ನಕಲಿ ಪತ್ರಕರ್ತೆರೆನ ವಿರುದ್ಧ ಕಾನೂನು ಕ್ರಮ ದೆತೊನೊಡ್ ಪಂಡುದ್ ಎಸ್ಪಿಗ್ ಮನವಿ
ಕೆಲವರೆನ್ ಪೋಡಿಪಾದ್ ಕಾಸ್ ವಸೂಲಿ ಮಲ್ತೊಂದುಪ್ಪುನ ನಕಲಿ ಪತ್ರಕರ್ತೆರೆನ ವಿರುದ್ಧ ಸೂಕ್ತ ಕಾನೂನು ಕ್ರಮ ದೆತೊನೊಡ್ ಪಂಡುದ್ ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ನಿಯೋಗ ಗುರುವಾರ ಉಡುಪಿ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಅಕ್ಷಯ್ ಹಾಕೇ ಮಚ್ಚೀಂದ್ರ ಅರೆಗ್ ಮನವಿ ಕೊರ್ತುಂಡ್.
ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘ ಬೆಂಗಳೂರು ನೆತ್ತ ಅಧೀನ ಸಂಸ್ಥೆಯಾದುಪ್ಪುನ ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘಡ್ ಸುಮಾರು 170 ಮಂದಿ ಸದಸ್ಯೆರು ಪ್ರಾಮಾಣಿಕರಾದ್ ಕರ್ತವ್ಯ ಮಲ್ತೊಂದುಲ್ಲೆರ್. ಆಂಡ ಇಂಚಪ್ಪೊಗ್ ಜಿಲ್ಲೆಡ್ ಕೆಲವು ವ್ಯಕ್ತಿಲು ಪತ್ರಕರ್ತರ ಸಂಘ ಬೊಕ್ಕ ಪತ್ರಕರ್ತೆರೆನ ಪುದರ್ ಪನೊಂದ್ ಕಾಸ್ , ವಸೂಲಿ ಮಲ್ಪುನ ಬೊಕ್ಕ ಪೋಡಿಪಾವುನ ಕೆಲಸೊಡ್ ತೊಡಗಿಸಾವೊಂದುಪ್ಪುನವ್ ಸಂಘದ ಗಮನೊಗ್ ಬೈದುಂಡ್.
ಒವ್ವೇ ಪತ್ರಿಕೆ ಅತ್ತುಂಡ ಟಿವಿಡ್ ಸುದ್ದಿ ಪ್ರಕಟಿಸಾವರೆಗ್ ಅತ್ತುಂಡ ಪ್ರಸಾರ ಮಲ್ಪರೆಗ್ ಕಾಸ್ ಕೊರ್ಪಿನ ಅಗತ್ಯ ಇಜ್ಜಿ.. ಆಂಡಲಾ ಕೆಲವು ನಕಲಿ ಪತ್ರಕರ್ತೆರು ಸುದ್ದಿದ ಪುದರುಡ್ ಕಾಸ್ ವಸೂಲಿ ಮಲ್ಪುನ ದಂಧೆಗ್ ಜತ್ತುದಿನ ಬಗ್ಗೆ ಸಂಘೊಗ್ ದೂರುಲು ಬೈದುಂಡ್.ಇಂಚ ಪತ್ರಕರ್ತೆರೆನ ಪುದರುಡ್ ಕಾಸ್ ವಸೂಲಿ ಮಲ್ಪುನ ನಕಲಿ ಪತ್ರಕರ್ತೆರೆನ ವಿರುದ್ಧ ಕಾನೂನು ಕ್ರಮ ದೆತೊನೊಡ್ ಪಂಡುದು ಮನವಿಡ್ ಒತ್ತಾಯ ಮಲ್ದೆರ್.
ಅಂಚೆನೇ ಪ್ರಸ್ತುತ ಚುನಾವಣೆ ಪ್ರಯುಕ್ತ ಜಿಲ್ಲೆಡ್ ಪೊಲೀಸ್ ಇಲಾಖೆ ಚೆಕ್ಪೋಸ್ಟ್ಲೆನ್ ನಿರ್ಮಾಣ ಮಲ್ತುದ್ ತಪಾಸಣೆ ಕಾರ್ಯೊಡ್ ತೊಡಗಿಸಾವೊಂದ್ , ಈ ಹಿನ್ನೆಲೆಡ್ ಕೆಲವು ವ್ಯಕ್ರಿಲು ತಮ್ಮ ವಾಹನೊಲೆಗ್ ಮಿಡಿಯಾ, ಪ್ರೆಸ್ ಸ್ಟಿಕ್ಕರ್ ಪಾಡೊಂದ್ ಅಕ್ರಮ ಚಟುವಟಿಕೆಲೆನ್ ಮಲ್ತೊಂದುಪ್ಪುನ ಬಗ್ಗೆ ಸಂಘೊಗ್ ದೂರು ಬೈದುಂಡ್. ಈ ರೀತಿದ ವಾಹನೊಲೆನ್ ಚೆಕ್ಪೋಸ್ಟ್ ಲೆಡ್ ಅಗತ್ಯ ತಪಾಸಣೆ ಮಲ್ಪೊಡ್ ಬೊಕ್ಕ ಅಯಿಟ್ ಒವ್ವೇ ಅಕ್ರಮ ಚಟುವಟಿಕೆ ತೋಜಿದ್ ಬತ್ತುಂಡ ಕೂಡಲೇ ಕ್ರಮ ದೆತೊನೊಡ್ ಪಂಡುದು ಮನವಿಡ್ ತೆರಿಪಾದೆರ್.
‘ನಮ್ಮ ಸಂಘದ ನಮ್ಮ ಸದಸ್ಯರೆಗ್ ಗುರುತು ಚೀಟಿ ಬೊಕ್ಕ ವಾಹನೊಲೆಗ್ ಅಧಿಕೃತ ಮಿಡಿಯಾ ಸ್ಟಿಕ್ಕರ್ ನ್ ಕೊರ್ತುಂಡ್.. ಪತ್ರಕರ್ತೆರೆನ ಪುದರುಡ್ ಏರೇ ಕಾಸ್ ವಸೂಲಿಗ್ ಬತ್ತುಂಡ ಅಕಲ್ನ ವಿರುದ್ಧ ಸ್ಥಳೀಯ ಪೊಲೀಸ್ ಠಾಣೆಲೆಗ್ ದೂರು ಕೊರೊಡ್ ಅಂಚೆನೇ ನಮ್ಮ ಸಂಘದ ಗಮನೊಗ್ ಕನವೊಡ್ ಪಂಡುದು ಸಂಘದ ಜಿಲ್ಲಾಧ್ಯಕ್ಷ ರಾಜೇಶ್ ಶೆಟ್ಟಿ ಅಲೆವೂರು ತೆರಿಪಾದೆರ್.
ನಿಯೋಗಡ್ ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ, ಕೋಶಾಧಿಕಾರಿ ಉಮೇಶ್ ಮಾರ್ಪಳ್ಳಿ, ಜತೆ ಕಾರ್ಯದರ್ಶಿಲಾಯಿನ ರಹೀಂ ಉಜಿರೆ, ಪ್ರಮೋದ್ ಸುವರ್ಣ, ಕಾಪು ತಾಲೂಕು ಪ್ರಧಾನ ಕಾರ್ಯದರ್ಶಿ ಪುಂಡಲೀಕ ಮರಾಠೆ, ಜಿಲ್ಲಾ ಸಮಿತಿ ಸದಸ್ಯೆರಾಯಿನ ಮೈಕಲ್ ರೋಡಿಗ್ರಸ್, ಹರೀಶ್ ಬಲಾಯಿಪಾದೆ, ಸಂಘದ ಸದಸ್ಯೆರಾಯಿನ ಶಶಿಧರ ಮಾಸ್ತಿಬೈಲು, ದೀಪಕ್ ಜೈನ್, ದಿನೇಶ್ ಎಂ.ಎಚ್., ಚೇತನ್ ಮಟಪಾಡಿ, ಅಶ್ವತ್ ಆಚಾರ್ಯ, ಜಸ್ಟಿನ್ ಡಿಸಿಲ್ವ, ಗೋಪಾಲಕೃಷ್ಣ ಪಾದೂರು, ರಕ್ಷಿತ್ ಬೆಳಪು, ನಾಗರಾಜ ರಾವ್, ಬಾಲಚಂದ್ರ ಎಚ್. ಮೊಕುಲು ಉಪಸ್ಥಿತರಿತ್ತೆರು.
by 