ವಿಜಯನಗರದ ಅಂತ್ಯ ಆಯಿಬೊಕ್ಕ ತುಳುನಾಡುನ್ ಸ್ವತಂತ್ರವಾದ್ ಆಳೊಂದಿತ್ತಿನ ಬಂಗೆರ್,ಚೌಟೆರ್,ಅಜಿಲೆರ್,ಸಾವಂತೆರ್ ಅರಸುಲಾದಿಪ್ಪನಗ ಅಕಲ್ನ ತಿರ್ತುಡ್ ಕೆಲವು ಬಲ್ಲಾಳೆರಿತ್ತುದ್ ರಾಜ್ಯಾಡಳಿತ ಮಲ್ತೊಂದಿತ್ತೆರ್.ಕ್ರಿ.ಶ.17 ನೇ ಶತಮಾನದ ಸುರುಕ್ ಇಂಚ ಒರಿ ಬಲ್ಲಾಳೆ ಇತ್ತೆದ ದ.ಕ.ಜಿಲ್ಲೆದ ಪುತ್ತೂರು ತಾಲೂಕುದ ಪಡುಮಲೆಟ್ (ಪೆರ್ಮಲೆ) ಇತ್ತೆ,ಕುಡೊರಿ ಸುಳ್ಯ ತಾಲೂಕುದ ಪಂಜೊಡ್,ಮೂಜನೇದ ಬಲ್ಲಾಳೆ ಎಣ್ಮೂರುಡಿತ್ತೆ.
ಈ ಪ್ರದೇಶೊಡ್ ಆನಿದ ದಿನೊಟ್ ಆಳೊಂದಿತ್ತಿನ ಬಲ್ಲಾಳೆರೆನ ರಾಜ್ಯೊಡ್ ಜನಸಾಮಾನ್ಯೆರೆನ ನಡುಟ್ ಪುಟ್ಟುದ್ ,ಬಾಳುದ್ ಬೆಳಗುದ್ ತನ್ನ ಅಸಾಮಾನ್ಯ ತ್ಯಾಗ ಬಲಿದಾನೊಡಾದ್ ಅಮರೆರಾಯಿನ ಅಮರು ವೀರೆರ್ ಕೋಟಿಚೆನ್ನಯೆರ್,ತುಳುನಾಡ್ದ ದೈವಾಂಶ ಪುರುಷೆರ್ ಪಂಡುದ್,ಸತ್ಯ ಧರ್ಮ ರಕ್ಷಣೆಗಾದ್ ಆತ್ಮಾರ್ಪಣೆ ಮಲ್ತುದ್ ಅಲೌಕಿಕ ವೀರೆರ್ ಪಂಡುದ್,ನಂಬಿನಕ್ಲೆಗ್ ಇಂಬು ಕೊರ್ದ್ ಕಾತೊಂದ್ ಬರ್ಪುನ ಕಾರಣಿಕದ ಶಕ್ತಿಲಾದ್ ದೈವೀಕರಣೆರಾಯಿನ ಕೋಟಿಚೆನ್ನಯೆರೆನ್ ಬ್ರಹ್ಮನ ಆರಾಧನೆದೊಟ್ಟುಗ್ ಪೂಜೆ ಮಲ್ಪುನ ಗ್ರಾಮದ ದೇಗುಲನೇ ಗರೋಡಿ ಪಂಡುದ್ ಜನಕುಲ್ ನಂಬೊಂದ್ ಬೈದೆರ್.
ಗ್ರಂಥಸ್ಥ ಉಪ್ಪಂದಿನ ಬಾಸೆ,ಭೂಉತ್ಪನ್ನ ನಡಪಂದಿನ ಪ್ರದೇಶ,ಲಿಖಿತ ಆಧಾರದ ಕೊರತೆ,ನಾಶ ಆವೊಂದುಪ್ಪುನ ಪೆರಿಯ ವಿದ್ವಾಂಸೆರೆನ ಮೌಖಿಕ ಸಾಹಿತ್ಯ ಪ್ರಕಾರ,ಇಂಚಿತ್ತಿನ ವಿಲಕ್ಷಣ ಪರಿಸ್ಥಿತಿ ಇತ್ತಿನ ತುಳುನಾಡುಡ್ ಜಾನಪದ ಐತಿಹ್ಯದ ಸಂಶೋಧನೆ ಬಾರೀ ಕಷ್ಟ.ಆಂಡಲಾ ತುಳುನಾಡುಡ್ ಸಾಂಸ್ಕ್ರತಿಕ ಲಕ್ಷಣ,ಜಾನಪದ ನಂಬಿಕೆ,ಮುಲ್ಪ ಕರಿದ್ ಪೋತಿನ ಪೆರಿಯೆರೆನ ಪ್ರತಾಪೊನ್ ಪದತ ರೂಪೊಡ್ ಗೀತಸಾಹಿತ್ಯವಾಯಿನ ಪಾಡ್ದನೊನ್ ಆಧಾರವಾದ್ ದೀಯೊಂದ್ ಮಸ್ತ್ ಜನ ಸಾಧಕೆರ್ ತುಳುವ ಸಂಸ್ಕ್ರತಿದ ಬಗ್ಗೆ ಬೊಲ್ಪು ತೋಜಾದೆರ್.ಈ ನಿಟ್ಟುಡ್ “ಪಾಡ್ದನೊಲ್” ತುಳುವೆರೆನ ಮೌಖಿಕ ಸಾಹಿತ್ಯವಾದಿತ್ತುದ್ ತುಳು ಪುರಾಣ ಪಂಡುದೇ ಪುದರ್ ದೀಯೊಲಿ.ತುಳುನಾಡ್ದ ಗರೋಡಿಲೆನ ಬಗ್ಗೆ ಜಾನಪದ ಸಂಶೋಧನೆಗ್ ಪಾಡ್ದನದೊಟ್ಟುಗ್ ಕ್ಷೇತ್ರದ ಅಧ್ಯಯನ ಆಧಾರವಾದಿತ್ತಿನೆಡ್ದಾವರ ಗರೋಡಿಲೆನ ಬಗ್ಗೆ ಲಿಖಿತವಾಯಿನ ಸಾಹಿತ್ಯ ಇದಮುಟ್ಟಲಾ ಮೂಡ್ದ್ ಬೈದುಜಿ ಪಂಡುದೇ ಪನೊಲಿ.ಗರೋಡಿಲೆನ ಅಧ್ಯಯನೊಲೆಡ್ ಉಂದೊಂಜಿ ಅಧ್ಯಯನಡ್ ಮಲ್ಲ ಕೊರತೆ..
ಸಂಗ್ರಹ:ತುಳುನಾಡ ಗರೊಡಿಗಳ ಸಾಂಸ್ಕೃತಿಕ ಅಧ್ಯಯನ(ಕನ್ನಡ). ತುಳುಕ್ ತಜುರ್ಮೆ: ಯಶೋದ ಕೇಶವ್. (ದುಂಬರಿಯುಂಡ್)
by 