ಜೀವನ ಶಾಲೆದ ಪಾಠೊಗ್ ಸೀಮಿತ ಆವಂದೆ ಪಠ್ಯೇತರ ಚಟುವಟಿಕೆಡುಲಾ ಜೋಕುಲು ಸಕ್ರಿಯವಾದ್ ಪಾಲ್ ಪಡೆಯೊಡ್ ಪಂಡುದ್ ತುಳುಕೂಟ ಉಡುಪಿದ ಗುರ್ಕಾರೆರಾಯಿನ ಬಿ.ಜಯಕರ ಶೆಟ್ಟಿ ಇಂದ್ರಾಳಿ ಪಂಡೆರ್.ಆರ್ ತುಳುಕೂಟ ಉಡುಪಿದ ವತಿಡ್ದ್ ಡಿಸೆಂಬರ್ 13ಗ್ ಪರ್ಕಳ ಪ್ರೌಢಶಾಲೆಡ್ ಶಾಲೆದ ವಜ್ರ ಮಹೋತ್ಸವ ಸಮಿತಿ ಬೊಕ್ಕ ಉಡುಪಿ ತುಳುಕೂಟದ ವತಿಡ್ದ್ ನಡತಿನ ಜೋಕ್ಲೆಗಾದ್ ತುಳುವನಡಕೆ ಕಾರ್ಯಕ್ರಮದ ಉದಿಪನ ಕಜ್ಜೊಡ್ ಗುರ್ಕಾರೆರಾದ್ ಪಾತೆರಿಯೆರ್.ತುಳು ಬಾಸೆ ಸಂಸ್ಕೃತಿನ್ ಬಿಂಬಿಸಾವುನ ಕಜ್ಜೊನ್ ಉಡುಪಿ ತುಳುಕೂಟ ನಿರಂತರವಾದ್ ಮಲ್ತೊಂದಿತ್ತುದ್ ಯುವಪೀಳಿಗೆ ಇಂಚಿತ್ತಿನ ಕಜ್ಜೊಡ್ ಹೆಚ್ಚಿನ ಸಂಖ್ಯೆಡ್ ಪಾಲ್ ಪಡೆದ್ ದುಂಬು ದ ಪೀಳಿಗೆಗ್ ಮುಟ್ಟಾವರೆಗ್ ದುಂಬು ಬರೊಡ್ ಪಂಡೆರ್.
ಈ ಸಂದರ್ಭಡ್ ಕಜ್ಜೊನ್ ಉದಿಪನ ಮಲ್ತಿನ ಪರ್ಕಳ ಪ್ರೌಢಶಾಲೆದ ವಜ್ರ ಮಹೋತ್ಸವ ಸಮಿತಿದ ಕಾರ್ಂತೆರಾಯಿನ ಶ್ರೀ ದಿನೇಶ್ ಹೆಗ್ಡೆ ಜೋಕ್ಲೆಗ್ ಎಡ್ಡೆಪ್ಪು ಬಯಕಿಯೆರ್. ಕಜ್ಜೊಡ್ ತಾಲ್ಯೆ ತುಚ್ಚಿನೇಕ್ ಪುಲಮರ್ದ್ ಕೊರ್ಪಿನ ಶ್ರೀ ಬೂದ ಶೆಟ್ಟಿಗಾರ್ ಮೆರೆಗ್ ಮಾನಾದಿಗೆ ಮಲ್ತೆರ್.
ಕಜ್ಜೊಡ್ ಮಲ್ಲ ಬಿನ್ನೆರಾದ್ ಪರ್ಕಳ ಪ್ರೌಢಶಾಲೆದ ವಜ್ರ ಮಹೋತ್ಸವ ಸಮಿತಿದ ಕೋಶಾಧಿಕಾರಿ ಶ್ರೀ ಶಿವರಾಮ ಶೆಟ್ಟಿ,ಶಾಲೆದ ಮುಖ್ಯೋಪಾಧ್ಯಾಯೆರಾಯಿನ ಶ್ರೀ ಆನಂದ ನಾಯಕ್, ಇಂಗ್ಲಿಷ್ ಮಾಧ್ಯಮದ ಮುಖ್ಯೋಪಾಧ್ಯಾಯಿನಿ ಸುಜಾತಾ,ತುಳುಕೂಟದ ಒತ್ತು ಗುರ್ಕಾರೆರಾಯಿನ ಶ್ರೀ ಭುವನ ಪ್ರಸಾದ್ ಹೆಗ್ಡೆ, ಶ್ರೀ ದಿವಾಕರ ಸನಿಲ್,ಕಾರ್ಯಂತೆರಾಯಿನ ಗಂಗಾಧರ ಕಿದಿಯೂರು, ಕೋಶಾಧಿಕಾರಿ ಚೈತನ್ಯ ಎಮ್.ಜಿ.ಉಪಸ್ಥಿತರಿತ್ತೆರ್.ತುಳುವನಡಕೆ ಕಾರ್ಯಕ್ರಮದ ಸಂಚಾಲಕೆರಾಯಿನ ಶ್ರೀ ದಿನೇಶ್ ಶೆಟ್ಟಿಗಾರ್ ಬಿನ್ನೆರೆನ್ ಎದ್ಕೊನೊಂದ್ ಪ್ರಾಸ್ತಾವಿಕ ಪಾತೆರಿಯೆರ್.ವಿ.ಕೆ.ಯಾದವ್ ಕಜ್ಜೊದ ನಿರೂಪಣೆ ಮಲ್ತೆರು.
ಸಭಾಕಜ್ಜೊಡ್ ಬೊಕ್ಕ ಜೋಕ್ ಲೆಗ್ ತುಳುವನಡಕೆದ ಪಂತೊಲು ನಡತುಂಡ್.ಅಕೇರಿಗ್ ಮುಗಿತಲದ ಲೇಸ್ ಡ್ ಪಂತೊಡ್ ಗೆಂದಿನ ಜೋಕ್ ಲೆಗ್ ಇನಾಮು ಪಟ್ಟಿಯೆರ್.
by 