ತುಳು ವರ್ಲ್ಡ್ ಫೌಂಡೇಶನ್

ತುಳುವರ್ಲ್ಡ್ ಫೌಂಡೇಶನ್ ಅಧ್ಯಕ್ಷೆ ರಾದ್ ಭಾನುಮತಿ ಶೆಟ್ಟಿ ಕಕ್ವಗುತ್ತು, ಪ್ರಧಾನ ಕಾರ್ಯದರ್ಶಿಯಾದ್  ವಸಂತ ರೈ ಕುತ್ತೆತ್ತೂರು ಆಯ್ಕೆ

ಕಟೀಲು, ಜೂನ್ 21: ಶ್ರೀ ಕ್ಷೇತ್ರ ಕಟೀಲು ದೇವಾಲಯಡ್ ನಡತಿನ  ತುಳುವರ್ಲ್ಡ್ ಫೌಂಡೇಶನ್‌ ದ ಆಡಳಿತ ಮಂಡಳಿ ಸಭೆಟ್  2026–27ನೇ ಸಾಲುದ ಅಧ್ಯಕ್ಷೆರಾದ್  ಶ್ರೀಮತಿ ಭಾನುಮತಿ ಶೆಟ್ಟಿ ಕಕ್ವಗುತ್ತು ಬೊಕ್ಕ ಪ್ರಧಾನ ಕಾರ್ಯದರ್ಶಿಯಾದ್  ಶ್ರೀ ವಸಂತ ರೈ ಕುತ್ತೆತ್ತೂರು ಮೊಕ್ಲೆನ್ ಸರ್ವಾನುಮತಡ್ ಆಯ್ಕೆ ಮಲ್ದೆರ್..

ಜರ್ಮನಿದ  ಕೋಲೋನ್ ವಿಶ್ವವಿದ್ಯಾನಿಲಯಡ್  ಉನ್ನತ ಶಿಕ್ಷಣ ಪಡೆತುದು, ಪ್ರವಾಸೋದ್ಯಮಡ್ ಡಿಪ್ಲೊಮಾ ಪಡೆದಿನ ಶ್ರೀಮತಿ ಭಾನುಮತಿ ಶೆಟ್ಟಿ ಕಕ್ವಗುತ್ತು ಮೇರು ಸುಮಾರು 39 ವರ್ಷ ಕಾಲ ಜರ್ಮನಿಡ್  ಇತ್ತುದ್  ತನ್ನವೇ  ಆಯಿನ ಟ್ರಾವೆಲ್ ಏಜೆನ್ಸಿನ್  ಯಶಸ್ವಿಯಾದ್ ನಡಪಾದೆರ್. ವಿದೇಶಡಿತ್ತುಂಡಲಾ  ತುಳು ಭಾಷೆ, ಸಂಸ್ಕೃತಿ ಬೊಕ್ಕ ಪರಂಪರೆದೊಟ್ಟುಗ್  ನಿಕಟ ಸಂಪರ್ಕನ್ ದೀಯೊಂದಿನ  ಆರು “ಅಟಿಲು ಮಲ್ಪುಲೆ ತುಳು ಕಲ್ಪುಲೆ” ಯೂಟ್ಯೂಬ್ ವಾಹಿನಿದ ಮೂಲಕ ತುಳುನಾಡುದ ಪರಂಪರೆನ್ ಜನಕ್ಲೆಗ್ ಪರಿಚಯ ಮಲ್ತೊಂದ್ ಬರೊಂದುಲ್ಲೆರ್.ಇಂಚಪ್ಪೊಗ್ ಮುಲ್ಕಿಡ್  “ಅಪ್ಪೆ ಬೇರ್ ದ ತುಳುನಾಡ್” ಕಾರ್ಯಕ್ರಮನ್ ಯಶಸ್ವಿಯಾದ್  ಆಯೋಜನೆ ಮಲ್ತುದ್ ಸಾರ್ವಜನಿಕೆರೆನ ಮೆಚ್ಚುಗೆ ಪಾತ್ರರಾತೆರ್..

ಪ್ರಸ್ತುತ ಆರು ಶಾಂಭವಿ ಸಂಜೀವಿನಿ ಒಕ್ಕೂಟ, ಮುಲ್ಕಿ ತಾಲೂಕು ಅಧ್ಯಕ್ಷೆಯಾದ್ ಕಾರ್ಯನಿರ್ವಹಣೆ ಮಲ್ತೊಂದಿತ್ತುದ್, ಮಹಿಳಾ ಸಬಲೀಕರಣ ಬೊಕ್ಕ ಸಮಾಜಮುಖಿ ಚಟುವಟಿಕೆಗೆ ಡ್ ಸಕ್ರಿಯವಾದ್ ತೊಡಗಿಸಾವೊಈದೆರ್.. ಅತ್ತಾವಂದೆ ಲಯನ್ಸ್ ಕ್ಲಬ್ ಬೊಕ್ಕ ರೋಟರಿ ಕ್ಲಬ್, ಮುಲ್ಕಿಡ್  ಸಕ್ರಿಯ ಸಮಾಜಸೇವಕೆರಾದಿತ್ತುದ್ , 2026–27ನೇ ಸಾಲುಗ್ ರೋಟರಿ ಕ್ಲಬ್, ಮುಲ್ಕಿದ ಪ್ರಥಮ ಮಹಿಳಾ ಅಧ್ಯಕ್ಷೆಯಾದ್ ಆಯ್ಕೆಯಾತೆರ್.

ವಸಂತ ರೈ ಕುತ್ತೆತ್ತೂರು ಮೇರು ಹಿಂದುಸ್ತಾನ್ ಪೆಟ್ರೋಲಿಯಂ ಕಾರ್ಪೊರೇಷನ್ ಲಿಮಿಟೆಡ್ (HPCL) ಡ್ ಮುಖ್ಯ ಪರಚಾಲನ ಪ್ರಬಂಧಕರಾದ್ (Chief Operations Manager) ದೀರ್ಘಕಾಲ ಸೇವೆ ಮಲ್ತುದ್  ನಿವೃತ್ತರಾತೆರ್.. ಆಡಳಿತ, ಯೋಜನಾ ನಿರ್ವಹಣೆ ಬೊಕ್ಕ ಸಂಘಟನಾ ಕೌಶಲ್ಯಡ್ ಅಪಾರ ಅನುಭವ ಇತ್ತಿನ  ಆರು, ನಿವೃತ್ತಿಡ್ ಬೊಕ್ಕ ತುಳು ಭಾಷೆ, ಸಂಸ್ಕೃತಿ ಬೊಕ್ಕ ಪರಂಪರೆದ  ಉಳಿವು ಬೊಕ್ಕ ಅಭಿವೃದ್ಧಿಗ್ ತೊಡಗಿಸಾವೊಂದೆರ್.. ಇಂಚಪ್ಪೊಗ್ ತುಳುವರ್ಲ್ಡ್ ಫೌಂಡೇಶನ್ ಮುಖಾಂತರ ಬಸ್ರೂರುಡ್  ಶ್ರೀ ತುಳುವೇಶ್ವರ ದೇವಸ್ಥಾನದ ಪುನರುದ್ಧಾರ ಬೊಕ್ಕ ಅಭಿವೃದ್ಧಿ ಕಾರ್ಯಗ್  ನಿನ್ನಿಕಲ್ಲು ಪಾದೆನ್ ರಾಷ್ಟ್ರೀಯ ಬೊಕ್ಕ ಜಾಗತಿಕ ಪರಂಪರೆದ  ತಾಣವಾದ್  ಅಭಿವೃದ್ಧಿ ಮಲ್ಪುನ ಯೋಜನೆಗ್ ಮಹತ್ವದ ಕೊಡುಗೆ ಕೊರ್ದು ವಿಶೇಷ ಶ್ರಮ ವಹಿಸಾದೆರ್.