ಶೀರೂರು ಪರ್ಯಾಯ

ಶೀರೂರು ಪರ್ಯಾಯದ ಪೂರ್ವಭಾವಿಯಾದ್  ಮಾತಾ ವಿಪ್ರಬಾಂಧವರೆನೊಟ್ಟುಗ್  ಸಮಾಲೋಚನಾ ಸಭೆ ನಡತುಂಡ್.. ಉಡುಪಿದ ಶೀರೂರು ಮಠಟ್ ನಡತಿನ ಕಾರ್ಯಕ್ರಮಡ್ ಸ್ವಾಗತ ಸಮಿತಿ ಅಧ್ಯಕ್ಷ ಶಾಸಕ ಯಶ್ ಪಾಲ್ ಸುವರ್ಣ ಅಧ್ಯಕ್ಷತೆಡಿತ್ತೆರು. ಪರ್ಯಾಯದ ಬಗೆಟ್ ಪಾತೆರಿನ ಆರು ಶ್ರೀ ಶ್ರೀ ವೇದವರ್ಧನ ತೀರ್ಥೆರು ಕೇವಲ ಅಷ್ಟಮಠಕ್  ಸೀಮಿತ ಅತ್ತಾವಂದೆ ದೇಶಡೊರ್ಮೆ  ಖ್ಯಾತಿ ಪಡೆದ್ ದೇಶಗ್ ಮಾರ್ಗದರ್ಶನ ಮಲ್ಪುನ ಯತಿಕುಲಾವೊಡುಪನ್ಪಿನ ಸಂಕಲ್ಪ ನಮ್ಮ.. ದುಂಬುದ ದಿನೊಟ್ ಹಿಂದೂ ಸಮಾಜ ಅರೆನ ಮಾರ್ಗದರ್ಶನಡ್ ದುಂಬರಿಯೊಡು , ಶೀರೂರು ಪರ್ಯಾಯ ನಮನ್ ಮಾತೆರೆನ್ ಒಟ್ಟು ಮಲ್ಪುನ ಪರ್ಯಾಯ ಪಂಡೆರು. ಮಠದ ದಿವಾನೆರಾಯಿನ  ಡಾ ಉದಯ ಸರಳತ್ತಾಯ ಪಾತೆರ್ದ್  ಕೃಷ್ಣ ಭಕ್ತೆರೆನ್ ಜೋಡಿಸಾವುನ ಕೆಲಸ ಶೀರೂರು ಪರ್ಯಾಯಡ್  ಆವೊಡು ಅಯಿಕ್ಕಾದ್  ಮಾತಾ ಭಕ್ತೆರು ಕೈಜೋಡಿಸಾವೊಡು ಪಂಡುದು ವಿನಂತಿ ಮಲ್ತೆರು. ಸ್ವಾಗತ ಸಮಿತಿದ ಸಂಚಾಲಕೆರಾಯಿನ  ಗೋಪಾಲಕೃಷ್ಣ ಆಸ್ರಣ್ಣ ಪಾತೆರ್ದ್  ಶೀರೂರು ಪರ್ಯಾಯ ಜನಸಾಮಾನ್ಯರೆನ ಪರ್ಯಾಯ ನಮ ಮಾತಾ ವೇದವರ್ಧನ ತೀರ್ಥೆರೆನ ಸಂಕಲ್ಪಗ್  ಸಹಕಾರ ಕೊರೊಡು ಈ ಕಾರ್ಯಡಾದ್  ಗ್ರಾಮಗ್  ಬೊಕ್ಕ ದೇಶಗುಲಾ ಎಡ್ಡೆ ಆಪುಂಡ್  ಪಂಡೆರು. ಸ್ವಾಗತ ಸಮಿತಿದ ಪ್ರಧಾನ ಕಾರ್ಯದರ್ಶಿ ಮಟ್ಟಾರ್ ರತ್ನಾಕರ್ ಹೆಗ್ಡೆ ಪಾತೆರ್ದ್  ಶೀರೂರು ಪರ್ಯಾಯಗ್ ಮಾತಾ ಸಮಾಜ ಬಾಂಧವೆರೆನ ಸಹಕಾರ ವ್ಯಕ್ತ ಆವೊಂದುಡ್.ಮಾತೆರೆನ ಸಹಕಾರಡಾದ್  ಶೀರೂರು ಪರ್ಯಾಯನ್ ಯಶಸ್ವಿ ಮಲ್ಪೊಡ್  ಪಂಡೆರು. ಉಡುಪಿ ತಾಲೂಕು ಬ್ರಾಹ್ಮಣ ಪರಿಷತ್ ಅಧ್ಯಕ್ಷ ಶ್ರೀಕಾಂತ್ ಉಪಾಧ್ಯಾಯ ದುಂಬು ದ  ದಿನೊಟ್ ಕುಡಲಾತ್  ಸಭೆ ಸಂಘಟನೆ ಮಲ್ತುದ್ ಜವಬ್ದಾರಿಲೆನ್ ಯಶಸ್ವಿಯಾದ್ ನಿಭಾಯಿಸುವಾ ಪಂಡೆರು. ಹೊರೆಕಾಣಿಕೆ ಸಮಿತಿ ಸಂಚಾಲಕ ಸುಪ್ರಸಾದ್ ಹೆಗ್ಡೆ ಪರ್ಯಾಯದ ಪೂರ್ವಭಾವಿಯಾದ್ ನಡತಿನ ಕೆಲಸ ಕಾರ್ಯಕ್ರಮಲು ಬೊಕ್ಕ ದುಂಬುದ ದಿನಕ್ಲೆಡ್ ನಡಪುನ ಕೆಲಸದ ಬಗ್ಗೆ ಮಾಹಿತಿ ಕೊರಿಯೆರು. ಉಡುಪಿ ಜಿಲ್ಲಾ ಬ್ರಾಹ್ಮಣ ಸಭಾದ ಅಧ್ಯಕ್ಷ ಸಂದೀಪ್ ಮಂಜ, ತಿಂಗಳೆ ವಿಕ್ರಮಾರ್ಜುನ ಹೆಗ್ಡೆ, ಸ್ವಾಗತಸಮಿತಿ ಕೋಶಾಧಿಕಾರಿ ಜಯಪ್ರಕಾಶ ಕೆದ್ಲಾಯ,ಪರ್ಯಾಯ ಸ್ವಾಗತ ಸಮಿತಿದ  ಕಾರ್ಯದರ್ಶಿ ಶ್ರೀ ಮೋಹನ್ ಭಟ್,ನಂದನ್ ಜೈನ್,ತುಶಿಮಾಮದ ಅಧ್ಯಕ್ಷ ಜಯರಾಮ ಆಚಾರ್ಯ,ಯುವಬ್ರಾಹ್ಮಣ ಪರಿಷತ್ ಅಧ್ಯಕ್ಷ ರಘುಪತಿ ರಾವ್,ಮಧುಕರ ಮುದ್ರಾಡಿ ಬೊಕ್ಕ ಬೇತೆ ಬೇತೆ ಬ್ರಾಹ್ಮಣ ಸಂಘಟನೆದ  ಸದಸ್ಯೆರು ಬೊಕ್ಕ ವಿಪ್ರಬಾಂಧವೆರು ಉಪಸ್ಥಿತರಿತ್ತೆರು. ಅಶ್ವಥ್ ಭಾರದ್ವಾಜ್ ಕಾರ್ಯಕ್ರಮ ನಿರೂಪಣೆ ಮಲ್ತೆರ್..