ತುಳುಭವನ ನಿರ್ಮಾಣಗ್ ಮನವಿ

*ತುಳು ಅಭಿವೃದ್ಧಿ ನಿಗಮ ಸ್ಥಾಪನೆ, ತುಳು ಭವನ ನಿರ್ಮಾಣಗ್ ಮುಖ್ಯಮಂತ್ರಿಗ್ಉದಯ್ ಶೆಟ್ಟಿ ಮುನಿಯಾಲ್ ಮನವಿ*

ಪಂಚ ದ್ರಾವಿಡ ಭಾಷೆಲೆಡ್ ಒಂಜಾಯಿನ  ತುಳು ಭಾಷೆದ ಸಮಗ್ರ ಅಭಿವೃದ್ಧಿಗ್  ವಿಶೇಷ ಕಾಳಜಿ ಉಪ್ಪುನ ದೃಷ್ಟಿಡ್ ರಾಜ್ಯ ಸರಕಾರ ತುಳು ಅಭಿವೃದ್ಧಿ ನಿಗಮ ಸ್ಥಾಪನೆ ಮಲ್ಪೊಡ್ ಬೊಕ್ಕ ಕಾರ್ಕಳಡ್  ಸುಸಜ್ಜಿತ ತುಳು ಭವನ ನಿರ್ಮಾಣಗ್ ಅನುದಾನ ಬುಡುಗಡೆ ಮಲ್ಪೊಡ್ ಪಂಡುದು ಕಾರ್ಕಳ ಕಾಂಗ್ರೆಸ್ ಮುಖಂಡ ಉದಯ್ ಶೆಟ್ಟಿ ಮುನಿಯಾಲ್ ಮೇರು ಮುಖ್ಯಮಂತ್ರಿ ಡಿ.ಕೆ ಶಿವಕುಮಾರ್ ಗ್ ಲಿಖಿತ ಮನವಿ ಸಲ್ಲಿಸಾದೆರ್.

ಈ ಬಗ್ಗೆ ಪಾತೆರಿನ ಉದಯ್ ಶೆಟ್ಟಿ ಮೇರು, ತುಳು ಭಾಷೆ, ಸಂಸ್ಕೃತಿ ಬೊಕ್ಕ ಪರಂಪರೆದ ಒರಿಪು ಬೊಕ್ಕ ಅಭಿವೃದ್ಧಿಗಾದ್ ರಾಜ್ಯ ಸರ್ಕಾರದ ವತಿಡ್ದ್ “ತುಳು ಅಭಿವೃದ್ಧಿ ಪ್ರಾಧಿಕಾರ”ನ್ ಶೀಘ್ರವಾದ್ ಸ್ಥಾಪನೆ ಮಲ್ಪೊಡ್ ಪಂಡುದು ಮಾನ್ಯ ಮುಖ್ಯಮಂತ್ರಿಲೆಗ್  ಮನವಿ ಮಲ್ದೆ. ತುಳು ಭಾಷೆ ಸಾದ ವರ್ಷಜ ಇತಿಹಾಸ ಇತ್ತಿನ  ಪ್ರಾಚೀನ ದ್ರಾವಿಡ ಭಾಷೆಯಾದಿತ್ತುದ್, ಲಕ್ಷಾಂತರ ಜನಕ್ಲೆನ ಮಾತೃಭಾಷೆಯಾದುಂಡ್. ತುಳು ಭಾಷೆ ತುಳುನಾಡುದ ಸಂಸ್ಕೃತಿ, ಪರಂಪರೆ ಬೊಕ್ಕ ಜೀವನ ಶೈಲಿದ ಅವಿಭಾಜ್ಯ ಅಂಗವಾದುಂಡ್.. ಜಾಗತೀಕರಣದ ಪರಿಣಾಮವಾದ್ ಪ್ರಾದೇಶಿಕ ಭಾಷೆದ ಬಳಕೆ ಕಡಿಮೆಯಾವೊಂದುಪ್ಪುನ ಸಂದರ್ಭಡ್  ತುಳು ಭಾಷೆದ ಸಂರಕ್ಷಣೆ ಬೊಕ್ಕ ಅಭಿವೃದ್ಧಿದ ಅಗತ್ಯತೆ ಹೆಚ್ಚಾತುಂಡ್ ಪಂಡೆರು.
ಯುನೆಸ್ಕೋ (UNESCO) ಲಾ ತುಳು ಭಾಷೆನ್ ಸಂರಕ್ಷಣೆ ಮಲ್ಪೊಡಾಯಿನ  ಭಾಷೆದ ಪೈಕಿ ಪರಿಗಣನೆ ಮಲ್ಪುನ ಹಿನ್ನೆಲೆಡ್  ತುಳು ಭಾಷೆದ ಒರಿಪು ಬೊಕ್ಕ ಬೆಳವಣಿಗೆಗಾದ್ ವಿಶೇಷ ಕ್ರಮ ದೆತೊಂಬಿನ  ಅತ್ಯಗತ್ಯವಾದುಂಡ್  ಅಂಚಾದ್ ತುಳು ಅಭಿವೃದ್ಧಿ ಪ್ರಾಧಿಕಾರೊನ್  ರಚನೆ ಮಲ್ತುದ್ ತುಳು ಭಾಷೆದ ಸಂರಕ್ಷಣೆ ಬೊಕ್ಕ ಪ್ರಚಾರ, ತುಳು ಸಾಹಿತ್ಯ, ಸಂಶೋಧನೆ ಬೊಕ್ಕ ಪ್ರಕಟಣೆಲೆಗ್ ಉತ್ತೇಜನ, ಶಾಲೆ, ಕಾಲೇಜುಲೇಡ್ ತುಳು ಅಧ್ಯಯನಗ್ ಹೆಚ್ಚಿಗೆ ಪ್ರೋತ್ಸಾಹ, ತುಳು ಜಾನಪದ ಕಲೆ, ಯಕ್ಷಗಾನ, ಭೂತಾರಾಧನೆ ಬೊಕ್ಕ  ಸಾಂಸ್ಕೃತಿಕ ಪರಂಪರೆದ ಸಂರಕ್ಷಣೆ, ತುಳು ಭಾಷೆಗ್ ಸಂವಿಧಾನಿಕ ಬೊಕ್ಕ ಶೈಕ್ಷಣಿಕ ಮಾನ್ಯತೆ  ತಿಕ್ಕುನಂಚ ಕ್ರಮ ದೆತೊನೊಡು,ತುಳುನಾಡುದ ಸಾಂಸ್ಕೃತಿಕ ಕೇಂದ್ರದ ಅಭಿವೃದ್ಧಿಗ್ ನೆರವು ಕೊರೊಡುಂದ್ ಮನವಿ ಕೋರ್ತೆ ಪಂಡುದು ಪಂಡೆರ್.

*ಕಾರ್ಕಳಡ್ ಸುಸಜ್ಜಿತ ತುಳು ಭವನಗ್ ಬೇಡಿಕೆ*
ಉಡುಪಿ ಜಿಲ್ಲೆ, ಕಾರ್ಕಳ ತಾಲ್ಲೂಕುಡ್ ತುಳು ಭವನ ನಿರ್ಮಾಣ ಮಲ್ಪುನ ಬಗೆಟ್  ಮನವಿ ಮಲ್ದಿತ್ತುದ್ ತುಳು ಭಾಷೆ, ಸಾಹಿತ್ಯ, ಕಲೆ, ಸಂಸ್ಕೃತಿ ಬೊಕ್ಕ ಪರಂಪರೆನ್ ಒರಿಪಾದ್ ಬುಳೆಪಾವುನ ಉದ್ದೇಶಡ್  ಸುಸಜ್ಜಿತ ತುಳು ಭವನ ನಿರ್ಮಾಣ ಅಗತ್ಯವಾದುಂಡ್
ಕಾರ್ಕಳ ತುಳುನಾಡುದ ಪ್ರಮುಖ ಸಾಂಸ್ಕೃತಿಕ ಕೇಂದ್ರಲೆಡ್ ಒಂಜಾದಿತ್ತುದ್, ಮುಲ್ಪ  ತುಳು ಭಾಷೆ, ಯಕ್ಷಗಾನ, ಭೂತಾರಾಧನೆ, ನಾಗಾರಾಧನೆ ಬೊಕ್ಕ  ಜನಪದ ಕಲೆಕುಲು ಇನಿಕುಲಾ ಜೀವಂತವಾದುಂಡ್ ತುಳು ಭಾಷೆ ಬೊಕ್ಕ ಸಂಸ್ಕೃತಿದ ಸಂರಕ್ಷಣೆ, ಅಧ್ಯಯನ ಬೊಕ್ಕ ಪ್ರಚಾರಗಾದ್ ಕಾರ್ಕಳಡ್ ತುಳು ಭವನದ ಅಗತ್ಯವುಂಡ್
ಪ್ರಸ್ತಾವಿತ ತುಳು ಭವನಡ್ ಗ್ರಂಥಾಲಯ, ಸಂಶೋಧನಾ ಕೇಂದ್ರ, ಸಭಾಂಗಣ, ವಸ್ತುಸಂಗ್ರಹಾಲಯ ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮಗಾದ್ ಅಗತ್ಯ ಮೂಲಸೌಕರ್ಯಲೆನ್ ಒದಗಿಸಾವೊಲಿ. ತುಳು ಭಾಷೆ ಬೊಕ್ಕ ಸಂಸ್ಕೃತಿದ ಅಭಿವೃದ್ಧಿಗ್ ಹೆಚ್ಚಿಗೆ ಉತ್ತೇಜನ ತಿಕ್ಕುಂಡ್
ಅಂಚಾದ್ ಉಡುಪಿ ಜಿಲ್ಲೆ, ಕಾರ್ಕಳ ತಾಲ್ಲೂಕುಡ್ ಸರ್ಕಾರದ ವತಿಡ್ದ್ ಸೂಕ್ತ ಜಾಗೆನ್ ಗುರುತಿಸಾದ್ ಅಗತ್ಯ ಅನುದಾನನ್ ಮಂಜೂರು ಮಲ್ತುದ್ ಶೀಘ್ರಡೇ ತುಳು ಭವನ ನಿರ್ಮಾಣಗ್ ಕ್ರಮ ದೆತೊನೊಡ್ ಪಂಡುದ್ ಉದಯ್ ಶೆಟ್ಟಿ ಮುನಿಯಾಲ್ ಮುಖ್ಯಮಂತ್ರಿಲೆಗ್ ಪತ್ರದ ಮೂಲಕ ಮನವಿ ಸಲ್ಲಿಸಾದೆರ್..