟುಡು ಮಡಲ್, ತಟ್ಟಿ ಪಾಡ್ದ್ ಮಲ್ತಿ ದೊಂಪೊದಡಿ ಅರದಲ ಪಾಡ್ದ್ ದೈವೊದ ಒರುಟು ಉಂತು ಪೊರ್ತು ಬರ್ಸ ಬತ್ತ್ಂಡಲ ಅವು ತೊಂದರೆನೇ ಪಂದ್ ತೆರಿದ್ ಪತ್ತನಾಜೆಡ್ದ್ ಬೊಕ್ಕ ನೇಮೊ ನೆರಿ ಕೊರ್ಪುನ ಕಟ್ಲೆ ಇಜ್ಜಿ ಪಂದ್ ಮಲ್ತ್‌ದಿಪ್ಪೆರ್.

ಕೆಲವು ಗ್ರಾಮೊದ ಗಡಿ, ಸೀಮೆದ ಕೊಡಿ, ಮಾಗಣೆದ ಗಡಿ, ರಾಜ್ಯೊದ ಗಡಿ ಪಂದ್ ನಿಗಂಟ್ ಆಯಿ ಜಾಗೆಲೆಡ್ ಕಡೆಕ್ಕಾದ್ ನೇಮೊ, ಉಚ್ಚಯೊ ಆದ್ ಆಡೆಗ್ ನೇಮೊ ನೆರಿ ಉಂತುನ ಕಟ್ಟ್. ಅವೆಟ್ ಕುಂಬ್ಲೆ ಸೀಮೆಡ್ ಆದಿ ಪರ್ಮಲೆ ಅಂತ್ಯೊ ಪುತ್ಯೆ ಪನ್ಪಿ ದೈವೊ ನುಡಿತಂಚನೆ ಪುತ್ಯೆಡ್ ಬಂಡಿನೇಮೊ ಆಯಿಬೊಕ್ಕ ಉಳ್ಳಾಕ್ಲೆಗ್ ನೇಮೊ ನೆರಿ ಇಜ್ಜಿ. ಕೊಂಡಾಣಡ್ ಅರಸು ದೈವೊದ ನೇಮೊ ಆದ್ ಪಿರಿ ಬೂಳ್ಯ ಪತ್ತ್ಂಡ ಅವೆಡ್ದ್ ಬೊಕ್ಕ ನೇಮೊ ನೆರಿ ಇಜ್ಜಿ. ಕಂಡೇವುದ ಕರಿಯ ಅತಂಡ ಮೀನ್ ಜಾತ್ರೆ ಆಯನೊಲೆ ಅಡೆಪ್ಪು ಪನ್ಪಿ ನಿಲೆಟ್ ಎರ್ಮಾಲ್ ಜಪ್ಪು, ಕಂಡೇವು ಅಡೆಪ್ಪು ಪನ್ಪಿ ಪಾತೆರಲಾ ಉಂಡು. ಪತ್ತನಾಜೆದ ಜಾತ್ರೆ, ಅಂಕೊ, ಆಯನೊ ಮುಗಿಂಡ ಬೊಕ್ಕ ಒವ್ವೆ ಪರ್ಬ ಮಿನದನ ಆವೊಡು ಪಂದ್ ಆಂಡ ಆಟಿ ಕರಿದ್ ಸೋನೊ ತಿಂಗೊಲು ಬರೊಡು. ಬೆಟ್ಟಂಪಾಡಿಡ್ ಪತ್ತನಾಜೆ ಜಾತ್ರೆ, ಕಟೀಲ್‌ಡ್ ಪತ್ತನಾಜೆ ಬಲಿ, ಧರ್ಮಸ್ಥಳಟ್ ಪತ್ತನಾಜೆ ಪರ್ವ, ಪುತ್ತೂರುಡು ಪತ್ತನಾಜೆ ಉಚ್ಚಯೊ, ಸಕಲೇಶಪುರ ಪಾಂಡವರಗುಡ್ಡ ಪತ್ತನಾಜೆ ಜಾತ್ರೆಲ್ ತುಳುನಾಡ್‌ಡ್ ವಿಶೇಷವಾದ್ ನೆಗಪುಂಡು.

ಪತ್ತಂಜಾವು ಪನ್ಪಿ ಮಲಯಾಳಂ ಪದ ಪತ್ತೆನಾನಿಗ್ ಮಾತ ಮುಗಿತಲ ಪನ್ಪಿ ಅರ್ಥ ದುನಿಪುಂಡು. ಪತ್ತನಾಜೆದಾನಿ ದೈವೊ ದೇವೆರೆಗ್ ಜಾತ್ರೆ ನೇಮೊಗು ಏರಿ ಕೊಡಿನ್ ಜಾಪುನ ಒರುಟು ಅತಂಡ ಪಾಡಿ ಕೊಡಿಮರ ಜಾದ್ ಅಂಕ ಆಯನೊಗು ಮುಗಿತಲದ ಬೊಟ್ಟು ದೀಪುನ ವಾಡಿಕೆ. ಅಂಚನೇ ಪತ್ತನಾಜೆದಾನಿ ದೇವಾಲ್ಯೊಲೆಡ್ ದೇವೆರ್ ಉಲಾಯಿ ಆಪುನ ಸಂಪ್ರದಾಯಲಾ ಉಂಡು. ಪಂಡ ಪತ್ತನಾಜೆಡ್ದ್ ಬೊಕ್ಕ ದೇವೆರೆಗ್ ಬಲಿ, ರಂಗಪೂಜೆ, ವಿಶೇಷ ಉಚ್ಚಯೊಲು ಇಜ್ಜಿ. ಅವೆಡ್ದ್ ಬೊಕ್ಕ ಪರ್ಬೊಗೇ ದೇವೆರ್ ಅಙನ ಜಪ್ಪುನು. ಈ ನಡುಟು ದೇವಾಲ್ಯೊಲೆಡ್ ನಿತ್ಯ ಪೂಜೆ ಮಾತ್ರ. ನೆನ್ನ ಪಿರವುದ ತಿರ್ಲ್ ತೂಯೆರೆ ಪೋಂಡ ಇತ್ತೆದ ಕಾಲೊದಂಚ ಬೋಡು ಬೋಡಾಯಿ ವ್ಯವಸ್ಥೆ ಇಜ್ಜಂದಿ ಆ ಕಾಲೊಡು ಮುಳಿತ್ತ ಮಾಡ್, ತಟ್ಟಿದ ಮದೆಪು ಇತ್ತಿನ ಗುಡಿ ಗುಂಡೊಲೆಡ್ ಬರ್ಸದ ಬಿರ್ಸ್‌ಗ್ ವಿಶೇಷ ಪೂಜೆ ಮಲ್ಪುನೆಕ್ ಸಾಧ್ಯ ಇಜ್ಜಿ. ಅತ್ತಂದೆ ಕೊಡಿಮರಕ್ಕ್ ಇತ್ತೆದಲೆಕೊ ಮುಚ್ಚಿಗೆ ಇಜ್ಜಂದಿ ಪೊರ್ತು ಪಾಡಿ ಮರನ್ ಅಂಚನೇ ಬುಡ್ಂಡ ಅವು ನರಿಕುಂಬು ಆಪುನ ಸಾಧ್ಯತೆಲ್ ಎಚ್ಚ ಇತ್ತ್ಂಡ್. ಅವೆಕ್ ಬೋಡಾದ್ ಮರಿಯಾಲೊಡು ದೈವೊ ದೇವೆರೆ ಸೊತ್ತುಲೆನ್ ಜೋಕೆ ಮಲ್ತೊಂದು ಇತ್ತೆರ್.

ನಿಚ್ಚಯೊ, ಮದಿಮೆ, ಮಸಿರಿ, ಇಲ್ಲೊಕ್ಕೆಲ್‌ಲೆನಂಚಿನ ಎಡ್ಡೆಮೆಲ್ಲಿಲೆಗ್ ಮಾತ ಮಂಗಲೊ ಪಂದ್ ಬೆನ್ನಿ ಬೆನ್ಕೆಗ್ ತೊಟ್ಟುನ ಜನಮಂದೆಗ್ ಬೆನ್ನಿದ ನಡುಟು ಬೇತೆ ಒವ್ವೇ ಲೇಸ್ ಮಲ್ಪೆರೆ ಪುರ್ಸೊತು ಇಜ್ಜಿ. ಆತೆ ಅತ್ತ್ ಅಯಿನ್ನ ಅಟ್ಟಣೆಗ್ ಬರ್ಸಲಾ ಬುಡ್ಪುಜಿ ಪಂಡ ತಪ್ಪಾವಂದ್. ಅಂಚಾದ್ ಈ ಪೊರ್ತು ಪುಟ್ಟಿ ಬಾಲೆಗ್ ತೊಟ್ಟಿಲ್ ಸಾಸ್ತ್ರೊ, ಸೈತಿ ಮಾನ್ಯಗ್ ಬೊಜ್ಜದ ಕಾರ್ಯೊ ಮಾತ್ರ ಬೆನ್ನಿದ ನಡುಟು ನಡತೊಂದು ಇತ್ತ್ಂಡ್. ಅವು ಬುಡ್ದ್ ಬೇತೆ ದಾಲಾ ಲೇಸ್‌ಲೆಗ್ ಪತ್ತನಾಜೆದಾನಿಗ್ ಮುಗಿತಲದ ಬೊಟ್ಟು.

ಪತ್ತನಾಜೆದ ಬೋಂಟೆ ತುಳುನಾಡ ಒಂಜಿ ಕಟ್ಟುಪಾಡ್ ಆದ್ ಬುಲೆದ್ ಬತ್ತ್‌ನವು. ಬೆನ್ನಿ ಸಾಗೊಳಿಗ್ ತೊಟ್ಟುನ ದುಂಬು ಬುಲೆಸೆಳೆ ಹಾಲ್ ಮಲ್ಪುನ ಮುರ್ಗೊಲೆನ್ ದೂರ ಮಲ್ಪುನ ನಿಲೆಟ್ ಬೋಂಟೆ ದೇರೊಂದು ಇತ್ತೆರ್. ಒರ್ಸೊಡು ಮೂಜಿ ಬೋಂಟೆ ಕಡ್ಡಾಯ. ಕೆಡ್ಡಸ, ಪತ್ತನಾಜೆ, ಪರ್ಬೊದ ಬೋಂಟೆಗ್ ತುಳುನಾಡ್‌ಡ್ ಬಾರೀ ಮಾನ್ಯತೆ.  ತಾರಿ ಕಂಡೊಗು ಮೂಜಿ ಬುಲೆ ಪನ್ಪುನಂಚ ಮೂಜಿ ಬುಲೆ ಬುಲೆಪ್ಪುನ ಬೆನ್ನಿದಕ್ಲ್ ಬೆನ್ನಿ ಸುರು ಮಲ್ಪೆರೆ ದುಂಬು ಕಂಡೊಗು ಒತ್ತೊಂದು ಇಪ್ಪುನಂಚಿನ ಮಲೆ, ಕಾಡ್‌ಲೆಡ್ ಬೋಂಟೆ ಮಲ್ತ್ ಮುಟ್ಟ ಬತ್ತ್ ಇಪ್ಪುನಂಚಿನ ಮುರ್ಗೊಲೆನ್ ಜಯಿತ್, ಅತಂಡ ದೂರ ಗಿಡತ್ತ್ ತನ್ಕುಲೆ ಒರ್ಸೊದ ಪಡಿ ಒರಿತೊಂದು ಇತ್ತೆರ್. ಅಂಚಾದ್ ಪತ್ತನಾಜೆದಾನಿ ಬೋಂಟೆ ದೇರುನ ಕ್ರಮ ತುಳುವೆರೆನವು. ಅಂಚಾದ್ ಆನಿ ಮಾಸೊದ ಒನಸ್ ಇಪ್ಪುಂಡು.

ಪತ್ತನಾಜೆದಾನಿ ಪತ್ತ್ ಪನಿ ಆಂಡಲಾ ಬರ್ಸ ಬರೋಡೇ. ಆನಿ ಬರ್ಪುನ ಬರ್ಸದ ಮಿತ್ತ್ ಬೆನ್ನಿ ಬೇಲೆ ಮಲ್ಪುನಕ್ಲ್ ದುಂಬುಗು ಬರ್ಪಿ ಬರ್ಸೊದ, ಕಾಯುನ ದೊಂಬುದ ಲೆಕ್ಕಾಚಾರ ಮಲ್ತೊಂದು ಇತ್ತೆರ್. ಪತ್ತನಾಜೆದಾನಿ ಪತ್ತ್ ಪನಿ ಆಂಡಲಾ ಬೂರ್ಜಿಂಡ ಪುರಿತ್ತ ಬಾಯಿಗ್ಲಾ ನೀರ್ ಇಪ್ಪುಜಿ ಪಂದ್ ಪೆರಿಯಕ್ಲೆ ಪಾತೆರ. ಅಂಚನೇ ಪತ್ತನಾಜೆದಾನಿ ಬರ್ಸ ಬತ್ತ್ಂಡ ಆ ಒರ್ಸೊ ಕಂಬೊಲಿ ಪುರಿ ಕಮ್ಮಿ ಆಪುಂಡು ಪನ್ಪೆರ್. ಬೇಸಡ್ ಮರಟ್, ಇರೆಟ್ ದೀದಿಪ್ಪುನ ಪುರಿತ್ತ ತೆತ್ತಿಲ್ ಬರ್ಸದ ನೀರ್ ಬೂರ್ದ್ ಪೊಟ್ಟು ಆಪುಂಡು. ಅಂಚಾದ್ ಪುರಿತ್ತ ಸಂತತಿ ಕಮ್ಮಿ ಆಪುಂಡು ಪನ್ಪಿ ನಂಬುಗೆ ಮಾತ್ರ ಅತ್ತ್ ಪ್ರಕೃತಿನ್ ತೆರಿಯೊಂದಿ ಪೆರಿಯೆರೆ ಅಲ್ಬೋಗೊದ ನುಡಿ.

ಪತ್ತನಾಜೆದ ಬಗೆಟ್ ಒಂಜಾತ್ ಗಾದೆಲ್‌ಲಾ ಉಂಡು. ಅವು ಪಂಡ… ‘ಪತ್ತನಾಜೆಗ್ ಬಂಡಿ ಬಲ್ಲ್ ಪೂರಾ ಉಲಾಯಿ’, ‘ಪತ್ತನಾಜೆದಾನಿ ಪತ್ತ್ ಪನಿ’, ‘ಊರುಡ್ದು ದೂರೊ ಪೋಯಿನಕುಲು ಬರೋಡಾಂಡ ಪತ್ತನಾಜೆ ಬರೋಡು’, ‘ನನ ಏಪ ಬರ್ಪುನೆಂದ್ ಕೇಂಡ ಪತ್ತನಾಜೆಗ್ ಬರ್ಪುನೆಂದ್ ಪನ್ಪೆರ್’, ‘ಪತ್ತನಾಜೆಗ್ ಪತ್ತ್ ಪನಿ ಬರ್ಸೊ ಬರೊಡೇ’, ‘ಪತ್ತನಾಜೆಗ್ ಪತ್ತ್ ಪನಿ ಬೂರ್ಜಿಂಡ ಪುರಿತ್ತ ಬಾಯಿಗ್ಲಾ ನೀರ್ ಇಜ್ಜಿ’, ‘ಪತ್ತನಾಜೆದ ಪನಿಕ್ ಪುರಿತ್ತ ತೆತ್ತಿ ಪೊಟ್ಟಾಪುಂಡು’, ‘ಪತ್ತನಾಜೆ ಬತ್ತ್ಂಡ ಜತ್ತಿ ಆಟೊ ಉಂತ್ತ್ಂಡ್’, ‘ಪತ್ತನಾಜೆತ ಮಲಕ – ಪತ್ತನಾಜೆತಾನಿ ಬರ್ಪುನಾ ಜಡಿಕೂಟ ಗಾಳಿ ಬರ್ಸೊ.’ ಪತ್ತನಾಜೆದ ಗಾದೆಲೆಡ್ ‘ಪಂಡಾ ಅಪ್ಪೆ ಅಟ್ಟಿಲ್ ಜಾರುಂಡು, ಪಂಡಿಜಾ ಅಮ್ಮೆ ನಾಯಿ ತಿನ್ಪೆ’ ಪನ್ಪಿ ಗಾದೆಲಾ ಒಂಜಿ. ಈ ಗಾದೆ ಬುಡ್ಪವೊಂದು ಪೋಯಿನಂಚ ಒಂಜಿ ಪೊರ್ಲುದ ಕತೆ ತನ್ನ ತಿರ್ಲ್‌ದ ಒಟ್ಟುಡು ನೆಗತ್ ಬರ್ಪುಂಡು.

ತುಳುವ ಪರತಿರಿ ಪಜಿತೊಂದು ಪೋಯಿನಂಚ ದುಂಬುದ ಕಾಲೊಡು ಪತ್ತನಾಜೆದ ಬೋಂಟೆ ಇತ್ತಿನ ನಮಕ್ ತೆರಿನವೇ. ಅಂಚನೇ ಆ ಒಂಜಿ ದಿನ ಇಲ್ಲದ ಯಜಮಾನಿ ತನ್ನ ಇಲ್ಲಡ್ ಇತ್ತಿನ ಬೆಡಿ ಪತೊಂದು ಪತ್ತನಾಜೆದ ಬೋಂಟೆಗ್ ಪಿದಡಿಯೇ. ಇಲ್ಲದ ಮೂಲೆಡಿತ್ತಿ ನಾಯಿದ ಕೂಕುರುಲಾ ತನ್ನ ಯಜಮಾನ್ಯ ಬೆರಿಯೇ ಕಾಡ ಸಾದಿ ಪತ್ತ್ಂಡ್. ಬೋಂಟೆಗ್ ದಾಲಾ ತಿಕಿಜೆ ಪಂದ್ ಬೇಜಾರ್ಡ್ ಇಪ್ಪುನಗ ಲೈಟ್‌ದ ಬೊಲ್ಪುಗು ಪುದೆಲ ಬರಿಟ್ ರಡ್ಡ್ ಕಣ್ಣ್ ಮೆನ್ಕುನ ತೋಜಿಂಡ್. ಅಂಜೋವು ಈಡ್ ದೀಂಡ್. ಬೋಂಟೆಡ್ ಆ ಜನಕ್ಕ್ ಒಂಜಿ ಮೇರ್/ಮುಯ್ಯೆರ್ ತಿಕ್ಂಡ್. ಕನತ್ ಸಜ್ಜಿ ಮಲ್ತ್ ಬೊಡೆದಿಡ ಅಟ್ಟಿಲ್ ಮಲ್ಪೆರೆ ಕೊರ್ಯೆ. ಉಂದೆನ್ ಮಾತಾ ಇಲ್ಲಡ್ ಇತ್ತಿ ಮಗೆ ತೂಯೆ. ಅಪ್ಪೆಮ್ಮೆ ಸಜ್ಜಿ ಮಲ್ತ್‌ನ ಮೇರ್‌ದ ಮಾಸ ಕೊನೊದು ಅಪ್ಪೆ ಬೆಯ್ಯೆರೆ ದೀದ್ ಅರೆಪ್ಪು ಪಾಡುನ ಮುಟ್ಟ ಅಲ್ಪ ಕುಲ್ಲಿನಾಯೆ ಅಮ್ಮೆರ್ ಮುಯ್ಯೆರ್‌ದ ಪೊಟ್ಟೆ ಕರ್ಲ್, ಚೋಲಿ ರೋಮ ದಕ್ಕೆರೆ ಕೊರ್ನ ನೆಂಪು ಆದ್ ಚಿಮಿಣಿ ಪತೊಂದು ಪೊಟ್ಟೆದ ಪಾಲೆ ಪತೊಂದು ದಕ್ಕೆರೆಗ್ ಪೋಯೆ. ಆನ್ ಕತ್ತಲೆಡ್ ಒಂಜಿ ಕೈಟ್ ಬೊಲ್ಪು, ಕುಡೊಂಜಿ ಕೈಟ್ ಪಾಲೆ ಪತೊಂದು ದಕ್ಕೆರೆ ಪೋನಗ ದಂಟ್‌ದ್ ಬೂರ್ನೆಡ್ ಪಾಲೆಡ್ ಇತ್ತಿ ಪೊಟ್ಟೆ ಕರ್ಲ್ ದರಿಂಡ್. ಬೂರ್ನಲ್ತ್ ಲಕ್ಕ್‌ದ್ ಕಜವು ಪೂಜಿದ್ ಪಾಲೆಗ್ ಪಾಡ್ನಗ ಅವೆಟ್ ಚಂಗುಲಿ ತೋಜಿಂಡ್. ಹಾ ಚಂಗುಲಿ ಪಂಡ ದಾದ ಪಂಡಿಜತೆ..

ಬುಲೆಕ್ಕರ್ ಪೆಲಕಾಯಿದ ಪಚ್ಚಿಲ್‌ನ್ ಉದ್ದ ತಿಗ್‌ತ್ತ್‌ದ್ ಪೆಲತ್ತರಿ ಪಾಡ್ದ್, ಪುಳಿ ಮುಂಚಿಡ್ ಬೆಯ್ಪದ್, ಅವೆಕ್ ತಾರಾಯಿ, ಸಂಬಾರ ಕಸಕ್ಕ್ ಕಡೆದ್ ಪಾಡ್ದ್ ಆಜವುನೆಕ್ ಚಂಗುಲಿ ಪನ್ಪೆರ್. ಪತ್ತನಾಜೆದಾನಿ ಚಂಗುಲಿ ಮಲ್ಪೊಡು. ಇಲ್ಲದ ಕಡೀರ ಜೋಕುಲು ಸರೀ ತಿನೊಡು. ಬಾಕಿದಕ್ಲ್‌ಲಾ ಪತ್ತನಾಜೆಗ್ ಚಂಗುಲಿ ತಿನೊಡು. ದಾಯೆ ಪಂಡ ಪತ್ತನಾಜೆದಾನಿ ದೇವೆರ್ ಜೋಕುಲು ಬಾಲೆಲೆನ್ ತೂಕ್‌ದ್ ತೂಪುನ ದಿನ. ಪತ್ತನಾಜೆದ ತೂಕಡ್ ಏರ್ ಏತ್ ದುನ್ನ ಉಪ್ಪುವೆರಾ ಆ ಒರ್ಸೊಗು ಆ ಜೋಕುಲೆಗ್ ತೂಕಗ್ ಸರಿಯಾದ್ ನುಪ್ಪುದ ತೂಕ ಮಲ್ತ್ ಕೊರ್ಪೆರ್ ಪನ್ಪಿ ಪಾತೆರ ಪನ್ಪೆರ್ ಹಿರಿಯಕ್ಲ್. ಉಂದು ನಿಜನಾ ಕಳುವಾ ಪಂದ್ ಪರೀಕ್ಷೆ ಮಲ್ಪುನಕ್ಲ್ ಅತ್ತ್ ಆನಿದ ಜೋಕುಲು. ಅಪ್ಪೆಮ್ಮೆ, ಅಜ್ಜೆಜ್ಜಿ ಪನ್ನೆನ್ ಕೇಂದ್ ಅಂಚನೇ ನಡಪುನಕ್ಲ್. ಅಂಚಾದ್ ಒರ್ಸೊದ ಕೂಳುಗಾದ್ ಹರ್ಸೊಡು ಪತ್ತನಾಜೆದ ಚಂಗುಲಿ ಬಂಜಾರ ತಿನೊಂದು ಇತ್ತೆರ್ ಪನ್ಪಿನ ನಿಜ ಆಂಡಲಾ, ಇಲ್ಲದ ಬಡಪತ್ತ್ ತೂದು ಬೊಡಿನ ಜೋಕುಲು ಈ ಒರ್ಸೊ ಆಂಡಲಾ ದೇವೆರೆ ತ್ರಾಸ್‌ಡ್ ದುನ್ನ ಇತ್ತ್‌ದ್ ಇಡೀ ಬದ್ಕ್ ಬಂಜಾರ ಉಂಡ್ ತಿಂದ್ ಬದ್ಕ್ ಕರಿಪೊಲಿ ಪನ್ಪಿ ಆಲೋಚನೆಡ್ ಮೂಂಕುಮುಟ್ಟ ಚಂಗುಲಿ ತಿನ್ಪೆರ್.  ಕಡೀರ ಜೋಕ್ಲೆಗ್ ಮಲ್ಲೆ ಆವೊಂದು ಪೋಯಿಲೆಕೊನೇ ಒರ್ಸೊಲಾ ಪನ್ಪಿ ಪಾತೆರ ಕೇಂದ್ ಚಂಗುಲಿ ತಿಂಡಲಾ ಬಡಪತ್ತ್ ನೀಗಂದಿನ ತೂದು, ಉಂದು ನಿಜ ಅತ್ತ್ ಪಂದ್ ಗೊತ್ತು ಇತ್ತ್‌ದ್ ತಿನೆರೆ ದುಂಬು ಪಿರ ತೂನಗ ಸುರುಟು ಕಡೀರ ಬಾಲೆಲೆನೇ ತೂಕುನು ಪಂದ್ ತಿನ್ಪವೊಂದಿತ್ತೆರ್. ಅಂಚಾದ್ ಪತ್ತನಾಜೆ ಬೊಕ್ಕ ಚಂಗುಲಿಗ್ ಬಾರೀ ಮುಟ್ಟದ ಬಿನ್ನಾದಿಗೆ ಪನೊಲಿ.

ಹ ಇತ್ತೆ ಕತೆಕ್ಕ್ ಬರ್ಕ. ದರಿನ ಪೊಟ್ಟೆಡ್ ಇಪ್ಪುನ ಚಂಗುಲಿ ತೂಯಿನ ಆನಗ್ ಮಂಡೆಡ್ ಒಂಜಿ ಅಂಸನಿದ ಪುರಿ ಪೊಗ್ಗ್ಂಡ್. ಸೀದಾ ಪೋದು ಇಲ್ಲ ಸುತ್ತ ಒಂಜಿ ಸುತ್ತು ಬತ್ತೆ. ದಾದನಾ ಆಯೆ ಎನ್ನಿನನೇ ನಿಜ ಆಂಡ್. ಇಲ್ಲದ ನಾಯಿದ ಕೂಕುರು ಓಲ್ಲಾ ತೋಜುಜಿ. ಪೊಟ್ಟೆ ದಕ್ಕ್‌ದ್ ಬತ್ತ್ ಉಲಾಯಿ ತೂನಗ ಅಪ್ಪೆ ಮುಯ್ಯೆರ್‌ದ ಕಜಿಪು ಜಾದ್ ದೀತಲ್. ಇತ್ತೆ ಪೋದು ಅಮ್ಮೆರೆಡ ಪಂಡ್ಂಡ ಅಪ್ಪೆನ ಅಟ್ಟಿಲ್ ಜಾರುಂಡು. ಬೇತೆ ಅಟ್ಟಿಲ್ ಮಲ್ಪೆರೆ ಸಮಯ ಇಜ್ಜಿ. ಇತ್ತೆನೆ ಕತ್ತಲೆ ಆತ್ಂಡ್. ಇಲ್ಲಡ್ ಆತ್ ಕಜಿಪುದ ಸಾಮಾನ್‌ಲಾ ಇಪ್ಪಂದ್. ಒಂತೆ ಗಂಗಸರ ಪರ್ತಿನ ಅಮ್ಮೆರ್ ಅಪ್ಪೆಗ್ ಹಾಕುವೆರ್. “ಎಂಕ್ ಅಂತೂ ಬಚ್ಚಿದ್ ಇತ್ತ್ಂಡ್. ನಾಯಿಯ ಮುಯ್ಯೆರಾ ಗೊತ್ತಾಯಿಜಿ, ನಿಕ್ಕ್ ಆಂಡಲಾ ಸೊಯ ಇಜ್ಜಾ” ಪಂದ್ ಅಪ್ಪೆಗ್ ಹಾಕುವೆ ಪಂದ್ ಪೋಡಿಗೆ ಸುರು ಆಂಡ್. ಆಂಡ ಪಂಡಿಜಿಂಡ ಅಮ್ಮೆ ನಾಯಿ ತಿನ್ಪುನ ಗತಿ ಬರ್ಪುಂಡು.

ಆಂಡ್ ದಾದ ಮಲ್ಪುನು ಆಲೋಚನೆ ಮಲ್ತಿ ಮಗೆ ದಾದ ಮಲ್ತೆ ಪಂಡ, ಅಮ್ಮೆರ್ ಉನೆರೆ ಕುಲ್ಲ್‌ದಾನಗ ಅಪ್ಪೆ ನುಪ್ಪು ಬಲಸ್‌ದಾನಗ ಮೆಲ್ಲ ರಾಗ ಸುರು ಮಲ್ತೆ.. “ಕಾಡ ಮುಯ್ಯೆರ್ ನಾಡ ಬರಿಕ್ ಬತ್ತ್ ನಮ್ಮ ಇಲ್ಲದ ಚಂಗುಲಿ ತಿನಂದ್, ಇಲ್ಲ ಕೂಕುರುಲಾ ಇರ್ಲ್ ಮಾಸ ಮಲ್ಪಿ ಪೊರ್ತು ಜಾಲ್ ಬುಡ್ದ್ ಪೋವಂದ್.. ಆಂಡ ಇನಿ ರಡ್ಡ್‌ಲಾ ಆಂಡ್. ಉಂದು ದಾದ ಸೋಯಗ ಮಾಯಗ ಅಮ್ಮೆರೆ.. ಪತ್ತನಾಜೆ ಪಂಡ ಇಂಚನಾ..? ನನ ದಾಲಾ ಆಯೆರೆ ದುಂಬು ಎಂಕ್ ಚಂಗುಲಿಯೇ ಪಾಡ್ಲೆ ಅಪ್ಪೆರೆ.. ಮಾಸ ಆಗಿಯೆರೆ ಆಂಡಲಾ ಎಲು ಆಗಿಯೆರೆ ಆವಂದ್. ಯಾನ್ ನನಲ ಒಂತೆ ಬುಲೆದ್ ದುನ್ನ ಆಯಿಬೊಕ್ಕ ಮುಯ್ಯೆರ್ ತಿನ್ಪೆ…” ಪಂದ್ ಪಂಡೆ. ಆತಾನಗ ಅಪ್ಪೆಮ್ಮೆರೆಗ್ ದಾದ ಆಂಡ್ ಪಂದ್ ಅರ್ಥ ಆಂಡ್. ನಾಯಿದ ಕೂಕುರುದ ಕಜಿಪು ಪಿದಯಿ ಬೂರ್ಂಡ್. ಪನೆರೆ ಆವಂದಿನೆನ್ ಬೇತೆನೇ ರೀತಿ ಪಂದ್ ಮಗೆ ಅಪ್ಪೆನ ಅಟ್ಟಿಲ್ ಜಾರುನೆನ್, ಅಮ್ಮೆ ನಾಯಿ ತಿನ್ಪುನೆನ್ ತಪ್ಪಯೆ.

ಇತ್ತೆ ಬೆನ್ನಿಯೇ ಕಮ್ಮಿ ಆವೊಂದುಪ್ಪುನ ಒಟ್ಟುಡು ಬೆನ್ನಿದ ಕ್ರಮೊಟ್ಟುಲಾ ಪರಾಕ್ ಆತ್ಂಡ್. ವಾ ಕಾಲೊಡು ಬೆನ್ನಿದ ಬದ್‌ಕ್ ತನ್ನ ಕಲೆ ಕಲೆವೊಂದು, ಬೇತೆ ಬೇತೆ ಬಣ್ಣದ ಬದ್‌ಕ್‌ನ್ ಒತ್ತೊಂಡಾ ಆನಿಗ್ ಪತ್ತನಾಜೆದ ಲೆಕ್ಕಂತಿನ ಬೆನ್ನಿದ ಗಡುಕ್ಲೆನ ಆಲೋಚನೆನೆ ಮದತೊಂದು ಪೋಂಡು. ಬಹುಶಃ ನನ ಒಂಜಾತ್ ಒರ್ಸೊಡು ಪತ್ತನಾಜೆ ಮದತ್ತ್ ಪೋಯಿನ ಒಂಜಿ ಪರ್ವ ದಿನ ಆದ್ ಪೋವು. ಇತ್ತೆನೆ ಪತ್ತನಾಜೆ ಕರಿಬೊಕ್ಕ ಮಾತ ಲೇಸ್, ಎಡ್ಡೆಮೆಲ್ಲಿಲ್ ನಡತೊಂದು ಉಂಡು. ಕಾಲೊದ ಒಂಬುಗೆ ಪಂಡಲಾ ಈ ಸುಧಾರಿಗೆ ಇಂಚಿಪದ ಒಪ್ಪಿತೊದ ಒಟ್ಟುಡು ಪತ್ತನಾಜೆ ಗಡುದಿನತ ಮಹತ್ವನ್ ತಗ್ಗಾವುನ ಒಂಜಿ ಬಿರ್ಸಾದಿಗೆದ ತೀರ್ಮಾನ ಪಂದೇ ಪನೊಲಿ ಪನ್ಪೆರ್ ಕುಂಡಂತಾಯೆರ್.

ಇನಿತ ದಿನಮಾನಡ್ ಕಂಡೊಲು ಮಾತಾ ಸೈಟ್ ಆದ್ ಕಟ್ವಾನೊ, ಪ್ಲಾಟ್‌ಲ್ ಆತ್ಂಡ್. ಇಪ್ಪುನ ಕಂಡೊಡುಲಾ ಆನಿದ ಕಾಲೊಡು ಕೈಟ್ ಬಡು ಪತ್ತ್‌ದ್ ಎರು ಬೋರಿ ಕಟ್ಟ್‌ದ್ ಮಾದಾವೊಂದು, ಮಲಂಪು ನೀರ್ ಮಗ್‌ತ್ತ್, ಉರಲ್ ಕೊರೊಂದು ದತ್ತೊಂದಿತ್ತಿ ಕಂಡೊನು ಟಿಲ್ಲರ್‌ಡ್ ಸ್ಟೇರಿಂಗ್ ಪತೊಂದು ದಪ್ಪುನ ಕಾಲೊಗು ಬತ್ತ್, ಪುಂಡಿಡ್ ಬಾರ್ ಪಾರಾವೊಂದು, ಪಾರ್ದನ ಪನೊಂದು ನೇಜಿ ನಡೊಂದು, ಕೆಯ್ಯಿ ಕೊಯ್ಯೊಂದು, ಪಡಿಕ್ಕ್ ನೋತೊಂದು ಒತ್ತಟ್ಟ್ ಮಲ್ತೊಂದು ಇತ್ತಿ ಬೇಲೆ ಇನಿ ಮಿಷನ್‌ಡ್ ಮಲ್ತೊಂದು ಉಲ್ಲೆರ್. ಅಂಚಾನಗ ಬೆನ್ನಿದ ಒಂಬುಗೆದ ಪರ್ಬೊಲು ನೆಂಪುಗಾದ್ ಒರಿಯುನಾಂಡಲಾ ಎಂಚ..?

• ಶ್ರೀಶಾವಾಸವಿ ತುಳುನಾಡ್