ಕ್ರಿಸ್ಮಸ್ ಸ್ನೇಹ ಕೂಟ

ಮಾತಾ ಧರ್ಮದ ಬಗ್ಗೆ ತೆರಿಯೊಂದು ಬದುಕುಗ – ಎಸ್ಪಿ ಹರಿರಾಮ್ ಶಂಕರ್
ಉಡುಪಿ: ಮಾತಾ ಧರ್ಮಲೆನ  ಆಚರಣೆ ಬೊಕ್ಕ ಸಂಸ್ಕೃತಿದ ಬಗ್ಗೆ ಅರಿತೊನೊಂದ್  ಸಮಾಜಡ್  ಶಾಂತಿದ  ಸಂದೇಶ ಸಾರಿಲೆಕ್ಕಾಪುಂಡ್ ಪಂಡುದು ಉಡುಪಿ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಹರಿರಾಮ್ ಶಂಕರ್ ಪಂಡೆರು.
ಆರು ಶನಿವಾರ ಉಡುಪಿ ಧರ್ಮಪ್ರಾಂತ್ಯದ ವತಿಡ್ದ್  ಮಾಧ್ಯಮ ಮಿತ್ರೆರೆನೊಟ್ಟುಗ್  ಆಯೋಜನೆ ಮಲ್ದಿತ್ತಿನ  ಕ್ರಿಸ್ಮಸ್ ಸ್ನೇಹ ಕೂಟ ಕಾರ್ಯಕ್ರಮ ಉದ್ಘಾಟನೆ ಮಲ್ತುದ್  ಪಾತೆರಿಯೆರು.
ಮಾತಾ  ಸಮುದಾಯಕುಲು ಒಟ್ಟಾಧ್  ಸೇರೊಂದು ಆಚರಣೆ ಮಲ್ಪುನ ಪರ್ಬ  ಕ್ರಿಸ್ಮಸ್ , ಸಮಾಜದ ಏಕತೆನ್ ಗಟ್ಟಿ ಮಲ್ಪರೆಗ್ ವಿಶ್ವದ ಮಾತಾ ಧರ್ಮದ ಮೂಲ ಉದ್ದೇಶವಾದುಂಡ್. ಸಮಾಜನ್  ಒಟ್ಟುಮಲ್ಪುನೇಟ್  ಧರ್ಮದ ಮಹತ್ವದ ಪಾತ್ರ ಉಂಡು. ಧರ್ಮ ಜನಕ್ಲೆನ್ ಧರ್ಮ, ಸಾಮಾಜಿಕ, ಆಧ್ಯಾತ್ಮಿಕವಾದ್ ಪ್ರಭಾವ ಮಲ್ಪುಂಡ್. ಪ್ರತಿಯೊಂಜಿ  ಧರ್ಮ ಸಮಾಜಡ್  ಒಗ್ಗಟ್ಟುದ ಭಾವನೆ ಮೂಡಿಸಾವುಂಡ್. ಈ ಮೂಲಕ ಬಲಿಷ್ಠ ಭಾರತ ನಿರ್ಮಾಣಡ್ ಪ್ರತಿಯೊರಿಲಾ ಕೈಜೋಡಿಸಾಗ ಪಂಡುದು ಶುಭ ಹಾರೈಸಿಯೆರು.
ಕಾರ್ಯಕ್ರಮದ ಅಧ್ಯಕ್ಷತೆಡ್ ಉಡುಪಿ ಧರ್ಮಪ್ರಾಂತ್ಯದ ಧರ್ಮಾಧ್ಯಕ್ಷರಾಯಿಪ ಅತಿ ವಂ|ಡಾ|ಜೆರಾಲ್ಡ್ ಐಸಾಕ್ ಲೋಬೊ ಇತ್ತೆರ್. ಆರ್ ಪಾತೆರ್ದ್  ಪ್ರಭು ಯೇಸು ತಮ್ಮ ಸ್ವರ್ಗದ ಸಾಮ್ರಾಜ್ಯನ್  ಬುಡುದ್  ಕಿದೆಟ್ ಪುಟ್ಟಿಯೆರು. ಮಾನವ ದೇವರೆಡ್ದ್  ದೂರ ಪೋಯಿನಪಗ, ಪಾಪಕೂಪಡ್  ಬೂರಿನಪಗ ಆರು ಬತ್ತುದ್, ಕುಡೊರ ಮಾನವರೆನ್ ದೇವೆರ್ ಮಲ್ಪರೆಗ್ ಪ್ರಯತ್ನ ಮಲ್ತೆರು. ಭೂಲೋಕಡ್ ಶಾಂತಿಗಾದ್ ಶ್ರಮ ಮಲ್ತಿನಕುಲು ಭಾಗ್ಯವಂತೆರು ಪಂಡುದು ಯೇಸು ಸ್ವಾಮಿ ಸಾರುದಿತ್ತೆರ್ ಅರೆನ ಸಂದೇಶದಂಚ ಬದುಕುಗ ಪಂಡೆರು.
ಕಾರ್ಯಕ್ರಮಡ್ ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಪೊಸ ಆಯ್ಕೆಯಾಯಿನ ಪದಾಧಿಕಾರಿಲೆನ್ ಧರ್ಮಪ್ರಾಂತ್ಯದ ವತಿಡ್ದ್ ಮಾನಾದಿಗೆ ಮಲ್ತೆರ್..
ಎಮ್ ಸಿ ಸಿ ಬ್ಯಾಂಕ್ ದ ಅಧ್ಯಕ್ಷೆರಾಯಿನ ಅನಿಲ್ ಲೋಬೊ, ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷೆರಾಯಿನ ಸುಜಿ ಕುರ್ಯ ಶುಭ ಹಾರೈಸಿಯೆರು.
ಕಾರ್ಯಕ್ರಮಡ್ ಉಡುಪಿ ಧರ್ಮಪ್ರಾಂತ್ಯದ ಶ್ರೇಷ್ಠಗುರು ಮೊನ್ಸಿಂಜ್ಞೊರ್ ಫರ್ಡಿನಾಂಡ್ ಗೊನ್ಸಾಲ್ವಿಸ್, ಕುಲಪತಿ ವಂ|ಸ್ಟೀವನ್ ಡಿಸೋಜಾ ಉಪಸ್ಥಿತರಿತ್ತೆರು.
ಉಡುಪಿ ಧರ್ಮಪ್ರಾಂತ್ಯದ ಸಾರ್ವಜನಿಕ ಸಂಪರ್ಕಾಧಿಕಾರಿ ವಂ|ಡೆನಿಸ್ ಡೆಸಾ ಸ್ವಾಗತಿಸಿ ಮಾಧ್ಯಮ ಸಂಚಾಲಕ ಮೈಕಲ್ ರೊಡ್ರಿಗಸ್ ವಂದಿಸಾಯೆರು. ಲೆಸ್ಲಿ ಆರೋಝಾ ಕಾರ್ಯಕ್ರಮ ನಿರೂಪಣೆ ಮಲ್ತೆರು.