ತುಳುನಾಡುದ ಪರತಿರಿಡೇ ತುಳುಬದುಕುಗ್ ಬಾರೀ ಮಲ್ಲ ಕೊಡುಗೆ ಕೊರಿನ ಡಾ.ವಿ.ಕೆ.ಯಾದವ್…

ತುಳುನಾಡುದ ಪರತಿರಿಡೇ ತುಳುಬದುಕುಗ್ ಬಾರೀ ಮಲ್ಲ ಕೊಡುಗೆ ಕೊರಿನ ಡಾ.ವಿ.ಕೆ.ಯಾದವ್..

ಪಂಚದ್ರಾವಿಡ ಬಾಸೆಲೆಡ್ ಒಂಜಾಯಿನ ತುಳುಬಾಸೆಗ್ ಮಾನಾದಿಗೆ ತಿಕ್ಕೊಡ್, ತುಳುನ್ 8 ನೇ ಪರಿಚ್ಛೇದಗ್ ಸೇರಾವೊಡ್ ಪನ್ಪಿನ ತುಳುವೆರೆನ ಆಶಯ.ಆಂಡ ಅಯಿಕ್ ಬೋಡಾಪಿನ ತುಳುಬಾಸೆದ ಪರತಿರಿನ್ ಕಬಿತೆ,ಸಾಹಿತ್ಯ,ಯಕ್ಷಗಾನ,ನಾಟಕದ ಮುಖೇನ ಸಂಶೋಧನಾತ್ಮಕವಾದ್ ಸರಕಾರೊಗ್ ಮುಟ್ಟಾವುನ ಬೇಲೆ ಸರಿಕಟ್ಟುಡ್ ಆವಂದೆ,ತುಳುಬಾಸೆ ಅಡಿಕ್ ಬೂರ್ದ್ ಪೋತುಂಡ್.ಇನಿ-ಕೋಡೆಡ್ ಪ್ರತಿಯೊಂಜಿ ಕ್ಷೇತ್ರೊಡುಲಾ ತುಲುಬಾಸೆನ್ ಗಲಸೊಂದಿತ್ತೆರೆಡುಲಾ, ತುಳುಬದುಕುದ ಎಸಲ್ ನ್ ತೆರಿಯೊನಂದೆ, ತುಳುವೆರ್ ತುಳುನಾಡುದ ಮೂಲಬದುಕುನ್ ತೆರಿಯೊನಂದೆ, ಅವ್ವೆನ್ ಒಂಚೊಂಚಿ ತಿರ್ಗಾವೊಂದುಪ್ಪುನವ್ವ್ ಬಾರೀ ಬೇಜಾರುದ ಸಂಗತಿ.ಅವ್ವ್ ದೈವಾರಾಧನೆ ಆದುಪ್ಪು,ನಾಗಾರಾಧನೆ ಆದುಪ್ಪು ಅತ್ತುಂಡ ತುಳುನಾಡುದ ಆಚರಣೆಲು ಆದುಪ್ಪು,ಉಂದು ಮಾತಾ ಇನಿ- ಕೋಡೆಡ್ ಬದಲಾವಣೆದ ಕಾಲಘಟ್ಟೊಡ್ ಪ್ರತಿಯೊಂಜಿಲಾ ಬದಲಾವೊಂದುಂಡ್.ನಮ ಮೂಲ ಬದುಕುದ ತಿರ್ಲ್ ಒರಿಯೊಡಾಂಡ ತುಳುಬಾಸೆಗ್ ಸರಕಾರದ ಮಾನ್ಯತೆ ತಿಕ್ಕೊಡಾಯಿನವ್ವ್ ಬಾರೀ ಅಗತ್ಯವಾದುಂಡ್.

ಆ ನಿಟ್ಟುಡ್ ಅವ್ವೇತೋ ತುಳುವಿದ್ವಾಂಸೆರ್ ನಕುಲು ತುಳುನಾಡುದ ಬಗೆಟ್‌ವಿಶೇಷ ಅಧ್ಯಯನ ಮಲ್ತುದ್, ಮೂಲೊನ್ ತೆರಿಯೊಂದ್ , ಬೂಕು ಬರೆದ್ ದುಂಬುದ ಪೀಳಿಗೆಗ್ ಎತ್ತಾವುನ ಬೇಲೆ ಮಲ್ತೊಂದುಪ್ಪುನವ್ ಬಾರೀ ಕುಸಿತ್ತ ಸಂಗತಿ ಆಂಡಲಾ ತುಳುನಾಡುದ ಕಡಲಪ್ಪೆ ಜೋಕುಲೆನ ಮೂಲಬದುಕುದ ಬಗೆಟ್ ಒವ್ವೇ ಸಂಶೋಧಾನಾತ್ಮಕವಾಯಿನ ಬೂಕು ಇದಮುಟ್ಟ ಬರಂದಿನವ್ ಬಾರೀ ಬೇಜಾರುದ ಸಂಗತಿ..ಅವ್ವೆ ನ್ ಗಣನೆಗ್ ದೀಯೊಂದ್, ಡಾ.ವಿ.ಕೆ‌.ಯಾದವ್ ಮೇರ್ ತಾನುಲಾ ಒರಿ ಮೊಗವೀರ ಸಮುದಾಯದಾರಾದ್, ತನ್ನ ಸಮುದಾಯದ ಬಗೆಟ್ ವಿಶೇಷ ಕಾಳಜಿ ಮುತುವರ್ಜಿ ದೀಯೊಂದ್, ತುಳುನಾಡುಗ್ ಅಮೋಘ ಕೊಡುಗೆ ಕೊರಿನ ಮೊಗವೀರ ಸಮುದಾಯದ ಬಗೆಟ್ ಒಂಜಿ ಬೂಕು(ಗ್ರಂಥ) ಬರೆಯೊಡ್ ಪನ್ಪಿನ ಆಲೋಚನೆ ಮಲ್ತೆರ್..ಅಂಚ ಆರ್ ತುಳುಟ್ ಈ ಗ್ರಂಥ ಬರೆಯೊಡಾಂಡ ಕನ್ನಡೊಡ್ ಎಮ್.ಎ. ಪದವಿ ಮಲ್ಪೊಡ್ ಪಂಡುದ್ ಬತ್ತುಂಡ್.ಅವ್ವೆನ್ಲಾ ಛದಿ ಬುಡಂದೆ ಮಲ್ತಿನ ಯಾದವ್ ಸರ್ ಮೊಗವೀರೆರ್ನ ಸಾಂಸ್ಕೃತಿಕ ಬೊಕ್ಕ ಆರ್ಥಿಕ ಚಿಂತನೆ ಪನ್ಪಿನ ಸುಮಾರು 500 ಪುಟದ ಬೂಕುನ್ ಬರೆಯೆರ್.ಇತ್ತೆ ಅವ್ ಬೂಕು ಬುಡುಗಡೆ ಆವರೆಗ್ ಅಣಿಯಾತುಂಡ್.ಎಲ್ಲೆದ ದಿನೊ ಪಂಡ ಅಗಸ್ಟ್ 27‌ ಐತಾರದಾನಿ ಬಪ್ಪನಾಡುದ ದುರ್ಗಾಪರಮೇಶ್ವರಿ ಅಪ್ಪೆನ ತಲಜಾಗೆಡ್ ಈ ಬೂಕು ಲೋಕಾರ್ಪಣೆ ಆವರೆಗುಂಡ್.ಈ ಬೂಕು ಮೊಗವೀರೆರ್ನ ಬದುಕುದ ತಿರ್ಲ್ ನ್ ತೆರಿಯೊಂಬಿನ ಅಚ್ಚಾದ್ ಬತ್ತಿನ ಕಡೀರ್ದ ಪಿ.ಎಚ್.ಡಿ‌ ಅಧ್ಯಯನ ಮಲ್ತುದ್ ಬರೆಯಿನ ಬೂಕು..ಈ ಬೂಕುಗ್ ತುಳುನಾಡುದ ಪುಗಾರ್ತೆದ ವಿದ್ವಾಂಸೆರಾಯಿನ ಡಾ.ವೈ.ಎನ್.ಶೆಟ್ಟಿ ಬೊಕ್ಕ ರಾಧಕ್ರಷ್ಣ ಬೆಳ್ಳೂರು ಮುನ್ನುಡಿ ಬರೆತೆರ್.ಮೊಗವೀರ ಪತ್ರಿಕೆದ ಸಂಪಾದಕೆರಾಯಿನ ಅಶೋಕ್ ಸುವರ್ಣ ಬೆನ್ನುಡಿ ಬರೆತೆರ್.ಗುರುಕುಲ ವಿಭಾಗೊಡ್ ಕುಪ್ಪಂ ಯೂನಿವರ್ಸಿಟಿದ ತುಳುಅನುವಾದ ಬೊಕ್ಕ ಅಧ್ಯಯನ ವಿಭಾಗದ ಮುಖ್ಯಸ್ಥೆರಾಯಿನ ಬಿ.ಎಸ್.ಶಿವಕುಮಾರ್ ಸಾಕಾರ ಕೊರ್ತೆರ್.ಅಂಚೆನೇ ತುಳುನಾಡುದ ಬೇತೆ ಬೇತೆ ವಿದ್ವಾಂಸೆರ್ ನಕುಲು,ಸಾಹಿತಿಲು,ಬರವುದಕುಲು ಬೆರಿಸಾಯ ಉಂಡು ಪಂಡುದ್ ಡಾ.ವಿ.ಕೆ.ಯಾದವ್ ತೆರಿಪಾದೆರ್.

ತುಲುವಪ್ಪೆ ಮಗೆ ಡಾ.ವಿ.ಕೆ.ಯಾದವ್ ಬರೆತಿನ ಈ ಬೂಕುಡಾದ್ ತುಳುಬಾಸೆಗ್ ಮಾನ್ಯತೆ ತಿಕ್ಕಡ್ ಪಂಡುದ್ ಎಡ್ಡೆಪ್ಪು ಬಯಕುಗ.