ಲೇಸ್ ಸುಧಾರಿಕೆದ ಬಿರ್ಸೆದಿ.

ಲೇಸ್ ಸುದಾರಿಕೆದ ಬಿರ್ಸೆದಿ – ಕೃತಿ ಮೂಡುಬೆಟ್ಟು

ಸಾದಿಪುನ ಮನಸ್ಸ್ ಇತ್ತ್‌ನ ಮಾನ್ಯಗ್ ಆಯನ ಉಮೇದ್, ಬುಡಂದಿ ಪುಣೆಪು ಬೊಕ್ಕ ಸಮರ್ಪಿಪು ಬಾಮೊಡು ದುಂಬು ಪೋಪುನ ಉಡಲ್ ಇತ್ತ್ಂಡ ಗೆಲ್ಮೆ ತನ್ನಾತೆಗೆ ಒಲಿದ್ ಬರ್ಪುಂಡು. ಸಾಧನೆ ಪನ್ಪಿನ ಒರಿಯನ ಪುಗೆಲೇರಿ ಬೈರಸ್ ಅತ್ತ್, ಅವು ತನ್ನ ಉಡಲ ಚಾತುರ್ಪುಗು ನೀರ್ ಗೊಬ್ಬರ ಪಾಡ್ದ್ ಬೆನ್ನಿ ಸಾಗೋಲಿ ಮಲ್ಪುನಾಯನ ತರೆಯೇರುನ ಮುಂಡಾಸ್. ಅಂಚಿನ ಒಂಜಿ ಉಮೇದ್ ದಿಂಜಿ ಸಾದಿಪು ಚಾತುರ್ಪುದ ಪೊಣ್ಣು ಮಗಲೆ ಬಗೆಟ್ ತೂಯೆರೆ ಪೋಂಡ ನೆಗತ್ ತೋಜುನಾರ್ ತುಳು ಕನ್ನಡಡ್ ಲೇಸ್ ಸುದಾರಿಪುದ ಬಿರ್ಸೆದಿ ಕೃತಿ ಮೂಡುಬೆಟ್ಟು.

ಕೃತಿ ಮೂಡುಬೆಟ್ಟು ಮಣಿಪಾಲ ಮಾಹೆ ಸಂಸ್ಥೆಡ್ ಬೆನ್ಕೆಡುಪ್ಪುನ ಕರುಣಾಕರ ಪೂಜಾರಿ ಬೊಕ್ಕ ಗೀತಾಂಜಲಿ ಕುಂಟುದ ಅಂಗಡಿಡ್ ಬೆನ್ಕೆಡುಪ್ಪುನ ಗೀತಾ ಪೂಜಾರ್ದಿ ದಂಪತಿಲೆನ ಮೋಕೆದ ಮಗಲ್ ಆದ್ 2004ನೇ ಜುಲೈ 15ನಾನಿ ಒಡಿಪುದ ಮೂಡುಬೆಟ್ಟುಡು ಪುಟ್ಟಿಯೆರ್. ತನ್ನ ಶಿಕ್ಷಣನ್ ಮುಗಿತ್ ಉಡುಪಿ ಎಂಜಿಎಂ ಕಾಲೇಜಿಡ್ ಝೂಯಾಲಜಿ ಕೆಮಿಸ್ಟ್ರಿಡ್ ಬಿಎಸ್ಸಿ ಪದವಿ ಪಡೆದ್ ಪ್ರಸ್ತುತ ಕಂಪ್ಯೂಟರ್ ಕಲ್ತೊಂದುಲ್ಲೆರ್.

ಪದವಿ ಮುಗಿತ್ತ್ ಉಡುಪಿದ ಸ್ಪಂದನಾ ಚಾನೆಲ್‌ಡ್ ಬೆನ್ಕೆಗ್ ತೊಟ್ಟಿನ ಕೃತಿ ತುಳುನಾಡ ದ್ವ‌ನಿ, ಉಡುಪಿ ಟೈಮ್ಸ್, ಪ್ರೈಮ್ ಟಿವಿ ಕನ್ನಡ ಸೇರಿನಂಚ ಒಡಿಪುದ ಎಚ್ಚಿನ ಮಾತಾ ಲೋಕಲ್ ಚಾನೆಲ್ಡ್ ಬೇಲೆ ಮಲ್ತಿನ ಅನುಭವ ದಿಂಜವೊನುನ ಒಟ್ಟುಡು ನಿರೂಪನಾ ಕ್ಷೇತ್ರಡ್ ತನ್ನನೆ ಆಯಿನ ಅಚ್ಚಿ ಮೂಡಾದೆರ್. ಪ್ರಸ್ತುತ ಸ್ಪೋರ್ಟ್ಸ್ ಕನ್ನಡ ಚಾನೆಲ್ಡ್ ಬೆನ್ಕೆದ ಮರ್ಗಿಲ್‌‌ಡುಪ್ಪುನ ಕೃತಿ ಟಿವಿ ರಿಯಾಲಿಟಿ ಪಂತೊಲೆಡ್ದ್ ಸ್ಫೂರ್ತಿ ದಿಂಜವೊಂದು ಡ್ಯಾನ್ಸ್, ನಿರೂಪಣಾ ಕ್ಷೇತ್ರಡ್ ಜಿಲ್ಲಾ ಮಟ್ಟದ ಪಂತೊ ಗೆಂದ್‌ದ್ ಜನೊಮೆಚ್ಚಿಗೆ ಪಡೆತೆರ್.

ಕಾತ್ಯಾಯಿನಿ ಟ್ಯೂಷನ್ ಕ್ಲಾಸ್ ಪನ್ಪಿ ಪುದರ್‌ಡ್ ಎಲ್.ಕೆ.ಜಿಡ್ದ್ ಪಿಯುಸಿಮುಟ್ಟದ ಜೋಕುಲೆಗ್ ಟ್ಯೂಷನ್ ಕ್ಲಾಸ್ ಸುರು ಮಲ್ತ್, ಜೋಕುಲೆನ ಮೋಕೆದ ಕಲ್ಪಾದಿಯಾದುಲ್ಲೆರ್. ರಂಗಕಲಾವಿದೆಯಾದ್ ಪೊಲಬು ಪತ್ತೊಂದಿ ಕೃತಿ ಊರುಡು ನಡಪುನ ನಾಟಕ, ಬೀದಿನಾಟಕೊಲೆಡ್ ಅಭಿನಯ ಮಲ್ಪುನ ಒರುಟು ಕಲಾರಸಿಕೆರೆಗ್ ತನ್ನ ಕಲಾಚಾತುರ್ಪುದ ತೂಪರಿಕೆ ಮಲ್ದೆರ್.

ಕಿನ್ಯೆಡೇ ಡ್ಯಾನ್ಸ್ ಕಲ್ಪುನ ಅಬುಲಾಸೆ ಇತ್ತಿನ ಕೃತಿ ತನ್ನ ಸೋದರ ಸಂಬಂಧಿ ವಿದ್ಯಾ ಪನ್ಪಿನಾರೆಡ್ದ್ ನೃತ್ಯಾಭ್ಯಾಸ ಮಲ್ತೆರ್. ದುಂಬಗ್ ತನ್ನ ಸ್ವಂತ ಪುಣೆಪುಡು ಸ್ವಯಂ ಕಲ್ಪುಡು ನಲಿಕೆ ಕಲ್ತ್, ಶಾಲಾ ಕಾರ್ಯಕ್ರಮಕ್ಲೆಡ್ ಡ್ಯಾನ್ಸ್ ಮಲ್ತ್ ಮಾತೆರೆಡ್ದ್ ಸೈ ಪನ್ಪವೊಂದೆರ್. ಅತ್ತಂದೆ ತನ್ನ ಊರುದ ಅಂಚನೇ ಒಳಕಾಡು ಶಾಲೆದ ಜೋಕುಲು, ತಾನ್ ಟ್ಯೂಷನ್ ಕೊರ್ಪಿನ ಬೊಕ್ಕ ಪಂತೊಡು ಪಾಲ್ ಪಡೆಪುನ ಜೋಕುಲೆಗ್ ಡ್ಯಾನ್ಸ್ ಕೋರಿಯೋಗ್ರಫಿ ಮಲ್ತ್, ನಲಿಕೆ ಕಲ್ಪವೊಂದುಲ್ಲೆರ್.

ಚಾನೆಲ್‌ಲೆಡ್ ನಿರೂಪಕಿಯಾದ್, ವಾರ್ತಾವಾಚಕಿಯಾದ್ ಇಪ್ಪುನೊಟ್ಟುಗು ಸಾಧಕಿಯೆರೆನ ಪೊಲಬುದ ನಮ್ಮೂರ ಜಾಣೆ ಕಾರ್ಯಕ್ರಮದ ಸಂದರ್ಶಕಿಯಾದ್ ಸ್ಪಂದನಾ ಚಾನೆಲ್‌ಡ್ ತನ್ನ ಬೆನ್ಕೆದ ಚಾತುರ್ಪು ಮೆರೆತೆರ್. ಬ್ರಹ್ಮಕಲಶ, ಕ್ರೀಡಾಕೂಟ, ಆಟಿಕೂಟ, ರಸಮಂಜರಿ, ಉಡುಪಿ ತುಳುಕೂಟದ ಲೇಸ್ ಸೇರಿನಂಚ ಮಸ್ತ್ ಸಂಘ ಸಂಸ್ಥೆಲೆನ ತುಳು ಕನ್ನಡ ಲೇಸ್ ಸುದಾರಿಕೆ, ಪುಟ್ಟುಪರ್ಬ, ನಿಚ್ಚಯೊ, ಮದಿಮೆ, ಬಯಕೆ, ಬಾಲೆ ತೊಟ್ಟಿಲ್‌ದಂಚಿನ ಲೇಸ್ ಸುದಾರಿಕೆ ಮಲ್ತ್ ಜನೊಮೆಚ್ಚಿಗೆ ಪಡೆತೆರ್. ಅಂಚನೇ ಒಂಜಾತ್ ಕಾರ್ಯಕ್ರಮ ಅಟ್ಟಣೆ ಮಲ್ತ್ ಅಯಿನ್ನ್ ಗೆಂದಯಿನ ಪೆರ್ಮೆದ ಒಟ್ಟುಡು ಕರಿನ ನಾಲ್ ಒರ್ಸೊಲೆಡ್ದ್ ನಿರೂಪಣಾ ಕ್ಷೇತ್ರಡ್ 300ಡ್ದ್ 400ದಾತ್ ಲೇಸ್ ಸುದಾರಿಕೆ ಮಲ್ತ್ ಪುಗರ್ತೆ ಪಡೆವೊಂದೆರ್.

ತನ್ನ ನೆಂಪುದ ಸಂಚಿಡ್ ಒಂಜಾತ್ ಮದಪೆರಾವಂದಿ ನೆಂಪುಲೆನ್ ಕೋತೊನ್ನ ಕೃತಿ ಮೂಡುಬೆಟ್ಟು ತನ್ನ ಸುರುತ ಬೇಲೆ ತಿಕಿನ ಪೊರ್ತುನು ಇಂಚ ನೆಂಪು ಮಲ್ತೊನುವೆರ್. ಪಿಯುಸಿಡ್ ವಿಜ್ಞಾನ ವಿಭಾಗಡ್ 63 ಪ್ರತಿಶತ ಮಾರ್ಕ್ ತಿಕ್‌ದಾನಗ ಇಲ್ಲಡ್ ಈತ್ ಕಮ್ಮಿ ಮಾರ್ಕ್ ದೆತ್ತ್ ದಾದ ಮಲ್ಪೆರಾಪುಂಡು ಕೇನುನ ಅಪ್ಪೆಮ್ಮನ ಪ್ರಶ್ನೆಗ್ ಉತ್ತರ ಕೊರ್ಯರೆ ಆವಂದೆ ಇಪ್ಪುನಗ ಇನ್ಸ್ಟಾಗ್ರಾಮ್ಡ್ ತೂದು ಸ್ಪಂದನಾ ಚಾನೆಲ್ಗ್ ಪೋದು ಸಂದರ್ಶನ ಕೊರ್ದು ಬತ್ತ್, ಸುರುತ ಸರ್ತಿಯೇ ಆಯ್ಕೆ ಆಯಿನವು ಮದಪೆರೆ ಆವಂದಿ ಘಟನೆ. ಅಂಚನೇ ಸುರುತ ಸರ್ತಿ ನಮ್ಮೂರ ಜಾಣೆ ಕಾರ್ಯಕ್ರಮದ ಸಂದರ್ಶನ ಮಲ್ತಿನ ಪೊರ್ತು, ಸುರು ಮೈಮ್ ಮಲ್ತಿನವು, ಕೆಲವೊಂಜಿ ಸೆಲೆಬ್ರಿಟಿಲೆನ ಒಟ್ಟುಡು ಕಾರ್ಯಕ್ರಮದ ಮಿತ್ತರ್ಮೆ ಪಟ್ಟೊಂದಿನ ಪೊರ್ತು ಬದ್ಕ್‌ದ ಅಮೂಲ್ಯ ಕ್ಷಣ ಪಂದ್ ಪನ್ಪುನ ಕೃತಿ ಮೂಡುಬೆಟ್ಟು ನನಲಾತ್ ಉಮೇದ್ ದಿಂಜವೊಂದು ದುಂಬು ಪೋವೊಂದುಲ್ಲೆರ್.

ಪೊಣ್ಣು ಒರ್ತಿ ಸಾಧನೆ ಮಲ್ಪೊಡಾಂಡ ಆಲೆಗ್ ಇಲ್ಲಡ್ ಅಪ್ಪೆಮ್ಮೆರೆ ಸಪೋರ್ಟ್ ಬೋಡು. ಅಂಚಾದ್ ತನಕ್ ಇನಿತ್ತ ಸಾದಿಪುದ ತಾದಿಡ್ ನಡಪೆರೆ ಬೆರಿಬೊಟ್ಟ್‌ದ್ ಉಮೇದ್ ಕೊರ್ನಕ್ಲ್ ತನ್ನ ಅಮ್ಮ ಪೊಪ್ಪ, ಕುಟುಂಬದಕ್ಲ್ ಬೊಕ್ಕ ಸ್ಪಂದನಾ ಚಾನೆಲ್‌ದಕ್ಲ್ ಪನ್ಪಿನ ಒಟ್ಟುಡು ತಾನ್ ಪೋಪಿ ಲೇಸ್‌ಗ್ ಒಟ್ಟುಗು ಬತ್ತ್, ಪಿರ ಇಲ್ಲಗ್ ಕನತ್ ಬುಡ್ಪಿನ ತನ್ನ ದೋಸ್ತಿಲ್ ಪಂದ್ ಪೆರ್ಮೆಡ್ ಪನ್ಪೆರ್.

ಉದಯೋನ್ಮುಖ ಸಾಧಕಿಯಾದ್ ಸಾದಿಪುದ ತಾದಿಡ್ ದುಂಬು ಪೋವೊಂದುಪ್ಪುನ ಕೃಷ್ಣನಿಲೆ ಒಡಿಪುದ ಪೊಣ್ಣು ಮಗಲ್ ಕೃತಿ ಮೂಡುಬೆಟ್ಟು ನನಲಾತ್ ಸಾಧನೆ ಮಲ್ತ್, ಗೆಲ್ಮೆದ ಗಿರಿ ಏರೊಂದು, ಪ್ರಶಸ್ತಿಲೆ ಸರಮಾಲೆಡ್ ಮೆರೆವಡ್. ಆರ್ನ ಸಾಧನಾ ಪಯಣದ ಸತತ ಪುಣೆಪು ಬೊಕ್ಕ ದುಂಬರಿಪುನ ಉಮೇದ್ ದಿಂಜಿ ಉಡಲ್‌ದ ಅಬುಲಾಸೆಗ್ ದೈವೊ ದೇವೆರೆ ಮದಿಪು, ಗುರು ಹಿರಿಯೆರೆ ಆಸ್ರಾದೊ ಇಪ್ಪಡ್ ಪನ್ಪಿ ಅರಿಕೆ ನಮ್ಮವು.