ಉಡುಪಿ ಜಿಲ್ಲೆಡ್ ಸರಿಕಟ್ಟಾಯಿನ ಪುನರ್ ವಸತಿ ಕೇಂದ್ರ ತಾಪನೆಗ್ ಸಾಮಾಜಿಕ ಕಾರ್ಯಕರ್ತೆರೆನ ಮನವಿ..

ಉಡುಪಿ: ರಕ್ಷಣೆ ಮಲ್ತಿನ ಜೋಕುಲು, ನಟ್ಟುನಕುಲು, ಮಾನಸಿಕ ಅಸ್ವಸ್ಥೆರು ‌ಬೊಕ್ಕ ಅಸಹಾಯಕ ಪೊಂಜೊವುನಕ್ಲೆಗ್ ವಸತಿ ವ್ಯವಸ್ಥೆ ಕಲ್ಪಿಸಾವರೆಗ್ ಜಿಲ್ಲೆಡ್ ಒವ್ವೇ ಸರಕಾರಿ ಪುನರ್‌ವಸತಿ ಕೇಂದ್ರ ಇಜ್ಜಿ.. ಈ ಕೊರತೆ ಡಾದ್ ಮಸ್ತ್ ಕಷ್ಟನಷ್ಟೊಲೆನ್ ಅನುಭವಿಸಾವೊಡಾಪುಂಡ್.ಅಂಚಾದ್ ರಾಜ್ಯ ಸರಕಾರ ಅತೀ ಅಗತ್ಯವಾದ್ ಉಡುಪಿ ಜಿಲ್ಲೆಗ್ ಸುಸಜ್ಜಿತ ಪುನರ್‌ವಸತಿ ಕೇಂದ್ರೊನ್ ಮಂಜೂರು ಮಲ್ಪೊಡ್ ಪಂಡುದು ಜಿಲ್ಲೆದ ಸಾಮಾಜಿಕ ಕಾರ್ಯಕರ್ತೆರು ಆಗ್ರಹ ಮಲ್ತುದೆರ್.

ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ರಜತ ಮಹೋತ್ಸವ ಸಮಿತಿ ಬೊಕ್ಕ ಹಿರಿಯಡ್ಕ ಸಂಸ್ಕೃತಿ ಸಿರಿ ಟ್ರಸ್ಟ್ ಸಹಯೋಗಡ್ ಉಡುಪಿ ಪತ್ರಿಕಾ ಭವನಡ್ ಮಂಗಳವಾರ ಆಯೋಜನೆ ಮಲ್ದಿತ್ತಿನ ಸಾಮಾಜಿಕ ಕಾರ್ಯ ಕರ್ತೆರಾಯಿನ ಈಶ್ವರ ಮಲ್ಪೆ, ನಿತ್ಯಾನಂದ ಒಳಕಾಡು, ವಿಶು ಶೆಟ್ಟಿ ಅಂಬಲಪಾಡಿ ಬೊಕ್ಕ ಗಣೇಶ್‌ರಾಜ್ ಸರಳೇಬೆಟ್ಟು ಮೊಕ್ಲೆನೊಟ್ಟುಗ್ ಪಾತೆರಕತೆ ಕಾರ್ಯಕ್ರಮಡ್ ಈ ಒತ್ತಾಯ ಮಲ್ತೆರ್..

ಜೀವರಕ್ಷಕೆರಾಯಿನ ಈಶ್ವರ ಮಲ್ಪೆ ಪಾತೆರ್ದ್, ಸರಕಾರ ರಂಕ್ಲೆಗ್ ಉಡುಪಿಡ್ ಐನ್ ಎಕರೆ ಜಾಗ ಕೊರುಂಡ ಎಂಕುಲೇ ಪುನರ್‌ವಸತಿ ಕೇಂದ್ರೊನ್ ತಾಪನೆ ಮಲ್ತುದ್ ಜವಾಬ್ದಾರಿ ದೆತೊನುವಾ.. ಮಲ್ಪೆ ಬಂದರುಡ್ದ್ .50% ಕೆಸರ್ಒ ದೆತ್ತುದ್ , ನೀರುಗ್ ಬೂರ್ದ್ ಸೈಪುನಕ್ಲೆನ ಸಂಖ್ಯೆ ಕಡಿಮೆ ಆತುಂಡ್. ಆಂಡಲಾ ಬಾಕಿದ ಶೇ.50ದಾತ್ ಕೆಸರುನ್ ಸರಕಾರ ಕೂಡಲೇ ದೆಪ್ಪನ ವ್ಯವಸ್ಥೆ ಮಲ್ಪೊಡ್. ಮಲ್ಪೆ ಬೀಚ್ ಡ್ ಕಸದ ರಾಶಿ ದಿಂಜಿದ್ ಪೋತುಂಡ್.. 50-60ಟನ್ ಕಸ ಸಮುದ್ರಡಾದ್ ಕರೆಕ್ ಬತ್ತುದ್ ಬೂರ್ದುಂಡ್ ಪಂಡುದು ತೆರಿಪಾಯೆರು.

ಅಪಘಾತ ಬೊಕ್ಕ ನೀರುಗ್ ಬೂರ್ದ್ ಸೈಪಿನ ಪ್ರಕರಣೊಲೆಡ್ ಮದ್ಯ ಅತ್ತುಂಡ ಮಾದಕ ದ್ರವ್ಯ ಸೇವೆನೆ ಮಲ್ತಿನಕುಲೇ ಉಪ್ಪುವೆರ್. ಅಂಚಾದ್ ಪೊಲೀಸ್ ಇಲಾಖೆ ಈ ಮಾದಕ ದ್ರವ್ಯ ಜಾಲದ ಮೂಲೊನ್ ಪತ್ತೆ ಮಲ್ಪುನ ನಿಟ್ಟುಡ್ ಕೂಲಂಕಷವಾದ್ ತನಿಖೆ ಮಲ್ತುದ್ ಕ್ರಮ ದೆತೊನೊಡ್. ಅಂಚೆನೇ ಶಿಕ್ಷಣ ಸಂಸ್ಥೆಲು ಬೊಕ್ಕ ಪೋಷಕೆರು ಈ ಬಗ್ಗೆ ಎಚ್ಚರವಾದಿಪ್ಪೊಡ್ ಪಂಡುದು ಆರು ಮನವಿ ಮಲ್ತೆರು.

ನಿತ್ಯಾನಂದ ಒಳಕಾಡು ಪಾತೆರ್ದ್ , ಅನಾಥ ಜೋಕ್ಲೆನ್ ರಕ್ಷಣೆ ಮಲ್ಪುವಾ . ಆಂಡ ಸಂಬಂಧಪಟ್ಡಿನಕುಲು ಕೌನ್ಸಿಲಿಂಗ್ ಮಲ್ತುದ್ ಅಕ್ಲೆನ್ ಕುಡೊರ ಬುಡ್ಪೆರ್.. ದಾಯೆಗ್ ಪಂಡ ಮುಲ್ಪ ಅಕ್ಲೆಗ್ ಉಂತರೆಗ್ ಸರಿಯಾಯಿನ ವ್ಯವಸ್ಥೆ ಇಜ್ಜಿ. ಅಂವೆನೇ ನಟ್ಟುನಕ್ಲೆಗ್ , ಮಾನಸಿಕ ಅಸ್ವಸ್ಥರೆಗ್ ಸರಕಾರಿ ಮಟ್ಟಡ್ ಪುನರ್ ವಸತಿ ಕೇಂದ್ರದ ವ್ಯವಸ್ಥೆ ಇಜ್ಜಿ. ಅಂಚಾದ್ ಸಾಮಾಜಿಕ ಕಾರ್ಯಕರ್ತೆರು ಪರದಾಡೊಡಾಪುಂಡ್. ಕೆಲವು ವರ್ಷದ ಪಿರಾವುಡ್ ಎಂಕುಲ್ ಜಿಲ್ಲಾಧಿಕಾರಿಗ್ ಮನವಿ ಮಲ್ತುಂಡಲಾ ಒವ್ವೇ ಸ್ಪಂದನೆ ಸಿಕ್ಕುದುಜಿ. ರಕ್ಷಣೆ ಮಲ್ತಿನ ಎಂಕುಲೇ ಸಂತ್ರಸ್ತರೆಡ ನೆರ್ಪಾನ ಕೇನುನ ಪರಿಸ್ಥಿತಿ ಬೈದುಂಡ್ ಪಂಡೆರು.

ವಿಶು ಶೆಟ್ಟಿ ಅಂಬಲಪಾಡಿ ಪಾತೆರ್ದ್ , ಈ ವರ್ಷ ಮಾನಸಿಕ ಸ್ಥಿಮಿತ ಕಳೆಯೊಂದ್ ತಿರ್ಗೊಂದಿತ್ತಿನ ಮಹಿಳೆಯರೆನ್ ರಕ್ಷಣೆ ಮಲ್ದೆ. ಆಂಡ ಅಕ್ಲಗ್ ಪುನರ್‌ವಸತಿ ಕಲ್ಪಿಸಾವರೆಗ್ ನಮಡ ಒವ್ವೇ ಸೌಲಭ್ಯ ಇಜ್ಜಿ.. ಅಕ್ಲೆನ್ ಉಪಾಚಾರಗಾದ್ ಬೇತೆ ಜಿಲ್ಲೆಗ್ ಲೆತೊಂದ್ ಪೋಪಿನ ಪರಿಸ್ಥಿತಿ ಎದುರಾತುಂಡ್. ನಮ್ಮ ಮನವಿಗ್ ಹಿರಿಯ ಅಧಿಕಾರಿಲು ಸರಿಯಾಯಿನ ಸ್ಪಂದನೆ ಕೊರ್ಪುಜೆರ್.. ಜಿಲ್ಲಾಸ್ಪತ್ರೆಡ್ ಮೂಲಭೂತ ಸೌಕರ್ಯ ಇಪ್ಪಂದೆ ಅವ್ವೇತೊ ಜನತ್ತ ಜೀವ ಪೋತುಂಡ್. ಎಚ್‌ಐವಿ ಸೋಂಕಿತ ಮಹಿಳೆಯರ್ ಸಾದಿಡ್ ತಿರ್ಗೊಂದಿತ್ತುಂಡಲಾ ಅಕ್ಲೆನ ರಕ್ಷಣೆಗ್ ಒವ್ವೇ ವ್ಯವಸ್ಥೆ ಇಜ್ಜಿ ಪಂಡುದ್ ಅಸಮಾಧಾನ ತೋಜಾಯೆರ್.

ಗಣೇಶ್‌ರಾಜ್ ಸರಳೇಬೆಟ್ಟು ಪಾತೆರ್ದ್ , ಜಾಸ್ತಿ ತೂ ಬೂರುನ ಅನಾಹುತೊಲು ಆಪಿನ ಮಣಿಪಾಲಗ್ ಅಗ್ನಿಶಾಮಕ ದಳ ಠಾಣೆ ಮಂಜೂರು ಮಲ್ಪೊಡ್. ಉಡುಪಿ ಜಿಲ್ಲೆಗ್ ಸುಸಜ್ಜಿತ ವಿದ್ಯುತ್ ಸ್ಮಶಾನ ಬೋಡಾತುಂಡ್. ಪ್ರವಾಸೋದ್ಯಮ ದಿಟ್ಟಿಡ್ ಮಣಿಪಾಲಡುಪ್ಪುನ ಅರ್ಬಿ ಪಾಲ್ಸ್ ಅಭಿವೃದ್ಧಿ ಮಲ್ಪೊಡ್. ಪರ್ಕಳದ ರಾಷ್ಟ್ರೀಯ ಹೆದ್ದಾರಿ ಕಾಮ ಗಾರಿ ಕೂಡಲೇ ಪೂರ್ಣ ಆವೊಡ್. ಕಾಡು ಪ್ರಾಣಿಲೆನ ಹಾವಳಿ ತಡೆಗಟ್ಟರೆಗ್ ಅರಣ್ಯ ಇಲಾಖೆ ಕ್ರಮ ದೆತೊನೊಡ್ ಪಂಡುದು ಒತ್ತಾಯ ಮಲ್ತೆರ್.

ಕಾರ್ಯಕ್ರಮನ್ ಸಂಸ್ಕೃತಿ ಸಿರಿ ಟ್ರಸ್ಟ್‌ನ ಆಡಳಿತ ವಿಶ್ವಸ್ಥ ಬೊಕ್ಕ ವಿಮರ್ಶಕೆರಾಯಿನ ಪ್ರೊ.ಮುಳೀಧರ ಉಪಾಧ್ಯ ಉದಿಪನ ಮಲ್ತೆರ್.. ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷೆರಾಯಿನ ರಾಜೇಶ್ ಶೆಟ್ಟಿ ಗುರ್ಕಾರ್ಮೆಡಿತ್ತೆರ್. ಉಡುಪಿ ವಿಶ್ವ ಸಂಸ್ಕೃತಿ ಪ್ರತಿಷ್ಠಾನದ ಗೌರವಾಧ್ಯಕ್ಷೆರಾಯಿನ ವಿಶ್ವನಾಥ ಶೆಣೈ, ಸಂಘದ ರಾಜ್ಯ ಸಮಿತಿ ಸದಸ್ಯ ಕಿರಣ್ ಮಂಜನಬೈಲು, ರಜತ ಮಹೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ ಜಯಕರ ಸುವರ್ಣ, ಕೋಶಾಧಿಕಾರಿ ಉಮೇಶ್ ಮಾರ್ಪಳ್ಳಿ ಉಪಸ್ಥಿತರಿತ್ತೆರು.

ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ ಸ್ವಾಗರ ಮಲ್ತೆರ್. ಪತ್ರಕರ್ತ ಶಶಿಧರ ಮಾಸ್ತಿಬೈಲು ಸಾಮಾಜಿಕ ಕಾರ್ಯಕರ್ತರೆನ್ ಪರಿಚಯ ಮಲ್ತೆರ್.. ರಜತ ಮಹೋತ್ಸವ ಸಮಿತಿ ಸಂಚಾಲಕ ಮುಹಮ್ಮದ್ ಶರೀಫ್ ಸೊಲ್ಮೆ ಸಂದಾಯ್ತ ಮಲ್ತೆರ್. ಸಂಘದ ಕಾರ್ಯಕಾರಿ ಸಮಿತಿ ಸದಸ್ಯ ಮೈಕಲ್ ರೋಡ್ರಿಗಸ್ ಕಾರ್ಯಕ್ರಮ ನಿರೂಪಣೆ ಮಲ್ತೆರು.