ಆನಂದ ಶರಧಿಡ್ ಮಾತ್ರವಂದನೆ

ಆನಂದ ಶರಧಿಡ್ ಮಾತೃ ವಂದನಾ ಕಾರ್ಯಕ್ರಮ
ಉಡುಪಿ: ಆಚಾರ್ಯ ಮಧ್ವರೆಗ್  ಕೃಷ್ಣ ಪ್ರತಿಮೆ ತಿಕ್ಕಿನ ಪರಮ ಪವಿತ್ರ ಜಾಗೆ  ಮಲ್ಪೆ ಕಡಲತೀರ ಶತಮಾನಡ್ದ್  ಧಾರ್ಮಿಕವಾದ್ ಮಹತ್ವ ಪಡೆದುಂಡ್.. ಇಂಚಪ್ಪೊಗ್ ಪ್ರವಾಸಿತಾಣವಾದ್ ಮಾರ್ಪಾಡಾದ್ , ಕುಡೊರ ಆಧಾತ್ಮಿಕ ಜಾಗೆ ಆದ್  ಬದಲಾವೊಡ್  ಪಂಡುದು ಕೃಷ್ಣಾಪುರ ಮಠದ ಶ್ರೀವಿದ್ಯಾಸಾಗರತೀರ್ಥ ಶ್ರೀಪಾದೆರು ತೆರಿಪಾದೆರು.
ಮಲ್ಪೆ ಕಡಲ ತೀರದ ಆನಂದ ಶರಧಿಡ್  ಶ್ರೀಕೃಷ್ಣ ಪರಿಸರ ಪ್ರತಿಷ್ಠಾನ ವತಿಡ್ದ್  ಮಾತೃ ವಂದನಾ ಕಾರ್ಯಕ್ರಮ ಉದಿಪನ ಮಲ್ತುದ್ ಅನುಗ್ರಹ ಸಂದೇಶ ಕೊರಿಯೆರು. ಜಾಗೆದ ಪಾವಿತ್ರ್ಯತೆ ಹೆಚ್ಚಿಸಾವರೆಗ್ ಭಜನೆ , ಮಾತೃವಂದನೆ ಇಂಚಿನ ಕಾಯಕ್ರಮದ ಮೂಲಕ ಜನಕ್ಲೆನ ಸಮಾಗಮ ಏರ್ಪಡ್ ಮಲ್ದುಂಡ್.. ಮಧ್ವಾಚಾರ್ಯರೆನ ಇಷ್ಟಾರ್ಥ ನೆರವೇರಿಸಾಯಿನ ಈ ಜಾಗ ಜನಕ್ಲೆನ ಬಯಕೆಲೆನ್ ಈಡೇರಿಸಾವುಂಡ್ ಪಂಡೆರು.
ವಾಗ್ಮಿ ಬೊಕ್ಕ ಆಧ್ಯಾತ್ಮಿಕ ಚಿಂತಕಿ ಡಾ. ಆರತಿ ವಿ. ಬಿ. ದಿಕ್ಸೂಚಿ ಭಾಷಣ ಮಲ್ತುದ್, ಇಲ್ಲ್ ಮಹಿಳೆಗ್ ಕರ್ಮಯೋಗದ ವೇದಿಕೆ. ಸ್ತುತಿ ಬೊಕ್ಕ ನಿಂದನೆಗ್ ಪೋಡಂದೆ ಕುಟುಂಬನ್ ಪೋಷಣೆ ಮಲ್ತಿನ  ಕರ್ಮಫಲನ್  ದೇವೆರು ಗೃಹಿಣಿಗೆ ಕೊರ್ಪೆ. ಸನಾತನ ಧರ್ಮಡ್  ಸ್ತ್ರೀ ಲಕ್ಷ್ಮೀ ಸ್ವರೂಪಿಣಿ ಪಂಡುದು ಪಂಡೆರು.ವೇದಿಕೆಡ್ ಐನ್ ಜನ ಮುತ್ತೈದೆಯೆರೆಗ್ ವಿಶೇಷ ಮಾನಾದಿಗೆ ಮಲ್ತೆರ್.
ಕರ್ನಾಟಕ ಬ್ಯಾಂಕ್‌ ದ  ಡಿ.ಜಿ.ಎಂ. ವಾದಿರಾಜ್,  ಪ್ರತಿಷ್ಠಾನದ ಕಾರ್ಯದರ್ಶಿ ರತ್ನಕುಮಾರ್, ಹಿರಿಯ ಸಂಘಟಕಿ ಉಷಾ ಎ. ಸುವರ್ಣ, ಎಸ್.ಎ..ಎಸ್.ಎಸ್.. ಜಿಲ್ಲಾ ಮಹಿಳಾ ಘಟಕದ ಅಧ್ಯಕ್ಷೆ ತಾರಾ ಉಮೇಶ್ ಆಚಾರ್ಯ,   ಸಂಗೀತ ವಿದುಷಿ ಉಷಾ ಹೆಬ್ಬಾರ್, ಮಣಿಪಾಲ ಮಹಿಳಾ ಸಮಾಜದ ಅಧ್ಯಕ್ಷೆ ವೈಜಯಂತಿ ಕಾಮತ್, ಜಿಲ್ಲಾ ಬಿಜೆಪಿ ಮಹಿಳಾ ಮೋರ್ಚಾ ಅಧ್ಯಕ್ಷೆ ಸಂಧ್ಯಾ ರಮೇಶ್, ನಿಕಟಪೂರ್ವ ನಗರಸಭಾ ಸದಸ್ಯೆ ರಶ್ಮಿ ಭಟ್, ಲಕ್ಷಿ ಮಂಜುನಾಥ್‌, ಜಿಲ್ಲಾ ಮಹಿಳಾ ಕಾಂಗ್ರೆಸ್ ಅಧ್ಯಕ್ಷೆ ಜ್ಯೋತಿ ಹೆಬ್ಬಾರ್, ಶೋಭಾ ಉಪಾಧ್ಯಾಯ,ವೀಣಾ ಶೆಟ್ಟಿ ಮೊಕುಲು ಉಪಸ್ಥಿತರಿತ್ತೆರು. ಕಾರ್ಯಕ್ರಮಡ್  ಪಾಲ್ ಪಡೆಯಿನ ಮಾತಾ ಅಪ್ಪೆನಕ್ಲೆಗ್ ಪೊಣ್ಣು ಜೋಕ್ಲೆಗ್ ಕಾಜಿ ,ಅರಶಿನ ಕುಂಕುಮ ಪೂ ಕೊರ್ದು ಮಾನಾದಿಗೆ ಕೊರಿಯೆರ್..  ಕೃಷ್ಣಾಪುರ ಮಠದ ಶ್ರೀಕುಲು ಪುಂಗನೂರು ತಳಿತ್ತ  ಪೆತ್ತೊಗ್  ಪೂಜೆ ಮಲ್ತೆರು.