ತುಳುಕೂಟ ಉಡುಪಿ(ರಿ) ಬೊಕ್ಕ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಹಯೋಗಡ್ ಜುಲೈ 16 ತಾರೀಕುದಾನಿ ನಡತಿನ “ಮದರಂಗಿದರಂಗ್” ಲೇಸ್ ಡ್ ಶಿಕ್ಷಕಿ,ಸಾಹಿತಿ,ತುಲುಟ್ ಬೂಕು ಬರೆಯಿನ ಶ್ರೀಮತಿ ವಾಸಂತಿ ಅಂಬಲಪಾಡಿ ಮೆರೆಗ್ ತುಳುಕೂಟದ ವತಿಡ್ದ್ ಮಾನಾದಿಗೆ ನಡತುಂಡ್.
ಉಡುಪಿದ ಸೈಂಟ್ ಸಿಸಿಲಿ ಪದವಿ ಪೂರ್ವ ಕಾಲೇಜ್ ಡ್ ಕನ್ನಡ ಉಪನ್ಯಾಸಕಿ. ಕನ್ನಡ , ತುಳು ಭಾಷೆಡ್ ಸಾಹಿತ್ಯ ರಚನೆ . 2018 ಡ್ ಉಡುಪಿ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ. ಪಿಯುಸಿಡ್ ಇಪ್ಪನಗನೇ ಸಾಹಿತ್ಯದ ಆಸಕ್ತಿ. ವಿದ್ಯಾರ್ಥಿ ಜೀವನೊಡೇ ಕುಂದಾಪುರ ದ ಭಂಡಾರ್ಕಾರ್ಸ್ ಕಾಲೇಜಿಡ್ ನಡತಿನ ವಿದ್ಯಾರ್ಥಿ ಸಾಹಿತ್ಯ ಸಮ್ಮೇಳನದ ಕಥಾಗೋಷ್ಠಿದ ಗುರ್ಕಾರ್ಮೆ..ರಡ್ಡನೇ ಪಿಯುಸಿಡ್ ಇಪ್ಪನಗ ತೂಟೆ ಪತ್ರಿಕೆದಕುಲು ಆಯೋಜನೆ ಮಲ್ದಿನ ತುಳು ಕಥಾ ಪಂತೊಡ್ ರಡ್ಡನೇ ರಡ್ಡನೇತ್ತ .ಅಂಚೆನೇ ಕಥೆ ಕವನ ಪಂತೊಡ್ ಸುರುತ್ತ , ರಡ್ಡನೇ ಇನಾಮು ತಿಕ್ಕುದುಂಡ್.ಒಟ್ಟು ಒರುಂಭ ಕೃತಿಕುಲು ಪ್ರಕಟ ಆತುಂಡ್. ಇರ್ನೂದೆದ ಒಂಜಿ ನೋಟು ಪನ್ಪಿನ ಕಥಾ ಸಂಕಲನ ಬೊಕ್ಕ ಪಿಜಿನ್ ದ ಬಾಸೆ ನಿಗಲೆಗ್ ತೆರಿಯುಂಡಾ ಪನ್ಪಿನ ತುಳು ಕವನ ಸಂಕಲನ ಸೇರಿನಂಚ ಕನ್ನಡ ಭಾಷೆಡ್ ಆಧುನಿಕ ವಚನೊಲೆನ ಸಂಕಲನ, ಅಬಾಬಿ ಸಂಕಲನ, ಕವನ ಬೊಕ್ಕ ಕಥಾ ಸಂಕಲನ ಪ್ರಕಟ ಆತುಂಡ್.ಮಂಗಳೂರು ವಿಶ್ವ ವಿದ್ಯಾಲಯದ ರಡ್ಡನೇ ಬಿ.ಎ ದ ಕನ್ನಡ ಪಠ್ಯ ಪುಸ್ತಕಡ್ ” ಮೋಂಬತ್ತಿ ಉರಿಸಿ ಕಾಯುತ್ತಿದ್ದೇವೆ ” ಪನ್ಪಿನ ಕವನ ಸಂಕಲನ ಸೇರ್ಪಡೆಯಾತುಂಡ್.
ಮಸ್ತ್ ಸಾಹಿತ್ಯ ಸಂಘಟನೆಡ್ ತೊಡಗಿಸಾವೊಂದ್, ಮಸ್ತ್ ಪ್ರಶಸ್ತಿ, ಮಾನಾದಿಗೆ.ಕೆಲವ್ ಪತ್ರಿಕೆಲೆಡ್ ಕಥೆ ಕವನ ಪ್ರಕಟ, ಮಂಗಳೂರು ಆಕಾಶವಾಣಿಡ್ ಬೊಕ್ಕ ಮಣಿಪಾಲದ ರೇಡಿಯೋಡ್ ಕನ್ನಡ ತುಳು ಕಥೆ ಕವನ ಭಾಷಣ, ಸಂದರ್ಶನೊಲು ಪ್ರಸಾರ ಆತುಂಡ್. ಮಸ್ತ್ ಸಾಹಿತ್ಯ ಸಮ್ಮೇಳನಡ್ ಕಥೆ ಕವನಲೆನ ವಾಚನ ಬೊಕ್ಕ ಕಥಾ ಬೊಕ್ಕ ಕವಿಗೋಷ್ಠಿಲೆಡ್ ಅಧ್ಯಕ್ಷತೆ. ಉಡುಪಿ ಚಾನೆಲ್, ಡೈಜಿವರ್ಲ್ಡ್, ಸ್ಪಂದನ ಚಾನೆಲ್ ಡ್ ಸಂದರ್ಶನ ಪ್ರಸಾರ ಆತುಂಡ್.. ಯೂಟ್ಯೂಬ್ ಲೆಡ್ ಕಥೆ ಕವನ ವಾಚನ ಬೊಕ್ಕ ವಿದ್ಯಾರ್ಥಿಲೆಗ್ ವ್ಯಕ್ತಿತ್ವ ವಿಕಸನದ ವಿಡಿಯೋ ಬೊಕ್ಕ ಶೈಕ್ಷಣಿಕ ಮಾಹಿತಿದ ವಿಡಿಯೋಲೆನ ಪ್ರಸಾರ. ಇಂಚ ಬೇತೆ ಬೇತೆ ರೀತಿಡ್ ಸಾಹಿತ್ಯದ ಲೋಕೊನ್ ಪುಟ್ಟಾಯಿನ ವಾಸಂತಿ ಅಂಬಲಪಾಡಿ ಮೆರೆಗ್ ತುಳುಕೂಟ ಗುರ್ತ ಮಲ್ತುದ್ ಮಾನಾದಿಗೆ ಕೊರ್ತುಂಡ್.
ಕಜ್ಜೊಡ್ ತುಳುಕೂಟದ ಗುರಿಕಾರೆ ಬಿ.ಜಯಕರ ಶೆಟ್ಟಿ ಇಂದ್ರಾಳಿ ಗುರ್ಕಾರ್ಮೆಡಿತ್ತೆರ್. ಮಲ್ಲ ಬಿನ್ನೆರಾದ್ ಶ್ವೇತಾ ಜಯಕರ ಶೆಟ್ಟಿ ಇಂದ್ರಾಳಿ, ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಹಾಯಕ ನಿರ್ದೇಶಕಿ ಶ್ರೀಮತಿ ಪೂರ್ಣಿಮಾ, ಉದ್ಯಾವರ ಎಮ್ಈಟಿ ಆಂಗ್ಲಮಾಧ್ಯಮ ಶಾಲೆದ ಆಡಳಿತಾಧಿಕಾರಿ ಡಾ.ಜುನೇದಾ ಸುಲ್ತಾನ್,ತುಳುಕೂಟದ ಕಾರ್ಯಂತೆ ಗಂಗಾಧರ ಕಿದಿಯೂರು,ಪಣವುದ ಪಾಲವೆರಾಯಿನ ಚೈತನ್ಯ ಎಮ್.ಜಿ., ಭುವನಪ್ರಸಾದ್ ಹೆಗ್ಡೆ,ಮನೋರಮಾ ಶೆಟ್ಟಿ, ಸದಾಶಿವ ಭಟ್ ಮದರಂಗಿದರಂಗ್ ದ ಸಂಚಾಲಕಿ ಯಶೋದ ಕೇಶವ್ ಇತ್ತೆರ್.ತಾರಾ ಉಮೇಶ್ ಆಚಾರ್ಯ ಮಾನಾದಿಗೆ ಪಡೆಯಿನರೆನ ಪರಿಚಯ ಮಲ್ತೆರ್.ವಿದ್ಯಾ ಸರಸ್ವತಿ ಕಜ್ಜೊದ ಮದಿಪು ಕೊರಿಯೆರ್.
by 