ಪರ್ಯಾಯ ಮಹೋತ್ಸವಗ್ ಪೂರ್ವಭಾವಿಯಾದ್ ಸಾಂಪ್ರದಾಯಿಕ ಧಾನ್ಯ ಮುಹೂರ್ತ ಇನಿ ನಡತುಂಡ್. ಉಡುಪಿದ ಕೃಷ್ಣದೇವೆರೆನ್ ಅನ್ನ ಬ್ರಹ್ಮ ಪಂಡುದು ಲೆಪ್ಪುವೆರ್. ಮುಲ್ಪ ಕೃಷ್ಣದೇವರೆಗ್ ಪ್ರತಿ ದಿನ ಶೋಢಶೋಪಚಾರ ಪೂಜೆದೊಟ್ಟುಗ್ ಕೆಲವ್ ಬಗೆತ ಖಾದ್ಯದ ನೈವೇದ್ಯ ನಡತುಂಡ ಕುಡೊಂಜಿ ಕಡೆಟ್ ಭಕ್ತೆರೆಗ್ ದೇವರೆನ ನೈವೇದ್ಯ ಅನ್ನಪ್ರಸಾದದ ರೂಪೊಡು ವಿತರಣೆ ಆಪುಂಡ್. ಮುಲ್ಪ ನಡಪುನ ಅನ್ನದಾಸೋಹದಡ್ ಲಕ್ಷಾಂತರ ಜನ ಪ್ರಸಾದ ಸ್ವೀಕಾರ ಮಲ್ಪುವೆರ್.ಅಂಚಾದ್ ಕೃಷ್ಣನ ಪೂಜೆನ್ ಅನ್ನ ಬ್ರಹ್ಮನ ಪೂಜೆ ಪಂಡುದು ಲೆಪ್ಪುವೆರ್.. ಜನವರಿ 18ಗ್ ನಡಪರೆಗುಪ್ಪುನ ಶಿರೂರು ಮಠದ ಪರ್ಯಾಯಗ್ ಧಾನ್ಯ ಸಂಗ್ರಹ ಮಲ್ಪುನ ಮುಹೂರ್ತ ಇನಿ ನಡತುಂಡ್. ಉಂದೆಟ್ ದುಂಬು ಬಾಳೆ ಮುಹೂರ್ತ, ಅಕ್ಕಿ ಮುಹೂರ್ತ, ಕಟ್ಟಿಗೆ ಮುಹೂರ್ತಲು ನಡದುಂಡ್.. ಮಾತಾ ಮುಹೂರ್ತದ ಉದ್ದೇಶ, ರಡ್ಡ್ ವರ್ಷ ಕಾಲ ಭಕ್ತೆರೆನ ಅನ್ನಪ್ರಸಾದಗ್ ಸಿದ್ಧತೆ ಮಲ್ಪುನವ್ವೇ..
ಧಾನ್ಯ ಮುಹೂರ್ತದ ಪ್ರಯುಕ್ತ, ಇನಿ ಬೇತೆ ಬೇತೆ ಧಾರ್ಮಿಕ ಕಾರ್ಯಕ್ರಮೊಲು ನಡತುಂಡ್.. ಶ್ರೀ ಕೃಷ್ಣದೇವೆರು ಅನಂತೇಶ್ವರ, ಚಂದ್ರಮೌಳೇಶ್ವರ ದೇವರ ದರ್ಶನಡ್ ಬೊಕ್ಕ ಭಕ್ತೆರು ತರೆಟ್ ಅರಿತ ಮುಡಿನ್ ತುಂಬೊಂದು ನಡತೆರು. ಧಾನ್ಯ ಸಂಗ್ರಹಿಸಾವುನ ಪ್ರತಿರೂಪದಂಚ, ಈ ಅರಿತ ಮುಡಿತ ಮೆರವಣಿಗೆ ಅಷ್ಟಮಠತ್ತ ರಥಬೀದಿಡ್ ನಡತುಂಡ್. ವಾದ್ಯ ಮೇಳದೊಟ್ಟುಗ್ ಸಾಗಿನ ಈ ಮೆರವಣಿಗೆ, ಕೃಷ್ಣ ಮಠ ಪ್ರವೇಶ ಮಲ್ತುಂಡ್. ಕೃಷ್ಣದೇವೆರೆನ ಆಡಳಿತ ಕಚೇರಿ ಇಪ್ಪುನ ಬಡಗು ಮಾಳಿಗೆಡ್ , ಅರಿತ ಮುಡಿಕುಲೆನ್ ಪೂಜೆ ಮಲ್ತೆರ್..
ಕನಕುಲೆನ್ ಸಾಂಪ್ರದಾಯಿಕವಾದ್ ಜೋಡಿಸಾದ್ ರಥ ನಿರ್ಮಾಣ ಮಲ್ಪುನವ್ ಉಡುಪಿಧ ಸಂಪ್ರದಾಯ. ಈ ರೀತಿ ನಿರ್ಮಿಸಾಯಿನ ಕನಕುದ ರಥಕ್ ಇನಿ ಶಿಖರ ಪ್ರತಿಷ್ಠೆ ನಡತುಂಡ್. ಈ ಕಾರ್ಯಕ್ರಮಡ್ ಶಾಸಕ ಯಶ್ ಪಾಲ್ ಸುವರ್ಣ, ಮಠದ ದಿವಾನೆರಾಯಿನ ಡಾ ಉದಯ ಸರಳತ್ತಾಯ, ಕಟೀಲು ಲಕ್ಷ್ಮೀನಾರಾಯಣ ಆಸ್ರಣ್ಣ, ಎಂ ಬಿ ಪುರಾಣಿಕ್,ಪ್ರದೀಪ್ ಕುಮಾರ್ ಕಲ್ಕೂರ,ಇಂದ್ರಾಳಿ ಜಯಕರ್ ಶೆಟ್ಟಿ, ಮುನಿಯಾಲು ಉದಯ್ ಕುಮಾರ್ ಶೆಟ್ಟಿ ಪರ್ಯಾಯ ಸಮಿತಿ ಮಟ್ಟಾರ್ ರತ್ನಾಕರ್ ಹೆಗ್ಡೆ, ಸುಪ್ರಸಾದ್ ಶೆಟ್ಟಿ, ಮೋಹನ್ ಭಟ್, ನಂದನ್ ಜೈನ್, ಮಧುಕರ್ ಮುದ್ರಾಡಿ, ವಿಷ್ಣು ಪ್ರಸಾದ್ ಪಾಡೀಗಾರ್, ಬೊಕ್ಕ ಅಪಾರ ಸಂಖ್ಯೆಡ್ ಭಕ್ತೆರು ಉಪಸ್ಥಿತರಿತ್ತೆರು
by 