ಬೀಜು ಗಾಳಿಡ್, ಪರಪಿ ನೀರ್‌ಡ್, ಪಕ್ಕಿ ಬುಲಿಪುಡು, ಕೋರಿ ಕೆಲೆಪುಡು, ಮುರ್ಗೊದಗ್ಗೊಲಿಪುಡು, ಮಾನ್ಯ ತೆಲಿಕೆ ನಲಿಕೆ ಉಸುಲೊಯ್ಪುಡು, ನಡಪು ಪಜ್ಜೆಡ್ ಓಲು ತೂಂಡಲಾ, ಓಲು ಕೇಂಡಲಾ ಕೇನುನವು ಸರಿಗಮಪದನಿ ಪನ್ಪಿ ಸೊರೊ. ಸಂಗೀತ ಪನ್ನಗ ಅವು ಏಲ್ ಸೊರೊಕುಲೆನ ಪೊರ್ಲ ನಲಿಕೆ. ಸ-ಷಡ್ಜ, ರಿ-ರಿಷಭ, ಗ-ಗಾಂಧಾರ, ಮ-ಮಧ್ಯಮ, ಪ-ಪಂಚಮ, ದ-ದೈವತ, ನಿ-ನಿಷಾದ ಪನ್ಪಿ ಎರ್ತೆ ಜಪ್ಪೆಲ್‌ದ ಆ ಏಲ್ ಸೊರೊಕ್ಕುಲು ಲೋಕೊಡುದಿತಿ ಕೋಟಿ ಪದೊಕ್ಲೆಗ್ ಜೂವೊ ಕೊರ್ತಿನವು. ಒವ್ವೆ ಸಂಗೀತ ಸಂಪನ್ನ ಆವೊಡು ಪಂಡ ಉಡಲ್‌ಡ್ ಬಗ್ತಿ ಬಾಮೊ ಉದಿಪೊಡು. ಸುಗಿಪು ದೇವೆರೆಗ್ ಸಂದೊಡಾಂಡ, ಪಂಡಿ ಪಾರ್ದನಗ್ ದೈವೊ ಒಸಯೊ ಆವೊಡಾಂಡ, ಪದೊಕು ಮನಸ್ ಅರ್ಲೊಡಾಂಡ ಗೀತೊದೊಟ್ಟು ಸಂಗೀತೊದ ರಾಗೊ ಬೋಡು. ಬಾಮೊ, ಗೀತೊ ರಡ್ಡ್ ಒಂಜೇ ಮೋನೆದ ರಡ್ಡ್ ಕಣ್ಣ್ ಇತ್ತಿಲೆಕಂತಿನವು. ರಡ್ಡೆಡ್ ಒಂಜಿ ಕಣ್ಣ್ ಇಜ್ಜಂಡಲಾ ದಿಟ್ಟಿ ಪರಿಪೂರ್ಣ ಆವಂದ್. ರಾಗೊ ತಾಳೊದೊಟ್ಟು ಬಾಮೊದುಡಲ ಬಾಮಿಪುದ ಪದೊಟು ಜನಮಂದೆ ಕೆಬಿ ಕೊಂಡೆ ಮಲ್ತ್ ಕೇನುನಂಚ ಮಲ್ಪಿ ಚಾತಿರ್ಪುದ ಒಂಜಿ ಸಕಲಕಲಾವಲ್ಲಭನ್ ಗುರ್ತ ಮಲ್ಪುನ ಕಿನ್ಯ ಪುಣೆಪು ಎನ್ನವು. ಸಂಗೀತ, ಸಾಹಿತ್ಯ, ಕಲೆ ಒಂಜೆಕ್ಕೊಂಜಿ ಒತ್ತೊರ್ಮೆದ ಪಜ್ಜೆ ಕೋತೊಂದು ದುಂಬು ಪೋಪುನವು. ರಾಗೊ, ತಾಳೊಲೆ ಮೇಳೊಗು ನಲಿಕೆ, ನಡಕೆದ ಪೊದೆಪು ಇತ್ತ್‌ಡ್ರ್ಂಡವು ಸೊರ್ಗೊಗು ಪತ್ತಿ ಜೀಟಿಗೆ ಆವು. ಅಂಚಿ ಸರ್ವ ಕಲೆಕ್ಲೆನ್ ಉಡಲ್‌ಡ್ ದಿಂಜವೊಂದಿನಾರ್ ಸಂಗೀತ ನಿರ್ದೇಶಕೆ, ಸಿನೆಮಾ ನಿರ್ದೇಶಕೆ, ಗಾಯಕೆ, ಮಿಮಿಕ್ರಿ ಕಲಾವಿದೆ, ಯಕ್ಷಗಾನ, ನಾಟಕ ಕಲಾವಿದೆ ಸಾಹಿತಿ, ಸಂಘಟಕೆರಾಯಿನ ಶರತ್ ಬಿಳಿನೆಲೆ.
1972ನೇ ಜುಲೈ 19ನಾನಿ ಆನಿದ ಪುತ್ತೂರು (ಇತ್ತೆ ಕಡಬ) ತಾಲೂಕುದ, ಕುಕ್ಕೆ ಸುಬ್ರಹ್ಮಣ್ಯಗ್ ಒತ್ತ್‌ದುಂತ್‌ನಂಚ ಇಪ್ಪುನ ಕಿನ್ಯ ಊರು, ಶ್ರೀ ಗೋಪಾಲಕೃಷ್ಣ ದೇವೆರೆ ನಿಲೆಯಾಯಿನ ಬಿಳಿನೆಲೆಟ್, ಕಲೆ ಸಾಹಿತ್ಯಲೆಡ್ ಮೇಲ್ಗೈ ಸಾಧಿತಿ ಕುಂಭಟ್ ಕುಟುಮೊಡು, ಕಲ್ಪಾದಿ, ಸಂಘಟಕೆರ್, ಧಾರ್ಮಿಕ ಮುಖಂಡೆರ್, ಸಾಹಿತಿಯಾದ್ ಪುಗರ್ತೆ ಪಡೆಯಿ ಗೋರಾಕೆ ಕಡಬ ಪಂದೇ ಪುದರಾಯಿನ ಗೋಪಾಲ ರಾವ್ ಕಡಬ ಬೊಕ್ಕ ಆರ್ನ ಧರ್ಮಪತ್ನಿ ಸದ್ಧರ್ಮ ಸಂಪನ್ನೆ ಶಾಂತಿ ರಾವ್‌ರೆನ ಕಡೀರ ಮಗೆಯಾದ್ ಮಡಿಕೇರಿಡ್ ಪುಟ್ಟಿನಾರ್ ಶರತ್ ಕುಮಾರ್ ಬಿಳಿನೆಲೆ.
ತನ್ನ ಪ್ರಾಥಮಿಕ ಶಿಕ್ಷಣನ್ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ ಬಿಳಿನೆಲೆಟ್ ಮುಗಿತ್, ಮಡಿಕೇರಿದ ಅಜ್ಜಿಲ್ಲಡ್ ಇತ್ತೊಂದು ಮರಗೋಡು ಭಾರತಿ ಹೈಸ್ಕೂಲ್‌ಡ್ ಪ್ರೌಢ ಶಿಕ್ಷಣ ಮಲ್ತ್ ಎಸ್.ಎಸ್.ಎಲ್.ಸಿಡ್ದ್ ಬೊಕ್ಕ ಪಿರ ಊರುಗು ಬತ್ತಿ ಶರತ್ ಕುಮಾರ್ ಸುಬ್ರಹ್ಮಣ್ಯದ ಶ್ರೀ ಸುಬ್ರಹ್ಮಣ್ಯೇಶ್ವರ ಪದವಿಪೂರ್ವ ಕಾಲೇಜಿಡ್ ಪಿ.ಯು.ಸಿ, ಪುತ್ತೂರುದ ವಿವೇಕಾನಂದ ಕಾಲೇಜಿಡ್ ಡಿಪ್ಲೋಮಾ ಇನ್ ಸಿವಿಲ್ ಇಂಜಿನಿಯರಿಂಗ್ ಮಲ್ತೆರ್. ಅಯಿಡ್ದ್ ಬೊಕ್ಕ ಬೆಂಗ್ಳೂರುದ ಆಟೋ ಕ್ಯಾಡ್‌ ಸೆಂಟರ್‌ಡ್ ಆಟೋಕ್ಯಾಡ್ ಡಿಪ್ಲೊಮಾ ಮಲ್ತ್, ಬಿಳಿನೆಲೆ ಪ್ರೌಢಶಾಲೆಡ್ ಪಾರ್ಟ್‌ಟೈಮ್ ಕಂಪ್ಯೂಟರ್ ಕಲ್ಪಾದಿಯಾದ್ ಒಂಜಾತ್ ಸಮಯ ಬೆಂದ್‌ನಾರ್ ಅಯಿಡ್ದ್ ಬೊಕ್ಕ ಬೆಂಗಳೂರುಡು ಇಂಟೆಲ್ ಸಾಫ್ಟ್ ಕಂಪೆನಿಡ್ ಡಿಸೈನರ್ ಆದ್ ಕೆಲವು ಒರ್ಸೊ ಬೆಂದೆರ್.
ಮೆಗ್ಯೆ ಸನತ್ ಕುಮಾರ್ ರಾವ್ ಬೊಕ್ಕ ತಂಗಡಿ ಸೌಮ್ಯ ಸತೀಶ್‌ರೆನ ಮೋಕೆದ ಪಲಯೇ ಶರತ್ ಕುಮಾರ್ ಜೋಕ್ಲಾಟಿಕೆಡೇ ಸೂಕ್ಷ್ಮಮತಿ ಬೊಕ್ಕ ಚುರುಕುದ ಮಾಣಿ. ಪೆರಿಯ ಸಾಹಿತಿಯಾಯಿ ಅಮ್ಮೆರೆನ ಆದರ್ಶಡ್ ಕಿನ್ಯ ಚಿಟ್ಕಲೆನ್ ಬರೆವೊಂದಿತ್ತಿ, ಕಲೆ, ಸಾಹಿತ್ಯಡ್ ಬಾರ್ಯಾತ್ ಮೋಕೆ ಇತ್ತಿ ಶರತ್ ಕುಮಾರ್ ತನ್ನ ಏಲ್ನೇ ಕ್ಲಾಸ್‌ಡ್ ನಾಟಕಗ್ ಮಿತ್ತರ್ಮೆ ಮಿತರಿನ ಮಾಣಿ ನಾರದ ವಿಜಯ, ಶಿವ ಸಂಸಾರೊ ಸೇರಿನಂಚ ಅವ್ವೇತೋ ತುಳು ಕನ್ನಡ ನಾಟಕೊಲೆಗ್ ಬಣ್ಣ ಪಾಡೊಂದು ಕಲಾರಂಗಡ್ ಒರಿನಾರ್ ಪಿರ ತಿರ್ಗ್‌ದ್ ತೂಯಿನ್ನೇ ಇಜ್ಜೆರ್. ಭಜನೆ ಪನೊಂದಿತ್ತಿ ಶರತ್ ಕುಮಾರ್ ಶ್ರೀ ಶ್ರೀ ವಿದ್ಯಾಭೂಷಣೆರೆಡ ಭಕ್ತಿಸಂಗೀತದ ತರಬೇತಿ ದೆತೊಂದು, ಕಿನ್ಯ ಕಿನ್ಯ ಭಜನಾ ಕಮ್ಮಟಲೆಡ್ ಪಾಲ್ ಪಡೆವೊಂದಿತ್ತೆರ್. ಅಯಿಡ್ದ್ ಬೊಕ್ಕ ಬೆಂಗಳೂರುದ ವೆಂಕಟ ರಾಘವನ್ ಬೊಕ್ಕ ಎಂ. ಎಸ್ ಗಿರಿಧರ್‌ ಪನ್ಪಿನಾರೆಡ ಸಂಗೀತ ಶಿಕ್ಷಣ ಪಡೆವೊಂದು ಶಾಸ್ತ್ರೀಯ ಬೊಕ್ಕ ಸುಗಮ ಸಂಗೀತನ್ ಕಲ್ಪುನ ಒಟ್ಟುಡು ನಾಟಕದ ಕಲೆತ್ತ ಪೊರ್ಲು ತಿರ್ಲ್‌ಲೆನ್ ತೆರಿಯೊಂದು ಬತ್ತೆರ್.
ಕಡಬಡ್ದ್ ಬೇಲೂರುಗು ಬೈಕ್‌ಡ್ ಪೋದು ಬರೊಂದು ವನಮಾಲ ಬೇಲೂರು ಪನ್ಪಿನಾರೆಡ ಗಮಕ ಶಿಕ್ಷಣದ ತರಬೇತಿ ದೆತೊಂದು ಮೂಜಿ ಒರ್ಸೊದ ಗಮಕ ಡಿಗ್ರಿ ಮಲ್ತೆರ್. ಅಲ್ಪಲ್ಪ ರಸಮಂಜರಿ, ದಾಸ ಸಾಹಿತ್ಯ ಕಾರ್ಯಕ್ರಮಲೆನ್ ಕೊರೊಂದಿತ್ತಿ ಶರತ್ ಕುಮಾರ್ ಪುಗರ್ತೆದ ಮದ್ದಳೆವಾದಕೆರಾಯಿನ ಕಾಸರಗೋಡು ಬಾಬು ರೈ ದುಂಬಾಯಿನಕ್ಲೆನೊಟ್ಟುಡು ಕಾರ್ಯಕ್ರಮೊಲೆನ್ ಕೊರ್ದ್ ಸೈ ಪನ್ಪವೊಂದೆರ್. ತನ್ನ ನೇಲ್ಯಮ್ಮೆರೆ ಮಗೆ ಶಶಿ ಗಿರಿವನರೆನ ಕಲಾತಂಡ ಗಿರಿವನ ನವರಸ ಗಾನಸಿರಿತ ಕಲಾವಿದೆರಾದ್ ಕನಕ ಕೀರ್ತನ ಗಾಯನ, ಭಕ್ತಿ ರಸಮಂಜರಿ, ಭಕ್ತಿಗಾನವೈಭವದಂಚಿನ ಅವ್ವೇತೋ ಕಾರ್ಯಕ್ರಮಲೆಡ್ ತಾಟಿಬೊಟ್ಟವೊಂದು ಪಿಜಿರ್ ಮಗ್‌ರ್‌ದ್ ಪದ ಪನ್ಪವೊನ್ನ ಗಟ್ಟಿಗೆ ಈ ಶರತ್ ಬಿಳಿನೆಲೆ.
ಅಮ್ಮೆರೆನ ಆದರ್ಶದೊಟ್ಟುಡು ನಾಯಕತ್ವದ ಗುಣೊನ್ಲಾ ಪಡೆವೊಂದು ಬತ್ತಿ ಶರತ್ ಕುಮಾರ್ ಬಿಳಿನೆಲೆ ಗ್ರಾಮ ಪಂಚಾಯತ್ ಓಟುಗು ಉಂತ್‌ದ್ ಅಲ್ಪ ಗೆಂದ್ಯೆರ್ಂಡಲಾ, ಗುರ್ಕಾರ ಗದ್ದಿಗೆನ್ ಹಿರಿಯರಿಗೆ ಬುಡ್ದ್ ಕೊರ್ನಾರ್. ಸರಳ ಬೊಕ್ಕ ಸಜ್ಜನಿಕೆದ ಸೀದಾ-ಸಾದ ಗುಣೊತ್ತ ಒಟ್ಟುಡು ತಪ್ಪುನು ತೂಯಿನಲ್ಪ ಖಂಡಿಪುನ ಸೀದ ನಡಕೆದ ಜವ್ವನೆ ಶರತ್ ಬಿಳಿನೆಲೆ ಸಮಾಜದ ಒಂಜಾತ್ ಅಂಕುಡೊಂಕುಲೆನ್ ತಿದ್ಡೊಂದು ಸಮಾಜಮುಖಿಯಾದ್ ದುಂಬು ಪೋಪಿನಲ್ಪ ಬೇತೆಕ್ಲೆಗ್ ತಾದಿ ತುಡರ್ ಆಯೆರ್. ಬಿಳಿನೆಲೆ ಬೈಲಡ್ಕ ಶಾಲೆಡ್ ಕಲ್ಪಾದಿಯಾದಿತ್ತಿ ಅಮ್ಮೆರ್ ಟ್ರೈನಿಂಗ್‌ಗಾದ್ ಕುಡ್ಲ, ಮೈಸೂರುಗುಂದು ಪೋಯಿನ ಪೊರ್ತು ಕಲ್ಪಾದಿಲ್ ಕಮ್ಮಿತ್ತಿ ಆ ಶಾಲೆಡ್ ಅಮ್ಮೆರೆನ ಪರವಾದ್ ಕಲ್ಪಾದಿಯಾದ್ ಇತ್ತಿ ಬಾಲೆ ಮನಸ್‌ದ ಶರತ್ ಜೋಕ್ಲೆನ ಮೋಕೆದ ಮೆಚ್ಚಿಗೆ ಪಡೆವೊಂಡೆರ್. ಮೆಗ್ದಿ ಸೌಮ್ಯ ಸತೀಶ್ ಬೊಕ್ಕ ಶರತ್ ಬಿಳಿನೆಲೆ ಒಟ್ಟಾದ್ ಸುಬ್ರಹ್ಮಣ್ಯಡೊಂಜಿ ಕಿಂಡರ್ ಗಾರ್ಡನ್ ಸುರುಮಲ್ತೆರಾಂಡಲಾ ಸುರುತ ರಡ್ಡ್ ಒರ್ಸೊ ಎಡ್ಡೆಡ್ ನಡತ್ಂಡಲಾ ಅನಿವಾರ್ಯ ಕಾರಣಲೆಡ್ದಾದ್ ನಿಧಾನೊಗು ಉಂತ್‌ದ್ ಪೋಂಡು.
ಎಲ್ಯೆಡೇ ತುಳು ಕನ್ನಡ ಹಾಸ್ಯ ಚುಟುಕು, ವ್ಯಂಗ್ಯ ಬರವುಲೆಮ್ ಬರೆವೊಂದಿತ್ತಿ ಶರತ್ ಅಮ್ಮೆರೆಡ್ದ್ ನೆರಡ್ಡೆ ತಿಂದೊಂದು ಬರವು ಉಂತವುನ ಮನಸ್ ಮಲ್ತೆರ್ಂಡಲಾ, ಅಯಿಡ್ದ್ ಬೊಕ್ಕ ಭಕ್ತಿ ಸಾಹಿತ್ಯ ಮುಡೆಪುನ ಮನಸ್ ಮಲ್ತೆರ್. ಸುಬ್ರಹ್ಮಣ್ಯ ದೇವೆರೆ ಬಗ್ತೆರ್ ಬದ್ಕ್‌ಡ್ ಒರಾಂಡಲಾ ‘ನಮೋ ನಮೋ ಶ್ರೀ ಸುಬ್ರಹ್ಮಣ್ಯ| ಪಾಲಿಸೆಮ್ಮನು ಅಮಿತವರಣ್ಯ| ನಾಗನರೂಪದಿ ನೆಲೆಸಿದ ದೇವ| ಸುಬ್ರಹ್ಮಣ್ಯ ನಮೋ ನಮೋ..’ ಪನ್ಪಿ ಬಿ.ಆರ್ ಛಾಯಾ ಪಂಡಿ ಪೊರ್ಲುದ ಮನಸಿರ್ಮೆನ ಆಪಿ ಸೊರೊತ್ತ ಕುಕ್ಕೆ ಸುಬ್ರಹ್ಮಣ್ಯ ಅಮೃತವಾಣಿನ್ ಕೇನಂದೆ ಇಪ್ಪಯೆರ್. ಈ ಸಾಹಿತ್ಯದ ಪಿರವುದ ಸಾಹಿತಿ ಉಂದುವೇ ಶರತ್ ಬಿಳಿನೆಲೆ ಪನ್ಪಿನ ಅವ್ವೇತೋ ಜನೊಕು ನನಲಾ ತೆರಿದಿಪ್ಪಂದ್. ಆತೆ ಅತ್ತಂದೆ ಅಶ್ವಿನಿ ಆಡಿಯೋ ಕಂಪೆನಿ, ಝೇಂಕಾರ್ ಆಡಿಯೋ ಕಂಪೆನಿ, ಸಾರೇಗಾಮ ಮ್ಯೂಸಿಕ್ಸ್, ಚಿತ್ತಾರ ಮ್ಯಾಗಜಿನ್‌ದಕ್ಲೆನ ಸಿ ಮ್ಯೂಸಿಕ್, ಟಿ ಸೀರಿಸ್, ಕುಕ್ಕೆ ಶ್ರೀ ಲೈವ್ ಕ್ಯಾಸೆಟ್ಸ್‌ದ ಖಾಯಂ ಸಾಹಿತಿಯಾಯಿ ಶರತ್ ಬಿಳಿನೆಲೆ ಬರೆಯಿ ತುಳು ಕನ್ನಡ ಸಾಹಿತ್ಯಲೆಡ್ ಕುಕ್ಕೆ ಭಕ್ತಿಗೀತಾ, ನಾಗರೂಪ ಕುಕ್ಕೆ ಸುಬ್ರಹ್ಮಣ್ಯ ಸುರುತ ಪಂತೆಡುಂತುಂಡು.
ಧರ್ಮಸ್ಥಳ ಅಮೃತವಾಣಿ, ಗೊರವನಹಳ್ಳಿ ಅಮೃತವಾಣಿ, ಸಂಕಷ್ಟಹರ ಅಮೃತವಾಣಿ, ಘಾಟಿ ಸುಬ್ರಹ್ಮಣ್ಯ ಅಮೃತವಾಣಿ, ಮಾಣಿಲ ಮಹಾಲಕ್ಷ್ಮೀ, ಪುತ್ತೂರು ಮಹಾಲಿಂಗೇಶ್ವರ ದೇವೆರೆ ಭಕ್ತಿಸುಗಿಪು ಸೇರಿನಂಚ ಸುಮಾರ್ ಭಕ್ತಿಗೀತೆಲೆನೊಟ್ಟುಗು ಹನುಮಾ ಲೈವ್ ಕ್ಯಾಸೆಟ್ಸ್‌ದಕ್ಲೆನ ಪಣೋಲಿಬೈಲು ಭಕ್ತಿಗೀತೆ, ಕೊರಗಜ್ಜನ ಭಕ್ತಿ ಸಾಹಿತ್ಯಲೆನ್ಲಾ ಬರೆತಿ ಶರತ್ ಬಿಳಿನೆಲೆ ಸುಮಾರ್ ಭಕ್ತಿಸುಗಿಪುಲೆಗ್ ಸೊರೊ ಕೊರ್ಪುನ ಒಟ್ಟುಡು ಭಕ್ತಿಗೀತೆಲೆಗ್ ಸಂಗೀತೊಲಾ ಕೋತ್‌ದೆರ್. ಸಾಹಿತ್ಯ ಕಟ್ಟುನೆನೇ ಅತ್ತಂದೆ ಭಕ್ತಿಗೀತಾಂಜಲಿ, ಶ್ರೀ ರಾಘವೇಂದ್ರ ಧರೆಗಿಳಿದ, ಗುರುಮಹಿಮಾ, ಕೈಲಾಸ ಗಿರಿವಾಸ, ಶಿವ ಲೋಕಾಮೃತ, ಶ್ರೀ ರಾಮಾನುಜ ಗೀತಮಾಲಿಕ, ಅಂಬಾ ಭವಾನಿ, ಜಗತ್ಪತೀಯ, ಅನಿಕೇತನ, ದಿವ್ಯ ದರ್ಶನ, ಶ್ರೀ ಹರಿಪಾದ, ಪಡುಮಲೆಯೊಡೆಯ ಭಕ್ತಿ ಗೀತಾಮೃತ, ಬಿಳಿನೆಲೆ ಭಕ್ತಿಗೀತೆಲ್, ದಾಸರ ಪದೊಕುಲು ಸೇರ್ನಂಚ ನೂದಿರ್ನೂದೆಡ್ದ್‌ಲಾ ಎಚ್ಚ ಭಕ್ತಿಗೀತೆಲೆಗ್ ಸಂಗೀತ ಸಂಯೋಜನೇ ಮಲ್ತ್, ಪದೊ ಪಂದ್ ಶರತ್ ಬಿಳಿನೆಲೆ ಭಕ್ತಿಸಂಗೀತ ಬೊಕ್ಕ ಭಕ್ತಿಸಾಹಿತ್ಯಡ್ ಮೇರುಶಿಖರದಂಚ ಮಾನ್ಯೆರುಡಲ್‌ಡ್ ತನ್ನ ಅಚ್ಚಿನ್ ಒತ್ತ್‌ದೆರ್.
ಭಕ್ತಿಸಾಹಿತ್ಯಗ್ ಮಾತ್ರ ತನನ್ ಒರಿಪವೊನಂದಿ ಶರತ್ ಬಿಳಿನೆಲೆ 90ನ ದಶಕಡ್ ಕನ್ನಡ ಚಲನಚಿತ್ರದ ಗೀತೆಲೆಗ್ ತುಳುಟು ಸಾಹಿತ್ಯ ಬರೆದ್ ‘ಮುಗುರು ತೆಲಿಕೆದ ಪೊಣ್ಣು’, ‘ಬೆಂಗ್ಳೂರುದ ಆಂಟಿ’, ‘ತುಳುನಾಡ್ ಎಂಕ್ ಮಲ್ಲೆ’ ದುಂಬಾಯಿ ಆಲ್ಬಮ್‌ಲೆಗ್ ಪುತ್ತೂರು ನರಸಿಂಹ ನಾಯಕ್, ಎಲ್.ಎನ್ ಶಾಸ್ತ್ರೀ, ಅಜಯ್ ವಾರಿಯರ್, ರಮೇಶ್ಚಂದ್ರ, ಡಾ. ಶಮಿತಾ ಮಲ್ನಾಡ್, ಸುಜಾತ ದತ್ತ್, ಚಂದ್ರಿಕಾ, ಸುರೇಖಾ ಸೇರಿನಂಚ ಒಂಜಾತ್ ಗಾಯಕೆರೆಡ ಪನ್ಪದ್ ಅಶ್ವಿನಿ ಆಡಿಯೋ ಕಂಪೆನಿಡ್ದ್ ರೆಕಾರ್ಡ್ ಮಲ್ಪದೆರ್. ಅಯಿಟ್ ತುಳುನಾಡ್ ಎಂಕ್ ಮಲ್ಲೆ, ಪಾರಿಜಾತ ಪೂವೆ ಆದ್ ಎನ್ನ ಬಾಲ್ವೆಡ್ ಬೈದನಾ, ಸಂಗಾತಿ ಈ ದಾಯೆ ದೂರ, ಪೊಣ್ಣೆ ಮರ್ಲ್ ಮಲ್ತನ, ಕೋರಿದ ರೊಟ್ಟಿ ಬೋಡ, ಓಲೆನ್ ಕನಪಿನ ಓ ಅಣ್ಣ, ದುಗ್ಗಮ್ಮಕ್ಕನ ಮಗೆ ದುಗ್ಗಪ್ಪೆ, ತುಳುನಾಡ ಅಟಿಲ್‌ದ ಕಮ್ಮೆನ, ಕಂಡನಿ ಇಲ್ಲದ ಸಿರಿದೇವಿ, ಪಜ್ಜೆದ ಮಿತ್ತ್ ಪಜ್ಜೆ ದೀದ್ ಬತ್ತೆ, ತೆಲಿತ್ತ್ ನಲಿತೊಂಡನಾ, ಆ ಬಾನೊಡೀರೆ, ಸಂಸಾರದ ಬೇನೆ, ಈ ಪೊಣ್ಣು ಈ ಮಣ್ಣ್ ಇಂಚಿನ ತುಳುವೆರೆ ಮನಸ್ ಇರ್ಮೆನ ಮಲ್ಪಿ ಪದೊಕ್ಲೆನ್ ಕಟ್ಟಿನಾರ್. ಒಟ್ಟುಡು ಮಿಮಿಕ್ರಿ ಕಲಾವಿದೆರ್ಲಾ ಆದಿಪ್ಪುನ ಇಂಬೆರ್ ಜೋಕ್ಲೆಗಾದ್ ಹನುಮಾ ಲೈವ್ ಕ್ಯಾಸೆಟ್ಸ್‌ದಕ್ಲ್ ಮಲ್ತಿನ ‘ಹಲೋ ಪುಟಾಣಿ’ ಪದೊಕ್ಲೆನ್ ಮಿಮಿಕ್ರಿ ಸೇರದ್ ಪನ್ನವೂ ಸೇರಿನಂಚ ಒಂಜಾತ್ ಕನ್ನಡ ಆಲ್ಬಮ್‌ಲೆಗ್ಲಾ ಸಾಹಿತ್ಯ ಬರೆದ್, ಪದ ಪನೊಂದಿತ್ತಿ ಶರತ್ ಬಿಳಿನೆಲೆನ ಕುಸಾಲ್ ದಿಂಜಿ ಪದೊಕುಲು ಆ ಕಾಲೊಡು ಬಾರೀ ಪುಗರ್ತೆನ್ ಪಡೆದಿತ್ತ್ಂಡ್.
ನಾಟಕ, ಗೀತನಾಟಕೊಲೆನ್ ಬರೆದ್ ನಿರ್ದೇಶನ ಮಲ್ತೊಂದಿತ್ತಿ ಶರತ್ ಬಿಳಿನೆಲೆ ‘ಶಬರಿಮಲೆ ಅಯ್ಯಪ್ಪ’, ‘ಶ್ರೀ ಗೋಪಾಲಕೃಷ್ಣ ವೈಭವ’ ನೃತ್ಯರೂಪಕ ಬರೆದ್, ಸಂಗೀತ ಕೋಪುನ ಒಟ್ಟುಡು ಬೆರಿ ಸಂಗೀತೊಲಾ ಕೊರ್ತೆರ್. ಆರ್ನ ಅಮ್ಮೆರ್ ಗೋರಾಕೆ ಕಡಬ ಬರೆತಿ ‘ಭಕ್ತ ಸುಧಾಮ’ ಗೀತಾನಾಟಕೊನು ನಿರ್ದೇಶನ ಮಲ್ಪುನ ಒಟ್ಟುಡು ಅಯಿಕ್ಕ್ ಹಿನ್ನಲೆ ಗಾಯಕೆರ್ ಆದ್ ತನ್ನ ಚಾತಿರ್ಪು ತೋಜದೆರ್. ಜೋಕ್ಲೆಗಾದ್ ಜಯಪ್ರಕಾಶ್ ಮೋಂಟಡ್ಕ ನಿರ್ದೇಶನ ಮಲ್ತಿ ‘ಮುಕ್ತದ್ವಾರ’ ನಾಟಕಗ್ ಸಂಗೀತ ಸಂಯೋಜನೆ ಮಲ್ತ್, ಪದೊ ಪನ್ತೆರ್. ದೂರದರ್ಶನ ಚಂದನದ ‘ಗೌತಮ ಬುದ್ಧ’ ನಾಟಕಗ್ ಸಂಗೀತ ಸಂಯೋಜನೆ ಮಲ್ತ್, ಪದೊ ಪನ್ತೆರ್. ಪತ್ತೆಡ್ದ್ ಎಚ್ಚ ತುಳು, ಕನ್ನಡ ನಾಟಕೊಲೆನ್ ನಿರ್ದೇಶನ ಮಲ್ಪುನೊಟ್ಟು ಸುಮಾರ್ ನಾಟಕೊಲೆಗ್ ಬೆರಿ ಸಂಗೀತಗಾರೆ ಆದ್ ಕೆಲಸ ಮಲ್ತಿ ಅನುಭವೊನು ತನ್ನ ನೆಂಪುದ ಸಂಚಿಡ್ ಕಟ್ಟೊಂದೆರ್.
ತನ್ನ 25ನೇ ಪ್ರಾಯೊಡು ಕೀನ್ಯಾ ದೇಶದ ಪ್ರಜೆಯಾದಿತ್ತಿ ಬಂಟ್ವಾಳ ನಂದಾವರ ಕುಟುಮೊದ ಪೊಣ್ಣು ವಿನಯ ರಾವ್‌ನ್ ಮದಿಮೆ ಆಯಿ ಶರತ್‌ಗ್ ಕವನ ರಾವ್ ಪನ್ಪಿ ಮಗಲ್ ಉಲ್ಲೆರ್. ಸಾಹಿತ್ಯ, ಸಂಗೀತ, ರಂಗನಿರ್ದೇಶನದ ಒಟ್ಟುಡು ಬೆನ್ನಿಡ್ಲಾ ಅನುಭವ ಇತ್ತಿ ಸಕಲಕಲಾವಲ್ಲಭ ಪನ್ಪವೊನ್ನಾರ್ ಅನಿವಾರ್ಯ ಕಾರಣಲೆಡ್ ಬೆಂಗಳೂರುದಂಚಿ ಮೋನೆ ಪಾಡ್ಯೆರ್. ಅಲ್ಪ ಸುಮಾರ್ ಸಂಘಟನೆಲೆಡ್ ಸಕ್ರಿಯ ಆದಿತ್ತಿ ಶರತ್ ಬಿಳಿನೆಲೆ ದಂಪತಿಲ್ ತುಳುವೆರೆ ಚಾವಡಿ (ರಿ) ಬೆಂಗಳೂರುದ ಸ್ಥಾಪಕ ಸದಸ್ಯರ್‌ಲಾ ಅಂದ್.
ಏಡ್ ಮುಟ್ಟಂದಿ ಸಪ್ಪಿಜ್ಜಿ ಪನ್ಪಿಲೆಕೊ ಹವ್ಯಾಸಿ ಯಕ್ಷಗಾನ ಕಲಾವಿದೆರ್ಲಾ ಆದಿಪ್ಪಿ ಶರತ್ ಬಿಳಿನೆಲೆ ದೇವಿಮಹಾತ್ಮೆದ ದೇವಿ, ಕಂಸವಧೆತ್ತ ಮಡ್ಯೊಲೆ, ಕೃಷ್ಣ ಲೀಲೆದ ವಿಜಯೆ, ಶಬರಿಮಲೆ ಕ್ಷೇತ್ರ ಮಹಾತ್ಮೆದ ಅಬ್ಬು-ಶೇಕು ಏಸೊಲೆನ್ ಮಾತ್ರ ಅತ್ತಂದೆ ಬೇತೆ ಬೇತೆ ಪ್ರಸಂಗೊಲೆಡ್ ಹಾಸ್ಯ ಏಸೊ ಬೊಕ್ಕ ಸಿರಿಯೇಸೊಲೆನ್ ಪೊರ್ಲುಡು ಮಲ್ತೊಂದು, ಕೊರ್ನ ಏಸೊಗು ನ್ಯಾಯ ಒದಗವುನ ಒಟ್ಟುಗು ಕಲಾರಸಿಕೆರೆ ಮೆಚ್ಚುಗೆನ್ ಪುಗೆಲೇರವೊಂದಿತ್ತೆರ್.
ಬೆಂಗಳೂರುದ ಮಹಾನಗರಿ ಶರತ್ ಬಿಳಿನೆಲೆನ ಬದ್ಕ್ ಬದಲ್ಪೆರೆ ಕಾತೊಂದು ಇತ್ತ್ಂಡ ಪನ್ಪಿಲೆಕೊ ಸಾಹಿತ್ಯಡ್ ಪುದರ್ ಮಲ್ತಿತ್ತಿ ಆರೆನ್ ಚಂದನವನ ಕೈಬೀಜಿದ್ ಲೆತ್ತಿಲೆಕೊ ಸಿನಿಮಾರಂಗಡ್ ಬೆನ್ಪಿನ ಅವ್ಕಾಸೊ ಒದಗ್ಂಡ್. ಸಾಯಿಪ್ರಕಾಶ್ ಬೊಕ್ಕ ಡೈಲಾಗ್ ಕಿಂಗ್ ಸಾಯಿಕುಮಾರ್ ಮಾರ್ಗದರ್ಶನಡ್ ಮಳೆಗಾಲ, ಶೋಧ, ನಾಂದಿ, ಕಲಾತ್ಮಕ ಸಿನೆಮಾ ಆಯಿನ ನವಿಲೇ ಓ ನವಿಲೇ ಪಿಚ್ಚರ್‌ಲೆಗ್ ಸಹಾಯಕ ನಿರ್ದೇಶಕೆರಾದ್ ಬೇಲೆ ಮಲ್ತೊಂದಿತ್ತಿ ಶರತ್ ಬಿಳಿನೆಲೆ ದುಂಬುಗು ಸಾಯಿಕುಮಾರ್ ಅಭಿನಯದ ‘ನೀನೇನಾ ಭಗವಂತ’, ತುಷಾರ್ ಗೌಡ ಅಭಿನಯದ ‘ಓಂ ಶರಣಮಯ್ಯಪ್ಪ’, ಶ್ರೇಯಾ ಅಭಿನಯದ ‘ಸೀತಾನದಿ’, ಬಿರಾದಾರ್ ಅಭಿನಯದ ‘ಧಾಂಗಡಿ’, ರತ್ನಮಾಲ ನಿರ್ಮಾಣ ಬೊಕ್ಕ ಅಭಿನಯದ ‘ಅವಳು ಮತ್ತು ಪ್ರಕೃತಿ’ ಪನ್ಪಿ ಸಿನೆಮಾಲೆನ್ ನಿರ್ದೇಶನ ಮಲ್ತೆರ್. ಕಾರ್ಕಳದ ಶಾಸಕೆರ್ ಅಂಚನೇ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆದ ಮಾಜಿ ಸಚೀವೆರ್ ಸುನಿಲ್ ಕುಮಾರ್ ಅಭಿನಯ ಮಲ್ತಿ ಇಂಬೆರ್ ನಿರ್ದೇಶನ ಮಲ್ತಿ ಸೀತಾನದಿ ಸಿನೆಮಾದ ನಿಲೆಟ್ ಯೂಟರ್ನ್ ನಿರ್ದೇಶಕೆ ಪವನ್ ಕುಮಾರ್, ಗೋಧಿ ಮೈಬಣ್ಣ ಸಾಧಾರಣ ಮೈಕಟ್ಟು ನಿರ್ದೇಶಕೆ ಹೇಮಂತ್ ಕುಮಾರ್, ಚೌಕಾಬಾರ ನಿರ್ದೇಶಕೆ ರಘು ಶಿವಮೊಗ್ಗ, ರಾಮ ರಾವಣ ನಿರ್ದೇಶಕೆ ಸತ್ಯಪ್ರಕಾಶ್, ಈರೇಗೌಡ ಪ್ರಕಾಶ್ ರೈ ಬೊಕ್ಕ ಯೋಗರಾಜ್ ಭಟ್ರೆನೊಟ್ಟುಗು ಬೆಸ್ಟ್ ಮೂವೀಸ್ ಪನ್ಪಿ ಮಿತ್ತರ್ಮೆ ಪಟ್ಟೊಂದೆರ್. ‘ಅವಳು ಮತ್ತು ಪ್ರಕೃತಿ’ ಸಿನೆಮಾ ನವಕರ್ನಾಟಕ ಚಲನಚಿತ್ರ ಅಕಾಡೆಮಿ (ರಿ)ದ ಕರ್ನಾಟಕ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವ 2022ಡ್ ಬೆಸ್ಟ್ ಎನ್ವಯರ್ಮೆಂಟ್ ರಾಜ್ಯ ಪ್ರಶಸ್ತಿ ಪಡೆವೊಂದ್ಂಡ್.
ರಂಗನಟನೆ, ಯಕ್ಷಗಾನೊನೇ ಅತ್ತಂದೆ ಮಳೆಗಾಲ, ನಾಂದಿ, ಶೋಧ, ಮಲೆನಾಡ ಪ್ರೇಮಕಥೆ, ಕಾನನ, ತೀರ್ಪು, ಕಡಲ್ಗಳ್ಳರು ಪನ್ಪಿ ಕನ್ನಡ ಬೊಕ್ಕ ಆರವಿ ಪನ್ಪಿ ತಮಿಳು ಸಿನೆಮಾಲೆಡ್ ಪೋಷಕಪಾತ್ರಲೆಡ್ ನಟನೆ ಮಲ್ತಿ ಶರತ್ ಕುಮಾರ್ ಕನ್ಯಾದಾನ, ವಾತ್ಸಲ್ಯ, ಎಲ್ಲಾ ಮರೆತಿರುವಾಗ, ಶಿವಲೀಲಾಮೃತ, ಅಕ್ಕಪಕ್ಕ ಧಾರವಾಹಿಲೆಡ್ ಬೊಕ್ಕ ಝೇಂಕಾರ್ ಆಡಿಯೋದ ಸುಮಾರ್ ಆಲ್ಬಂಲೆಡ್ ಆಕ್ಟ್ ಮಲ್ತ್‌ದೆರ್. ಜುಗ್ಗ ಸ್ವಾಮಿ ಜುಗ್ಗ, ಫ್ರೆಂಡ್ಶಿಪ್ ದ ಟ್ರುತ್, ನಗೆಯಲೋಕ ಸೇರಿನಂಚ ಸುಮಾರ್ ಟೆಲಿಫಿಲ್ಮ್‌ಲೆನ್ ನಿರ್ದೇಶನ ಮಲ್ಪುನ ಒಟ್ಟುಡು ಸುಮಾರ್ ಸಾಕ್ಷ್ಯಚಿತ್ರಲೆನ್ಲಾ ನಿರ್ದೇಶನ ಮಲ್ದೆರ್. ಶಿರಡಿ ಸಾಯಿಬಾಬಾನ ಭಕ್ತೆ ಆಯಿನ ಶರತ್ ಶಿರಡಿ ಶ್ರೀ ಸಾಯಿಬಾಬಾ ಧಾರಾವಾಹಿ ನಿರ್ದೇಶನ ಮಲ್ದೆರ್. ಗ್ರಾಫಿಕ್ ಡಿಸೈನರ್ ಬೊಕ್ಕ ಸೃಜನಾತ್ಮಕ ನಿರ್ದೇಶಕೆರಾಯಿನ ಇಂಬೆರ್ ಹಾಸನದ ಅಮೋಘ ಚಾನೆಲ್‌ಗ್ ಸುಮಾರ್ ಜಾಹಿರಾತು ಮಲ್ತ್ ಕೊರ್ಪುನ ಒಟ್ಟುಡು ಅವೆನ್ನ್ ನಿರ್ದೇಶನಲಾ ಮಲ್ದೆರ್.
ಬಾನೊಗು ರಾಪಿ ಗರುಡೆ ತನ್ನ ಈಡ್‌ದ ಒಟ್ಟುಡು ತನ್ನ ಮೂಲೊನ್ಲಾ ಮರಪ್ಪಂದಿಲೆಕೊ ಸ್ಯಾಂಡಲ್‌ವುಡ್ ಸಿನೆಮಾ ಬೊಕ್ಕ ಧಾರಾವಾಹಿ ನಿರ್ದೇಶನನೇ ಅತ್ತಂದೆ ತನ್ನ ಮೋಕೆದ ಸಂಗೀತನ್ ಮದಪ್ಪಂದೆ ಸಂಗೀತ ನಿರ್ದೇಶನಲಾ ಮಲ್ತೊಂದು ದುಂಬು ಪೋಯೆರ್. ಶಿರಡಿ ಸಾಯಿಬಾಬಾನ ಮಿತ್ತ್ ಮಲ್ಲ ಭಕ್ತಿ ದಿಂಜಿ ಉಡಲ ಶರತ್ ಬಿಳಿನೆಲೆ ಸಂಗೀತ ನಿರ್ದೇಶನ ಮಲ್ತಿ ಮೈಲಾರ ಸ್ವಾಮಿ ಬರೆತಿ ‘ದ್ವಾರಕಾಮಾಯಿ ಶ್ರೀ ಶಿರಡಿ ಸಾಯಿ’ ಪನ್ಪಿ ಆಲ್ಬಂನ್ ಭಾರತಡ್ ಗಾಯಕೆರಾದ್ ಮಲ್ಲ ಪುದರ್ ಮಲ್ತಿ ಸಂಗೀತ ದಿಗ್ಗಜ್ಜೆರಾಯಿನ ಡಾ. ಎಸ್ ಪಿ ಬಾಲಸುಬ್ರಹ್ಮಣ್ಯಂ ತೆಲುಗುಡು ಅಂಚನೇ ಡಾ ರಮೇಶ್ಚಂದ್ರೆರ್ ಕನ್ನಡಡ್ ಪನ್ತೆರ್. ಹಿರಿತೆರೆ ಕಿರುತೆರೆ ನಟಿ ಮುನಿರತ್ನ (ರತ್ನಮಾಲ) ಮಲ್ತಿ ಸಾಹಸಿ ಮಕ್ಕಳು ಸಿನೇಮಾಗ್ ಸಂಗೀತ ನಿರ್ದೇಶನ ಮಲ್ತಿ ಶರತ್ ಬಿಳಿನೆಲೆ ತನ್ನ ಕೆಲವು ಚಿತ್ರೊಲೆಗ್ ಚಿತ್ರಕಥೆ, ಸಾಹಿತ್ಯದ ಒಟ್ಟುಡು ಸಂಗೀತ ಸಂಯೋಜನೆಲಾ ಮಲ್ದೆರ್.
ಅನುಷಾಅನುರಾಗ ಯೂಟ್ಯೂಬ್ ಚಾನೆಲ್‌ಗ್ ಕಬಿ ಬಿ.ಎನ್ ಗೋಪಾಲಕೃಷ್ಣ ರಾವ್‌ನ ಸಾಹಿತ್ಯಲೆಡ್ ರಮೇಶ್ಚಂದ್ರೆರ್ ಪದೊ ಪಂಡಿ ಸೂರ್ಯಾಸ್ತಮ, ಅಜಯ್ ವಾರಿಯರ್ ಪದೊ ಪನ್ತಿ ಜೀವನವು ಸಾಗುತ್ತಿದೆ, ರಾಜೇಶ್‌ಕೃಷ್ಣನ್ ಸೊರೊತ್ತ ಶಿವಪೂಜೆ, ಸರಿಗಮಪ ಖ್ಯಾತಿದ ತನುಶ್ರೀ ರಾವ್ ಮಂಗಳೂರು ಪಂಡಿ ಕವಿ, ಸಂತೋಷ್ ವೆಂಕಿ ಪಂಡಿ ನಲ್ಲೆಗೆ, ಅನುರಾಧ ಭಟ್ ಪನ್ತಿನ ಕೊಳಲಕೃಷ್ಣ, ಎಂ.ಡಿ ಪಲ್ಲವಿ ಪದೊ ಪನ್ತಿನ ತಾಯಿ ಪನ್ಪಿ ಕನ್ನಡ ಬೊಕ್ಕ ಸಂತೋಷ್ ವೆಂಕಿ ಸೊರೊತ್ತ ಪ್ರಿಯುಡು, ಅನುರಾಧ ಭಟ್ ಸೊರೊಟು ಕವಿ ಬೊಕ್ಕ ವೇಣು ಕೃಷ್ಣುಡು ತೆಲುಗು ಆಲ್ಬಮ್ ನಿರ್ದೇಶನ ಮಲ್ತ್, ಸಂಗೀತ ಕೋತ್‌ದೆರ್. ಈ ಆಲ್ಬಮ್‌ಲೆಡ್ ಎಚ್ಚಿನೆಕ್ ಬಿಸ-2022 (ಬೆಂಗಳೂರು ಇಂಡಿಪೆಂಡೆಂಟ್ ಸ್ಟಾರ್ ಅವಾರ್ಡ್ 2022) ಅವಾರ್ಡ್ ಬೈದ್ಂಡ್. ನಲ್ಲೆಗೆ ಆಲ್ಬಮ್ ಬೆಸ್ಟ್ ಆಲ್ಬಮ್ ಸಾಂಗ್ ಅವಾರ್ಡ್, ಬೆಸ್ಟ್ ಫಿಮೇಲ್ ಸಿಂಗರ್ ಅವಾರ್ಡ್ ಕೊಳಲ ಕೃಷ್ಣ ಆಲ್ಬಮ್‌ಗ್ ಸೊರೊ ಕೊರ್ತಿ ಅನುರಾಧ ಭಟ್‌ಗ್, ಬೆಸ್ಟ್ ಮೇಲ್ ಸಿಂಗರ್ ಅವಾರ್ಡ್ ಶಿವಪೂಜೆ ಪದ ಪಂಡಿ ರಾಜೇಶ್‌ಕೃಷ್ಣೆರೆಗ್ ತಿಕುನ ಒಟ್ಟುಡು ಬೆಸ್ಟ್ ಆಲ್ಬಮ್ ಸಾಂಗ್ ಡೈರೆಕ್ಟರ್ ಅವಾರ್ಡ್ ಶರತ್ ಬಿಳಿನೆಲೆರೆ ಮಟ್ಟೆಲ್ ಸೇರ್ದ್ಂಡ್.
ಶ್ರೀ ಶಕ್ತಿಪೀಠಮ್ ಬಾಯಾರುದ ಶ್ರೀ ದುರ್ಗಾಮಹಾಕಾಳಿ ಸಹಸ್ರನಾಮಾವಳಿ, ಬಲ್ಪ ತ್ರಿಶೂಲಿನಿ ದೇವಾಲ್ಯೊದ ಕನ್ನಡ ಶತನಾಮಾವಳಿ, ಪಡುಮಲೆಯೊಡೆಯ ತ್ರಿಭಾಷಾ (ತುಳು-ಕನ್ನಡ-ಸಂಸ್ಕೃತ) ಶತನಾಮಾವಳಿಲೆಗ್ ಬೊಕ್ಕ ಅಲ್ತ ಭಕ್ತಿ ಸುಗಿಪುಲೆಗ್ ಸಂಗೀತ ನಿರ್ದೇಶನದ ಒಟ್ಟುಡು ತನ್ನ ಸ್ವರಲಾಲಿತ್ಯೊನು ಕೋತಿ ಶರತ್ ಬಿಳಿನೆಲೆ ‘ಬಿರ್ಸೆ’ ತುಳು ಸಿನಿಮಾಗ್ ರಡ್ಡ್ ಸಾಹಿತ್ಯ ಬರೆಪುನ ಒಟ್ಟುಡು ಕೋಸ್ಟಲ್‌ವುಡ್‌ಡ್ಲಾ ತನ್ನ ಪಜ್ಜೆ ಊರ್ದೆರ್. ಅತ್ತಂದೆ ಕೆಲವು ತುಳು ಸಿನಿಮಾಲೆಗ್ಲಾ ಚಿತ್ರಕಥೆ ಬರೆಯೆರೆ ಮಾರ್ಗದರ್ಶನ ಮಲ್ದೆರ್.
ಪಂತೊಲೆಗ್ ನಿರ್ಣಾಯಕೆರಾದ್ ಪೋವೊಂದಿತ್ತಿ ಶರತ್ ಬಿಳಿನೆಲೆ ಸುಮಾರ್ ಪ್ರತಿಭಾಕಾರಂಜಿ, ಜಿಲ್ಲಾ ಯುವಜನ ಮತ್ತು ಕ್ರೀಡಾ ಇಲಾಖೆದ ಯುವಜನ ಮೇಳಲ್, ನಾಟಕ ಪಂತೊ, ಯಕ್ಷಗಾನ ಪಂತೊ, ಸಂಗೀತ, ಸಾಹಿತ್ಯೊಲೆನ, ಬೇತೆ ಬೇತೆ ಯೋಜನೆಲೆಗ್ ಸಾಂಸ್ಕೃತಿಕ ಪಂತೊಲೆನ ವಲಯ ಮಟ್ಟ, ತಾಲೂಕು ಮಟ್ಟ, ಜಿಲ್ಲಾ ಮಟ್ಟ, ವಿಭಾಗೀಯ ಬೊಕ್ಕ ರಾಜ್ಯಮಟ್ಟದ ಪಂತೊಲೆಗ್ ತೀರ್ಪುಗಾರೆರಾದ್ ಉತ್ತಮ ತೀರ್ಪುಗಾರೆರ್ ಪನ್ಪಿ ಪುಗರ್ತೆನ್ಲಾ ಪಡೆವೊಂದೆರ್. ಒಟ್ಟುಗು ಕೇಂಡಿನಕ್ಲೆಗ್ ಭಾಷಣ ಬರೆದ್ ಕೊರ್ಪುನು, ಲೇಸ್ ಸುದಾರಿಕೆಗ್ ಮಾರ್ಗದರ್ಶನ ಮಲ್ಪುನು, ಚಿತ್ರಕಥೆ – ಸಂಭಾಷಣೆ ಬರೆದ್ ಕೊರೊಂದಿತ್ತಿ ಶರತ್ ಬಿಲಿನೆಲೆ ಬರೆತಿ ಸಾಹಿತ್ಯೊಲು ಆರ್ನ ಪುದರ್‌ಡ್ದೆಚ್ಚ ಬೇತೆಕ್ಲೆನ ಪುದರ್‌ಡ್ ಪಸರೊಂದಿತ್ತಿನನೇ ಅತ್ತಂದೆ ಇತ್ತೆಲಾ ಪುದರ್‌ದಾಂತೆನೆ ಪಸರುನೆನ್ ತೂನಗ ಶರತ್ ಬಿಳಿನೆಲೆ ಒಂಜಿ ತತ್ವ ಆದರ್ಶ ದೀವೊಂಡಲಾ, ಪುದರ್ ಮಲ್ಪೊಡು, ದುಡ್ಡು ಮಲ್ಪೊಡು ಪಂದ್ ಬಯಕಿನಾರತ್ತ್. ಅತ್ತಂದೆ ಪುದರ್‌ದ ಬೆರಿಯೆ ಬಲಿತ್ತಿನಾರತ್ತ್ ಪಂದ್ ಸೊಸ್ಟ ಆಪುಂಡು.
ಸಾಹಸ ಸಿಂಹ ವಿಷ್ಣುವರ್ಧನ್, ಸಂಚಾರಿ ವಿಜಯ್, ಬ್ಯಾಂಕ್ ಜನಾರ್ಧನ್, ಹೊನ್ನವಳ್ಳಿ ಕೃಷ್ಣ, ಪೃಥ್ವಿ ಅಂಬರ್, ಗುರುಕಿರಣ್, ದಿಯಾ ಖ್ಯಾತಿದ ದೀಕ್ಷಿತ್, ಸುಧಾರಾಣಿ, ರೇಖಾದಾಸ್, ಎಮ್ ಎನ್ ಸುರೇಶ್, ಮಿಮಿಕ್ರಿ ದಯಾನಂದ್, ರತ್ನಮಾಲ, ದಿಲೀಪ್ ರಾಜ್‌, ವಿಜಯ್ ಕುಮಾರ್ ಕೊಡಿಯಾಲ್‌ಬೈಲ್, ಟಿ ಶಕುಂತಲಾ ಶೆಟ್ಟಿ ಬೊಕ್ಕ ಸಾಯಿಕುಮಾರ್ ಕುಟುಮೊದ ಕೈತಲ್‌ದ ಒಡನಾಟ ಇಪ್ಪುನ ಶರತ್ ಬಿಳಿನೆಲೆ ಸಿನೆಮಾ ರಂಗದ ಬೊಕ್ಕ ಸಾಮಾಜಿಕ ರಂಗದ ಮಲ್ಲ ದಿಗ್ಗಜರೆನೊಟ್ಟು ಕೆಲಸ ಮಲ್ತಿ ಅನುಭವಿ.
ಕೊರೋನಾದ ಅಟ್ಟಹಾಸ ಬೊಕ್ಕ ಆಯಿನ ಒಂಜಿ ಆಕ್ಸಿಡೆಂಟ್ ಶರತ್ ಬಿಳಿನೆಲೆನ ಬಿರ್ಸ್‌ಗ್ ಒಂತೆಮಟ್ಟ್‌ಗ್ ಕಟ್ಟ್ ಪಾಡ್ದ್, ಸಡಿತ್ತ್ ಉಂತ್ ಚಿತ್ರರಂಗಡ್ದ್ ಪಿದಯಿ ಉಂತುಲೇಕ ಮಲ್ತ್ಂಡ್ ಪಂದ್ ತೋಜಿಂಡಲಾ, ಆರ್ನ ಸಂಗೀತದ ಪಾಂಡಿತ್ಯಗ್ ಅಡ್ಡಿ ಮಲ್ಪುನಲ್ಪ ಅವುಲಾ ಸೋತ್ ಪೋಂಡು. ಪಲಯೆ ಶಶಿ ಗಿರಿವನರೆನ ಕಡಬ ನಾಲೂರುದ ಗಿರಿವನ ಮ್ಯೂಸಿಕ್ ಸ್ಟುಡಿಯೋಡು ಒಂಜಾತ್ ಪದೊಕ್ಕುಲೆಗ್ ಸೊರೊ ಕೊರಿ ಶರತ್ ಬಿಳಿನೆಲೆ ತಾನೇ ಒಂಜಾತ್ ಸಾಹಿತ್ಯ ಬರೆವೊಂದು, ಶಶಿ ಗಿರಿವನರೆನ ಸಾಹಿತ್ಯದ ಒಟ್ಟುಡು ಬೇತೆ ಸಾಹಿತಿಲೆನ ಬರವುಲೆಗ್ಲಾ ಸೊರೊತ್ತೊರುಟು ಜೂವೊ ಕೊರ್ದ್ ಪದೊತ್ತ ಸಬಿ ಪಟ್ಟಿಯೆರ್. ಸುಮಾರ್ ಭಕ್ತಿಗೀತೆ, ಭಾವಗೀತೆಲೆಗ್ ಸಂಗೀತ ಬೊಕ್ಕ ಸೊರೊ ಕೊರ್ದ್, ಆಲ್ಬಮ್ ಸಾಂಗ್‌ಲೆನ್ ನಿರ್ದೇಶನ ಮಲ್ಪುನ ಒರುಟು ತನ್ನ ಜೀವಂತಿಕೆ ತೋಜವೊಂದು ಕೋಟಿಗಾಯನದಂಚಿ ಮಿತ್ತರ್ಮೆಡ್ಲಾ ಪಾಲ್ ಪಡೆವೊಂದು ಜನಮನ್ನಣೆ ಪಡೆಯೆರ್.
ಒಂತೆ ಬಚ್ಚೆಲರಪಾದ್ ಮೈ ಕುಡ್ತ್ ಲಕ್ಕಿ ಶರತ್ ಬಿಳಿನೆಲೆ ಪ್ರಸ್ತುತ ಮೈಸೂರುದ ಎಸ್.ಪಿ ಕೃಷ್ಣಪ್ಪೆರ್ನ ‘ರಾಗಿಗುಡ್ಡ’ ಕನ್ನಡ ಸಿನೆಮಾದ ಸಂಗೀತ ನಿರ್ದೇಶನ ಮಲ್ಪುನೆನ ಒಟ್ಟುಡು ‘ದೇಶಪ್ರೇಮದ ಕಿಡಿ ಗಂಗೂಬಾಯಿ’ ಪನ್ಪಿ ರೂಪಕಗ್ ಸಂಗೀತ ಸಂಯೋಜನೆ ಬೊಕ್ಕ ಬೆರಿಸಂಗೀತ ಕೊರ್ಪಿ ಅಟ್ಟಣೆಡುಲ್ಲೆರ್. ಒಂಜಾತ್ ಭಕ್ತಿಪ್ರಧಾನ, ಭಯಾನಕ, ಪ್ರೇಮಕತೆಕ್ಲೆ ಕತೆತ್ತ ಕನ್ನಡ, ತುಳು, ಅರೆಭಾಷೆ ಸೇರ್ನಂಚ ಬೇತೆ ಬೇತೆ ಬಾಸೆಲೆನ ಕತೆಕ್ಲೆನ್ ಕೈಟ್ ಪತೊಂದು, ಪೊಸ ಯೋಜನೆಲೆಗ್ ನಿರ್ಮಾಪಕೆರೆ ನಾಡ್ಪಾಟೊಡುಲ್ಲೆರ್.
ದಿಂಜಿ ಕೊಡಪಾನ ಅಲೆಂಚುಜಿ ಪನ್ಪಿನಂಚನೇ ಸರ್ವ ಛಾತಿರ್ಪು ತನ್ನೊಲಯಿ ಇಪ್ಪುನ ಶರತ್ ಬಿಳಿನೆಲೆ ತೂಪುನಕ್ಲೆಗ್ ಸರಳತೆದ ಸಾಕಾರ ಮೂರ್ತಿ. ಲೆಕ್ಕೊದ ಪಾತೆರದೊಟ್ಟು ಒಂಜಾತ್ ಗಾಂಭೀರ್ಯ, ಮಾತೆರೆನೊಟ್ಟು ಬಿರಾದ್ ಪೋಪಿ ಗುಣ, ತೆರಿಯಂದಿನೆನ್ ತೆರಿಯೊನುನ ಅಂಗಲಾಪು, ತೆರಿನೆನ್ ಬೇತೆಕ್ಲೆಗ್ ಕಲ್ಪವುನಲ್ಪದ ಸೌಜನ್ಯ, ತಿಕಿನೆಡ್ ತೃಪ್ತಿ ಪಡೆಪಿನೊಟ್ಟು ಬೇನೆ ಮಲ್ತಿನಕ್ಲೆನ್ಲಾ ಮಾಪು ಮಲ್ತ್, ಅಗತ್ಯ ಇಪ್ಪುನಕ್ಲೆಗ್ ಸಕಾಯ ಮಲ್ಪಿ ಉದಾರತೆ, ಭೂಮಿ ತೂಕದ ತಾಳ್ಮೆಯದ ಶರತ್ ತನಡ ಇತ್ತಿನೆನ್ ಬೇತೆಕ್ಲೆಗ್ ಕೊರ್ದ್ ಮನಿಪಂದೆ ಕುಲ್ಲುನ ಮಹಾನುಭಾವೆ. ಬೇಡ್‌ದ್ ತಿಂಡಲಾ ಅಡ್ಡಿಜ್ಜಿ ಕುಡೊರ್ಯನ ಮಂಡೆ ಹಾಕ್‌ದ್ ಬದ್ಕೆರೆ ಬಲ್ಲಿ ಪಂದ್ ಬುದ್ದಿ ಪನೊಂದು, ಸಜ್ಜನಿಕೆದ ಬದ್ಕ್ ನಡಪಾಪಿ ಕಡಬ, ಬಿಳಿನೆಲೆತ್ತ ಸಂಗೀತ ಸಾಮ್ರಾಟೆ, ತುಳುವ ಮಣ್ಣ ಮಾಣಿಕ್ಯೊದ ಬದ್ಕ್ ಬಂಗಾರಾವಡ್. ತನ್ನ ಜೀವನನ್ ಸಂಗೀತ, ಸಾಹಿತ್ಯ, ಕಲೆ, ನಟನೆ, ನಿರ್ದೇಶನಗ್ ಕೊರ್ನ ಕಲಾಕುಸುಮ ಸರಳ ಸಜ್ಜನಿಕೆದ ಸಾಕಾರಮೂರ್ತಿನ್ ನನ ದುಂಬುದ ದಿನೊಕ್ಲೆಗ್ಲಾ ಭಾಗ್ಯಲಕ್ಷ್ಮಿ ಕೈ ಪತ್ತ್, ಕೈಟಿಪ್ಪುನ ಯೋಜನೆಲೆನ್ ಮಾತ ಗೆಲ್ಮೆದಂಚಿ ಕೊನೊವಡ್. ಆರ್ನ ಆರಾಧ್ಯ ಮೂರ್ತಿಯಾಯಿನ ಕುಕ್ಕೆದುಲ್ಲಾಯೆ, ಶಬರಿಮಲೆ ಅಯ್ಯಪ್ಪ ಸ್ವಾಮಿ, ಚಾಮುಂಡೇಶ್ವರಿ, ಶಿರ್ಡಿ ಸಾಯಿಬಾಬಾ ಬೊಕ್ಕ ಜ್ಯೋತಿರ್ಮಾತೃ ಸ್ವರೂಪಿಣಿ ಬದ್ಕ್ ಬೆಳಗಾವಡ್ ಪನ್ಪಿ ದುನಿಪುದೊಟ್ಟು ಬದ್ಕ್‌ದ ಪಂಚ ದಶಕಲೆನ್ ಮುಗಿತ್ ದುಂಬುಗು ಪಜ್ಜೆ ದೀವೊಂದುಪ್ಪುನ ಶರತ್ ಬಿಳಿನೆಲೆನ ದುಂಬುದ ಬದ್ಕ್‌ಗ್ ಸಮಸ್ತ ಕಲಾಭಿಮಾನಿಲೆನ ಪರವಾದ್ ಎಡ್ಡೆಪುದ ಮದಿಪುಲು.
- ಶ್ರೀಶಾವಾಸವಿ ತುಳುನಾಡ್
by 