ಗುಜ್ಜಾಡಿ ಸ್ವರ್ಣ ಜುವೆಲರ್ಸ್ ಪ್ರೈವೇಟ್ ಲಿಮಿಟೆಡ್ ದ ಸಂಸ್ಥಾಪಕೆರಾಯಿನ ದಿವಂಗತ ಗುಜ್ಜಾಡಿ ನರಸಿಂಹ ನಾಯಕ್ ಅರೆನ ಜನ್ಮಶತಮಾನೋತ್ಸವ ವರ್ಷದ ಅಂಗವಾದ್ ‘ಗುಜ್ಜಾಡಿ ನರಸಿಂಹ ನಾಯಕ್ ಅವರ ನೆನಪುಗಳು’ ಕೃತಿ ಬುಡುಗಡೆ ಸಮಾರಂಭ ಜುಲೈ 25ಗ್ ಕಾಂಡೆ 10.30ಗಂಟೆಗ್ ಉಡುಪಿದ ಅಮ್ಮಣ್ಣಿ ರಾಮಣ್ಣ ಶೆಟ್ಟಿ ಸ್ಮಾರಕ ಸಭಾಭವನಡ್ ನಡಪರೆಗುಂಡ್ ಪಂಡುದು ನಗರಸಭೆತ ಮಾಜಿ ಅಧ್ಯಕ್ಷ ಗುಜ್ಜಾಡಿ ಪ್ರಭಾಕರ್ ನಾಯಕ್ ತೆರಿಪಾದೆರ್..
ಉಡುಪಿಡ್ ಸುದ್ದಿಗೋಷ್ಠಿಡ್ ಪಾತೆರಿನ ಆರು, ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸರಕಾರ್ಯವಾಹ ದತ್ತಾತ್ರೇಯ ಹೊಸಬಾಳೆ ಆರು ಕೃತಿನ್ ಬುಡುಗಡೆ ಮಲ್ಪರೆಗುಲ್ಲೆರ್ .ಲೆಕ್ಕಪರಿಶೋಧಕ ಕೆ. ಉಲ್ಲಾಸ್ ಕಾಮತ್, ವಿಶ್ವ ಹಿಂದೂ ಪರಿಷತ್ ದ ಎಂ.ಎನ್. ನಾಗರಾಜ್ ಬೊಕ್ಕ ಎಒಜೆ ಮುಖ್ಯ ಸಂಪಾದಕ ಸುಮೇಶ್ ವಾಧೇರಾ ಮುಖ್ಯ ಅತಿಥಿಲಾದ್ ಪಾಲ್ ಪಡೆಯರೆಗುಲ್ಲೆರ್ ಪಂಡುದು ಮಾಹಿತಿ ಕೊರಿಯೆರು.
ಉದಯವಾಣಿದ ಮಾಜಿ ಉಪಸಂಪಾದಕ ಸತೀಶ್ ಮಲ್ಯೆರು ದಿವಂಗತ ನರಸಿಂಹ ನಾಯಕ್ ಅರೆನೊಟ್ಟುಗ್ ನಡಪಾಯಿನ ವಿಸ್ತ್ರತ ಸಂದರ್ಶನದ ಆಧಾರದ ಮಿತ್ತ್ ಈ ಕೃತಿನ್ ಆತ್ಮಕಥನ ರೂಪಡ್ ಸಂಪಾದಿಸಾದೆರ್.. ಪುಸ್ತಕಡ್ ಅರೆನ ವೈಯಕ್ತಿಕ ಬೊಕ್ಕ ಕೌಟುಂಬಿಕ ಜೀವನ, ವ್ಯಾಪಾರ ಕ್ಷೇತ್ರದ ಸಾಧನೆ ಬೊಕ್ಕ ಸಾಮಾಜಿಕ ಬದುಕುನ್ ಮೂಜಿ ಪ್ರತ್ಯೇಕ ವಿಭಾಗಲೆಡ್ ವಿವರಣೆ ಮಲ್ದೆರ್ ಪಂಡುದು ತೆರಿಪಾಯೆರು.
ಬಾರೀ ಬಂಗೊಡ್ ಆರಂಭ ಮಲ್ತುದ್ ಪ್ರಾಮಾಣಿಕತೆ, ಪರಿಶ್ರಮ ಬೊಕ್ಕ ಜನಕ್ಲೆನ ವಿಶ್ವಾಸದ ಬಲಟ್ ಯಶಸ್ವಿ ಉದ್ಯಮಿಯಾದ್ ಬುಲೆಯಿನ ನರಸಿಂಹ ನಾಯಕ್ ಅರೆನ ಜೀವನ ಪಯಣನ್ ಪುಸ್ತಕಡ್ ದಾಖಲೆ ಮಲ್ದೆರ್.. ಸಮಾಜಸೇವೆ, ರಾಷ್ಟ್ರೀಯ ಸ್ವಯಂಸೇವಕ ಸಂಘ, ವಿಶ್ವ ಹಿಂದೂ ಪರಿಷತ್ ಬೊಕ್ಕ ಜನಸಂಘ-ಬಿಜೆಪಿದೊಟ್ಟುಗ್ ಇತ್ತಿನ ನಂಟು, ರಾಜಕೀಯ ವಿಚಾರಧಾರೆ, ಜೀವನ ಮೌಲ್ಯ, ಬೊಕ್ಕ ಕುಟುಂಬದ ಒಗ್ಗಟ್ಟುಗ್ ಕೊರಿನ ಮಹತ್ವ ಸೇರಿನಂಚ ಕೆಲವು ವಿಷಯೊಲು ಕೃತಿಟ್ ಉಂಡು ಪಂಡುದು ಪ್ರಭಾಕರ್ ನಾಯಕ್ ಪಂಡೆರು.
ಸುದ್ದಿಗೋಷ್ಠಿಡ್ ಸ್ವರ್ಣ ಜುವೆಲರ್ಸ್ ದ ರಮಾದಾಸ್ ನಾಯಕ್, ರಘುವೀರ್ ನಾಯಕ್, ದೀಪಕ್ ಬೊಕ್ಕ ಅಭಯ್ ಉಪಸ್ಥಿತರಿತ್ತೆರು.
by 