ಒಡಿಪುಡ್ ತಿರಂಗಾ ಯಾತ್ರೆ

ಆಪರೇಶನ್ ಸಿಂಧೂರ್ ಯಶಸ್ವೀ ಸೇನಾ ಕಾರ್ಯಾಚರಣೆ ನಡಪಾಯಿನ  ನಮ್ಮ ದೇಶದ ವೀರ ಯೋಧರೆಗ್  ಗೌರವ ಬೊಕ್ಕ  ಬೆಂಬಲ  ಸೂಚಿಸಾವುನ  ನಿಟ್ಟುಡ್ , ರಾಷ್ಟ್ರ ರಕ್ಷಣಾ ಸಮಿತಿ ಉಡುಪಿದ  ವತಿಡ್ದ್ ಇನಿ ಜೋಡುಕಟ್ಟೆಡ್ದ್ ಸರ್ವೀಸ್ ಬಸ್ ನಿಲ್ದಾಣದ ಮುಟ  ಬೃಹತ್ ತಿರಂಗಾ ಯಾತ್ರೆ ನಡತುಂಡ್.ಪ್ರತಿಯೊರಿಲಾ ದೇಶದ ತಿರಂಗನ್ ಪಸೊಂದ್ ಬರ್ಸ ಬತ್ತುಂಡಲಾ ಬರ್ಸದ ನಡುಟೇ ಪಜ್ಜೆ ಪಾಡೊಂದ್ ದೇಶೊಗ್ ಬೊಕ್ಕ ಯೋಧೆರೆಗ್ ಜೈಕಾರ ಪಾಡೊಂದ್ ನಡತೆರ್.

ಮೇ 20 ಮಂಗಳವಾರ ಬಯ್ಯಗ್  4.00ಗಂಟೆಗ್ ಉಡುಪಿ ಜೋಡುಕಟ್ಟೆಡ್ದ್ ರಾಷ್ಟ್ರ ರಕ್ಷಣಾ ಸಮಿತಿದ  ವತಿಡ್ದ್ ನಡತಿನ ‘ತಿರಂಗ ಯಾತ್ರೆ’.ಡ್ ಭಾರತೀಯ ಸೇನೆದ  ವೀರ ಯೋಧರೆಗ್  ಗೌರವ ಸಂದಾಯ್ತ ನಡತುಂಡ್.

ಪಹಲ್ಗಾಮ್ ಡ್  ನಡತಿನ  ಉಗ್ರೆರೆನ ದಾಳಿ ಬೊಕ್ಕ ಹತ್ಯಾಕಾಂಡೊನ್  ಖಂಡಿಸಾದ್  ಭಯೋತ್ಪಾದಕ ಚಟುವಟಿಕೆದ  ವಿರುದ್ಧ ಹೋರಾಟ ಮಲ್ಪರೆಗ್ ಭಾರತೀಯರ್ ಮಾತೆರ್  ಒಟ್ಟಾವೊಡ್ ಪನ್ಪಿನ  ಸಂದೇಶೊನ್  ಸಾರುನ ಬೊಕ್ಕ ‘ಆಪರೇಷನ್ ಸಿಂಧೂರ್’ ವಿಜಯೋತ್ಸವದ ಅಂಗವಾದ್ ನಡತಿನ  ‘ತಿರಂಗ ಯಾತ್ರೆ’ಡ್  ಪಕ್ಷ, ಜಾತಿ, ಧರ್ಮ ರಹಿತವಾದ್ ನಾಗರಿಕೆರು ಬೃಹತ್ ಸಂಖ್ಯೆಡ್ ಪಾಲ್ ಪಡೆಯೆರ್.