ಪೊಸ ಬಿಸು ಪರ್ಬ

ಪೊಸ ವರ್ಸ ಬಿಸು ಪರ್ಬ

ನಾಡೊಂದು ಬರ್ಕ ಪೊಸತಾಯಿ ಸಾದಿ
ಪರ್ಬೊಗು ಅರ್ಲಾಗ ತೆಕ್ಕಂದಿ ಬೊಲ್ಪು
ಕದೆಲ್ಂಡ್ ಪರತ್ ಗೋಡಿಂಡ್ ಪೊಸತ್
ಪಚ್ಚೆ ಪಸರಿ ಕಾಡ್ ತೋಜುಂಡು ಕರೆಟ್

ಪಿಸ್‌ರ್‌ನ್ ಮದಪುಗ ಬದ್ಕ್‌ನ್ ಕಟ್ಟ್‌ಗ
ಒಡ್ಕ ದಾಂತಿ ಕುಸಿನ್ ಪಡೆಕ ಸಮಾ
ಕಾಡ ಪುರ್ಪೊಡು ಭಕ್ತಿಡ್ ಪುಡ್ಯೊನುಗ
ದೈವದ ಕೊಡಿ ಅಡಿಟ್ ಸೇರ್ದ್ ನಮ

ಯುಗ ವರ್ಸ ಕರಿಂಡ್ ನೆಲದೈವ ಒಲಿಂಡ್
ಭಕ್ತಿದ‌ ಸಕ್ತಿ ಮರತ್ ಪೋಂಡಾ ನರಮಾನಿ
ಮಲ್ತಿ ಕರ್ಮದ ಕೋಟೆ ಅಹಂ ಬರ್ಚಿದ ಪರ್ತೆ
ಕದೆಲ್ದಿ ಮಿತ್ತರ್ಮೆಡ್ ಉಂತುದನಾ ಮಾನಿ

ಕರದ್ ಪೋಪಿ ಪೊರುಮೆ ಉಂತವುನು ಏರ್
ತಾರ್ದ್ ಪೋಪಿ ಸತ್ಯೋನು ತಾಂಗುನು ಏಪಾ
ಮನಸುಂಡು ಉಲಯಿ ಬಲ ದಾಂತೆ ನುರಿದ್
ತಪ್ಪುನ್ ತೆರಿದ್ ಸಕ್ತಿ ಪತ್ತ್‌ದ್ ಮಲ್ಪುಗ ಒಪ್ಪ

ಬಿಸು ಪರ್ಬ ಉಂದು ಗೆಲ್ಮೆದ ಒರುತ
ತೆಟ್ಟ್‌ನ್ ಮರತ್ ಸತ್ಯದ ದೈನ್ ನಡ್‌ಕಾ
ಮರ‌ ಮಲ್ಲ ಆದ್ ಫಲ ಕೊರು ರುಚಿತ
ಪರ್ಬೊ ದಿನತಾನಿ ಪೊಸ ಬಿದೆ ಬಿತ್ತ್‌ಗಾ

ಆರ್ ಕೆ ನಿರಂಜನ್
ತುಲುವೆರೆ ಕಲ (ರಿ)