ಒಡಿಪುದ ಅಷ್ಟಮಠೊಟ್ ಒಂಜಾಯಿನ ಶ್ರೀ ಪುತ್ತಿಗೆ ಮಠದ ಸ್ವಾಮೀಜಿಲಾಯಿನ ಶ್ರೀ ಶ್ರೀ ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮೀಜಿಲು ಅರೆನ ವಿಶ್ವ ಗೀತಾ ಪರ್ಯಾಯಡ್ ಮಾತಾ ಭಾಷೆದ ಲಿಪಿಟ್ ಭಗವದ್ಗೀತೆ ಬರೆಪಿನ ಸಂಕಲ್ಪ ಮಲ್ದಿತ್ತುದ್ ಅಯಿತ್ತ ಯಜ್ಞದ ಭಾಗವಾದ್ ಕೋಟಿ ಗೀತಾ ಲೇಖನ ಯಜ್ಞ ಪಂಡುದ್ ಪುದರ್ ಕೊರ್ತೆರ್.ಆ ನಿಟ್ಟುಡ್ ತುಳುನಾಡು ಡ್ ತುಳುಭಾಷೆದ ಲಿಪಿಟ್ ಲಾ ಭಗವದ್ಗೀತೆ ಬರೆಯೊಡ್ ಪನ್ಪಿನ ಉದ್ದೇಶೊಡ್ ಜೈ ತುಳುನಾಡ್ ಸಂಘಟನೆ ಅಟ್ಟಣೆ ಮಲ್ದಿತ್ತುದ್ ಇದಮುಟ ಸುಮಾರ್ 200 ಕ್ ಲಾ ಜಾಸ್ತಿ ಜನ ತುಳುಲಿಪಿಟ್ ಭಗವದ್ಗೀತೆ ನ್ ಬರೆತೆರ್.ಅವ್ವೆನ್ ಒಡಿಪುದ ಕೃಷ್ಣ ಗ್ ಸಮರ್ಪಣೆ ಮಲ್ಪುನ ಒಂಜಿ ವಿಶೇಷ ಕಜ್ಜೊ ಉಂದುವೇ ಬರ್ಪಿನ ನವೆಂಬರ್ 16 ತಾರೀಕು ಗ್ ಬಾರಿ ಗೌಜಿಡ್ ನಡಪರೆಗುಂಡ್ ಪಂಡುದ್ ಕೋಟಿ ಗೀತಾ ಲೇಖನ ಯಜ್ಞದ ಪೂರ್ಣಾವಧಿ ಪ್ರಚಾರಕೆರಾಯಿನ ಶ್ರೀ ಕೆ.ವಿ.ರಮಣಾಚಾರ್ಯೆರ್ ತೆರಿಪಾಯೆರ್.ಆರು ಇನಿ ಒಡಿಪುದ ಪ್ರೆಸ್ ಕ್ಲಬ್ ಡ್ ನಡತಿನ ಪತ್ರಿಕಾ ಗೋಷ್ಠಿಡ್ ಪಾತೆರಿಯೆರ್.ಪುತ್ತಿಗೆ ಸ್ವಾಮೀಜಿಲೆನ ಕೋಟಿ ಗೀತಾ ಲೇಖನ ಯಜ್ಞೊಡ್ ವಿಶ್ವದ ಮಾತಾ ಕಡೇಟುಲಾ ಬಾರೀ ಪ್ರಶಂಸೆನ್ ಪಡೆದಿತ್ತುದ್ ಇತ್ತೆ ತುಲು ಲಿಪಿಟ್ ಬರೆದ್ ಸಮರ್ಪಣೆ ಮಲ್ಪುನ ಕಜ್ಜೊ ಉಂದುವೇ ಬರ್ಪಿನ ನವೆಂಬರ್ 16 ತಾರೀಕುಗ್ ಐತಾರದಾನಿ ನಡಪುನ ಕಜ್ಜೊಡ್ ಹೆಚ್ಚಿನ ತುಳುವೆರ್ ಪಾಲ್ ಪಡೆದ್ ಶ್ರೀ ಕೃಷ್ಣನ ಅನುಗ್ರಹ ಕ್ ಪಾತ್ರರಾವೊಡ್ ಪಂಡೆರ್.
ನವೆಂಬರ್ 16, 2025 ಐತಾರದಾನಿ “ತುಳುವೆರೆ ದಂಡ್” ಪನ್ಪುನ ಮೆರವಣಿಗೆನ್ ಜೈ ತುಳುನಾಡ್ ಸಂಘಟನೆ ಏರ್ಪಾಟ್ ಮಲ್ತ್ದೆರ್.
ಕಾಂಡೆ 9:00 ಗಂಟೆಗ್ ಉಡುಪಿ ಜೋಡುಕಟ್ಟೆರ್ದ್ ಮೆರವಣಿಗೆ ಸುರು ಆದ್ ಶ್ರೀ ಕೃಷ್ಣ ಮಠದ ಗೀತೆ 10:30 ಗಂಟೆಗ್ ಸುರು ಆಪುಂಡು.
. ಅವೆರ್ದ್ ಬೊಕ್ಕ ಗೀತಾ ಮಂದಿರೊಡು ತುಳು ಲಿಪಿಟ್ ಬರೆತಿನ ಗೀತಾ ಗ್ರಂಥೊನು ಉದಿಪನ..
.
- ಈ ಪೋರ್ತುಡ್ ಜೈ ತುಳುನಾಡ್ ಸಂಘಟನೆದ ಕೇಂದ್ರ ಸಮಿತಿದ ಸಂಘಟನಾ ಕಾರ್ಯದರ್ಶಿ ಸಂತೋಷ್ ಕಟಪಾಡಿ ಪಾತೆರ್ದ್ ಪತ್ತೊಂಜಿ ವರ್ಸೊರ್ದಿಂಚಿ ತುಳು ಬಾಸೆದ ಬುಲೆಚಿಲ್ಗಾದ್, ತುಳು ಲಿಪಿ ಒರಿಯಡ್ ಪನ್ಪಿನ ಬೇಲೆನ್ ಮಲ್ತೊಂದು ಬೈದಿನ ಸಂಘಟನೆ ತುಲು ಲಿಪಿಕ್ ವಿಶೇಷವಾಯಿನ ಕೊಡುಗೆ ಕೊರ್ತುಂಡ್.ತುಳು ಬಾಸೆ ಲಿಪಿನ್ ಒರಿಪಾವೊಡು ಪನ್ಪಿನವು ನಾಡ್ ಸಂಘಟನೆದ ಮುಖ್ಯ ಉದ್ದೇಶ.
300 ಡ್ದ್ ಜಾಸ್ತಿ ತುಳು ಲಿಪಿ ಶಿಕ್ಷಕೆರೆಗ್ ತರಬೇತಿ ಕೊರ್ದು, 50,000 ಡ್ದ್ ಜಾಸ್ತಿ ವಿದ್ಯಾರ್ಥಿಲು ತುಳು ಲಿಪಿ ಕಲ್ತೊಂದುಲ್ಲೆರ್.
ತುಲುಬಾಸೆಡ್ ಭಗವದ್ಗೀತೆ ಬರೆಪಿನಕುಲು, ಸಂಘದ ಸದಸ್ಯೆರ್, ತುಳುಪ್ರಿಯೆರ್, ಬೊಕ್ಕ ಒಡಿಪು ಶ್ರೀಕೃಷ್ಣ ನ ಭಕ್ತೆರ್ ಈ ಕಜ್ಜೊಡ್ ಪಾಲ್ ಪಡೆದ್ ಗೆಂದಾದ್ ಕೊರೊಡು ಪಂಡೆರ್.ಈ ಪೊರ್ತುಡ್ ಜೈ ತುಳುನಾಡ್ ಸಂಘಟನೆದ ಒಡಿಪು ಎಗ್ಗೆದ ಗುರ್ಕಾರ್ದಿ ಸುಶೀಲ ಜಯಕರ್,ಒತ್ತು ಕಾರ್ಯಂತೆರಾಯಿನ ಸುಪ್ರೀತಾ ಪುತ್ರನ್,ಪಣವುದ ಪಾಲವೆರಾಯಿನ ಸುಪ್ರಿಯಾ ಅಖಿಲೇಶ್,ಕಿರಣ್ ಬಂಟ ಕಲ್ಲು ಉಪಸ್ಥಿತರಿತ್ತೆರ್.
by 