ಅಡ್ಡ ಒರುಂಕು ತಡಮೆ

ಅಡ್ಡ ಒರುಂಕು ತಡಮೆ ಈ ಸಬುದೊನು ಕೆಲವೆರಾತೇ ಕೇನ್ದುಪ್ಪೆರ್ ಆತೇ.

“ಅಡ್ಡ”, ಸಬುದ ಕನ್ನಡ ಬಾಸೆಡ್ಲಾ ತುಲುತ ಅರ್ಥೊಡೇ ಇಪ್ಪುನವು.
“ಒರುಂಕು”,ಈ ಸಬುದೊನು ಇತ್ತೆದ ಜನಮಾನಿಲ್ ಅಪೂರ್ಪೊಗು ಗಳಸೊಂದುಲ್ಲೆರ್.
“ತಡಮೆ” ಈ ಪದನ್ ಇತ್ತಿತ್ತೆದಕ್ಲೆಗ್ ತೆರಿಪಾಯೆರೆ”ಗೇಟ್ ಬಾಕಿಲ್” ನ್ ತೂಪಾವೊಡಾತೆ.
ಅಂಚಾಂದ್ ಈ ಅಡ್ಡ ಒರುಂಕು ತಡಮೆ ಬಗೆಟ್ ದಾಲಾ ಗೊತ್ತುಪ್ಪಂದ್ಂದ್ ಬಜೀ ಬುರ್ನಾಸ್ ಆವೊಡುಂದಿಜ್ಜಿ. ಒಂಜಾತ್ ಮಂದಿಲು ಉಂದೆನ್ ತೂದುಪ್ಪೆರ್. ಅವೆನ್ ಕಡತ್ ಪೋದೇ ಗೆಲ್ಮೆನದ ಸಾದಿ ಪತ್ತ್‌ದ್ ದುಂಬತ್ತೊಂದು ಕೆಲವೆರ್ ನಡತ್‌ ಪೋದುಪ್ಪೆರ್. ಊರು ದೇಸೊ ಲೋಕೊಡು ಮಾಮಲ್ಲ ಪುದರ್ ಪಡೆದುಪ್ಪೆರ್.

‌ ದುಂಬುದ ಕಾಲೊ ಬೆನ್ನಿ ಬೆನ್ಕೆನೇ ಎಚ್ಚಾದ್ ಇತ್ತಿನವು.ಕೆಲವೆರಾತೇ ಕಂಗ್ ದೈತ ತೋಟ ಮಲ್ತೊಂದಿತ್ತಿನೆ. ಅಕ್ಲೆನ ಆತ್ ಮಲ್ಲ ಜಾಗೆಗ್ ಕಲ್ಲ ಸಾಲ್ ಏರಾದ್ ಮುಳ್ಳ ಬೇಲಿದ ಅಗರ್ ಮಲ್ತೊಂದಿತ್ತೆರ್.ಕಾಡ ಪಂಜಿ, ಕಸುಬು ದಾಂತೆ ಕಲ್ವೆರ್ ಆತಿನಕ್ಲೆ ಸೊಂಟೊ ಪೊಲಿದ್ ಪೋಪಿಲೆಕೊ ಅಗರ್ ಏರಾದ್ ಗುಂಡಿ ತೋಡಾದ್ ನೆಮ್ಮದಿಡ್ ಇಪ್ಪೆದೆರ್.
ಆಂಡಾ,ಅಂಚಿಂಚಿದ ಇಲ್ಲಲೆಗ್ ಕೂಡೊಟ್ಟುಡು ಪೋದು ಬರೊಡಾಂಡ , ಕೂಡುಕಟ್ಟ್‌ದ ಬೆನ್ನಿ ಸಾಗೊಲಿಗ್ ಒದಗುನ ಎರುಕುಲೆನ್ ದೇರೊಂದು ಪೋವೆರೆಗ್ ಸುಲಬ ಆಪಿಲೆಕೊ , ಕೈಕಂಜಿಲೆನ್ ಮೇಯೆರೆ ಗುಡ್ಡೆಗ್ ಬುಡೆರೆಂದ್, ಪತ್ತೊರ್ಮೆದ ಮಂದಿಲೊಟ್ಟುಡು ಆಟ ನಾಟಕ ಕೋಲ ಜಾತ್ರೆಗ್ ಇಲ್ಲದಕುಲುಲಾ ಪೋದು ಬರೊಡಾಂಡ, ಮದ್ಮೆ ಮಸ್ಸಿರಿಗ್ ಕೂಡೊಟ್ಟಾದ್ ಪೋದು ಪೊರ್ಲಾವೊಡಾಂಡಾ…
ಇಂಚಿತ್ತಿ ಪೊರ್ತುಲೆಗೇ ಒದಗೆರೆಂದ್, ಕಲ್ಲಕೋಟೆದ ಗಡಿ ದೀವೊಂದು ರಡ್ಮೂಜಿ ಕೊಲು ಅಗೆಲದ ಬೆದ್‌ರ್‌ದಂಡೆದ “ತಡಮೆ” ಕಟ್ಟಾವೊಂದಿತ್ತೆರ್ . ಎಲ್ಯ ಮಟ್ಟ್ ಜಾಗೆದಕುಲು, ಇಲ್ಲದ ಸುತ್ತುದ ಅಗರ್ಗ್ ನಾಲ್ ಮೆಯಿಟ್ "ಅಮ್ಚ" ಮಲ್ತೊಂದು ಸುದಾರ್ತೊಂದು ಪೋವೊಂದಿತ್ತೆರ್. ರಡ್ಡ್ ಬರಿಟ್ ಒಂಜಿ- ಒಂಜರೆ ಕೋಲು ಕಲ್ಲ ಗೋಡೆ. ನಡುಟೊಂಜಿ ಉದ್ದ ಕಲ್ಲ್ ಊರೊಂದು, ಇಜ್ಜಿಂಡ ಅಡ್ಡಡ್ಡ ತುಚ್ಚಾದ್ ಬೊಕ್ಕಲಾತ್ ಜಾಗ್‌ರ್ತೆ ಒದಗಾವೊಂದಿತ್ತೆರ್. ಅವೆನ್ ತೂನಗನೇ, ಏರೆನ ಇಲ್ಲ್ಂದ್ ಗೊತ್ತಾಪುಲೆಕ ಪೂತ ದೈಕುಲು ತೆಲಿತೊಂದುಪ್ಪೆದ್ಂಡ್. ಕಂಡು ಕಲ್ವೆರ್, ಸೋಣೊದ ನಾಯಿಲು, ಗಾಡೊದ ಗಡಸುಲು ಬೀರ ಪೋಪುನ ಕಯಿಕಂಜಿಲು, ಅಂಚಿತ್ತಿ ಅಮ್ಚನ್ ಅಡಿ ದಾಂತಿಲೆಕೊ ದಾಂಟೊಂದು ಪೋಪುನೆನ್ ತೂದಾನಗನೇ ಉಂಡಾಯಿನೆ...ಈ "ಅಡ್ಡ ಒರುಂಕು ತಡಮೆ"! ಬಲತ ಮೆಯಿಟ್ ಪೊಗ್ಗೆರೆ ಒಂಜಿ -ಒಂಜರೆ ಅಡಿತ ಅದೆ,ನಡುಟು ಅಡ್ಡ ಪಜ್ಜೊಗು ರಡ್ಡ್ ಅಡಿ ಜಾಗೆ, ಬೊಕ್ಕೊಂಜಿ ಒಂಜಿ -ಒಂಜರೆ ಅಡಿತ ಅದೆ ದತ್ತ ಮೆಯಿಟ್ ಪಿದಾಯಿ ಪೋಯೆರೆಗ್ಂದ್ ಕಟ್ಟೊಂದಿತ್ತೆರ್. ಈ ದತ್ತ ಬಲತ ಅದೆಕ್‌ಲೆಗ್ ಉದ್ದ ಕಲ್ಲ್‌ನ್ ಮೊರಂಪುಡ್ದು ಮಿತ್ತ್ ಬರ್ಪುಲೆಕ "ಅಡ್ಡ" ದೀವೊಂದು ಈ ಅಮ್ಚನ್ ಮಲ್ಪೆದೆರ್. ಏತೇ ಅಂಬರೆಪ್ಪು ಅಮಸರದಕುಲಾಂಡಲಾ ಈ "ಅಡ್ಡ ಒರುಂಕು ತಡಮೆ" ದಾಂಟೊಡಾಂಡ ಪತ್ತ್ ಮಿಗ್‌ತ್ ಉಸುಲೊಯ್ತ್ ಬುಡೊಂದು(ಸುದಾರ್ತೊಂದು!) ಇಂಚಿಡ್ದ್ ಅಂಚಿಗ್ ಪಜ್ಜ ಜಾರಾವೊಡೇ!! ಅಂಚಿತ್ತಿ ಆ ಅಮ್ಚದ ಬೆಪ್ಫು ಬೆಚ್ಚ ಜಾಗೆಡ್ ಉಚ್ಚು ಪರಣೆಲು ಚೇಲ್ ಕೊಂಬಚ್ಚೇಲ್ ಒರ್ಯಕ್ಕೊರ್ಯನ್ ಮುಕ್ಕು ಮುಗಿಪೆರೆಲಾ ಕಾತೊಂದಿಪ್ಪುಂಡು! ಅಂಚಾದೇ ಕತ್ತಲೆ ಆವೆರೆ ದುಂಬೇ ಇಲ್ಲದಕುಲು ಇಲ್ಲದುಲಯಿ ಪೊಗ್ಗುದು ಜೆಪ್ಪ ಇಪ್ಪೆದೆರ್. ಅನಪತ್ಯೊಗು ರಾತ್ರೆದ ಪೊರ್ತುಡು ಅವೆನ್ ಕಡತ್ ಪೋವೊಡಾಂಡ ಮಡಲ್ದ ಸೂಟೆ ಪತೊನೊಡೇ...ಏರಾಂಡಲಾ ಬನ್ನಗ, ಅಂಚೆನೇ ಎದ್ಕೊನೆರೆಲಾ. ಪಚ್ಚ ಪಗೆಲ್ ಪೊರ್ತುಗುಲಾ ಏರಾಂಡಲ ಅವೆನ್ ದಾಂಟ್‌ದ್ ಬರ್ಪಿ ಸೌದ ಕೇನ್ಂಡಾ... ಕಟ್ಟ್ ಪಾಡಂದಿತ್ತಿ ಇಲ್ಲ ನಾಯಿ ಕೊರೆತೊಂದೇ ಎದುರುಂತುದು ಎದ್ಕೊನುವ!

ಈ “ಅಡ್ಡ ಒರುಂಕು ತಡಮೆ” ನಮನ ಇಲ್ಲ್‌ನ್, ಜಾಲ್‌ನ್,ಜಾಗೆನ್,ಊರುನು ಕಾಪುನ ಕಾಪು ಮಾನಿಂದೇ ಎನ್ನೊಲಿ.ಅವ್ವು ಪ್ರತಿಯೊಂಜಿ ದೇಸೊದ ಉದ್ದಗಲೊಡು ಬೇತೆ ಬೇತೆ ಸುರ್ಪೊಡು ನಿಲೆ ಆದುಂಡು.ಈ ಭರತಪ್ಪೆನ ಮೂಜಿ ಮೂಲೆದ ಕಡಲ ಕರೆಟ್ ಇಂಚಿತ್ತಿ ತಡಮೆ ಏತುಂಡುಂದು ಮಿಲಿಟ್ರಿದಾಕ್ಲೆಗೇ ಗೊತ್ತು ಇಪ್ಪೊಡು. ದೇಸೊದ ಮಿತ್ತ ಮೆಯಿಟ್ ತಿಗಲೆ ದೇರ್ತುಂತಿನ ಮಂಜಿದಿಂಜಿನ ಪರ್ವತೊಲೆ ರಾಸಿ (ಹಿಮಾಲಯ) ಇಂಚೆನೇ ದೆಂಜಿ ತಡಮೆದ ಒರುಟು ಕಾತೊಂದುಂಡು. ಅವೆತ ಅಡಿಕ್ ಪುಡ್ಯೊಂದು,ಪೊರುಂಬೊಂದು ಇಪ್ಪುನ ಕೋಟಿ ಕೋಟಿ ಕಾಪು ಮಾನಿಲೇ...ನಮನ ದೇಸೊದ ಮಾಮಲ್ಲ ಅಡ್ಡ ಒರುಂಕು ತಡಮೆಲು! ಈತೆನ್ ಬರೆದಾನಗ ಎನ್ನ ಜೋಕ್ಲಾಟಿಕೆದ ದಿನೊಕುಲು ನೆಂಪಾವಂದಿಪ್ಪಾ?

ಕಣ್ಮುಚ್ಚಾಲೆ ಗೊಬ್ಬುನಗ ಎಚ್ಚಿನಕುಲು ಉಂದುವೇ ತಡಮೆದ ನಡು ಜಾಗೆಡ್ ದೆಂಗ್‌ದ್ ಕುಲ್ಲೆರೆ ಬಲಿಪುನೆ.ಏರಾಂಡಲ ಆ ಅದೆತಡೆ ದೆಂಗೆರೆ ಬನ್ನಗ ಬೇತೇರಾಂಡಲಾ ಆ ಜಾಗೆಡ್ ಅಡೆಂಗ್‌ದ್ ಇಪ್ಪೆದೆರ್! ಅದೆ ನಾಡ್ದ್ ಬತ್ತಿನಕುಲು ತಿಕ್ಕ್‌ದೇ ಬೂರೊಂದಿತ್ತೆರ್ (ಔಟ್ ಆವೊಂದಿತ್ತೆರ್)!
ಆ ಪೊರ್ತುಡು ಅಡ್ಡ ಕಲ್ಲ್ ತಾಗ್‌ದಾಯಿನ ಆ ಗಡಿತ ಗುರ್ತೊ ಇತ್ತೆಲಾ ಎನ್ನ ಕೋಲ್ಕಾರ್ (ಮೊರಂಪುದ ತಿರ್ತವು) ತೊಜಪಾವೊಂದುಂಡು!

ಕಿನ್ಯಡೇ ಪೋಕ್ರಿ ಕಿಟ್ಟೆ ಆದಿತ್ತಿನ ಎನನ್ ಬಡು ಪತ್ತ್‌ದೇ ನೋತೊಂದಿತ್ತೆರ್… ಅಪ್ಪ ಅಮ್ಮ ಅಕ್ಕನಕುಲು. ಯಾನ್ ತಿಕ್ಕುವೆನಾ…ಮೂಜಿ ಕಡಪ್ಪ ಲಾಗ್ಯೊಂದು ಅಗರ್‌ದ ಆ ಮೆಯಿಟ್ ಉಸುಲು ಬುಡೊಂದು ಸೇಂಕೊಂದು ಬಾಯಿ ನಿಲ್ಕೆ ತೆಲಿತೊಂದು ಇತ್ತಿನ ನೆಂಪು,
ಈ ಪೊರ್ತುಗುಲಾ ಮರಪೆರೆ ಆವಂದಿನ ತೊಟ್ಲ ತೂಂಕು.

‌(ಒಂಜಿ ಕೊಸಿ ಕುಸಾಲ್‌ ಎದುರ್ಕತೆ .
“ಅಡ್ಡ ಒರುಂಕುಡು ಬೂತೊ ಕಲ್ಕ್ಂಡ್ “. ಅವು ದಾದಾಂದ್ ಪರಾ ಮಂಡೆಲೆನ ಕೆಬಿ ಮೂಂಕುದುಲಾಯಿ ಪೊಗ್ಗುದಿಪ್ಪು!).
//
ಅಶೋಕ ಎನ್ ಕಡೇಶಿವಾಲಯ