ತುಳುವೇಶ್ವರ ಅಷ್ಟಮಂಗಳ ಪ್ರಶ್ನೆ.

ತುಳುವೇಶ್ವರ ಅಷ್ಟಮಂಗಳ ಪ್ರಶ್ನೆ ಚಿಂತನೆಡ್  ಮಹಾ ಅನಾವರಣ – ಮುಳಾಲದೇವಿ ತುಳುವೇಶ್ವರಿ, ವಾರಾಹಿ ಪಂಜುರ್ಲಿ ಸಾನಿಧ್ಯೊಲು ಪತ್ತೆ

ಬಸ್ರೂರು, ಅಕ್ಟೋಬರ್ 9:
ತುಳುನಾಡುದ  ಸಾಂಸ್ಕೃತಿಕ–ಆಧ್ಯಾತ್ಮಿಕ ವೈಭವದ ಪ್ರತಿರೂಪ ಆದುಪ್ಪುನ ತುಳುವೇಶ್ವರ ದೇವಸ್ಥಾನ, ಬಸ್ರೂರುಡ್ ಅಕ್ಟೋಬರ್ 6 ಡ್ದ್  9 ನಡತಿನ  ಅಷ್ಟಮಂಗಳ ಪ್ರಶ್ನೆ ಚಿಂತನೆದ ಪೊರ್ತು ಮಹತ್ವದ ಆಧ್ಯಾತ್ಮಿಕ ಸತ್ಯೊಲು ಬೊಕ್ಕ ಪುರಾತನ ದೈವ ಸಾನಿಧ್ಯೊಲು  ಬೊಲ್ಪುಗ್  ಬೈದುಂಡ್..

ದೈವಜ್ಞೆರು ಮಲ್ತಿನ  ಪ್ರಶ್ನೆ ಚಿಂತನೆಡ್ , ತುಳುವೇಶ್ವರ ಪರಶುರಾಮ ನಿರ್ಮಿತ ಪವಿತ್ರ ಕ್ಷೇತ್ರಲೆಡ್  ಒಂಜಾದಿತ್ತುದ್, ತುಳುನಾಡು ಬೆರ್ಮೆರೆ ಸೃಷ್ಟಿದ ಕೇಂದ್ರವಾದುಂಡ್ ಪಂಡುದು ದೃಢ ಆತುಂಡ್.. ಸುಮಾರು 1500 ವರ್ಷ ಪಿರ  ಬುಡಕಟ್ಟು ಜನಾಂಗೊಲು ಪೂಜೆ  ಮಲ್ತೊಂದಿತ್ತಿನ ದೈವ ದೇವ ರಾಜಮಹಾರಾಜೆರೆನ  ಕಾಲೊಡ್ ವೈಭವೋಪೇತ ತಾಂತ್ರಿಕ ಪೂಜೆಲು, ಉಚ್ಚಯೊಲು ಬೊಕ್ಕ ನೇಮಾದಿಲು  ನಡದುಂಡ್ ಪಂಡುದು ತೆರಿದ್ ಬೈದುಂಡ್..

ತುಳುವೇಶ್ವರಿ – ಮುಳಾಲ ದೇವಿ ಸಾನಿಧ್ಯ ಪತ್ತೆ

ದೈವಜ್ಞರ ಚಿಂತನೆಡ್  ತುಳುವೇಶ್ವರನ ಪ್ರಾಣಸಖಿಯಾಯಿನ ತುಳುವೇಶ್ವರಿ ದೇವಿ, ಈ ಪ್ರದೇಶದ ಮೂಲ ದೇವಿಯಾದಿತ್ತುದ್ ಜನಪದ ಭಾಷೆಡ್ ಮುಳಾಲದೇವಿ (ಮೂಲ ಆಳುಗಳ ದೇವಿ) ಪಂಡುದು ಅಲೆನ್ ಲೆತ್ತೊಂದಿತ್ತೆರ್  ಪಂಡುದು ದೃಢ ಆತುಂಡ್..
ಆಲು ಇತ್ತೆ ಜಲದಿವಾಸ ಉಪ್ಪುನ ಜಾಗೆನ್  ಊರುದ  ಭಕ್ತೆರು ಗುರ್ತ ಮಲ್ದಿತ್ತುದ್  ಅಲ್ಪ ವಿಶಿಷ್ಟ ಮರಕುಲು ಬೊಕ್ಕ ಮಣ್ಣುದ ಕುರುಹುಲು ತಿಕ್ಕುದುಂಡ್..
ಪ್ರಾಚೀನ ಕಾಲೊಡ್  ಬುಡಕಟ್ಟು ಜನಾಂಗೊಲು ಕಂಗಿಲು ನಲಿಕೆದ  ಮುಖಾಂತರ ಈ ದೇವಿನ ಆರಾಧನೆ ಮಲ್ತುದ್ ಮಾರಿ ರೋಗಡ್ ಬಳಲೊಂದಿತ್ತಿನ  ಜನಕ್ಲೆಗಾದ್  ತೀರ್ಥಬಾವಿದ  ನೀರುನ್  ಉಪಯೋಗ ಮಲ್ತುದ್ ಚಿಕಿತ್ಸಾ ಸೇವೆ ಮಲ್ತೊಂದಿತ್ತೆರ್ ಪಂಡುದು ತೆರಿದ್ ಬೈದುಂಡ್.
ಉಂದೆಟಾದ್  ಈ ಊರುಗ್ “ಬಸ್ರೂರು” ಪನ್ಪಿನ  ಪುದರುದ ಮೂಲ ಉಂಡು ಪನ್ಪಿನ  ನಂಬಿಕೆಲಾ  ಉಂಡು..

ಮೇರು ಶ್ರೀಚಕ್ರದ ರಹಸ್ಯ:

ಈ ದೇವಾಲಯಡ್  ಪೂರ್ವಕಾಲಡ್  ತಾಂತ್ರಿಕ ಶಕ್ತಿಯುತವಾಯಿನ ಮೇರು ಶ್ರೀಚಕ್ರ ಪೂಜಿತವಾದಿತ್ತುಂಡ್..
ದೈವಜ್ಞರ ಪ್ರಕಾರ, ಆ ಶ್ರೀಚಕ್ರವನ್ನು ಶತಮಾನದ ಪಿರ ನೇಪಾಳ ದೇಶಗ್ ಹಸ್ತಾಂತರ ಮಲ್ದೆರ್.
ಆ ಚಕ್ರನ್  ಮರುಪತ್ತೆಮಲ್ತುದ್ ಬಸ್ರೂರು ದ ತುಳುವೇಶ್ವರ ಸನ್ನಿಧಿಡ್  ಪುನಃ ಪ್ರತಿಷ್ಠಾಪನೆ ಮಲ್ತುಂಡ, ಭಾರತ ದೇಶದ ಆಧ್ಯಾತ್ಮಿಕ ಶ್ರೇಯಸ್ಸುಗ್ ಅದ್ಭುತ ಫಲಪ್ರದ ಆವರೆಗುಂಡ್  ಪಂಡುದು ಪ್ರಶ್ನೆ ಚಿಂತನೆಡ್  ತೆರಿದ್ ಬೈದುಂಡ್..

ನಂದಿನ  ಸುರುತ ಆರಾಧನೆ:

ತುಳುವೇಶ್ವರ ಸನ್ನಿಧಿದ  ಪಾಣಿ ಪೀಠಡ್ ಸ್ಥಾಪಿತವಾದುಪ್ಪುನ ನಂದಿ ದೇವೆ  ಪಶುಪತಿನಾಥನ ಅವತಾರವಾದ್ ಪೂಜಿತನಾದುಲ್ಲೆ..
ಆಯನ ಆರಾಧನೆ ಅತ್ಯಂತ ಶುಭಕರ ಬೊಕ್ಕ ಶ್ರೇಯಸ್ಕರವಾದುಂಡ್ ಪಂಡುದು ಪ್ರಶ್ನೆ ಚಿಂತನೆ ತೆರಿಪಾದುಂಡ್.

ವರಾಹ ಪಂಜುರ್ಲಿ ಸಾನಿಧ್ಯ:

ವಾರಾಹಿ ನದಿ ತೀರಡ್ ಅವತಾರ ಪಡೆಯಿನ ವರಾಹ ದೇವೆರು ಬೊಕ್ಕ ಪಂಜುರ್ಲಿ ದೈವೊಲೆನ ಮೂಲ ಸಾನಿಧ್ಯಲಾ ಉಂದುವೇ ಬಸ್ರೂರು ಡ್ ಉಂಡು ಪಂಡುದು ದೃಢ ಆತುಂಡ್..
ಅಂಚಾದ್  ದೇವಸ್ಥಾನದ ಪಿದಾಯಿಭಾಗಡ್ ಪಂಜುರ್ಲಿ ಪ್ರತಿಷ್ಠೆ ಪುನರ್ ಸ್ಥಾಪನೆದ ಅಗತ್ಯ ಉಂಡು ಪನ್ಪಿನ ಸೂಚನೆ ತಿಕ್ಕುಧುಂಡ್..

ಜನಪದ ಬೊಕ್ಕ ವೈದಿಕ ಆರಾಧನೆದ ಸಂಯೋಜನೆ:

ತುಳುವೇಶ್ವರೆ ಜನಪದ ಬೊಕ್ಕ ವೈದಿಕ ಸಂಸ್ಕೃತಿದ ಸೇತುವೆಯಾದಿತ್ತುದ್,
ಬುಡಕಟ್ಟು ಜನಾಂಗಲು ಪೂಜೆ ಮಲ್ದಿನ ದೈವವಾದುಪ್ಪುನ ಕಾರಣ  ಮಾತಾ ವರ್ಗದ ಜನಕ್ಲೆಗ್  ಈ ಕ್ಷೇತ್ರದ ಪೂಜಾ–ಅಭಿಷೇಕಲೆಡ್  ಪಾಲ್ ಪಡೆಯರೆಗ್ ಅವಕಾಶ ಕೊರೊಡುಂದು ಶಿಫಾರಸು ಮಲ್ದುಂಡ್..
ಉತ್ಸವ ಸಂದರ್ಭಡ್ ಕಂಗಿಲು ನಲಿಕೆ, ಕೊರಗ ನಲಿಕೆ, ಕುಡುಬಿ ನಲಿಕೆ ಇಂಚ ಜನಪದ ಕಲಾರೂಪಲೆಗ್  ಆದ್ಯತೆ ಕೊರೊಡು ಪಂಡುದು ಪ್ರಶ್ನೆಡ್  ತೆರಿದ್ ಬೈದುಂಡ್.
ದೇವೆರೆಗ್ ಇಷ್ಟವಾಯಿನ ನೈವೇದ್ಯವಾದ್  ನೇರಳೆ ಪರುಂದ್ ಬೊಕ್ಕ ಮುಳ್ಳುಸೌತೆ ಉಲ್ಲೇಖ ಮಲ್ದುಂಡ್.

ಪುನರ್ ವೈಭವದ ಅಗತ್ಯತೆ:

ಪ್ರಸ್ತುತ ದೇವಾಲಯಗ್ ಕೇವಲ ರಡ್ಡ್  ಸೆಂಟ್ಸ್  ಜಾಗ ಮಾತ್ರ ಇತ್ತುದ್, ಪುನರ್ ವೈಭವಗಾದ್  ಸುತ್ತಮುತ್ತಲುದ ಭೂಮಿಲೆನ್  ದೆತೊಂದ್  ಆರಾಧನಾಲಯ, ನಕ್ಷತ್ರವನ ಬೊಕ್ಕ ತೀರ್ಥಭಾವಿ ಪುನರ್ ನಿರ್ಮಾಣ ಅಗತ್ಯವಾದುಂಡ್.
ಆಯಿಕಾದ್  ಊರ–ಪರವೂರ–ವಿದೇಶಲೆಡ್ ವಾಸ ಮಲ್ಪುನ ಭಕ್ತರೆಡ್ದ್  ತನುಮನಧನದ  ಸಹಕಾರ ಕೋರುನಂಚ ದೇವ ಪ್ರಶ್ನೆಡ್ ಸೂಚನೆ ತಿಕ್ಕುದುಂಡ್.

ದುಂಬುದ ಪ್ರಶ್ನೆ ಚಿಂತನೆ:

ಮುಂದಿನ ಪ್ರಶ್ನೆ ಚಿಂತನೆ 2026 ಮೇ 2ಗ್ (ಮೇಷ 18) ನಡಪರೆಗುಂಡ್.ಅಯಿತ್ತುಲಾಯಿ  ಮಾತಾ ಅಗತ್ಯ ಪೂರ್ವ ಕಾರ್ಯೊಲು ಪೂರ್ಣ ಆಪಿಲೆಕ್ಕ ದೇಶವಿದೇಶಡ್ದ್  ಆಶಯ ವ್ಯಕ್ತವಾದುಂಡ್.

ಸಹಸ್ರ ದೀಪೋತ್ಸವ – ಅಕ್ಟೋಬರ್ 24, 2025:

ಈ ಮಹಾ ಚಿಂತನೆದ ದುಂಬರಿನ ಭಾಗವಾದ್ ಪ್ರತಿಯೊರಿ ಭಕ್ತೆರೆನ ಶ್ರೇಯಸ್ಸು ಬೊಕ್ಕ ದೋಷ ಪರಿಹಾರಾರ್ಥವಾದ್
ಅಕ್ಟೋಬರ್ 24, 2025 ಗ್ ಬಯ್ಯಗ್ 5:00 ಗಂಟೆಡ್ದ್  ಬಸ್ರೂರು ತುಳುವೇಶ್ವರ ಸನ್ನಿಧಿಡ್ “ಸಹಸ್ರ ದೀಪೋತ್ಸವ” ಕಾರ್ಯಕ್ರಮನ್ ಆಯೋಜನೆ ಮಲ್ದುಂಡ್..
ದೇವೆರೆಗ್ ಇಷ್ಟವಾಯಿನ ಜನಪದ ನಲಿಕೆದ ಪ್ರದರ್ಶನಗುಲಾ ಅವಕಾಶವಿತ್ತುದ್, ಆಸಕ್ತ ಕಲಾವಿದೆರು ಸಂಪರ್ಕ ಮಲ್ಪೊಲಿ – 9061086101.

ಮಾತಾ ತುಳುವೇಶ್ವರ–ತುಳುವೇಶ್ವರಿ–ವಾರಾಹಿ–ಪಂಜುರ್ಲಿ ಭಕ್ತೆರು ದೀಪೋತ್ಸವಡ್  ಪಾಲ್ ಪಡೆದ್  ದೈವ ದೇವೆರೆನ ಕೃಪೆಕ್ ಪಾತ್ರರಾವೊಡ್ ಪಂಡುದ್ ಮನವಿ.