ಒಡಿಯೂರು ಶ್ರೀ ಗುರುದೇವಾನಂದ ಸ್ವಾಮಿಲು ಬರೆತಿನ ತುಳು ಹನುಮಾನ ಚಾಲೀಸ: ಜೈ ಗುರದೇವ್

ಶ್ರೀ ಗುರು ತಾಮರೆದ ಪರಾಗೊಡು ದೆಕ್ಕುವೆ ಮನ ಕನ್ನಡಿನ್
ಪಂಡ್ರುವೆ ಪುರುಷಾರ್ಥವೋಲೆನ್ ಕೊರ್ಪಿನ ಶುದ್ದೊದ ಚರಿತೊನ್
ಬುದ್ದಿ ಕಮ್ಮಿ ಶರೀರೊಲ ದುರ್ಬಲ ನಟ್ಟುವೆ ಪವನಕುಮಾರ
ಬಲ ಬುದ್ದಿನ್ ವಿದ್ಯೆನ್ ಕೊರೊಡೆಂಕ್ ಮಾಜಡ್ ದೋಸ ವಿಕಾರ

ಜಯ ಹನುಮಾನ್ ವಿದ್ಯಾಗುಣಸಾಗರ
ಜಯವಾನರಪತಿ ಮೂಜಗೊತೆಚ್ಚರ

ರಾಮದೂತೆ ಬಲೊಟೇಪಲ ಮಿತ್ತೆ
ಅಂಜನಿನಾ ಮಗೆ ವಾಯುನ ಪುತ್ರೆ

ಮಹಾಶೂರೆ ವಿಕ್ರಮ ಬಜರಂಗಿ
ಕುಮತಿ ದೆಪ್ಪುನಯೆ ಸಜ್ಜನ ಸಂಗಿ

ಮಿನ್ಕುನ ವೇಸೊದ ಕಾಂಚನವರ್ಣೆ
ಸುರುಳಿದ ಕುಜಲ್ ಕುಂಡಲ ಕರ್ಣೇ

ಪೊರ್ಲುದ  ಧ್ವಜೊ ವಜ್ರಾಯುದೊ ಕೈಟ್
ಮಡಿಯಾತಿನ ಜನಿವಾರೊ ಪುಗೆಲೆಡ್

ಶಿವದೇವೆರೆ ಮಗೆ ಕೇಸರಿನ ತನಯೆ
ತೇಜೊಪ್ರತಾಪೊಡ್ ಲೋಕೊಗೆ ಹಿರಿಯೆ

ವಿದ್ಯಾವಂತೆ ಗುಣಿ ಕಜ್ಜೊಡ್ ಬಿರ್ಸೆ
ರಾಮನ ಕೆಲಸೊಡ್ ಬೀಸೊದ ಪುರುಷೆ

ಪ್ರಭು ಚರಿತೊನ್ ಕೇಣ್ಣಗ ಈ ರಸಿಕೆ
ರಾಮ ಲಕ್ಷ್ಮಣ ಸೀತೆನ ನಿಜ ಭಜಕೆ

ಕಿನ್ನಿ ರೂಪ ಸೀತೆಗ್ ತೋಜಾಯ
ಮಲ್ಲೆ ಆದ್ ಲಂಕೆಗ್ ಸೂ ಕೊರಿಯ

ಭೀಮರೂಪೊಡಸುರೆರೆನೀ ಕೆರಿಯ
ರಾಮನ ಕಜ್ಜೊಡ್ ವಿಜಯೊನ್ ಪಡೆಯ

ಜೀವನಿಡ್ಡಾದ್ ಲಕ್ಷ್ಮಣನ್ ಬದ್ಕಾಯ
ರಾಮನ ಖುಶಿತಾಲಿಂಗನ ಪಡೆಯ

ರಾಮೆ ನಿನನ್ ಮಸ್ತ್ ಪುಗರಿಯೆ
ಮೆಗಿಯೆ ಭರತನ್ ಸಮೊ ಈ ಪಣಿಯೆ

ಸಾವಿರ ಜನೊ ಮಳ್ಪಡ್ ಗುಣಗಾನ
ಪಂಡ್ ನ ರಾಮನ ಪಿರ ಆಲಿಂಗನ

ಸನಕಸನಂದನ ಮುನಿ ಬ್ರಹ್ಮಾದಿ
ನಾರದ ಶಾರದೆ ಸುಮನಸೆರಾದಿ

ಯಮಕುಬೇರ ದಿಕ್ಪಾಲ ಜನೊಕುಲು
ಕವಿಕ್ಕುಲು ಪುಗರ್ತೆಡ್ ಒತ್ತೆರ್ ಸೋಲು

ವಿನಯೊಡ್ ಪರಿಚಯೊ ಮಲ್ತ್ ರಾಮನ್
ಸುಗ್ರೀವಗ್ ಕೊರ್ಪಯ ರಾಜ್ಯೊನ್

ನಿನ್ನ ಪಾತೆರೊನ್ ಕೇಂಡಿ ವಿಭೀಷಣೆ
ಜಯೊ ಪಡೆಯೆನೆ ಲಂಕೇಶ್ವರೆ ಆಯೆನೆ

ಸಾವಿರ ಯೋಜನ ದೂರೊತ ಸೂರ್ಯನ್
ಬಡವುಗ್ ನಿಂಗ್ಯರೆ ಪಾಡಿಯ ಲಾಗೊನ್

ರಾಮನ ಉಂಗಿಲೊ ಬಾಯಿಡ್ ದೀದ್
ಕಡಲುನ್ ಲಾಗಿಯ ಸಾಹಸೊ ಮಲ್ತ್

ಲೋಕೊದ ದುರ್ಗಮ ಕಜ್ಜೊಲು ಮಾಂತ
ನಿನ್ನ ಅನುಗ್ರಹೊಡ್ದಾತ್ ಸುಖಾಂತ

ರಾಮನ ಬಾಕಿಲ್ ಕಾಪುನ ನಿನ್ನ
ಆಜ್ಞೆ ಬೋಡು ದರ್ಶನೊಗ್ ರಾಜನ

ಶರಣಾಗತೆರೆಗ್ ಸರ್ವೋಲ    ಸುಖೊನೆ
ನಿನ್ನ ರಕ್ಷಣೆಡ್ ಇಜ್ಜಿ ದುಃಖೊನೆ

ನಿನ್ನ ಸತ್ವೊನ್ ಮಲ್ಪುವ ಶಮನೊ
ಹೂಂಕಾರೊಗ್ ಮೂಲೋಕೊ ಕಂಪನೊ

ನಿನ್ನ ಪುದರುನ್ ನಿನೆತ್ತುಂಡ ಯಾವು
ಭೂತ ಪಿಶಾಚಿಲು ದೂರೊಗ್ ರಾವು

ಹನುಮನ್ ನಿನೆತುಂಡ ರೋಗ ಬರಂದ್
ಬೇನೆ ಕಷ್ಟ ಬಂಙೊಲು ತೋಜಾಂದ್

ತ್ರಿಕರಣ ಪೂರ್ವಕೊ ಮಲ್ಪುಲೆ ಧ್ಯಾನ
ಸಂಕಟಮೋಚನೆ ಈ ಹನುಮಾನ

ಮಾತೆರೆಗಿಷ್ಟನ್ ಕೊರ್ಪೆಗೆ ರಾಮೆ
ಆಯನ ಕಾರ್ಯಸಹಾಯಕೆ ಹನುಮೆ

ಭಕ್ತಜನಕ್ಕುಲೆ ಇಚ್ಚೆಲು ಮಾತ
ಪುರೆಸ್ಸಾದ್ ಕೊರ್ಪಿನ ಫಲದಾತ

ನಾಲ್ ಯುಗೊಟ್ಟುಲ ನಿನ್ನ ಪ್ರತಾಪೊ
ತೋಜುಂಡ್ ಬೆಳಗುಂಡ್ ತೇಜೋರೂಪೊ

ಸಾಧುಸಂತೆರೆಗ್ ರಕ್ಷಕೆಯಾದ್
ಇಪ್ಪುವೆ ರಾಮನ ಸೇವಕೆಯಾದ್

ಅಷ್ಟಸಿದ್ಧಿ ನವನಿಧಿಗೀ ದಾತೆ
ನಿಕ್ಕ್ ರಡ್ಡ್ ವರೊ ಕೊರ್ಯಲ್ ಸೀತೆ

ರಾಮರಸಾಯನೊ ನಿನ್ನಡ ನಿಲಿಕೆ
ನಿತ್ಯೊಲ ದೇವೆರೆ ಸೇವೆಗ್ ನಲಿಕೆ

ನಿನ್ನನ್ ನಿನೆಪುವೊ ರಾಮೆ ತಿಕ್ಕುವೆ
ದುಕ್ಕೊ ದೋಸೊನ್ ದೂರ ಮಲ್ಪುವೆ

ಕಡೆಕಾಲೊಡ್ ರಾಮನ ಬರಿ ಪೋದ್
ಭಕ್ತೆ ಆಪೆನೆ ಮುಕ್ತಿನ್ ಪಡೆದ್

ಬೇತೆ ದೇವೆರೆನ್ ನೆನೆಪಂದೆ ನಿನ್ನ
ಪೂಜೆ ಮಲ್ತುಂಡ ಸೌಖ್ಯೊನೆ ಪೂರ್ಣ

ವೀರಹನುಮನ್ ನೆನೆಪುನ ಮುಟ್ಟ
ಕಷ್ಟ ಸಂಕಟೊ ಬರಾಂದ್ ಗಿಟ್ಟ

ಜೈ ಜೈ ಜೈ ಹನುಮಾನ್ ಬೈರಾಗಿ
ಕೃಪೆ ಮಲ್ಪುಲ ಗುರು ಪರಮತ್ಯಾಗಿ

ನೂದು  ಸರ್ತಿ   ಚಾಲೀಸ್ ಪಂಡುಂಡ
ಮೋಕ್ಷೊದ ಸುಕೊ ನಿಶ್ಚಿತೊ ಕಡೆಮುಟ್ಟ

ಏರ್ ಓದುವೆರೊ ಹನುಮಾನ್ ಚಾಲೀಸ
ಸಿದ್ಧಿ ಪಡೆಪೆರ್ ಸಾಕ್ಷಿ ಗಿರೀಶ

ವಿಷ್ಣುನ ಕಿಂಕಿರೆ ತುಲಸೀದಾಸೆ
ಹೃದಯೊಡ್ ರಾಮೆ ಕುಳ್ಳಡ್ಂದಾಸೆ
ಪವನ ನಂದನ ಸಂಕಟಹಾರಿ ಮಂಗಲ ಮೂರುತಿ ರೂಪ
ರಾಮಲಕ್ಷ್ಮಣ ಸೀತೆ ಒಟ್ಟುಗ್ ಉಡಲುಗ್ ಬಲ ಸುರಭೂಪ